Aoaoina i le Perisitua

Ou te faafetai ina ua tatou mafuta ma outou i lenei sauniga a le au perisitua a le Atua. E tele ni nofoaga eseese ua tatou tauaofia ai i le po nei ma tulaga e tele i la tatou auaunaga faaleperisitua. Ae ui i o tatou tulaga eseese uma lava, e i ai so tatou tulaga manaomia e laugatasia ai. O le aoaoina mai lea o tiute i le perisitua ma ia tatou tuputupu a’e i lo tatou mana e faatinoina ai.

A o o’u tiakono sa ou lagonaina malosi lena tulaga manaomia. Sa ou ola ae i se tamai paranesi o le Ekalesia i New Jersey, i le Talafatai i Sasae o le Iunaite Setete. Sa na o a’u le tiakono i le paranesi—e le faapea na o au sa auai ae e na o au lava sa i ai i faamaumauga. O lo’u uso matua, o Ted, e na o le pau lena o le aoao. O loo i ai o ia iinei i le po nei.

A o ou tiakono pea lava, sa siitia mai lo matou aiga i Iutā. O iina na ou maua ai ni mea matagofie se tolu sa i ai, e faatele’a’i ai lo’u tuputupu ae i le perisitua. Muamua, o se peresitene sa ia iloa nofo i lalo ma fono ma tagata o lana korama. O le lona lua, o le faatuatua tele ia Iesu Keriso na oo atu ai i se alofa sili ua tatou faalogo i ai—o le alofa o le tasi i le isi. Ma le lona tolu, o se talitonuga maumaututu sa lautagatasia ai, o lo matou faamoemoega atoa faaleperisitua o le galulue lea mo le faaolataga o tagata.

Sa le o le uarota na lelei ona faavae na faia ai le eseesega. O le mea sa i ai iina i lena uarota e mafai foi ona maua i soo se mea, i soo se iunite lava o le Ekalesia o loo e i ai.

O nei mea e tolu atonu na avea foi ma se vaega tele o ou aafiaga i le perisitua lea e te tau le matauina ai. Mo isi, atonu tou te le lagonaina le manaomia o le tuputupu ae, o lea atonu tou te tau le iloaina ai nei fesoasoaniga. Po o le a lava le itu, ou te tatalo ia fesoasoani mai le Agaga ia te a’u ia faamanino atu ma faatosina atu ia te outou.

O lo’u faamoemoega ua ou tautala atu ai i nei fesoasoaniga e tolu mo le tuputupu ae i le perisitua, ia uunaia ai outou e faataua ma faaaogaina. Afai o le a outou faia, o le a suia a outou auaunaga mo le lelei sili atu. Ma, afai e faalauteleina, o le a faamanuiaina e a outou auaunaga faaleperisitua ia fanau a le Tama Faalelagi e sili atu nai lo le mea ua e manatu e te mafaia i le taimi nei.

Sa ou mauaina le fesoasoaniga muamua ina ua faafeiloaia au i se korama a ositaulaga lea sa peresitene ai le epikopo. Atonu o se mea itiiti lena ia te outou ae na ou maua ai se lagona o le mana i le perisitua lea na suia ai la’u auaunaga i le perisitua talu mai lena taimi. Sa amata i le ala sa ia taitaia ai i matou.

Na foliga mai ia te a’u, sa ia faia manatu faaalia o ositaulaga talavou e pei lava o i matou o tagata na sili ona popoto i le lalolagi. Sa faatalitali o ia seia uma ona saunoa uma i latou o le a saunoa. Sa ia faalogo. Ma a filifili o ia i le mea e tatau ona fai, na foliga mai ia te au na faamautu mai e le Agaga ia faaiuga ia te i matou faapea foi ma ia.

Ua ou iloa nei sa ou lagonaina le uiga o le mau lea e faapea mai, o le peresitene e fono faatasi ma sui o lana korama.¹ Ma o tausaga mulimuli ane, a o avea a’u ma epikopo faatasi ma la’u korama o ositaulaga, sa aoaoina uma ai i latou ma a’u foi i le mea sa ou aoaoina a o avea au ma se ositaulaga talavou.

