“Ia Manatua le Mea Lenei: O Le Agalelei e Amata Ia te A’u”

O ni nai vaiaso ua tea, sa ou aoaoina ai se lesona taua mai se tamaitai o le Lora o le failauga talavou i la’u uarota. Sa faagaeetia a’u a o ia aoao mai ma molimau mai ma le mautinoa e uiga ia Iesu Keriso. Sa faaiuina lana tautalaga i le faamatalaga lenei: “A ou faaogatotonuina Iesu Keriso i lo’u olaga, e lelei lava lo’u aso, ou te agalelei atu i e pele ia te a’u, ma e faatumulia a’u i le fiafia.”

Sa ou matauina lava lenei tamaitai talavou i ana fegalegaleaiga i nai masina ua mavae. Na te faafeiloaia tagata uma i ni foliga fiafia ma vave ataata. Sa ou vaai i lona fiafia i le faamanuiaina o isi talavou. Na faamatala lata mai nei e ni Maea Meite se toalua le faaiuga a lenei tamaitai talavou e faaleaogaina ana pepa ulufale i se tifaga ina ua ia iloaina o le a le o se aafiaga e “mama ma matagofie.”¹O ia o se tagata alofa, agalelei, ma usiusitai. E sau o ia mai i se aiga e na o se tina, ma o lona olaga e le’i faapea na leai ni luitau, o lea sa ou mafaufau ai pe faapefea ona ia faatumauina lona agaga fiafia ma le agalelei. Ina ua molimau mai lenei tamaitai, “Ou te faaogatotonuina lo’u olaga ia Iesu Keriso,” na ou iloa ai le tali.

“Matou te talitonu ia faamaoni, amiotonu, nofo mama, agalelei, amio mama, ma le faia o mea lelei i tagata uma.” O lenei lisi matagofie o uiga faaKeriso, o loo maua i le mataupu faavae lona sefulutolu o le faatuatua, o le a saunia ai i tatou mo faamanuiaga o le malumalu ma le ola e faavavau.

E na o le tasi le upu o na upu ou te fia faamamafaina—agalelei.O le agalelei o se upu matagofie e seāseā tatou faalogo i ai. O ona aa e mai Latina o lona uiga “o le faamanuia atu i se tasi.”²Ina ia agalelei, o lona uiga ia agaalofa, ia i ai ni faamoemoega lelei, ma ia loto alofa. O le toatele o outou na outou iloa le uiga o le agalelei a o outou i ai i le Peraimeri ma taulotoina ai le pese lenei:

Sa aoao mai i tatou e lo tatou Faaola, ma sa soifua foi i se soifuaga agalelei. Sa alofa ma auauna atu Iesu i tagata uma. O le faaogatotonu o o tatou olaga ia Iesu Keriso, o le a fesoasoani tatou te maua ai lenei uiga o le agalelei. Ina ia tatou atiina ae nei lava uiga faa-Keriso, e tatau ona tatou aoao e uiga i le Faaola ma “mulimuli i Ona ala.”⁴

Mai le faataoto i le Samaria agalelei, ua tatou aoao ai e tatau ona tatou alolofa atu i tagata uma. E amata le tala i le Luka mataupu e 10, ina ua fesili atu se aoao tulafono i le Faaola, “Se a se mea ou te faia ina ia ou maua ai le ola e faavavau?”

Na tali le Faaola: “E te alofa atu i le Alii lou Atua ma lou loto atoa, ma lou agaga atoa,ma lou malosi atoa, ma lou manatu atoa; e te alofa atu foi i le lua te tuaoi, ia pei o oe lava ia te oe.”

Ona fesili atu lea o le aoao tulafono, “O ai foi le tagata ma te tuaoi?” O se fesili malie lena e fesili ai se aoao tulafono, aua o tagata Iutaia sa i ai o latou tuaoi i le itu i matu, o tagata Samaria, lea latou te matuai inoino i ai, ma a latou malaga mai Ierusalema e agai atu i Kalilaia, latou te ui i le auala e mamao atu lea e ui atu i le Vanu o Ioritana nai lo le ui atu i Samaria.

Na tali atu Iesu i le fesili a le aoao tulafono i le faamatalaina o le faataoto i le Samaria agalelei. E tusa ai ma le faataoto:

“O se tasi tagata na alu ifo mai Ierusalema i Ieriko, ua maua o ia e tagata fao mea, ua latou toeseina ona ofu, ma fasi ia te ia, ua latou o, ua tuua ia ua tali oti. …

“A o le tasi Samaria ua alu lana malaga, ua oo atu i le mea o i ai o ia, ua iloa o ia, ona mutimutivale lea o lona alofa,

“Ua alu atu ma nonoa i ona manua, ua liligi foi i ai le suauu ma le uaina, ua faatietie ia te ia i lana lava manu, ma taitai ia te ia i le fale e tali ai malo, ma tausi ia te ia.

