Molimau

O se tasi o faamanuiaga silisili i lo’u olaga i le tele o tausaga o le avanoa e vagavagaia ai au ma galulue ma tupulaga talavou o le Ekalesia. Ou te mafaufau i nei mafutaga ma faauooga o ni mea aupito sili ona faamemelo i ai ma faatauaina i lo’u olaga. O faavae foi na o le tele o lo’u faamoemoe mo le lumanai o le Ekalesia, malo, ma le lalolagi.

I taimi o nei fegalegaleaiga, sa ou maua ai foi le avanoa e talanoa ai ma nisi sa i ai ni faaletonu po o ni luitau eseese i a latou molimau. E ui ina eseese mea patino ma tulaga ese foi i nisi taimi, ae o le tele lava o fesili ma mafuaaga o le le mautonu e talitutusa uma lava. E faapena foi, o nei faafitauli ma atugaluga e le fuatasi i se vaega patino o tagata. O ia faafitauli e ono faapopoleina ai tagata e o mai i aiga ua augatupulagā o auai i le Ekalesia, o tagata faatoa auai i le Ekalesia, faapena foi i latou faatoa tau faamasani i Le Ekalesia a Iesu Keriso o le Au Paia o Aso e Gata Ai. O a latou fesili e masani lava e afua i lo latou fesili faamaoni po o le fia iloa foi. Talu ai o taunuuga e taua tele ma ogaoga mo i tatou taitoatasi, ua foliga mai ai e talafeagai le mafaufau i a tatou molimau. I la tatou matalalaga a le Au Paia o Aso e Gata Ai, tatou te vaai i a tatou molimau o ni a tatou molimau mautinoa o le moni aiai o le talalelei a Iesu Keriso, lea e maua mai i faaaliga e ala mai i le Agaga Paia.

E ui ina faigofie ma manino se molimau mai i lenei tautinoga maioio, ae e ono tulai mai i lenei tautinoga ni fesili faigofie e pei o le: O ai e i ai le aia e maua ai se molimau? E faapefea e se tagata ona maua se faaaliga e tatau ai? O a laasaga mo le mauaina o se molimau? Pe o le molimau o se mea e tupu po o se faagasologa e faifai pea? O nei fesili taitasi faapea foi ma isi, e i ai foi a latou soā fesili ae o faavae o le mauaina ma le faatumauina o se molimau i le talalelei a Iesu Keriso, e tuusa’o, e manino ma e gafatia e tagata uma.

Sei ou tali puupuu atu i nei atugaluga e ono tulai mai, ona ou faasino atu lea i nisi o nai manatu sa faasoa mai talu ai nei e ni uo talavou matutua faatuatuaina sa i ai ni aafiaga patino mo le mauaina o a latou molimau. Sa latou maua foi ni avanoa e auauna atu ai i isi sa i ai ni luitau po o faigata faatasi ai ma nisi o vaaiga i lo latou faatuatua ma talitonuga.

Muamua, o ai e i ai le aia e maua ai se molimau? O tagata uma lava e naunau e totogi le tau—o lona uiga o le tausia o poloaiga—e mafai ona maua se molimau. “O le mea lea ua oo ai le siufofoga o le Alii i tuluiga o le lalolagi, ina ia mafai ona lagona e i latou uma o e fia faalogo” (MFF 1:11). O se mafuaaga faavae mo le toefuataiga o le talalelei ina ia “mafai ona taitoatasi le tagata ma tautala atu i le suafa o le Atua le Alii, o le Faaola lava o le lalolagi; ia mafai ona faalauteleina foi le faatuatua i le lalolagi” (MFF 1:20–21).

