Haapiiraa i roto i te Autahu‘araa

Te mauruuru nei au i to’u taeraa mai i rotopu ia outou i teie rururaa a te autahu‘araa a te Atua na te ao taatoa nei. Tei roto tatou i te mau vahi rau i teie pô e i roto i te mau tufaa e rave rahi no ta tatou taviniraa i roto i te autahu‘araa. Noa’tu râ te rau o to tatou huru oraraa te vai nei te hoê hinaaro amui i roto ia tatou. O te haapiiraa ïa i ta tatou mau ohipa i roto i te autahu‘araa e te haereraa i mua i roto i to tatou mana no te rave i te reira.

Ei diakono ua ite puai au i taua hinaaro ra. Ua ora vau i roto i te hoê amaa iti no te Ekalesia i New Jersey, i te pae hitiaa o te râ o te fenua Marite. O vau ana‘e te diakono i roto i te amaa—eiaha o te tae noa mai, o te taata ana‘e râ i ni‘a i te tapura. O to’u tuaana, Ted, ana‘e te haapii. Tei ô nei oia i teie pô.

A vai diakono noa’i au, ua fanuu to’u utuafare i Utaha. I reira, ua ite au e toru na mea faahiahia e vai ra no te haavitiviti i to’u tupuraa i roto i te autahu‘araa. Te mea matamua o te hoê ïa peresideni tei ite nahea i te parahi i roto i te apooraa i piha‘iho i te mau melo o ta’na pŭpŭ autahu‘araa. Te piti o te faaroo rahi ïa ia Iesu Mesia tei arata‘i i te here rahi o ta tatou i faaroo iho nei te—here no te tahi e te tahi. E te toru o te hoê ïa iteraa papû tei faaitehia e te tumu rahi no te autahu‘araa o te haaraa ïa no te faaoraraa i te taata.

E ere na te paroita tei haamau-maitai-hia i faatupu i te huru-ê-raa. Te mea e vai ra i reira te vai atoa ra ia i te mau paroita atoa o te Ekalesia tei reira outou.

Ua vai na paha teie na mea e toru i roto i ta outou mau pŭpŭ e aita outou i ite i te reira. No vetahi aita paha outou e ite i te hinaaro ia haere i mua no reira aita ia outou e hinaaro i teie nei mau tautururaa. Noa’tu eaha te mea ta outou i ite, te pure nei au ia tauturu mai te Varua ia’u ia haamaramarama atu ia outou e ia anaanatae outou i teie na mea e toru.

Te tumu e paraparau atu ai au no ni‘a i teie na tauturu e toru no te tupu i roto i te autahu‘araa no te tura‘i ia outou ia haafaufaa e ia faaohipa i te reira. Ia na reira outou, e maitai atu ïa ta outou taviniraa. E, mai te mea e faarahihia te reira, e haamaitai ïa ta outou taviniraa autahu‘araa i te mau tamarii a te Metua i te Ao ra hau atu i ta outou i mana‘o i teie nei e e nehenehe.

Ua ite au i te tautururaa matamua a fariihia ai au i roto i te hoê pŭpŭ tahu‘a, e te episekopo to matou peresideni. E ohipa ha‘iha‘i paha te reira na outou ua horo‘a mai râ te reira ia’u i te hoê auraa no te mana i roto i te autahu‘araa tei taui i ta’u huru taviniraa i roto i te autahu‘araa mai taua taime ra. Ua haamata te reira na roto i ta’na huru arata‘iraa ia matou.

E au ra ia’u, ua faariro oia i te mau mana‘o o te mau tahu‘a apî mai te mea ra e mau taata paari ratou i te ao nei. Ua tia‘i oia e ia parau mai te feia atoa e hinaaro ia parau. Ua faaroo oia. E ia faaoti ana‘e oia i te mea e ti‘a ia ravehia, e au ra ia’u e ua haapapû mai te Varua ia matou e ia’na te mau faaotiraa.

Ua ite au i teie nei i te auraa o te papa‘iraa mo‘a tei parau e e parahi te peresideni i roto i te apooraa i piha‘iho i te mau melo o ta’na pŭpŭ autahu‘araa.¹ E e rave rahi mau matahiti i muri mai a riro ai au e episekopo i piha‘iho i ta’u mau pŭpŭ tahu‘a ua haapiihia vau e ratou i te mea ta’u i haapii mai ei tahu‘a apî.