“O le taeao o le a alu ia, ona to ae lea o tenari e lua, ma avatu i le matai e ona le fale, ua fai atu ia te ia, Ina e tausi ia te ia; ai se mea e te toe faatau ai, ou te taui atu ia te oe pe a ou toe sau.”⁵

E le pei o le faitaulaga Iutaia ma le sa Levi o e na laaloa ma le tagata manua, o se tasi lava o lo latou ituaiga, sa agalelei le tagata Samaria e ui lava i o latou feeseeseaiga. Sa ia faaalia le uiga faa-Keriso o le agalelei. Ua aoaoina i tatou e Iesu e ala i lenei tala e faapea, o tagata uma lava o o tatou tuaoi ia.

Na faasoa lata mai nei e se fesoasoani o le au epikopo se aafiaga na aoao mai ai le taua o tuaoi taitoatasi. A o vaavaai atu o ia i le aulotu, sa ia vaaia ai se tamaitiiti ma se atigipusa tele o vali na tumu i lanu eseese. A o vaavaai atu o ia i tagata e toatele o lana uarota, sa ia manatua ai, e pei foi o vali, na foliga tutusa uma i latou, ae sa tulaga ese tagata taitoatasi.

Sa ia faapea atu, “O le ata lafoia latou te aumaia i le uarota ma le lalolagi o a latou uma lava ia. … E tofu i latou taitoatasi ma malosiaga ma vaivaiga, moomooga a le tagata lava ia, ma miti patino. Ae a tuu faatasi latou te tuufaatasia ai se uili o lanu o le lotogatasi faaleagaga. …

“O le lotogatasi o se uiga faaleagaga. O lagona matagofie o le toafilemu ma le faamoemoega lea e sau mai le i ai i se aiga. … O le manao i le mea e sili mo isi e pei foi ona e manao ai mo oe lava. … O le iloaina e leai se isi o taumafai e faaleaga oe. [O lona uiga o le a le tuua lava na o oe.]”⁶

Tatou te fausia lena lotogatasi ma fetufaai o tatou lanu tulaga ese e ala i le agalelei: o faatinoga taitasi o le agaalofa.

Pe sa e lagonaina ea le tuua toatasi? O e matauina ea i latou ua tuua toatasi, o loo ola i se lalolagi faanoanoa ma le le fiafia? Tamaitai talavou, ua ou vaai a o e aumaia lau lanu tulaga ese i olaga o isi e ala i ou foliga ataata, i au upu alofa, po o se upu faalaeiau.

Na aoao i tatou e Peresitene Thomas S. Monson i auala tatou te feoeoea’i ai ma o tatou tupulaga ma tagata uma tatou te fetaui, ina ua ia ta’u atu i tamaitai talavou o le Ekalesia, “O’u tuafafine talavou faapelepele, ou te aioi atu ia te outou ia outou lototetele e o ese mai le faamasino atu ma le faitioina o i latou e siomia outou, faapea foi ma le lototele ia mautinoa ai o loo aofia tagata uma ma [latou] lagonaina le alofaina ma le faatauaina.”⁷

E mafai ona tatou mulimuli i le faataitaiga a le Samaria agalelei, ma “sui le lalolagi” a se tagata e toatasi e ala i le agalelei.⁸ Ou te valaaulia outou taitoatasi e fai se galuega faa-Samaria i le vaiaso a sau nei. E ono manaomia ai lou aapa atu i tua atu o au uo masani, po o le faatoilaloina o lou matamuli. E te ono filifili ma le lototele e auauna atu i se tasi e le lelei lona faia o oe. Ou te folafola atu, afai o le a e faalautele atu au mea e fai nai lo mea e faigofie ona fai, o le a e lagona le fiafia i lou loto ma o le a avea le agalelei o se vaega o lou olaga i aso uma. O le a e vaaia ai o le agalelei e mafai ona aumai ai le olioli ma le lotogatasi i lou aiga, lau vasega, lau uarota, ma lau aoga.“Ia manatua le mea lenei: o le agalelei e amata ia te a’u.”

Sa le’i gata ina alofa lo tatou Faaola i tagata uma; ae sa Ia auauna atu foi i tagata uma. Ia faalautele atu lou agalelei i tagata e toatele. O le a mafai ona faamanuiaina tagata matutua ma e laiti i au auaunaga agalelei. O Peresitene Monson, talu mai i lona talavou, o loo i ai se avanoa faapitoa i lona fatu mo e matutua. Na te silafia le taua o se asiasiga puupuu, o se ataata po o se oomi o se lima ua vaivai ma maanuminumi. O faatinoga faatauvaa faapena o le agaalofa e aumai ai le fiafia i se olaga lea e i ai taimi e maua mai i ni aso uumi, tuua toatasi ma le faanoanoa. Ou te valaaulia outou taitoatasi ia magafagafa i o outou matua matutua ma tagata ua matutua.Vaavaai solo i le lotu a taeao po o ai se tagata matua e mafai ona ia faaaogaina ou uiga agalelei e faaopoopo atu i o latou olaga. E le tele ni mea e manaomia ai: faafeiloai i latou i o latou igoa, fai sina talanoaga puupuu, ia e avanoa e fesoasoani atu ia i latou. Pe mafai ona outou tatalaina se faitotoa pe ofo atu e fesoasoani i lo latou fale po o le togalaau? O se galuega faigofie ia te oe i lou matua i le taimi nei, e mafai ona avea o se galuega lofituina mo se tagata matua atu. “Ia manatua le mea lenei: o le agalelei e amata ia te a’u.”

