O Le Fatu o le Avea ai ma Soo

Mai lava i le amataga o taimi, sa aoao mai le Alii, ina ia avea ma Ona nuu, e tatau ona tasi i tatou i le loto ma tasi le mafaufau.¹ Sa faamatala mai foi e le Faaola o poloaiga e sili e lua i le tulafono, “Ia e alofa atu i le Alii lou Atua ma lou loto atoa, ma lou agaga atoa, ma lou mafaufau atoa,” ma “ia alofa atu foi i le lua te tuaoi ia pei o oe lava ia te oe.”² Ma le mea mulimuli, e lei leva ona faatulaga le Ekalesia, ae poloaiina e le Alii le au paia ina ia “asiasi i e matitiva ma e le tagolima e fesoasoani atu ai i lo latou faaolatotoga.”³

O le a le autu masani i nei poloaiga uma? E tatau ona tatou fealofani ma feauaunaa’i. O le mea moni, o le fatu lea o le avea ai ma soo i le Ekalesia moni a Iesu Keriso.

A o tatou faamanatuina le 75 tausaga o le polokalama o le uelefea a le Ekalesia, ua faamanatu mai ai ia i tatou faamoemoega o le uelefea o le fesoasoani i tagata o le ekalesia ina ia fesoasoani ia i latou lava ma faalagolago le tagata ia te ia lava, ia tausia e matitiva ma e le tagolima, ma auauna atu. Ua faatulagaina e le Ekalesia ana punaoa e fesoasoani ai i tagata o le au paia ia maua mea faaletino, faaleagaga, faaleagafesootai, ma faalelagona mo lo latou lava soifua manuia, o o latou aiga, ma isi. O le tofi o le epikopo e aofia ai se tiutetauave faapitoa e tausia e matitiva ma e le tagolima ma ia faatautaia na punaoa mo tagata o lana uarota. E lagolago atu i ai korama a le perisitua, Aualofa, aemaise o faiaoga o aiga ma faiaoga asiasi i ana taumafaiga.

O le Aualofa o le fatu lea o le uelefea. Ina ua faatulagaina e le Perofeta o Iosefa Samita le Aualofa i le 1842, sa ia saunoa atu i tamaitai, “O le amataga lenei o aso e sili atu mo e matitiva ma e le tagolima.”⁴ Na ia ta’u atu i tamaitai o le faamoemoega o le Aualofa o le “faaolatotoga lea i e matitiva, o e le tagolima, o fafine ua oti a latou tane ma fanau ua matuaoti, ma le faatinoina o faamoemoega tauleleia uma. … O le a latou liligiina atu le suauu ma le uaina i loto ua manunu’a o e faanoanoa, o le a latou soloia loimata o fanau ua matuaoti, ma faafiafiaina loto o fafine ua oti a latou tane.”⁵

Sa ia ta’ua foi e faapea o le Sosaiete, “E ono faama’itea ia tuagane e faia galuega lelei a o latou taulimaina mea e manaomia e e matitiva—e saili i e o manaomia le fesoasoani alofa, ma tuuina atu mea latou te manaomia; e fesoasoani ai i le faasa’oina o amio tauleleia ma le faamalolosia o le amio mama i le nuu.”⁶

O loo galulue faatasi alii ma tamaitai o le Ekalesia i le aumaia o le toomaga ia i latou e manaomia. E tuuina atu e le au Perisitua le lagolago e tatau ai mo i latou e manaomia le taitaiga ma le fesoasoani faaleagaga. E faamanuiaina e faiaoga musuia o aiga ia olaga ma tuuina atu faamanuiaga o le talalelei i aiga taitasi. E le gata i lea, latou te ofoina atu lo latou malosi ma taleni i isi auala e pei o le fesoasoani atu i se aiga e manaomia ona lipeaina se fale, fesoasoani i se aiga e siitia, pe fesoasoani foi i se tuagane e saili se galuega e manaomia.

E asiasi atu peresitene o Aualofa i aiga e fuafua ia mea o manaomia e avatu i se epikopo. E vaavaai ma tausia e faiaoga asiasi musuia ia uso ma aiga. E tele lava o latou e muamua ona tali atu i taimi e manaomia vave ai se fesoasoani. E saunia e uso o le Aualofa ni meaai, avatu le auaunaga alofa, ma le lagolago faifai pea i taimi o faigata.

