2010–2019
“Hinumdumi kini: Pagkamabination Magagikan Kanako”
Abril 2011


“Hinumdumi kini: Pagkamabination Magagikan Kanako”

Ang pagkamanggiloy-on makadala og kalipay ug panaghiusa nganha sa inyong panimalay, sa inyong klase, sa ward, ug sa inyong eskwelahan.

Pipila ka semana ang milabay, akong nakat-unan ang usa ka importante nga leksyon gikan sa usa ka Laurel kinsa mao ang mamumulong sa kabatan-onan sa akong ward. Natandog ako samtang masaligon siyang mitudlo ug mipamatuod ni Jesukristo. Gitapos niya ang iyang pamulong uban niini nga pahayag: “Kon akong himoon si Jesukristo nga sentro sa akong kinabuhi, mamaayo ang akong adlaw, mas mabination ako ngadto sa akong mga minahal, ug ako mapuno sa kalipay.”

Akong naobserbahan kini nga young woman gikan sa panagsa nga pakig-istorya sulod sa milabay nga pipila ka mga bulan. Nagtimbaya siya sa tanan uban ang makidlapon nga mga mata ug dali nga pahiyom. Nabantayan ko siya nga nalipay sa kalampusan sa uban nga mga batan-on. Duha ka mga Mia Maid bag-ohay nga mireport ngari kanako kalabut sa desisyon niini nga batan-ong babaye sa dili paggamit sa mga ticket sa sine sa diha nga iyang naamguhan nga kini dili mahimong usa ka kasinatian nga “mahiyason ug matahum.”1 Siya mahigugmaon, mabination, ug masulundon. Gikan siya sa usa ka panimalay nga nag-inusara ang ginikanan, ug ang iyang kinabuhi dili ingon nga walay mga hagit, busa ako nahibulong kon giunsa niya pag-amuma ang iyang malipayon, mabination nga espiritu. Sa diha nga kining batan-ong babaye mipamatuod, “Akong gisentro ang akong kinabuhi diha ni Jesukristo,” ako dihay tubag.

“Kami nagtuo sa pagkamatinuoron, pagkamatinud-anon, pagkaputli, pagkamanggiloy-on, mahiyason, ug sa pagbuhat sa matarung ngadto sa tanan nga mga tawo.” Kining nindot nga lista sa Kristohanong mga hiyas, nga makita diha sa ikanapulog-tulo nga Artikulo sa Hugot nga Pagtuo, moandam kanato alang sa mga panalangin sa templo ug sa kinabuhing dayon.

Buot akong mopatigbabaw diha sa usa lamang niini nga mga pulong—benevolent[pagkamanggiloy-on].Ang benevolent [pagkamanggiloy-on] usa ka matahum nga pulong nga dili kaayo nato kasagaran madunggan. Ang gigikanan niini Latin, ug kini nagkahulugan og “manghinaut og kaayohan sa usa ka tawo.”2 Ang pagkamanggiloy-on mao ang pagkamaaghup, pagkamaayo og kabubut-on, ug mahigugmaon sa tanan. Daghan kaninyo nakakat-on mahitungod sa ideya sa pagkamanggiloy-on sa diha pa kamo sa Primary ug gisag-ulo kini nga awit:

Buot kong magmabination sa tanan,

Kay kana husto, tan-awa.

Busa nag-ingon ako sa akong kaugalingon, Hinumdumi kini:

Pagkamabination nagagikan kanako.”3

Ang atong Manluluwas nagtudlo kanato mahitungod ug nagpuyo og manggiloy-on nga kinabuhi. Si Jesus nahigugma sa tanan ug Siya miserbisyo sa tanan. Ang pagsentro sa atong mga kinabuhi diha ni Jesukristo motabang kanato sa pag-angkon niini nga hiyas sa pagkamanggiloloy-on. Aron atong mapalambo kining sama nga Kristohanong mga hiyas, kita kinahanglang magkat-on mahitungod sa Manluluwas ug “magsunod sa Iyang mga paagi.”4

Gikan sa sambingay sa maayong Samarianhon atong nakat-unan nga kinahanglan atong higugmaon ang tanan. Nagsugod ang istorya diha sa Lucas kapitulo 10, sa diha nga usa ka batid sa balaod nangutanan sa Manluluwas, “Unsa may akong buhaton aron makapanunod ako sa kinabuhing dayon?”

Ang tubag: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong kusog, ug sa tibuok mong hunahuna;ug ang imong silingan sama sa imong kaugalingon.”