E piti ahuru matahiti i muri mai, ei episekopo, ua ite au i te tereraa maitai o te hoê apooraa, e ere noa i te fare pureraa, i roto atoa râ i te mau mou‘a. I roto i te hoê faaoaoaraa i te mahana maa ua mo‘e te hoê melo no ta matou pŭpŭ autahu‘araa i roto i te uru raau i te pô taatoa. Ua ite matou e o oia ana‘e e aita ho’i to’na e ahu mahanahana, e maa aore râ e fare faaearaa. Ua imi matou ia’na ma te manuïa ore.

Te haamana‘o nei au e ua pure amui matou e ua paraparau mai te mau melo tata‘itahi. Ua faaroo maitai au e e au ra ia’u ua na reira atoa ratou. I te tahi taime i muri mai, ua tae mai te mana‘o hau i ni‘a ia matou. Ua ite au e tei te vahi papû e te maro to matou melo tei mo‘e.

Ua maramarama ia’u eaha te mea e ti‘a i te pŭpŭ ia rave e te mea eita e ti‘a ia rave. A faaite mai ai te feia tei ite mai ia’na i te vahi i roto i te uru raau i reira to’na haereraa’tu no te paruru ia’na ua mana‘o vau e ua ite au i te vahi. Te semeio rahi no’u o te iteraa ïa i te mana o te faaroo ia Iesu Mesia a te hoê apooraa autahu‘araa tahoê tei afa‘i mai i te heheuraa i te taata e te mau taviri no te autahu‘araa. Ua tupu paatoa matou i taua mahana ra i roto i te mana no te autahu‘araa.

Te piti o te taviri no te faarahi i te haapiiraa o te fariiraa ïa i te here no te tahi e te tahi o te tae mai na roto i te faaroo rahi. Aita vau i papû eaha te tae matamua mai e au ra tei reira te faaroo e te here toopiti atoa ra i te mau taime atoa e hinaarohia te haapiiraa rahi e te vitiviti i roto i te autahu‘araa. Ua haapii mai o Iosepha Semita i te reira ia tatou na roto i te hoho‘a maitai.

I te mau mahana matamua o te Ekalesia i roto i teie tau tuuraa evanelia, ua farii oia i te hoê faaueraa a te Atua ia patu i te puai i roto i te autahu‘araa. Ua titauhia ia’na ia haamau i te mau fare haapiiraa na te mau taea‘e tei mau i te autahu‘araa. Ua haamau te Fatu i te titauraa e ia vai mai te here no te tahi e te tahi i rotopu i te feia o te haapii e o te haapiihia. Teie te mau parau a te Fatu no ni‘a i te faatupuraa i te hoê vahi no te haapiiraa i te autahu‘araa e te huru no te feia e haere e haapii i reira:

« A haamau na ia outou iho … a haamau i te hoê fare … no te haapiiraa, e fare no te haapa‘o…

« A faataa na outou i te hoê orometua no rotopu ia outou iho, eiaha te paatoaraa ia parau mai i te taime hoê ra ; a tuu râ i te hoê ia parau mai i te taime hoê ra e ia faaroo ho’i te paatoaraa i ta’na ra mau parau, ia oti te mau taata atoa i te parau mai ra ua haamaitaihia ïa te paatoaraa te tahi i te tahi, e ia faito te ti‘araa o te mau taata atoa te tahi i te tahi ».²

Te faaite ra te Fatu i te mea ta tatou i ite a‘e na oia ho’i te puai o te hoê apooraa autahu‘araa aore râ piha haapiiraa no te faahaere mai i te heheuraa na roto i te Varua. Te heheuraa o te hoê ana‘e ïa rave‘a e nehenehe ai ia tatou ia ite e o Iesu te Mesia. Taua faaroo ra o te taahiraa matamua ïa i ni‘a i te e‘a ta tatou e pa‘uma no te haapii i te mau ture no te evanelia.

I roto i te tufaa 88 no te Parau Haapiiraa e te Parau Fafau i roto i te mau irava 123 e124 ua haapapû te Fatu i te parau no te here te tahi i te tahi e te haapaeraa i te faahapa te tahi i te tahi. Ua noaa i te taata tata‘itahi ia tomo atu i roto i te fare haapiiraa autahu‘araa tei haamauhia e te Fatu na roto i te raveraa i te hoê fafauraa ma te afa‘i i te rima i ni‘a ia riro « e hoê hoa e taea‘e … i roto i te mau ruuruuraa o te here ».³

Aita tatou e pee i taua peu ra i teie mahana area râ i te mau vahi atoa ua ite au i te reira ei tumu e ei hotu no te haapiiraa mai i te mau parau mau no te evanelia. E ani te Fatu i te Varua Maitai ia parahi mai no te haapapû i te parau mau. E na te oaoa i te haapiiraa mai i te mau parau mau no te evanelia e faatupu i te here i roto i te aau o te taata o te faaite i ta ratou ohipa no te haapiiraa.