Lua, e faapefea e se tagata ona maua se faaaliga e tatau ai, ae o a foi laasaga faavae e ausia ai? Ua manino lava le mamanu ma e tumau lava i tupulaga uma. O le folafolaga na tuuina mai mo le mauaina o se molimau o le Tusi a Mamona e masani foi ona faatatau i ai:

“Pe a maua e outou nei mea”—o lona uiga sa outou faalogo, faitau, ma suesue i ai, ma mafaufau loloto i le fesili ua i ai—“ole atu i le Atua, le Tama Faavavau, i le suafa o Keriso, pe le moni ea nei mea”—o lona uiga o le a outou tatalo ma mafaufau i ai, ia patino ma ia migao faatasi ai ma se tautinoga maumaututu e mulimuli i le tali o au tatalo—“afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu ia te outou i le mana o le Agaga Paia.

“O le mana foi o le Agaga Paia tou te iloa ai le tonu i mea uma lava.” (Moronae 10:4–5).

Tolu, pe o le mauaina o se molimau o se mea tutasi e tupu po o se faagasologa e faifai pea? O se molimau e tai pei lava o se mea e ola lea e tuputupu a’e ma faateleina pe a taulimaina faalelei. E manaomia ona fafaga e le aunoa, tausi ma puipuia ina ia lauolaola ma manuia. E faapena foi, a tatou faatuatuanai i a tatou molimau pe se’e ese mai le mamanu e ola ai i lena molimau, e mafai ona galoma atu pe faaitiitia. Ua lapatai mai tusitusiga paia e faapea o le solitulafono po o le solia o poloaiga a le Atua, e mafai ona le maua ai le Agaga ma faafitia ai le molimau na ia muai mauaina (tagai MFF 42:23).

Se’i ou faasoa atu ni mea se sefulu o matauga ma fautuaga a a’u uo talavou faamaoni ma le faatauaina. O manatu na latou faasoa mai e uiga tutusa i o latou mafaufauga ma aafiaga; o lea, atonu e le o se mea o le a ofo ai se tasi o i tatou. Ae paga lea, ae maise lava i taimi o a tatou lava tauiviga ma mafatiaga, e ono galo ai ia i tatou i se taimi pe le amanaiaina ai lo latou aoga ia i tatou lava.

Muamua, e taua tagata uma aua o i tatou uma o fanau a le Atua. Na te silafia i tatou, e alofa ia i tatou, ma e finagalo ia tatou manuia ma toe foi atu ia te Ia. E tatau ona tatou aoao e faalagolago i Lona alofa ma i Lana lava taimi ae le o o tatou lava manaoga lē atoatoa ma lē onosai.

Lua, e ui ina tatou talitonu atoatoa i le suiga tele o le loto o loo faamatala mai i tusitusiga paia (tagai Mosaea 5:2; Alema 5:12–14, 26), ae e tatau ona tatou malamalama e tele lava ina faasolosolo malie mai, ae o le taimi lava e tasi pe o taimi uma foi, ma e tali i fesili patino, aafiaga, ma atugaluga faapea foi a tatou suesuega ma tatalo.

Tolu, e tatau ona tatou manatua o se faamoemoega faavae lava o le olaga o le suesueina ma tofotofoina, ma o lea e tatau ai ona tatou aoao ia tuputupu ae mai a tatou luitau ma ia faafetai mo lo tatou iloaina, e le mafai ona tatou mauaina i se ala faigofie.

Fa, e tatau ona tatou aoao e faalagolago i mea ua tatou talitonu i ai, po o le iloa o mea e lagolagoina i tatou i taimi o le le mautonu po o faafitauli foi o loo tatou mafatia ai.

Lima, e pei ona sa aoao mai e Alema, o le mauaina o se molimau e masani lava o se alualu i luma i se paluga o le faamoemoe, talitonu ma i’u ai ina iloa le moni o se mataupu faavae patino, aoaoga faavae po o le talalelei lava ia (tagai Alema 32).

Ono, o le aoao atu o se tasi i mea ua tatou iloa, e faamalolosia ai a tatou lava molimau a o tatou atiina ae le isi. A e tuu atu i se tagata se tupe po o se meaai, o le a toesea au mea. Peitai, a e faasoa atu lau molimau, e faamalosia ai ma faateleina e le gata i lē na te tuuina atu ae faapea i lē na faalogo i ai.

