Na Veisorovaki sa Kovuta na Mosi Kecega

Au raica ni dua na gauna bibi ni noqu cakacaka vakavuniwai a taurivaki ena qaravi ni mosi. E voleka ni veisiga kece ga au na dau vakavuna na mosi niu veisele—kau qai dau laki tovolea tale vagumatua meu vakamamadataka ka kauta laivi sara yani na mosi oqo.

Au dau vakasamataka vakatitobu na inaki ni mosi. E sega ni dua vei keda ena vakuwai mai na mosi. Au sa raica na duidui ni nodra taqeya rawa na tamata na ka oqo. Eso era yalorarawa ka gole tani mai vua na Kalou, ka so era vakatara na nodra vakararawataki mera volekata kina na Kalou.

Me vakataki kemuni, au sotava talega na mosi. Na mosi e veivakayadrati tiko ki na cakacaka ni veivakabulai. E vakavulica meda dauvosota. Oqori beka na vuna eda vakayagataka kina na vosa patient vei ira era tauvimate.

E vola kina vakaoqo o Elder Orson F. Whitney: “E sega ni maumau na mosi eda vakararawataki kina, se vakatovolei eda sotava. E vakavulici keda, me vakatorocaketaki kina na keda ituvaki me vaka na vosota, vakabauta, yaloqaqa, kei na yalomalumalumu. … Sa ikoya na rarawa kei na veivakararawataki, cakacaka vakaukauwa ni sotavi na dredre, eda sa na qai rawata na vuli ka da lako mai kina eke meda mai vulica.” ¹

A kaya talega vakakina o Elder Robert D. Hales:

“Na mosi ena rawa ni vakayalomalumalumutaki iko mo vakanananu kina vakatitobu. Au vakavinavinakataka na noqu curuma rawa na ka oqo. …

“Au sa vulica rawa ni oti e dua na veisele levu ni tautauvata ga na mosi ni yago kei na vakabulai ni yago vata kei na mosi vakayalo kei na vakabulai ni yalo ena gauna ni veivutuni.”²

E sega ni dau noda cala tu ga na noda dau sotava e vuqa na rarawa. E wavoliti keda tu na veika tawakilai, ituvaki veicalati se veivakararawataki, tauvimate e veivakataotaki, ka vakakina na mate ka dau yaco mai ki na noda bula oqo. Sa vakakina, na noda rawa ni sotava na veivakararawataki ena vuku ni nodra ivakarau eso.³ E raica o Liai ni sa sotava o Jekope “ e vuqa na leqa kei na rarawa, … ena vuku ni nodratou itovo ca na [tuakana].”⁴ E tiki ni ituvatuva ni bula marau nei Tamada Vakalomalagi na veisaqasaqa. Eda na sotava na veika e vuqa meda kila vinaka kina na loloma nei Tamada kei na noda gadreva dina na veivukei ni iVakabula.

E sega ni wanono lo voli tikoga na iVakabula. E kila vakavinaka sara tu ga Vakaikoya na mosi eda dau sotava.

“A sa colata ko koya na rarawa ni tamata kecega, io, na rarawa ni veika bula kecega, na tagane kei na yalewa, kei na gone.”⁵

“Ena vuku ni ka oqori tou toro doudou kina ki na itikotiko vakaturaga loloma, meda vinakati kina, meda lomani talega ka vukei ena gauna e yaga kina.”⁶

Ena gauna eso ni rarawa bibi, eda temaki meda taroga kina, “Sa sega beka na ibotani mai Kiliati; sa sega beka na vuniwai mai kea?”⁷ Au vakadinadinataka ni kena isau na io, e tiko e kea e dua na vuniwai. E kovuta na Veisorovaki i Jisu Karisito na ituvaki kei na inaki kece ni bula oqo.