O le luasefulu tausaga mulimuli ane, ao avea a’u ma se epikopo, na ou maua ai le avanoa e vaaia ai le aoga o se aufono, sa le na o totonu o falelotu, ae faapena foi i luga o mauga. I se gaoioiga i le Aso Toonai, na se ai i le vao i le po se tasi o le matou korama. O le mea na matou iloaina, sa tuua na o ia ma sa leai ni ona ofu mafanafana, meaai, po o se malutaga. Sa matou sueina o ia, ae sa le faamanuiaina.

O le mea ou te manatua, sa matou tatalo faatasi ona tofu faaali manatu lea o tagata taitasi. Sa ou faalogologo ma le toto’a ma sa foliga mai ia te a’u, sa faapena foi i latou. Ina ua mavae se taimi, sa faapea ona oo mai se lagona o le toafilemu i o matou luga. Sa ou lagonaina sa saogalemu ma malu i se mea, ia le sui o le matou korama lea sa leiloa.

Sa manino mai ia te au le mea na tatau ona fai e le korama, ma le mea e le tatau ona faia. Ina ua faamatala e tagata na mauaina o ia le nofoaga o le togavao sa alu i ai o ia mo le saogalemu, sa ou lagonaina na ou iloa. Ae o le vavega ia te a’u o le vaaia lea o le mana o le faatuatua ia Iesu Keriso o se aufono lotogatasi o le perisitua na aumai ai faaaliga i le tagata na i ai ki o le perisitua. Sa matou tuputupu ae uma i lena aso i le mana o le perisitua.

O le ki lona lua e faateleina ai le aoaoina o le i ai lea o le alofa o le tasi mo le isi lea e maua mai i le faatuatua maoae. Ou te le mautinoa po o le fea e muamua, ae o ia mea uma e foliga mai e i ai lava iina i soo se taimi e i ai ni aoaoga se tele ma le vave i le perisitua. Sa aoao mai e Iosefa Samita lena tulaga ia i tatou e ala i faataitaiga.

I le popofou o le Ekalesia i lenei tisipenisione, sa ia maua ai se poloaiga mai le Atua e atiina ae le malosi i le perisitua. Sa poloaiina o ia e faatutu ni aoga mo i latou e umia le perisitua. Sa faataatia mai e le Alii ia tulaga e manaomia, ia i ai le alofa mo le tasi ma le isi ia i latou o le a aoao atu ma aoaoina. O fetalaiga nei a le Alii e uiga i le faatuina o se nofoaga e aoao ai le perisitua ma le tulaga e i ai i latou o e aoaoina ai:

“Ia outou faatulagaina; … ma faatuina se fale … o le aoaoga, … o se fale o le tulaga maopoopo atoatoa. …

“Ia tofia mai ia te outou lava le faiaoga, ma aua nei failauga uma faatasi; a ia tuuina atu i tagata taitoatasi e lauga ma ia faalogo uma i ana upu, ina ia faamalamalamaina uma i lauga a tagata uma, ina ia tutusa le avanoa i tagata uma.”²

Ua faamatalaina e le Alii le mea ua uma ona tatou vaaia, o le malosi o se aufono po o se vasega o le perisitua e aumai ai faaaliga e ala i le Agaga. O faaaliga e na o le pau lea o le ala e mafai ona tatou iloa ai o Iesu o le Keriso. O lena faatuatua o le vaega muamua lea o le apefa’i tatou te feaei ai e aoao mataupu faavae o le talalelei.