Mai te reira atoa i te tahi atu pae. E faataupupu te mărôraa aore râ te pohehaeraa i te aravihi o te Varua Maitai ia haapii ia tatou e no tatou ia farii i te maramarama e te parau mau. E i roto i te mau mana‘o mauruuru ore o te tupu mai o te mau huero ïa no te amahamaha e te faahaparaa i rotopu i te feia tei tia‘i i te hoê haapiiraa tei ore i fariihia e ratou.

E au ra ia’u e te vai ra i rotopu i te feia tei mau i te autahu‘araa o te haapii amui maitai te feia faatupu hau. E ite outou i te reira i roto i te mau piha haapiiraa a te autahu‘araa e i roto i te mau apooraa. O te horo‘araa ïa no te tauturu i te feia ia imi i te mea ta ratou e fana‘o amui nei ia ite ana‘e ratou i te mau taa-ê-raa. O te horo‘araa ïa no te tauturu i te mau taata ia ite i roto i te mea ta te hoê taata i parau mai te hoê tautururaa eiaha râ mai te hoê faahaparaa.

Ia nava‘i te hinaaro mau o te Mesia e te hoê hinaaro ia riro ei feia faatupu hau, e noaa ïa te hoêraa i roto i te apooraa e te mau piha haapiiraa. E titauhia te faaoroma‘i e te haehaa, ua ite râ vau i te tupuraa noa’tu e mea fifi te mau tumu parau e no roto mai ho’i te mau taata o te apooraa aore râ o te mau piha haapiiraa i te mau huru oraraa atoa.

E nehenehe ia faatupu i te faito teitei tei haamauhia e te Fatu na te mau taata tei mau i te autahu‘araa i roto i te mau faaotiraa a te mau pŭpŭ autahu‘araa. E nehenehe te reira ia ravehia ia rahi ana‘e te faaroo e te here e aita ana‘e e mărôraa. Teie te titauraa a te Fatu no Ta’na fariiraa i ta tatou mau faaotiraa : « E te mau feruriraa ohipa atoa o te faaotihia e te hoê o teie na pŭpa ra ia ravehia na roto i te tahoêraa i te reo o te paatoaraa no taua pŭpŭ ra e tia’i, oia ho’i ia tahoê mau te mana‘o no te mau melo atoa e teie na pŭpŭ tata‘itahi i to te reira pŭpŭ mau faaotiraa, ia faafaitohia te mana e te ti‘araa o ta ratou mau faaotiraa te tahi i te tahi ra ».⁴

Te toru o te tauturu no te haapiiraa i roto i te autahu‘araa no roto mai ïa i te hoê faaiteraa papû no teaha te Fatu e haamaitai ai e e ti‘aturi ai ia tatou no te mau e no te faaohipa i Ta’na autahu‘araa. No te haa ïa no te faaoraraa i te taata nei. E afa‘i mai teie faaiteraa papû i te hoêraa i roto i te mau pŭpŭ autahu‘araa. E nehenehe ta tatou e haamata i te haapii mai i te reira na roto i te aamu varua e nahea tatou te mau tamaroa varua i faaineinehia’i hou te fanauraa no taua tura varavara ra ia mau i te autahu‘araa.

Teie ta te Fatu i parau no te feia tei horo‘ahia te ti‘aturiraa rahi no te autahu‘araa i roto i teie nei oraraa : « E na mua‘e i to ratou fanau-raa-hia, ua farii ratou, e e rave rahi atu â, i ta ratou mau haapiiraa matamua i roto i te ao o te mau varua e ua faaineinehia ratou no te haere mai i te tau o te Fatu no te rave i te ohipa i roto i Ta’na ra ô vine no te faaoraraa i te mau varua o te taata nei ».⁵

I roto i te autahu‘araa te amo nei tatou i te hopoi‘a mo‘a no te haa no te mau varua o te taata. E ti‘a ia tatou ia rave eiaha noa ia haapii e teie ta tatou ohipa. E ti‘a ia faahaerehia te reira i roto i te hohonuraa o to tatou aau e e ore roa te mau aniraa i ni‘a i ta tatou mau tutavaraa i to tatou apîraa ra aore râ te mau tamataraa e tae mai na roto i te faito matahiti e nehenehe e haafariu ê atu ia tatou i taua tumu ra.