Na olioli tagata o le Ekalesia i le lalolagi atoa i aso ua mavae, ma e tatau foi ona olioli i le taimi nei i avanoa ua tatou maua e auauna atu ai. O a tatou taumafaiga tuufaatasi e avatu ai le toomaga ia i latou o e matitiva, fiaaai, mafatia, pe faanoanoa, ma faaolaina ai agaga.

Ua tofu le epikopo ma se faleteuoloa a le Alii ua ia te ia, lea e faatuina a o tuuina atu e tagata faamaoni o le ekalesia i le epikopo o latou taimi, taleni, tomai, agaalofa, o oloa, ma tupe e tausia ai e matitiva ma fausia ai le malo o le Atua i le fogaeleele.⁷ E mafai ona tatou tofu sao uma i le faleteuoloa o le Alii pe a totogi a tatou taulaga anapogi ma ia faaavanoa atu a tatou punaoa i le epikopo e fesoasoani ai i e le tagolima.

E ui i le saoasaoa o le suiga o le lalolagi, e le suia lava mataupu faavae o le uelefea i le gasologa o taimi aua o upumoni faalelagi musuia ua faaalia. A faia e tagata o le Ekalesia ma o latou aiga mea uma e mafai ona latou faia e tausia ai i latou lava ae a le gafataulimaina ai mea faavae e manaomia, ua sauniuni le Ekalesia e fesoasoani i ai. E vave ona taulimaina ia manaoga mo taimi pupuu, ae faia se fuafuaga e fesoasoani ai i le tagata ia faalagolago ia te ia lava. O le faalagolago o le tagata ia te ia lava, o le gafatia lea ona saunia mea e tatau ai i le faaleagaga ma le faaletino o le olaga mo le tagata lava ia ma le aiga.

A tatou faateleina le maualuga o lo tatou lava faalagolago ia i tatou lava, ua tatou faateleina lo tatou gafatia e fesoasoani ai ma auauna atu i isi i le auala na faia ai foi e le Faaola. Tatou te mulimuli i le faataitaiga a le Faaola pe a tatou auauna atu i e le tagolima, o e mama’i, ma e puapuagatia. A oo ina avea le alofa ma mataupu faavae taiala o lo tatou tausiga o isi, ona avea lea o la tatou auaunaga ia i latou ma faatinoga o le talalelei. O le talalelei i lona taimi e aupito sili ona manaia. O le amioatua e sili ona lelei lea.

I o’u tofiga eseese i le Ekalesia, ua faalotomaulaloina ai lava au i le alofa ma le popolega o loo faaalia e epikopo ma taitai o Aualofa mo a latou lafu. A o avea au ma peresitene o le Aualofa i Chile, i le amataga o le 1980, sa feagai le atunuu ma se pau tele o le tamaoaiga ma e 30% na leai ni galuega. Sa ou molimauina le galulue ma le totoa o peresitene o Aualofa i le “faia o mea lelei⁸ i lalo o nei tulaga faigata. Sa latou faatinoina le mau o loo i le Faataoto 31:20: “Ua faamafola lona lima i le ua tigaina; ua tuu atu foi ona lima i le ua mativa.”

O uso e matua laiti ni mea mo o latou lava aiga, sa fesoasoani i taimi uma ia i latou sa latou manatu e tele atu lo latou manaomia. Ona ou malamalama atili ai lea i le mea na silasila i ai le Faaola ina ua ia fetalai i le Luka 21:3–4:

“E moni, ou te fai atu ia te outou, o mea a lenei fafine mativa ua oti lana tane ua lafo i ai, ua sili lea ia i latou uma:

“Aua o i latou uma, ua latou lafo atu i taulaga a le Atua nisi mea mai a latou mea ua tele; a o ia ua mativa, ua lafo e ia ana mea uma e ola ai sa ia te ia.”

I ni nai tausaga mulimuli ane, sa ou molimauina ai le mea lava lea a o ou peresitene i le Aualofa i Atenitina, ina ua feagai le atunuu ma le matua maualuga o le tau o le soifuaga i le atunuu, ma le fai ifo o le tamaoaiga na sosoo ai, na aafia ai le toatele o o tatou tagata faamaoni. Sa ou toe molimauina foi i a’u asiasiga talu ai i Kinshasa i le Malo Temokarasi o Congo; Antanarivo i Matakasa, ma Bulwayo i Zimbabwe. O tagata o uarota i soo se nofoaga, aemaise lava o uso o le Aualofa, o loo faaauau pea ona fausia le faatuatua, faamalolosia tagata taitoatasi ma aiga, ma fesoasoani ia i latou o loo manaomia.