I le vaega e 88 o le Mataupu Faavae ma Feagaiga, i fuaiupu e 123 ma le 124, ua faamamafa mai ai e le Alii le alofa o le tasi i le isi ma aua le saili masei le tasi i le isi. Na maua e tagata taitasi le avanoa e ulufale ai i le aoga perisitua na faatuina e le Alii e ala i le osifeagaiga i le siilima ia avea “o se uo ma se uso … i fusi o le alofa.”³

Tatou te le o toe mulimuli la i lena faiga i aso nei, ae o soo se mea lava ou te vaaia ai le matagofie o le aoaoina i le perisitua, e i ai foi na fusi o le alofa. Sa ou vaai i ai o se mafuaaga ma se taunuuga o le aoaoina o upumoni o le talalelei. O le alofa e valaaulia ai le Agaga Paia e mafuta mai e faamautu ai se upumoni. Ma o le olioli i le aoaoina o upumoni paia e fatuina ai le alofa i loto o tagata o e auai faatasi i le aafiaga o le aoaoina.

E faapena foi ona moni lona faafeagai. O le feteenai po o le felotoleagaa’i e taofia ai le mafai e le Agaga Paia ona aoao i tatou ma taofia ai foi i tatou mai le mauaina o le malamalama ma le upumoni. Ma o lagona o le le fiafia lea e masani lava ona oo mai ai, o fua ia o le feteenai atili ma le saili masei ia i latou o e sa faamoemoeina se aafiaga aoaoina lea sa le’i oo mai.

O e umia le perisitua e aoao lelei faatasi, o taimi uma lava e foliga mai ai ia te a’u, o loo i ai ni tagata faatupu filemu maoae ia i latou. E te vaaia tagata faatupu filemu i vasega perisitua ma i aufono. O le meaalofa lea e fesoasoani ai i tagata ia maua ni tulaga e laugatasia ai pe a latou vaaia ni eseesega. O le meaalofa lea e fesoasoani ai i tagata e iloa atu ai se mea na ta’ua e se tasi tagata, o se saofaga ae le o se faasa’oga.

A lava ma totoe le alofa moni o Keriso ma se manao ia avea ma e faatupu filemu, o le a maua le lotogatasi i aufono ma vasega. E manaomia ai le onosai ma le lotomaulalo, ae ua ou vaai o tupu, e tusa lava pe faigata faafitauli ma matuai eseese mea e o mai ai tagata o le aufono po o le vasega.

E mafai ona ausia tulaga maualuluga ua faataatitia mai e le Alii mo e umia le perisitua i le faiga o faaiuga i korama. E mafai pe a i ai le faatuatua tele ma le alofa ma le leai o ni finauga. O le mea lenei e manaomia e le Alii mo Lona faamautuina o a tatou faaiuga: “O tonu uma foi e faia e se tasi o nei korama e ao lava ina faia i lona finagalo autasi; o lona uiga, o sui taitasi mai ia korama, e ao ina malilie i ana tonu, ina ia ogatasi a laua tonu o le tasi i le tasi, i le mana po o le aogā.”⁴

O le fesoasoaniga lona tolu i le aoaoina i le perisitua e oo mai ma se tautinoga paia, e uiga i le mafuaaga e faamanuia ma faatuatuaina ai e le Alii i tatou e umia ma faaaoga Lana perisitua. O le galulue lea mo le faaolataga o tagata. O lenei tautinoga laugatasia e aumai ai le lotogatasi i korama. E mafai ona tatou amata aoao e uiga i lenei mea mai le tala faatusipaia i le auala na saunia ai i tatou o atalii agaga ae tatou te le’i fananau mai mo lena faamamaluga e seāseā maua, o le umiaina o le perisitua.

Na fetalai le Alii e uiga ia i latou ua tuuina mai i ai le faatuatuaga tele o le perisitua i lenei olaga e faapea, “E oo lava foi i le taimi a o lei fananau mai i latou, sa aoaoina i latou, faapea foi ma le toatele o isi tagata, i a latou uluai lesona i le lalolagi o agaga ma sa saunia e o mai i le aso tatau a le Alii e galulue i lona tovine mo le faaolataga o agaga o tagata.”⁵

Tatou te fefaasoaai i le perisitua le tiute paia o le galulue mo agaga o tagata. E tatau ona tatou faia ni mea e sili atu nai lo le na ona iloa o lo tatou tiute lenei. E tatau ona goto ifo i o tatou loto, ina ia le mafai e le tele o mea e manaomia e a tatou taumafaiga i lo tatou talavou po o tofotofoga lea e oo mai faatasi ma lo tatou matutua, ona aveese i tatou mai lena faamoemoega.