Ang batid sa balaod dayon nangutana, “Kinsa man ang akong silingan?” Kana usa ka nindot nga pangutana nga ipangutana sa usa ka batid sa balaod, tungod kay ang mga Judeo adunay mga silingan sa amihanan, ang mga Samarianhon, kinsa ilang gikalagutan og maayo nga kon sila mobiyahe gikan sa Jerusalem ngadto sa Galilea, moagi sila og mas layo nga dalan agi sa Walog sa Jordan kay sa mobiyahe agi sa Samaria.

Gitubag ni Jesus ang pangutana sa batid sa balaod pinaagi sa pagsaysay sa sambingay sa maayong Samarianhon. Sumala sa sambingay:

“May usa ka tawo nga sa naglugsong gikan sa Jerusalem paingon sa Jerico nahulog ngadto sa mga tulisan, ug siya ilang gihubuan, ug gibunalan, ug unya gibiyaan siya nga himatyon. …

“Apan usa ka Samarianhon, sa nagbaktas siya, nahiabut didto kaniya: ug sa iyang pagkakita kaniya, siya giabut og kalooy,

“Ug miduol kaniya, ug iyang gibugkusan ang iyang mga samad, nagpatulo niini og lana ug bino, unya iyang gipasakay sa iyang kabay-anan, ug gidala siya sa balay abutanan ug iyang giatiman kini.

“Ug sa pagkasunod nga adlaw sa diha nga molakaw na siya, mikuha siya og duha ka denario, ug iyang gihatag kini sa tag-iya, ug miingon kaniya, Atimana siya, ug kon makagasto ka pag labaw niini, bayran ko ikaw unya inig balik ko dinhi.”5

Dili sama sa Judeo nga pari ug sa Levita kinsa gilabyan ang samdan nga tawo, usa nga taga-ila, ang Samarianhon mabination walay pagsapayan sa mga panagbangi. Gipakita niya ang Kristohanong hiyas sa pagkamanggiloy-on. Gitudloan kita ni Jesu pinaagi niini nga istorya nga ang tanan atong silingan.

Usa ka magtatambag sa Bishopric bag-ohay nga nakigbahin og kasinatian nga nagtudlo kon unsa ka importante ang matag silingan. Samtang nagtan-aw sa kongregasyon, nakita niya ang usa ka bata nga may dako nga kahon sa krayola puno sa daghan nga nagkalain-laing mga kolor. Samtang siya nagtan-aw sa daghan nga mga miyembro sa iyang ward, nahinumdom siya nga sama sa mga krayola, sila parehas kaayo, apan ang matag tawo usab talagsaon.

Siya miingon: “Ang kolor nga ilang gidala nganha sa ward ug sa kalibutan ila ra gayud. … Sila adunay tagsa-tagsa nga mga kalig-on ug mga kahuyang, personal nga mga pangandoy, ug gitago nga mga damgo. Apan kon mag-uban, sila mibagay ngadto sa usa ka color wheel sa espirituhanon nga panaghiusa.” …

“Ang panaghiusa usa ka espirituhanon nga kalidad. Kini mao ang tam-is nga pagbati sa kalinaw ug katuyoan nga moabut gikan sa pagkasakop diha sa usa ka pamilya. … Kini mao ang pagtinguha sa labing maayo alang sa uban sama sa imong pagtinguha niini alang sa imong kaugalingon. … Kini ang pagkasayud nga walay usa nga gustong mopasakit kanimo. [Kini nagpasabut nga ikaw dili gayud mag-inusara.]”]”6

Kita nagtukod niana nga panaghiusa ug nakigbahin sa atong talagsaon nga mga kolor pinaagi sa pagkamanggiloy-on: tagsa-tagsa nga mga buhat sa pagkamabination.

Mibati ka ba sukad og pag-inusara? Nakamatikud ka ba niadtong mga nag-inusara, nagpuyo sa walay kolor nga kalibutan? Batan-ong mga babaye, ako nagtan-aw samtang kamo nagdala sa inyong talagsaon nga kolor diha sa mga kinabuhi sa uban inubanan sa inyong mga pahiyom, sa inyong mabination nga mga pulong, o sa usa ka mubo nga sulat sa pagdasig.

