2010–2019
Ua Tatou Manumalo Aiai ona o Ia Ua Alofa Mai Ia Te i Tatou
Aperila 2011


Ua Tatou Manumalo Aiai, ona o Ia Ua Alofa Mai Ia Te i Tatou

O tofotofoga e le mo na o le sueina o i tatou. E matuai taua tele i le faagasologa o le faaaogaina o le amioatua.

O le soifuaga i le lalolagi e aofia ai luitau, tofotofoga, ma faigata, ma o nisi o tofotofoga tatou te feagai i le olaga e mafai ona matuai faigata lava. Pe o gasegase, faalataina, faaosoosoina, maliu o se tasi e pele, faalavelave faalenatura po o nisi lava mafatiaga, o puapuaga o se vaega o lo tatou olaga faaletino. Ua mafaufau le toatele pe aisea e ao ai ona tatou feagai ma luitau faigata. Ua tatou iloa o se tasi o mafuaaga ina ia mafai ona tofotofoina lo tatou faatuatua, e iloa ai pe o le a tatou faia mea uma ua poloai mai ai le Alii.1 O le mea e lelei ai, o lenei olaga i le lalolagi o le nofoaga sili lea e fetaia’i ai—ma pasia—ai nei tofotofoga.2

Peitai o nei tofotofoga e le mo na o le sueina o i tatou. E matuai taua tele i le faagasologa o le faaaogaina o le amioatua.3 Afai tatou te taulimaina lelei nei puapuaga, o le a faapaiaina mo lo tatou manuia.4

Na saunoa Elder Orson F. Whitney, “E leai se tiga tatou te pagatia ai, leai se tofotofoga tatou te oo i ai e maumau. … O mea uma tatou te pagatia ai ma mea uma tatou te onosaia, ae maise lava pe a tatou onosaia ma le faato’ato’a, e fausia ai o tatou tagata, faamamaina ai o tatou loto, faalautele ai o tatou agaga, ma atili avea ai i tatou ma ni tagata agamalu ma agaalofa. … E ala mai i faanoanoaga ma puapuaga, fita ma faigata, tatou te maua ai le malamalama lea ua tatou o mai ai iinei ia maua.”5

Talu ai nei na ma’i ai se tamaitiiti e iva tausaga le matua i se kanesa e le taatele o le ponaivi. Sa faamatala mai e le fomai ia auga ma togafitiga, lea na aofia ai le tele o masina e togafitia ai e faaaoga ai le leisa ma se taotoga ogaoga. Fai mai a ia, o se taimi sili lea ona faigata mo le tamaitiiti ma lona aiga, peitai sa ia faaopoopo mai, “E fesili mai tagata, ‘Pe o le a ou tumau pea i le tagata sa ou i ai pe a mae’a lenei mea?’ Ou te fai atu i ai, ‘E leai, o le a e le toe pei o le mea sa e i ai muamua. O le a sili atu ona e malosi. O le a maeu lava!’”

E i ai taimi e foliga mai e taulai atu ai o tatou tofotofoga i vaega o o tatou olaga ma itu o o tatou agaga, lea e foliga mai e tau le mafai ona tatou taulimaina. Talu ai o le tuputupu ae o le tagata lava ia o se taunuuga faamoemoeina o nei luitau, o lea e le o se mea e faateia ai le avea o tofotofoga ma mea e sili ona patino—lea e toetoe lava a agatonu mai i o tatou manaoga po o vaivaiga faapitoa. Ma e leai se tasi e sao mai ai, ae maise lava, e le sao mai ai le Au Paia o loo taumafai e fai le mea sa’o. Atonu e tuufesili nisi o le Au Paia usiusitai, “Aisea ua tupu ai ia te a’u? O lea ou te taumafai e avea ma tagata lelei! Aisea ua faatagaina ai e le Alii lenei mea e tupu?” O le ogaumu o le puapuaga e fesoasoani e faamama ai e oo lava i le tagata o le Au Paia e aupito sili ona lelei e ala i le susunuina o mea le mama o o tatou olaga ae tuu ai le auro mao’i.6 E oo lava foi i minerale e sili ona taua e manaomia foi ona faamamaina e aveese ai mea le mama. E le lava le avea ma se [tagata] lelei. Tatou te mananao ia avea e faapei o le Faaola, o lē sa aoaoina a o mafatia o Ia i “tiga ma puapuaga ma tofotofoga uiga eseese.”7

O le Auala Savali o Crimson i Logan Canyon o se tasi lea o auala sopo e sili ona ou fiafia i ai. O le vaega autu o le auala e ui atu i le tumutumu o tofē papa maualuluga ma e maua ai ni vaaiga matagofie o le auala i totonu o le mauga ma le vanu o i lalo ifo. Ae peitai, e le faigofie le oo atu i le tumutumu o le tofē. O le auala iina e a’e i taimi uma; ma a o lei oo atu foi i le tumutumu, e tau atu le tagata a’ea’e i le vaega aupito tifato o le ala; ma e punitia ai e tofē lava ia ia vaaiga matagofie o le auala i le va o mauga. O le taumafaiga mulimuli e matuai sili ai lava ona aoga ia taumafaiga aua o le taimi lava e taunuu ai i le tumutumu le tagata na a’e, e matuai maofa lava i vaaiga matagofie. Na pau lava le ala e mafai ona iloa atu ai nei vaaiga o le a’e i ai.