E le’i leva atu se taimi sa ou asiasi atu ai i se faitaulaga sili i lona fale. Ua le toe mafai ona oo mai o ia i a matou sauniga faale-korama. E nofo na o ia. Ua maliu lona faletua lalelei ma o lana fanau e mamao foi le mea e nonofo ai. O le taimi ma le gasegase na faatapulaa ai lona gafatia ona auauna atu. O loo siisii uamea mamafa lava o ia ina ia faatumauina ai se mea e mafai ona ia faatumauina o lona malosi.

Ina ua ou savali atu i totonu o lona fale, sa tula’i mai o ia i lona tootoo e faafeiloai a’u. Sa ia valaaulia a’u ou te saofai i se nofoa i ona tafatafa. Sa ma talatalanoa i a matou fegalegaleaiga fiafia i le perisitua.

Ona ia faapea mai lea ma le naunautai tele: “Aisea ua ou saga ola ai lava? Aisea ua ou saga i ai pea iinei? Ua le mafai ona ou faia se mea.”

Sa ou ta’u atu ia te ia o loo ia faia se mea mo a’u. O loo ia siitia a’u i lona faatuatua ma lona alofa. Na oo lava foi i le ma feiloaiga puupuu, o ia na ou manao ai ia ou lelei atili atu. O lana faataitaiga o le naunautai e fai se mea e tauaogaina na musuia ai au ia ou taumafai malosi atu e auauna atu i isi ma le Alii.

Ae mai le foliga faanoanoa o lona leo ma lana vaai, na ou lagonaina ai ou te le’i taliina ana fesili. Sa mafaufau lava pea o ia pe aisea ua faaola ai lava ia e le Atua ma le tele o ona tapulaa e mafai ai ona auauna atu.

I lona agalelei masani sa ia faafetai mai ai ia te a’u mo lo’u oo atu e vaai o ia. A o ou tulai ou te aluese mai, sa savali mai i se isi potu le tamaitai tausi soifua lea e sau i lona fale mo ni nai itula i aso uma. I le taimi o le ma talanoaga, sa ia faamatala laitiiti mai ai e uiga i le tamaitai tausi soifua. Sa ia fai mai o ia o se tamaitai lelei tele. O le tele o lona olaga sa mafuta ai i tagata o le Au Paia o Aso e Gata Ai, ae sa lei avea lava o ia ma se tagata o le ekalesia.

Sa savali mai e faasino mai ia te a’u le faitotoa. Sa tusi atu o ia i le tamaitai ma fai mai ma se ataata, “Vaai, e leai se mea e mafai ona ou faia. Sa ou taumafai ia papatiso o ia i le Ekalesia, ae e le o aoga lava.” Sa ataata mai le tamaitai ia i maua. Sa ou savali i fafo ma agai atu i lo’u fale e lata ane.

Sa ou iloaina i le taimi lena, ua leva ona totoina i lona loto ia tali i ana fesili. O lena faitaulaga sili lototele sa taumafai e fai lona tiute na aoaoina ai o ia e ala i le tele o ona tausaga i le perisitua.

Sa ia iloaina na pau lava le ala e mafai ai e lena tamaitai talavou ona maua faamanuiaga o le faaolataga e ala i le talalelei a Iesu Keriso, o le osifeagaiga lea i le papatisoga. Sa aoaoina o ia e tusa ai ma feagaiga e peresitene uma o korama uma mai le tiakono e oo i le faitaulaga sili.

Sa ia manatua ma lagonaina lana lava tautoga ma le feagaiga o le perisitua. Sa ia tausia pea lava.

O ia o se molimau ma se faifeautalai mo le Faaola, po o fea lava e agai i ai lona soifuaga. Ua uma lava ona i ai i lona loto. O le faanaunauga o lona loto ia mafai ona suia le loto o le tamaitai tausi soifua e ala i le Togiola a Iesu Keriso ma e ala i le tausia o feagaiga paia.

