E Nehenehe te Taraehara e Faaora i te mau Mauiui atoa

I te tau a rave ai au i te ohipa tapu, ua haa vau i te rahiraa o te taime i roto i te parau no te mauiui. Fatata pauroa te mahana, te reira noa te ohipa—e te rahiraa o ta’u tautooraa o te tamataraa ïa e arai e e tamarû i te mauiui.

Ua feruri maite au i te tumu o te mauiui. Aore hoê o tatou i ere i te mauiui. Ua ite au i te taata i te arairaa i te reira na roto i te mau rave‘a rau. Te tahi pae ua fariu ê ratou i te Atua i roto i te riri, area te tahi pae ra ua faariro ïa ratou i to ratou mauiui ei rave‘a haafatataraa ia ratou i te Atua.

Mai ia outou, ua farerei atoa vau iho nei i te mauiui. Na te mauiui e arai i te parau no te faaoraraa. Pinepine oia i te haapii mai ia tatou i te faaoroma‘i. No reira paha tatou e faaohipa ai i te parau ra patient [na roto i te reo farani] no te taata ma‘i.

Ua papa‘i o Elder Orson F. Whitney e : « Te mauiui ta tatou e farii nei, te tamataraa ta tatou e farerei nei, e ere ïa i te mea faufaa ore. E haapiiraa te reira ia tatou, e faahotu te reira i to tatou mau aravihi mai te faaoroma‘i, te faaroo, te mana‘o puai e te haehaa… E mea na roto i te oto e te mamae, te itoito, e te ati, e roaa ai ia tatou te ite o ta tatou i haere mai e titau i ô nei ».¹

Mai te reira atoa te parau a Elder Robert D. Hales :

« Na te mauiui e faatupu i te haehaa e ti‘a ai ia tatou ia feruri maite. E oaoa rahi to’u i te fariiraa i te reira iteraa…

« Ua haapii mai au e, te mauiui tahuti nei e te faaoraraa o te tino i muri a‘e i te hoê tapuraa teimaha, ua aifaito noa ïa i te mauiui pae varua e te faaoraraa o te varua i roto i te parau no te tatarahaparaa ».²

E rave rahi o to tatou mauiui e ere ïa no tatou te hape. Ua haatihia tatou i te mau ohipa mana‘o-ore-hia, te mau mea e faaapiapi nei i to tatou mau hinaaro e aore râ, te mau mea e faainoino nei ia tatou, te ma‘i e tae roa’tu i te pohe, e na te reira mau mea ho’i e haape‘ape‘a nei i to tatou oraraa tahuti nei. Taa ê noa’tu i te reira, e farerei paha tatou i te ati na roto i te ohipa i ravehia e te tahi atu mau taata.³ Te parau ra o Lehi i ni‘a ia Iakoba e, « ua pohe oe… i te oto rahi no te ohipa iino a to oe ra na tuaana ».⁴ E tuhaa na mea e piti i roto i te faanahoraa no te oaoa a te Metua i te Ao ra. Te farerei paatoa nei tatou i te pato‘iraa e na te reira e faaite mai ia tatou i te here o to tatou Metua e i to tatou hinaaro i te tauturu a te Faaora.

Aita te Faaora e hi‘o mamu noa mai ia tatou. Ua ite papû oia i te mauiui ta tatou e farerei nei.

« Ua faaoroma‘i oia i te mauiui o te taata atoa, oia ïa, te mauiui o te mau taata atoa, te mau tane atoa, e te mau vahine atoa, e te mau tamarii atoa ho’i »⁵

« E teie nei, e faafatata noa’tu tatou i te terono o te aroha mau ra, ia arohahia mai tatou nei, e ia noaa te maitai ei turu mai ia tatou i te tau e au ai ra ».⁶

I te tahi mau taime, i roto i te mauiui rahi, e tupu mai te mana‘o ui e, « Aita (anei) e raau i Gileada ; aita (anei) o reira e tahu‘a ? »⁷ Te faaite papû nei au e, oia, te vai ra te hoê tahu‘a. Na te Taraehara a Iesu Mesia e faaora i teie mau ati e teie mau opuaraa o te tahuti nei.