O se mamanu o loo i tusitusiga paia ma i le olaga ua faaalia ai o le tele o taimi, o tofotofoga e sili ona faigata ma sili ona matautia e muamua ona oo mai i mea matagofie e tutupu ma le tuputupu ae tele. “E oo mai faamanuiaga pe a mavae atu puapuaga e tele.”8 Sa taumaileia le fanauga a Isaraelu i le Sami Ulaula a o lei vaeluaina.9 Na fetaiai Nifae ma tulaga matautia, feita mai o ona uso, ma le tele o toilalo ona faatoa mafai lea ona ia maua ia papatusi apamemea.10 Sa lofituina Iosefa Samita e se mana leaga sa sili ona malosi, lea na pei ai na malaia o ia i le matuai faaumatiaina. A o toetoe a magoto atu o ia i le leai o se faamoemoe, sa taumafai malosi o ia e valaau atu i le Atua, ma i lena lava taimi sa asia ai o ia e le Tama ma le Alo.11 E masani ona feagai tagata sailiili ma mea faafeagai ma tofotofoga a o latalata ina papatiso. Ua iloa e tina o luitau o le tiga fanau e muamua atu i le vavega o le fanauina [o se pepe]. Tatou te vaaia i lea taimi ma lea taimi ia faamanuiaga ofoofogia e vave lava ona sosoo mai ma ni tofotofoga tetele.

Pe tusa o le 19 o tausaga o lo’u tinamatua, sa maua ai i se faama’i lea na mafua ai ona ma’i tigaina o ia. Sa ia fai mai mulimuli ane, “Sa le mafai ona ou savali. Sa matuai le foligā lava lo’u vae agavale ona e tele ni masina sa ou taoto ai i le moega. O ponaivi sa vaivai ma pei o se momi, ma a faapapa’i lo’u vae i le fola sa pei e sipaka.”12 A o faataotolia o ia i le moega ma i le luluti o ona tiga, sa ia maua ma suesue ai i tamaitusi mai Le Ekalesia a Iesu Keriso o le Au Paia o Aso e Gata Ai. Sa liliu mai o ia ma papatisoina mulimuli ane ai. O le tele o taimi, e fesoasoani ai se luitau faapitoa e tapena i tatou mo se mea e sili atu le taua.

I le totonugalemu o faafitauli, e toetoe lava a le mafai ona iloa atu, o faamanuiaga o loo agai mai e sili atu ona maoae nai lo le tiga, faalumaina po o le lotomomomo lea tatou te ono oo i ai i lena taimi. “O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aoaoina ai.”13 Na aoao mai le Aposetolo o Paulo, “Aua o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau.”14 E manaia le faaaogaina e Paulo o le faaupuga “puapuaga mamasagia.” O le upu lenei e sau mai se tagata sa fasia, fetogia, malaia i folauga, faafalepuipuiina, ma sa oo i le tele o isi tofotofoga.15 Ailoga e ta’ua e le toatele o i tatou o tatou puapuaga e mamasagia. Ae pe a faatusa atu i faamanuiaga ma le tuputupu ae tatou te mauaina mulimuli, i lenei olaga ma le faavavau, e moni lava e mamasagia o tatou puapuaga.

Tatou te le sailia ia faigata, tofotofoga ma faaosoosoga. O la tatou malaga patino i le olaga o le a aumai tonu ai lava le tele o tofotofoga mo o tatou manaoga. O le tele o tofotofoga o se vaega masani lava o o tatou olaga i le tino, ae i ai so latou sao taua i lo tatou alualu i luma.

A o faaiu le galuega a le Faaola i le lalolagi, sa oo ai o Ia i le tofotofoga ua aupito sili ona faigata o le olaga—o le puapuagatia matautia i Ketesemane ma i Kolokota. O lenei tulaga na muamua mai i le Toetu mamalu ma le folafolaga e faapea, e i ai se aso o le a mavae ese ai o tatou puapuaga uma. O Lona puapuagatia sa o se tulaga manaomia i le tuugamau avanoa i lena taeao o le Eseta ma i lo tatou tino ola pea ma le ola e faavavau i le lumanai.