Si Presidente Thomas S. Monson mitudlo kanato kon unsaon sa pagpakig-uban sa atong mga higala ug sa tanan nga atong gikahimamat sa diha nga siya misulti sa batan-ong mga babaye sa Simbahan, “ Pinalangga kong batan-ong mga sister, naghangyo ako kaninyo sa pagbaton og kaisug sa paglikay nianang paghukom ug pagpanaway sa mga naglibut kaninyo, ingon man sa kaisug sa pagsiguro nga ang tanan naapil ug gibati nga gihigugma ug gihatagan og bili.”7

Makasunod kita sa ehemplo sa maayong Samarianhon ug “usbon ang kalibutan” sa usa lamang ka tawo pinaagi sa pagkamanggiloy-on.8Buot ako nga modapit matag usa kaninyo sa pagbuhat og dili mokubos sa usa nga sama sa Samarianhon nga buhat niining moabut nga semana. Kini mahimong nanginahanglan nga kamo mokab-ot lapas sa inyong naandan nga mga higala, o mobuntog sa inyong pagkamanggiulawon. Mahimong maisugon ninyong pilion ang pagserbisyo sa usa ka tawo kinsa dili maayo nga motagad kaninyo. Mosaad ako kaninyo nga kon inyong ilugway ang inyong kaugalingon lapas sa unsay sayon nga buhaton, mobati kamo og maayo kaayo sa kaugalingon nga ang pagkamabination mahimo nga kabahin sa inyong matag adlaw nga kinabuhi. Inyong makita nga ang pagkamanggiloy-on makadala og kalipay ug panaghiusa nganha sa inyong panimalay, sa inyong klase, sa ward, ug sa inyong eskwelahan. “Hinumdumi kini: ang pagkamabination magagikan kanako.”

Dili lamang nga ang atong Manluluwas nahigugma sa tanan, siya mialagad sa tanan. Ipakaylap ang inyong kaayo ngadto sa daghan. Ang tigulang ug batan-on mahimong mapanalanginan og maayo pinaagi sa inyong mabinationg serbisyo. Si Presidente Monson, sukad sa panahon nga siya usa ka batan-ong lalaki, kanunay dihay usa ka espesyal nga dapit sa iyang kasingkasing alang sa mga tigulang. Nahibaloan niya ang bili sa kadiyot nga pagbisita, usa ka andam nga pahiyom o paggunit sa huyang, kunot nga kamot. Ang mao nga yanong mga buhat sa putli nga gugma nagdala og kolor ngadto sa kinabuhi nga usahay bunga sa dugay, nag-inusara, mingaw nga mga adlaw. Nagdapit ako sa matag usa kaninyo sa pagpakabana sa inyong mga apohan ug mga katigulangan. Tan-awa sa simbahan ugma ug pangita og usa ka tawo nga mas edaran kinsa makagamit sa bulok sa imong kolor nga idugang ngadto sa ilang kinabuhi. Dili kini bug-at—sa pagtimbaya kanila sa pangalan, pakig-istorya kanila og kadiyot, pagkaanaa sa pagtabang kanila. Makaabli ba kamo sa pultahan o makatanyag og tabang sa ilang panimalay o halaman? Ang sayon ninyo nga buhatun sa inyong batan-on nga edad mahimong usa ka bug-at nga proyekto alang sa mas edaran nga tawo. “Hinumdumi kini: ang pagkamabination magagikan kanako.”

Usahay ang pagkamanggiloy-on labing malisud diha sa atong kaugalingon nga mga pamilya. Ang lig-on nga mga pamilya nagkinahanglan og paningkamot. “Pagmalipayon, pagmatinabangon, ug pagmahunahunaon sa uban. Daghang mga problema sulod sa panimalay moabut tungod kay ang mga sakop sa pamilya mosulti ug molihok sa hinakog ug sa walay pagbati nga paagi. Pagpakabana sa imong kaugalingon sa mga panginahanglan sa ubang mga sakop sa pamilya. Tinguhaa nga magmakidaiton imbis nga manungog, makig-away, ug makigbangi.”9“Hinumdumi kini: ang pagkamabination nagagikan kanako.”

Gihigugma ni Jesus ang mga kabataan, mikugos kanila, ug mipanalangin kanila.10Sama sa Manluluwas, ang imong pagkamabination makapanalangin sa tanang mga kabataan, dili lamang niadtong anaa sa inyong panimalay.