Te vai ra te tahi atu huru mauiui e o tatou iho ïa te tumu. E vai te mauiui pae varua i roto i te hohonuraa o to tatou aau e e ore roa e rave‘a ia faaore, e tae roa i te haamauiui-rahi-hia i te« horiri faito ore » mai ta Alama i faaite mai.⁸ No roto mai te reira i ta tatou ïa mau ohipa ino e te tatarahapa ore. No teie atoa mauiui, te vai ra te rave‘a rahi e te maitai. No ô mai te reira i te Metua ra, na roto i te Tamaiti, e no tatou tata‘itahi te reira o tei hinaaro e rave i te mau mea atoa i titauhia no te tatarahapa. I parau mai te Mesia e, « e ore anei outou e fariu mai ia’u i teie nei … e e faaroo mai, ia faaorahia outou e au ra ? »⁹

Te Mesia iho tei haapii mai e : « I tono mai ta’u Metua ia’u ia faateiteihia vau i ni‘a i te satauro ; e ia oti ta’u faateitei-raa-hia i ni‘a i te satauro ra, ia ume mai au i te mau taata aota ra ia’u… no reira, i te au i te mana o te Metua, e ume au i te mau taata atoa ra ia’u ».

« I tono mai ta’u Metua ia’u ia faateiteihia vau i ni‘a i te satauro ; e ia oti ta’u faateitei-raa-hia i ni‘a i te satauro ra, ia ume mai au i te mau taata aota ra ia’u…

« No reira, i te au i te mana o te Metua, e ume au i te mau taata atoa ra ia’u ».¹⁰

Penei a‘e ta’na ohipa faufaa roa‘e tei roto ïa i te ohipa e tupu ra i roto ia tatou tata‘itahi, te taata iho, no te faateitei, no te haamaitai, no te haapuai, no te paturu, no te arata‘i e no te faaoreraa i ta tatou iho hara.

Mai ta Nephi i ite i roto i te orama, ua horo‘a te Mesia i te tuhaa rahi o to’na oraraa i te tahuti nei no te haamaitai e no te faaora i te feia tei roohia i te mau huru ma‘i atoa—to te tino, to te mana‘o, e to te varua. « E ite atu ra vau i te mau taata ma‘i, o tei pohe i tera ma‘i i tera ma‘i … e ua faaite mai [te melahi] i teie mau mea atoa ia’u… E ua faaorahia’tura ratou i te mana o te Arenio a te Atua ».¹¹

Ua tohu atoa o Alama e « e haere atu Oia ma te faaoroma‘i i te mauiui, e te ati, e te mau huru faahemaraa atoa ra ; e … e rave oia i te mauiui e te mau ma‘i o ta’na mau taata ia’na iho…

« Ia faaîhia to’na ra aau i te aroha … ia ite oia na roto i te tino i te rave‘a e faaora’i i to’na mau taata i to ratou paruparuraa ra ».¹²

I te hoê maororaa pô, tei te fare ma‘i au i ni‘a i te ro‘i, i teie taime e taata ma‘i au, e ere i te taote, ua tai‘o vau i taua mau irava ra e rave rahi taime. « E mea nahea te rave-raa-hia ? No vai ? Eaha te titauhia no te farii i te reira ? E au anei mai te faaoreraa i te hara ? E titauhia anei ia tatou ia noaa to’na here e ta’na tauturu ia tatou ? » A feruri maite noa ai au i te reira, ite a‘e ra vau e, i roto i To’na oraraa tahuti nei, ua ma‘iti te Mesia ia farii i te mauiui e te ati ia ti‘a ia’na ia haroaroa ia tatou. Penei a‘e e ti‘a atoa paha ia tatou ia farii i te fifi o te tahuti nei ia ti‘a ia tatou ia haroaroa Ia’na e i ta tatou fâ mure ore.¹³

Ua haapii mai te peresideni Henry B. Eyring e : « E tamahanahana te reira ia tatou a tia’i ai tatou ma te oto ia tae mai te tamarû a te Faaora, e ua ite Oia, na roto ia’na iho, e nahea ia faaora e ia tauturu ia tatou… E na te faaroo i roto i taua mana ra e horo‘a ia tatou i te faaoroma‘i a pure ai tatou e a rave ai i te ohipa e a tia’i ai i te tauturu. Ua ite Oia nahea ia tauturu ia tatou na roto noa i te heheuraa, tera râ, ua ma‘iti Oia ia haapii na roto i to’na iho iteraa ».¹⁴

Ua ite au « i te rima faaati o to’na here » i taua pô ra.¹⁵ Ua rari to’u turua i te roimata o te aau mehara. I muri a‘e, a tai‘o ai au i roto i te buka a Mataio no ni‘a i te oraraa tahuti nei o te Mesia, ua itehia ia’u te tahi atu mea : « I To’na haereraa mai, ua hopoi maira ratou ia’na ra e rave rahi … e faaora ihora i te feia atoa i pohe i te ma‘i ».¹⁶ Ua faaora Oia i te feia atoa i haere mai Ia’na ra. Aore hoê i faaho‘ihia.