O nisi taimi tatou te mananao ai ia tatou tuputupu ae e aunoa ma ni luitau ma ia atiina ae le malosi e aunoa ma se tauiviga. Peitai e le mafai ona oo mai le tuputupu ae i le uia o se auala faigofie. Ua tatou malamalama lelei o se tagata taalo afeleti e musu i toleniga faigata ma malolosi o le a le avea lava ma se tagata afeleti iloga i le lalolagi. E tatau ona tatou faaeteete ia aua ne’i o tatou inoino i mea tonu lava ia e fesoasoani tatou te maua ai le amioatua.

E leai se tofotofoga ma se faigata tatou te feagai e sili atu nai lo o tatou tulaga gafatia, aua tatou te maua le fesoasoani mai le Alii. E mafai ona tatou faia mea uma e ala ia Keriso, o lē faamalosi mai ia i tatou.16

Ina ua toe manuia mai i ni luitau ogaoga o le soifua maloloina, sa faasoa mai ai e Elder Robert D. Hales le vaega lenei i le konafesi aoao: “Na i ai ni nai taimi, sa ou fai atu ai i le Alii, ua ou aoaoina lelei lava ia lesona e aoaoina, ma o le a le manaomia ona ou onosaia se isi lava puapuaga. O ia talosaga faatauanau na foliga mai sa leai ma se taunuuga, aua sa faamanino mai ia te a’u, o lenei faagasologa o le faamamaina o le tofotofoina sa tatau lava ona onosaia i le taimi a le Alii ma i le ala a le Alii lava ia. … Sa ou … aoaoina o le a le tuua na o a’u e feagai ma nei tofotofoga ma faigata ae o le a oo mai ni agelu e fesoasoani ia te a’u. Sa i ai nisi sa toetoe lava o ni agelu na oo mai o ni fomai, tausima’i, ae o le tagata sili lava, o la’u soa agalelei o Mary. Mai lea taimi i lea taimi, ina ua finagalo ai le Alii, sa faamafanafanaina ai a’u i asiasiga a au o le lagi lea na aumaia le mafanafana ma le faamautinoaga faalelagi i taimi sa ou pagatia ai.”17

E alofa lo tatou Tama Faalelagi ia i tatou, ma ua tatou iloa “o i latou uma o e faalagolago i le Atua e lagolagoina i latou i o latou tofotofoga, ma o latou tiga, ma o latou puapuaga, e faaeaina foi i latou i le aso gataaga.”18 E i ai se aso pe a tatou oo atu i le isi itu o le veli, o le a sili atu se mea tatou te mananao i ai nai lo le na o le ta’u mai e se tasi ia i tatou, “Ia, ua uma oe.” Nai lo lena, tatou te mananao e fetalai mai le Alii, “Ua lelei ia, le auauna lelei e, ma le faamaoni.”19

Ou te fiafia i upu a Paulo:

“O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lē lavalavā, po o le pagatia, po o le pelu? …

“A ua tatou manumalo aiai i nei mea uma lava, ona o ia ua alofa mai ia te i tatou.”20

Ou te iloa o loo soifua le Atua ma o loo soifua Lona Alo o Iesu Keriso. Ua ou iloa foi e ala mai i la Laua fesoasoani, e mafai ai ona avea i tatou o ni “tagata manumalo aiai” i puapuaga tatou te feagai i lenei olaga. E mafai ona avea i tatou e faapei o i Laua. I le suafa o Iesu Keriso, amene.

  1. Tagai i le 1 Peteru 1:6–8; Aperaamo 3:25.

  2. Tagai i le 1 Peteru 2:20.

  3. Tagai i le 2 Peteru 1:4.

  4. Tagai i le2 Nifae 2:2.

  5. Orson F. Whitney, in Spencer W. Kimball, Faith Precedes the Miracle (1972), 98

  6. Tagai i le Isaia 48:10; 1 Nifae 20:10.

  7. Tagai i le Alema 7:11–12.

  8. Mataupu Faavae ma Feagaiga 58:4.

  9. Tagai i le Esoto 14:5–30.

  10. Tagai i le 1 Nifae 3–4.

  11. Tagai i le Talafaasolopito—Iosefa Samita 2:15–17.

  12. Amalie Hollenweger Amacher, unpublished history in possession of author.

  13. Eperu 12:11.

  14. 2 Korinito 4:17.

  15. Tagai i le 2 Korinito 11:23–28.

  16. Tagai i le Filipi 4:13.

  17. Robert D. Hales, “O Le Feagaiga o le Papatisoga: O Le I Ai i le Malo ma ni ō le Malo,” Liahona, Ian. 2001, 6.

  18. Alema 36:3.

  19. Mataio 25:21.

  20. Roma 8:35, 37.