Aita i maoro a‘e nei ua haere atu vau e farerei i te hoê tahu‘a rahi i to’na ra fare. Eita e nehenehe faahou ia’na ia haere mai i te mau rururaa a ta matou pŭpŭ autahu‘araa. Te ora nei oia ana‘e, ua pohe ta’na vahine nehenehe e te ora nei ta’na mau tamarii i te atea ia’na. No te matahiti paari e te ma‘i aita’tura oia e nehenehe faahou i te tavini maitai. Te amo noa ra oia i te tapau auri no te tape‘a i to’na puai tino tei oaoahia e ana na mua’tu.

I to’u tomoraa’tu i roto i to’na fare, te ti‘a noa mai ra oia e ta’na turu tootoo no te farii mai ia’u. Ua ani oia ia’u ia parahi i ni‘a i te hoê parahi fatata’tu ia’na. Ua paraparau maua i to maua mau auraa oaoa i roto i te autahu‘araa.

I reira ma te reo puai ua parau maira oia ia’u : « No teaha vau e ora noa ai ? No teaha tei ô nei noa â vau ? Aita e nehenehe ta’u e rave i te tahi mea ».

Ua parau atu vau ia’na e te rave nei oia i te tahi mea no’u. Te faateitei nei oia ia’u na roto i to’na faaroo e to’na here. Noa’tu te poto o ta maua farereiraa ua faatupu oia i roto ia’u te hinaaro ia maitai atu â. Ua faauru to’na hoho‘a no te faaotiraa i te rave i te tahi mea faufaa rahi ia’u ia tamata puai atu no te tavini ia vetahi ê e i te Fatu.

Ua nehenehe ia’u ia ite na roto i te toparaa oto o to’na reo e te hi‘oraa i roto i to’na na mata e aita vau i pahono i ta’na mau uiraa. Te ui noa ra oia no teaha ra te Atua e vaiiho ai ia’na ia ora noa e taua mau faataupupuraa i ni‘a i to’na aravihi no te tavini.

Ua haamauruuru mai oia ia’u mai ta’na i matau i te rave no to’u haereraa mai e farerei ia’na. A ti‘a’i au no te haere ua tomo mai te tuati vahine o te haere mai i to’na fare tau hora i te mau mahana atoa mai roto mai i te tahi atu piha. I roto i ta maua tau’araa parau o maua ana‘e ua parau rii mai teie taea’e ia’u no’na. Ua parau oia e mea faahiahia roa teie tuati. Ua ora na teie vahine i rotopu i te feia mo‘a i te mau mahana hopea nei te rahiraa o to’na oraraa e aita â oia i riro atu ra ei melo.

Ua haere maira te tuati vahine no te arata‘i ia’u i te opani. Ua faatoro a‘e ra oia ia’na e parau maira ma te ataata, « ua ite oe, e au ra aita e nehenehe ia’u ia rave i te tahi mea. Ua tamata noa na vau e ia bapetizohia oia i roto i te Ekalesia e aita te reira i tupu ». Ua ata maira oia ia’na e ia’u nei. Ua haere atu vau i rapae e ua ho’i atu ra vau i to’u fare.

I reira to’u iteraa e ua tanu-a’e-na-hia te mau pahonoraa i ta’na mau uiraa e mea maoro i teie nei i roto i to’na aau. Ua tamata na taua tahu‘a rahi itoito ra i te rave i ta’na ohipa tei haapiihia ia’na e rave rahi mau matahiti i roto i te autahu‘araa.

Ua ite oia e te hoê ana‘e rave‘a e farii ai taua tamahine apî ra i te haamaitairaa no te faaoraraa na roto i te evanelia a Iesu Mesia o te raveraa ïa i te hoê fafauraa na roto i te bapetizoraa. Ua haapiihia oia mai te au i te mau fafauraa e te mau peresideni atoa no te mau pǔpǔ autahu‘araa mai te mau diakono e tae atu i te mau tahu‘a rahi.

Ua haamana‘o oia e ua ite oia i ta’na iho a‘oraa e fafauraa i roto i te autahu‘araa. Te haapa‘o noa ra oia i te reira.

E ite e e misionare oia no te Faaora i te mau vahi atoa e afa‘i te oraraa ia’na. Tei roto a‘e na te reira i to’na aau. Te hinaaro o to’na aau e ia nehenehe ïa te aau o teie tuati vahine ia tauihia na roto i te Taraehara a Iesu Mesia e na roto i te haapa‘oraa i te mau fafauraa mo‘a.