Pe a mafaufau i se uso faatauvaa po o se tuagane e i ai se valaauga o le Ekalesia, ua mafai ona alu atu i se aiga o feagai ma le mativa, faanoanoa, ma’i, po o le le mautonu, ma mafai ona avatu i ai le filemu, toomaga, ma le fiafia, e ofoofogia. Po o fea lava e i ai le uarota po o le paranesi, pe o le a foi le tele po o le laitiiti o se vaega, ua maua e tagata uma o le ekalesia i le lalolagi atoa lena avanoa. E tupu i aso uma ma o loo tupu foi i se isi nofoaga i le taimi lava lenei.

O Karla o se tina talavou o se fanau e toalua. E uumi taimi e faigaluega ai lona toalua o Brent, ma e itula e malaga ai i le galuega e itula foi e toe foi ane ai. E lei leva ona fanau le la tama teine lona lua, ae ona faamatalaina le tala lenei: “O le aso na sosoo ma le aso na ou talia ai le valaauga e avea ma se fesoasoani i le Aualofa a la’u uarota, sa amata ona ou lagona le lofituina. E mafai faapefea ona ou tauaveina le tiutetauave e fesoasoani ai e tausia fafine o la’u uarota a o lea ou te tauivi e tau lava ina faataunuu la’u matafaioi o se ava ma se tina o la’u tama e 2 tausaga le matua ma se pepe faatoa fanau? Ao ou mafaufau i nei lagona, sa amata ona ma’i la’u tama e lua tausaga. Sa ou le mautinoa po o le a le mea e fai mo ia ae pe faapefea foi ona vaai le pepe. O le taimi lava lena, na tu faafuasei mai ai Sister Wasden, o se tasi o o’u faiaoga asiasi. O se tina ua matutua lana fanau, sa ia iloa lelei le mea e fai e fesoasoani ai. Sa ia ta’u mai ia te au le mea e tatau ona ou faia, ae sei alu i le faletalavai e aumai ni sapalai. Mulimuli ane, sa ia faia se fuafuaga e piki ai lo’u toalua i le nofoaga o nofoaafi ina ia vave sau ai e fesoasoani mai ia te au. O lana tali mai i le mea ou te talitonu o se uunaiga mai le Agaga Paia, faatasi ai ma lona naunautai e auauna mai ia te au, o le faamautinoaga lea sa ou manaomia mai le Alii o le a Ia fesoasoani mai ia te au e faataunuu lo’u valaauga fou.”

E alofa le Tama Faalelagi ia i tatou ma silafia o tatou tulaga ma tomai patino. E ui ina tatou sailia Lana fesoasoani i aso taitasi e ala i le tatalo, ae e masani lava e ala mai i se isi tagata Na te taulimaina ai o tatou manaoga.⁹

Na fetalai mai le Alii, “O le mea lea e iloa ai e tagata uma lava o o’u soo outou, pe afai ua outou fealofani.”¹⁰

E faaalia le alofa mama o Keriso pe a tatou tuuina atu le auaunaga e lē manatu faapito. O le fesoasoani o le tasi i le isi o se aafiaga faapaiaina, lea e faaea ai lē na te talia ae faalotomaulalo ai lē na te foai atu. E fesoasoani tatou te avea ai ma soo moni o Keriso.

O le fuafuaga o le uelefea o le faaaogaaga lea o mataupu faavae e faavavau o le talalelei. O le saunia moni lava lea i le ala a le Alii. Ia tatou tofu faafouina lo tatou naunau e avea o se vaega o le faleteuoloa a le Alii e faamanuiaina ai isi.

Ou te tatalo ia faamanuia e le Alii i tatou taitoatasi i se lagona tele atu o le alofa mutimutivale, alofa moni, ma le agalelei. Ou te talosaga atu ina ia faateleina lo tatou naunau ma tomai e aapa atu ai ma fesoasoani i e limavaivai, o e faanoanoa, ma i latou o e puapuagatia; ina ia taulimaina o latou manaoga, ina ia faamalolosia lo latou faatuatua, ma ia faatumuina o latou loto i le faafetai ma le alofa.

Ia faamanuiaina i tatou taitoatasi e le Alii a o tatou savavali ai i le usiusitai i ana poloaiga, Lana talalelei, ma Lona malamalama. I le suafa o Iesu Keriso, amene.