E dua tale na mataqali mosi eda dauvakavuna. E umanaki vakatitobu tu e lomada na mosi vakayalo ka vakilai kina na karamaca, ka vakakina noda kuretaki ena dua na“ka rerevaki tawakilai” me vaka e vakamacalataka o Alama.⁸ Sa irevurevu ni noda caka cala kei na tawa veivutuni. Sa tiko na iwali raraba ka dodonu sara ni mosi talega oqo. Sa mai vua na Tamada, ki vua na Luvena, sa vakakina kivei keda yadua eda sa gadreva dina meda cakava na ka kecega meda veivutuni rawa kina. E kaya na Karisito, “Saumaki ka lesu mai vei au meu vakabulai kemudou.”⁹

Na Karisito Vakaikoya a vakavulica na ka oqo:

“A sa talai au mai ko Tamaqu meu mai laveti cake ena kauveilatai; ia au sa laveti cake ena kauveilatai, meu kauti ira mai kina na tamata kecega kivei au. …

“Ia, me vaka sa lewa ko Tamaqu au na kauti ira mai na tamata kecega kivei au.”¹⁰

Sa qai koya beka na nona cakacaka bibi duadua me gumatua tiko vei keda yadua, na tamata yadudua, me laveta, vakalougatataka, vaqaqacotaka, tokona, dusimaka ka vosoti keda.

Me vaka na raivotu nei Nifai, ni sa vakanamata na cakacaka vakalotu i Karisito ena vuravura oqo ki na nodra vakalougatataki ka vakabulai na tauvimate mai na kedra ituvaki taucoko—yago, vakasama, kei na yalo.“Au sa raica e lewevuqa era sa tauvimate kei ira sa vauci tu ena malumalumu kecega. … Ia sa vakabulai ira na Lami ni Kalou ena nona kaukauwa.”¹¹

A parofisaitaka talega o Alama ni“na mai vunau voli ko koya, ena vosota na ka rarawa, na veivakararawataki kei na veivakatovolei kecega; ni … na colata ko koya na nodra rarawa kei na nodra ivalavala ca na nona tamata. …

“Ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma.”¹²

Ena noqu a mai davo toka vaka e dua na tauvimate ka sega ni vaka e dua na vuniwai ena dua na imocemoce e valenibula ena dua na bogi levu, au a wilika ka baci wilika tale na veitikina o ya. Au sa vakasama sara, “E yaco beka vakacava? Baleti cei? Na cava e lavaki? Sa vaka beka na vosoti ni ivalavala ca? Meda na cakacakataka beka na nona loloma kei na veivukei?” Niu vakasamataka tiko, au sa mai kila sara ni Nona gauna ni bula e vuravura oqo a digitaka kina me vakila na mosi kei na rarawa me kilai keda rawa kina. Meda sa qai kila vakakina na titobu ni bula e vuravura oqo meda kilai Koya vinaka kina kei na keda inaki tawamudu.¹³

A vakavulica kina o Peresitedi Henry B. Eyring: “Ena vakacegui keda ni da sa waraka tu mai vakadede na veivuke yalataki ni iVakabula, ni kila vinaka tu o Koya, mai na ka e sa sotava oti, me veivakabulai ka vukei keda.…Ia na vakabauta me baleta na kaukauwa o ya ena solia vei keda na vosota ni da masu tiko ka cakacaka ka waraka na veivuke. Arawa Vua me kila me vukei keda vakacava ena ivakatakila, ia a digitaka me vuli ga mai na veika e a sotava sara ga vakai Koya.”¹⁴

Au a vakila ena bogi oya ni sa ovici au ena Nona loloma.¹⁵ A suasua na noqu ilokoloko ena wainimataqu ni vakavinavinaka. Au a qai laki wilika ena Maciu na cakacaka vakalotu nei Karisito e vuravura, kau kunea talega kina oqo: “Ia ni sa yakavi mai, sa kau mai vei koya e lewevuqa … a sa … vakabulai ira kecega sa tauvimate.”¹⁶ Sa vakabulai irakece sa lako mai Vua. E sega ni vakatala laivi e dua.