E mea poto roa to’na taime i roto i te fare haapiiraa a te autahu‘araa i roto i teie nei oraraa ia faaauhia i te ora mure ore. I roto râ i taua taime poto ra ua noaa ia’na te mau haapiiraa mure ore. E afa‘i ïa oia na muri ia’na, i te mau vahi atoa e pii te Fatu ia’na, te mau haapiiraa autahu‘araa e te faufaa mure ore.

Aita i ti‘a noa ia outou ia anaanatae i te haapii i ta outou mau haapiiraa autahu‘araa i roto i teie oraraa e ti‘a atoa râ ia outou ia mana‘o maitai i te mau mea e nehenehe ia rave. E ta‘oti‘a paha te tahi o tatou i roto i to tatou mau mana‘o, ta tatou mau rave‘a no te haapii i te mea ta te Fatu e horo‘a mai na tatou i roto i Ta’na taviniraa.

Ua faaru‘e atu te hoê taure‘are‘a i to’na oire iti i te fenua Peretane (Galles), ua faaroo i te mau aposetolo a te Atua, e ua tomo mai i roto i te basileia a te Atua i te fenua nei. Ua fano atu oia na muri i te feia mo‘a i Amerika e ua faahoro i te hoê pereoo i te tooa o te râ na roto i te mau afaa. No roto oia i muri mai i te pŭpŭ a Brigham Young tei haere mai i muri iho i roto i taua afaa ra. Tei roto i ta’na taviniraa autahu‘araa te tamâraa e te faaineineraa i te fenua no te faaapu.

Ua hoo oia i te faaapu no te hoê tino moni iti roa no te haere i te hoê misioni na te Fatu i roto i te medebara no te haapa‘o i te mau mamoe. Ua piihia oia mai taua vahi ra no te hoê misioni na ni‘a i te moana no te haere i roto i taua iho oire iti ta’na i faaru‘e i roto i to’na vêvêraa no te pee atu i te Fatu.

Ua ite oia na roto i teie mau mea atoa te hoê rave‘a no te haapii i piha‘iho i te mau taea‘e no te autahu‘araa. E misionare mata‘u ore, ua haere atu oia na ni‘a i te purumu i Wales i te fare faafaaearaa no te tau ve‘ave‘a a te hoê taata tei riro e maha taime e faaterehau nui no te fenua Peretane no te pûpû atu ia’na te evanelia a Iesu Mesia.

Ua vaiiho te taata tuiroo ia’na ia tomo atu i roto i to’na aorai. E parau tu‘ite ta teie taata na te Fare Haapiiraa Teitei no Eton i Oxford. Ua paraparau te misionare ia’na no ni‘a i te haamataraa o te taata, te ohipa tumu a Iesu Mesia i roto i te aai o te ao nei, e tae noa’tu i te huru hopea o te mau fenua.

I te hopea o to raua farereiraa, aita te taata no te fare i farii i te aniraa a teie misionare ia bapetizo ia’na. A taa ê ai raua ua ui taua faatere ra no te hoê o te mau hau emepera rahi o te ao nei i teie misionare haehaa : « I hea to oe haereraa i te haapiiraa ? » Ta’na pahonoraa : « I roto i te autahu‘araa a te Atua ».

Ua mana‘o paha outou i te hoê taime eaha ra ïa te maitai o to outou oraraa ahani noa ua fariihia outou i roto i te tahi fare haapiiraa no te haapii mai. Te pure nei au e e ite ïa outou i te faahiahia o te here o te Atua no outou e te rave‘a Ta’na i horo‘a ia outou no te tomo atu i roto i Ta’na fare haapiiraa.

Mai te mea e itoito e e haapa‘o outou i roto i te autahu‘araa, e niniihia mai ïa te mau tao‘a rahi no te ite varua i ni‘a ia outou. E tupu ïa outou i roto i to outou mana i te pato‘i i te ino e i te poro i te parau mau o te arata‘i atu i te faaoraraa. E ite ïa outou i te poupou i roto i te oaoaraa o te feia ta outou i arata‘i atu i te faateiteiraa. E riro mai ïa to outou utuafare e hoê vahi no te haapiiraa.

Te faaite papû atu nei au e ua faaho‘ihia mai te mau taviri no te autahu‘araa. Te mau nei e te faaohipa nei te peresideni Thomas S. Monson i taua mau taviri ra. Te ora nei te Atua e ua matau maitai oia ia outou. Te ora nei Iesu Mesia. Ua ma‘itihia outou no te hanahana i te mauraa i te autahu‘araa. Na roto i te i‘oa o Iesu Mesia ra, amene.