O le a fai si puupuu o lona taimi i le a’oga o le perisitua i lenei olaga e faatusa atu i le faavavau. Ae e oo lava foi i lena taimi puupuu ua ia iloaina lelei ai lava mataupu aoaoina o le faavavau. O le a ia tauaveina, po o fea lava o le a valaau i ai le Alii, ia lesona o le perisitua e faavavau lona aoga.

E le gata ina tatau ona e naunau e aoao au lesona o le perisitua i lenei olaga, ae e tatau foi ona e faamoemoe i mea e mafai ona fai. E toaitiiti i tatou atonu e faatapulaaina i o tatou mafaufau ia avanoa e aoao ai mea ua faatulagaina e le Alii mo i tatou i Lana galuega.

Sa tuua e se tasi alii talavou lona nuu laitiiti i Uelese i le amataga o le 1840, sa ia faalogo i aposetolo a le Atua, ma sau ai i le malo o le Atua i le lalolagi. Sa malaga mai o ia ma le Au Paia i Amerika ma toso atu se taavaletosolima i sisifo i fanua valevalenoa. Sa i ai o ia i le vaega na sosoo mai ina ua muai taunuu mai Polika Iaga i lenei vanu. O lana auaunaga faale-perisitua na aofia ai le faato’aina ma le tāina o se fanua mo se faatoaga.

Sa ia faatauina atu le faatoaga mo se tau itiiti tele ina ia alu ai i se misiona mo le Alii i le toafa e vaai mamoe. Sa valaauina o ia mai lena misiona i se isi misiona e sopoia ai vasa i le nuu tonu lava na ia tuua i lona mativa, ina ia mulimuli atu i le Alii.

O ia mea uma sa ia maua ai se ala e aoao ai faatasi ma le usoga perisitua. Sa avea o ia ma se faifeautalai lototoa, sa ia uia auala o Uelese e tau atu i le maota o se tagata sa avea faafa ma palemia o Egelani, e ofo atu ia te ia le talalelei a Iesu Keriso.

Sa faatagaina o ia e lenei tamalii maoae, i totonu o lona maota. Sa faauu mai o ia i le Kolisi o Eton ma le Inivesite o Oxford. Sa la talanoa ma le faifeautalai i le afuaga o le tagata, le tiute tutotonu o Iesu Keriso i le talafaasolopito o le lalolagi, faapea foi ma le taunuuga o malo.

I le faaiuga o le la feiloaiga, sa teena ai e le tamalii lea le talosaga e talia le papatisoga. Ae a o la faamavae, sa fesili atu ai lena taitai o se tasi o autau malosi o le lalolagi i le faifeautalai faatauvaa: “O fea na e a’oga ai?” O lana tali: “I le perisitua a le Atua.”

Atonu na i ai se taimi sa e mafaufau ai i le lelei atu o lou olaga pe ana mafai ona faatagaina oe e te a’oga i se a’oga. Ou te tatalo ia outou iloa le tele o le alofa o le Atua mo oe ma le avanoa ua Ia tuuina atu e te ulufale ai i Lana aoga o le perisitua.

Afai o le a e maelega ma usiusitai i le perisitua, o le a liligi atu i ou luga oa o le poto faaleagaga. O le a e tuputupu ae i lou malosi e tetee ai le tiapolo ma folafola atu le upumoni lea e tau atu ai i le faaolataga. O le a e maua le olioli i le fiafia o isi e te taitaiina atu i le faaeaga. O le a avea lou aiga o se nofoaga o le aoaoga.

Ou te molimau atu ua toefuataiina mai ki o le perisitua. O Peresitene Thomas S. Monson o loo umia ma faaaogaina na ki. O loo soifua le Atua ma [Na te] silafia lelei oe. O loo soifua Iesu Keriso. Sa filifilia oe mo le mamalu o le umiaina o le perisitua. I le suafa o Iesu Keriso, amene.