Mai ta Elder Dallin H. Oaks i haapii mai : « Ua rau te huru no te mau haamaitairaa o te faaoraraa ta tatou e farii, e ua au te reira mau haamaitairaa i to tatou mau hinaaro tata‘itahi, mai Ia’na i ite i te reira, e o tei here rahi ia tatou. I te tahi taime e tinai te ‘faaoraraa’ i to tatou ma‘i e aore râ, e haamama oia i ta tatou hopoi‘a. Tera râ i te tahi taime e ‘faaorahia’ tatou na roto i to tatou fariiraa i te puai e aore râ, i te haroaroa e aore râ, te faaoroma‘i, no te amo i te hopoi‘a i tuuhia i ni‘a ia tatou ».¹⁷ E pahono Oia ia tatou mai Ta’na i na reira i te mau taata atoa.¹⁸ E ora te mau varua atoa na roto i To’na mana. E marû te mau mauiui atoa. I roto Ia’na e « noaa ho’i te ora i to [tatou] varua ».¹⁹ Eita paha te huru o to tatou oraraa e taui oioi, to tatou râ mauiui, to tatou pe‘ape‘a, to tatou ati e to tatou mata‘u, e nehenehe te reira e horomiihia i roto i To’na ra hau e i Ta’na raau faaora.

Ua ite au e, pinepine te tamarii i te farii ohie noa i te mauiui e i te ati. E farii ratou i te reira ma te maniania ore e te haehaa e te marû. Ua ite to’u aau i te hoê varua nehenehe e te marû tei haati i teie mau tamarii-rii.

O Sherrie te hoê tamahine iti ahuru ma toru matahiti, tei tapuhia ahuru mamaha hora te maoro no te hoê potaa mariri aitaata i roto i to’na puo ivi. A haere marû noa ai oia i te araara mai i roto i te piha utuuturaa, na ô maira oia e : « Papa, tei ô nei o tatie Cherry, e … tei ô nei atoa o papa ruau Norman … e o mama ruau Brown. E papa, o vai tera e ti‘a ra i piha‘i iho ia oe ?… E hoho‘a roa o’na ia oe, e mea huru rahi rii noa a‘e râ… Te na ô mai nei oia e, o Jymmy oia, to oe taea‘e ». Ua pohe to’na tonton Jimmy i te 13 raa o to’na matahiti.

« Fatata hoê hora te maoro to Sherrie … faaiteraa mai i te mau taata tei haere mai e farerei ia’na, e mau fetii ana‘e no’na tei pohe a‘e na. No to’na rohirohi, ua vare‘a a‘e ra oia i te taoto ».

I muri a‘e ra ua parau oia i to’na metua tane e, « papa, pauroa te mau tamarii i roto i teie piha utuuturaa, e mau melahi ana‘e to ratou tei haere mai e tauturu ia ratou ».²⁰

Teie te te Faaora i parau ia tatou paatoa :

« Inaha, e mau tamarii-rii outou e aita e ti‘a ia outou ia amo i te mau mea atoa i teie nei ; ia tupu â ho’i outou i te aroha e i te ite i te parau mau e ti‘a’i.

« Eiaha e mata‘u, e te mau tamarii-rii, no te mea na’u ho’i outou…

« No reira tei rotopu ïa vau ia outou na, e o vau nei â te tia‘i mamoe maitai ».²¹

Ta tatou titauraa rahi i te tahuti nei o te riroraa ïa « ei taata mo‘a na roto i te taraehara a te Mesia ».²² I roto paha i te mauiui ta outou e ta’u atoa e farerei nei e ite-maitai-hia ai te faito mau o teie faanahoraa. I roto i te fifi rahi, e nehenehe tatou ia riro mai te tamarii te huru i roto i to tatou aau, ia faahaehaa ia tatou iho, e « ia pure, ia ohipa e ia tia‘i »²³ ma te faaoroma‘i ia faaorahia to tatou varua e to tatou tino. Mai ia Ioba, ia oti tatou i te haamaitaihia na roto i te mau tamataraa, e riro mai tatou « mai te auro te huru ».²⁴

Te faaite papû nei au e, o Oia to tatou Faaora, to tatou Hoa, e to tatou Paruru, te Taote Rahi, te Faaora Rahi. Na roto ia’na e itehia ai ia tatou te hau e te tamahanahana i roto i to tatou mauiui e ta tatou mau hara, mai te mea e, e haere mai tatou Ia’na ra ma te aau haehaa. To’na nei « maitai atire ïa ».²⁵ Na roto i te i‘oa o Iesu Mesia ra, amene.