Fitu, e tatau ona tatou faia mea laiti ae o mea e tatau ai ma ia faia e le aunoa. Tatalo, suesue i tusitusiga paia ma le talalelei, auai i sauniga Lotu, tapuaiga i le malumalu, faataunuuina o asiasiga a faiaoga asiasi ma faiaoga o aiga ma isi tofiga e faamalolosia ai lo tatou faatuatua ma valaaulia ai le Agaga i o tatou olaga. A tatou le amanaiaina se tasi o nei avanoa, ua tatou tuua a tatou molimau i se tulaga lamatia.

Valu, e le tatau ona tatou faia ni tulaga faatonuina maualuluga atu mo isi nai lo i tatou lava. Ua tele taimi tatou te faatagaina ai mea sese po o toilalo o isi, aemaise lava o taitai po o tagata o le Ekalesia, e faatosinaina ai o tatou lagona mo i tatou lava po o a tatou molimau. O faigata o isi tagata e le o se ‘alofaga lea mo o tatou faaletonu.

Iva, e lelei le manatua o lou tuvaelua ia te oe lava pe a e faia se mea sese e mafai ona avea ma mea matautia e faapei o le le manatu mamafa pe a manaomia le salamo moni.

Sefulu, e tatau ona malamalama pea o le Togiola a Keriso e aoga atoatoa pea lava mo i tatou taitoatasi pe a tatou faatagaina ai. Ona sologa lelei lava lea o isi mea uma, pe a faaauau pea ona tatou tauivi ma auiliiliga patino, mausa po o vaega o misi mai lo tatou faatuatua.

Ou te faafetai mo le malamalamaaga, malosiaga ma molimau a le tele o a’u uo talavou ma paaga lelei. A ou mafuta atu ia i latou e faamalosia a’u, ae a ou iloa foi o la e mafuta ma isi, e faamalosiauina au i le iloa o mea lelei o loo latou faia ma le auaunaga o loo latou tuuina atu mo le Matai o loo latou tapuai i ai ma taumafai e usita’ia.

E faia e tagata mea lelei ma le taua aua e i ai a latou molimau. E ui e moni lenei mea, ae tatou te maua foi molimau ona o mea tatou te fai. Na fetalai Iesu:

“O la’u mataupu, e le o sa’u lava, a o lana na auina mai a’u.

“Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:16–17).

“Afai tou te alolofa mai ia te au, ia outou tausi mai i a’u poloaiga” (Ioane 14:15).

E faapei o Nifae ma Mamona anamua, “Ou te le iloa le uiga o mea uma” (1 Nifae 11:17; tagai foi O Upu a Mamona 1:7), ae se’i ou ta’uina atu le mea ua ou iloa.

Ou te iloa o loo soifua le Atua lo tatou Tama Faalelagi ma e alofa ia te i tatou. Ou te iloa o Lona Alo tulaga ese faapitoa, o Iesu Keriso, o lo tatou Faaola ma le Togiola ma o le ao o le Ekalesia, lea o loo tauaveina Lona suafa. Ou te iloa na oo Iosefa Samita i mea uma sa ia taulogologo maia ma aoao mai e tusa ai ma le Toefuataiga o le talalelei i o tatou aso. Ou te iloa o loo taitaia i tatou e aposetolo ma perofeta i aso nei ma o loo umia e Peresitene Thomas S. Monson ki uma o le perisitua, e moomia e faamanuiaina ai o tatou olaga ma tulei ai i luma le galuega a le Alii. Ou te iloa tatou te aia uma i lenei malamalama, ma afai o e tauivi, e mafai ona e faalagolago i le moni aiai o molimau ua e faafofoga i ai mai lenei pulelaa i lenei konafesi. Ua ou iloa nei mea ma ou te molimau atu ai i le suafa o Iesu Keriso, amene.