Mahimong dili ikaw masayud sa impluwensya sa imong kinabuhi ug ehemplo nga maanaa sa usa ka bata. Nakadawat ako karong bag-o gikan sa usa ka higala kinsa nagdumala og day care center sa usa ka lokal nga high school. Ang mieskwela niana nga high school mao ang ubay-ubay nga batan-ong mga lalaki ug babaye nga mga miyembro sa Simbahan. Iyang gipaambit kanako kini nga kasinatian: “Samtang ako naglakaw sa mga hawanan kauban sa gagmay nga mga bata nindot tan-awon unsa ka daghan sa mga locker nga adunay hulagway ni Jesus o sa mga templo nga gipapilit sa sulod sa mga sira. Usa sa mga bata nakakita sa hulagway ni Jesus diha sa sulod sa [batan-ong babaye] na-abli nga sira sa locker ug miingon, ‘Tan-awa, si Jesus anaa sa atong eskwelahan!Ang estudyante nakahilak samtang siya miduko ug migakus sa bata. Gipasalamatan ko ang young woman alang sa iyang maayong ehemplo ngadto sa naglibut kaniya. Kini makapabayaw nga masayud nga adunay daghang mga kabatan-onan nga naningkamot sa pagbarug alang sa kamatuoran ug pagkamatarung ug sa pagbuhat sa ilang bahin sa pagdapit sa Espiritu nganha sa ilang mga kinabuhi, bisan tuod kini malisud usahay uban sa kalangas ug kasamok sa kalibutan nga naglibut kanila. Kita adunay daghang nindot nga mga kabatan-onan sa Simbahan.”

Dili ako makalalis niana! Batan-ong mga babaye, kamo nag-usab sa kalibutan pinaagi sa pagsentro sa inyong kinabuhi diha ni Jesukristo ug kamo “nahimo unsay iyang gusto kaninyo nga mahimo.”11

Salamat sa inyong pagkamanggiloy-on nga mga kinabuhi; sa paglakip niadto kinsa tingali lahi; sa kalooy ngadto sa inyong mga higala, sa mga tigulang, sa inyong pamilya, ug sa gagmay nga mga kabataan; sa pagka-silingan niadtong kinsa nag-inusara ug niadtong kinsa adunay mga hagit ug kaguol. Pinaagi sa inyong pagkamanggiloy-on, kamo “nagpatunong sa uban ngadto sa kahayag[sa Manluluwas].”12 Salamat sa paghinumdom nga “ang pagkamabination nagagikan kanako.”

Nasayud ako nga si Presidente Thomas S. Monson usa ka propeta sa Dios kansang kinabuhi nahimong modelo sa pagkamanggiloloy-on diin kita makakat-on. Sunda ang atong propeta. Pagkat-on gikan sa iyang ehemplo ug paminaw sa iyang mga pulong. Ako nagtuo sa ebanghelyo ni Jesukristo, ug ako nasayud nga pinaagi ni Propeta Joseph Smith ang priesthood gipahiuli dinhi sa yuta.

Nasayud ako nga ang Manluluwas buhi ug naghigugma sa matag usa kanato. Gihatag niya ang Iyang kinabuhi alang sa tanan. Nag-ampo ako nga atong isentro ang atong mga kinabuhi diha ni Jesukristo ug “mosunod sa Iyang mga paagi” pinaagi sa paghigugma ug sa pagserbisyo sa usag usa.13Pinaagi sa pagbuhat sa ingon, nasayud ako nga kita makahimo sa kalibutan nga usa ka mas maayong dapit, tungod kay “kita nagtuo sa … pagkamanggiloy-on.”14 Ako nagpamatuod, diha sa pangalan ni Jesukristo, amen.

  1. (Tan-awa sa Mga Artikulo sa Hugot nga Pagtuo 1:13).

  2. Tan-awa sa Oxford English Dictionary Online, 2nd ed. (1989), “benevolent,” oed.com.

  3. “Kindness Begins with Me,” Children’s Songbook, 145.

  4. “Guardians of Virtue,” Strength of Youth Media 2011: We Believe (DVD, 2010); annaa usb sa lds.org/youth/video/youth-theme-2011-we-believe.

  5. Lucas 10:25, 27, 29, 30, 33–35.

  6. Jerry Earl Johnston, “The Unity in a Ward’s Uniqueness,” Mormon Times, Feb. 9, 2011, M1, M12.

  7. Thomas S. Monson, “Unta Kamo Adunay Kaisug,” Liahona, Mayo 2009, 123.

  8. “Mga Magbalantay sa Hiyas.”

  9. Alang sa Kalig-on sa mga Kabatan-onan (booklet, 2001), 10–11.

  10. Tan-awa sa Marcos 10:16.

  11. “Mga Magbalantay sa Hiyas.”

  12. “Mga Magbalantay sa Hiyas.”

  13. “Mga Magbalantay sa Hiyas.”

  14. Mga Artikulo sa Hugot nga Pagtuo 1:13