Me vaka a vakatavulica o Elder Dallin H. Oaks: “Na veivakalougatataki ni veivakabulai e yaco mai ena levu na sala, era dui ganita yadua na noda gagadre, me vaka e kila o Koya e lomani keda vakalevu duadua. Ena so na gauna ena walia na noda tauvimate se laveti na noda icolacola ena dua na ‘ veivakabulai’ “Ia ena so na gauna eda sa ‘vakabulai’ ena kena soli na kaukauwa kei na kila se na vosota meda colata rawa kina na icolacola e vakataqari vei keda.”¹⁷ Sa rawa vei ira kece era lako mai me “karoni ira ko Jisu.”¹⁸ Era na vakabulai na tamata kecega ena Nona kaukauwa. Sa rawa me takali yani na mosi. Eda na kunea ga Vua “na vakacegu ni [yaloda].”¹⁹ Ena sega beka ni vakasauri ga na veisau ni noda bula vakayago, ia sa rawa me takali yani na noda mosi, lomaleqa, rarawa, kei na rere ena Nona iwali ni veivakacegui kei na veivakabulai.

Au raica ni ra dau ciqoma vakarawarawa tu na gone na mosi kei na rarawa. Era vosota toka ena yaloraramusumusu kei na yalomalumalumu. Au dau vakila na totoka kei na vinaka ni yalo e wavoliti ira tu na gone.

E tinikava na auwa na kena seleti na dra ca e na suitu nei Sherrie yabaki tinikatolu. Ni sa vakilai koya mai ena I.C.U, a kaya sara: “Ta, e tu oqo o Nei Cheryl, kei… Tukaqu o Norman kei BubuBrown.Ta, o cei ga e tu qori e yasamu? E vakataki iko na kena irairai, e balavu ga.… E kaya o koya ni o koya na tacimu o Jimmy.” A se mate sara o tamana lailai ena ceguoca ni se qai yabaki13.

“E volekata ni dua na auwa … na nona vakamacalataki ira tiko na vulagi oqori, o Sherrie …o ira kece na wekana era sa mate. Sa mani moce kaya ena nona wawale.

E muri a qai kaya vei tamana, “Ta, era vukei ira kece tiko na gone era curu tiko ena I.C.U o ira na agilosi.”²⁰

Sa kaya kina na iVakabula vei keda kece:

“Raica dou sa gone lailai ga ka sega ni kila na ka kecega; sa kilikili mo dou tubu cake ena loloma ka kila na ka dina.

“Dou kakua ni rere, koi kemudou na gone lalai. …

“Raica au sa tiko ena kemudou maliwa, ia koi au na ivakatawa vinaka.”²¹

Sa noda bolebole cecere ni bula e vuravura oqo o ya meda “tamata yalosavasava e na vuku ni isoro i Karisito.”²² Na mosi e daru sotava sa buturara vinaka beka e dau vakarautaki vakalevu cake kina na ka oqo. Ena kena cecere sara, sa rawa meda yalo vakataki ira na gone, vakamalumalumutaki keda, ka “da masu tiko ka wawa ka cakacaka” ena vosota me vakabulai kina na yaloda kei na yagoda. ²³Ni da sa vakasavasavataki oti ena noda vakatovolei, eda sa vakataki Jope, meda sa qai “lako mai vaka na koula.”²⁴

Au vakadinadinataka ni sai Koya na noda Dauveivueti, noda iTokani, noda Dautataro, na vuniwai cecere, na dauveivakabulai cecere. Sa mai Vua na noda vakacegu kei na vakagalalataki mai na noda mosi kei na ivalavala ca, kevaka wale ga meda na lako yani Vua ena yalomalumalumu. Sa “rauti keda na [Nona] loloma.”²⁵Ena yaca i Jisu Karisito, emeni.