O nisi taimi o le avea ma se tagata agalelei e sili ona faigata i o tatou lava aiga. O aiga malolosi e manaomia ai taumafaiga. “Ia agaga fiafia, loto fesoasoani, ma manatu i isi tagata. O le tele o faafitauli i le aiga e mafua ona o le tautatala ma le faia e tagata o le aiga o mea manatu faapito po o le le agalelei. Ia e manatu popole i manaoga o isi tagata o lou aiga. Taumafai ia avea oe ma se tagata e faatupuina le filemu nai lo le taufaalili, tauaimisa, ma feupuai.”⁹ “Ia manatua le mea lenei: o le agalelei e amata ia te a’u.”

Sa alofa Iesu i tamaiti, sa Ia siiina i latou, ma faamanuia i latou.¹⁰E pei foi o le Faaola, e mafai ona e faamanuiaina ai tamaiti uma i lou agalelei, e le na o tamaiti o lou aiga.

Atonu e te le iloa le aafiaga o lou olaga ma faataitaiga e te ono faia i se tamaitiiti laitiiti.Sa ou mauaina talu ai nei se tusi puupuu lenei mai se uo o loo puleaina se aoga faataitai i se aoga maualuga i le lotoifale. E aooga ai i lena aoga maualuga nisi o alii ma tamaitai talavou o le Ekalesia. Sa ia faasoa maia ia te au le aafiaga lenei: “A matou savalivali atu ma tamaiti laiti i fale faafiafia tetele, e ese le manaia o le vaaia o le tele o kapoti loka e i ai ata o Iesu po o malumalu e faapipiiina ai i totonu o faitotoa. Na vaaia e se tasi o tamaitiiti se ata o Iesu i le pito i totonu o le faitotoa o le loka na matala a se [tamaitai talavou] ma fai mai, ‘Vaai foi, o loo i ai Iesu i le tatou aoga!’ Na ootia le teineitiiti aoga ma maligi ona loimata a o ia punou ifo ma opo lea tamaitiiti. Ou te faafetai i le tamaitai talavou mo le faataitaiga lelei sa avea ai o ia i isi na siomia o ia. E faagaeetia lava le iloa e toatele tagata talavou o loo taumafai e tutu atu mo le upumoni ma le amiotonu ma fai la latou vaega i le valaauliaina o le Agaga i o latou olaga, e ui lava e i ai taimi e faigata ai, ona o le malomaloa ma le vāvāo o le lalolagi o loo siomia i latou. O loo i ai ni o tatou talavou lelei i le Ekalesia.”

O lo’u manatu moni foi lena! Tamaitai talavou, o loo outou suia le lalolagi e ala i le faaogatotonuina o lou olaga ia Iesu Keriso, ma ua “avea ai outou ma ituaiga tagata ua finagalo o Ia e avea ai outou.”¹¹

Faafetai mo o outou olaga agalelei; mo le faaaofia ai o i latou o e atonu e ese mai; mo lo outou agalelei i a outou tupulaga, i tagata matutua, i lou aiga, ma tamaiti laiti; mo le avea ma ni tuaoi ia i latou o e tuua toatasi ma i latou o loo i ai ni luitau ma loto mafatia. E ala i lou agalelei, o loo outou “faasino atu ai [isi] i le malamalama o le Faaola.”¹² Faafetai lava mo le manatuaina “o le agalelei e amata ia te a’u.”

Ou te iloa o Peresitene Thomas S. Monson o se perofeta a le Atua, o lona soifuaga o se faataitaiga o le agalelei e mafai ona tatou aoao mai ai. Mulimuli i lo tatou perofeta. Aoao mai i ana faataitaiga ma faalogo i ana upu. Ou te talitonu i le talalelei a Iesu Keriso, ma ou te iloa na toefuatai mai le perisitua i le lalolagi e ala mai ia Iosefa Samita.

Ou te iloa o loo soifua lo tatou Faaola ma e alofa ia i tatou taitoatasi. Ua Ia tuuina mai Lona soifua mo i tatou uma. Ou te tatalo ia tatou faaogatotonu o tatou olaga ia Iesu Keriso, ma “mulimuli i Ona ala” e ala i le agaalofa ma auauna atu o le tasi i le isi.¹³ O le faia o ia mea, ou te iloa e mafai ona tatou faia ai le lalolagi o se nofoaga e sili atu ona lelei aua, “tatou te talitonu ia … agalelei.”¹⁴Ou te molimau atu ai i le suafa o Iesu Keriso, amene.