O Le Malumalu Paia—O Se Sulu Ta’iala i le Lalolagi

Ou uso e ma tuafafine pele, e momoli atu o’u alofaaga ma faafeiloai atu ia te outou taitoatasi ma ou te tatalo ia taiala e le Tama Faalelagi o’u mafaufauga ma musuia a’u upu ou te tautala atu ai ia te outou i le aso.

Se’i ou amata atu i se faamatalaga se tasi pe lua e faatatau i savali matagofie sa tatou faalogoina i lenei taeao mai ia Sister Allred ma Epikopo Burton e uiga i le polokalama Uelefea a le Ekalesia. E pei ona ta’ua, o le tausaga nei e atoa i ai le 75 tausaga o lenei polokalama musuia lea ua faamanuiaina ai olaga o le toatele. O se faamanuiaga mo au lo’u iloaina lelei o nisi o i latou sa uluai faatautaia lenei galuega tele—o ali o galuega alofa ma vaaiga mamao.

E pei ona ta’ua e Epikopo Burton ma Sister Allred, ua tuuina atu i le epikopo o le uarota le tiutetauave e tausia ai ma vaaia i latou o ē nonnofo i totonu o tuaoi o lana uarota. O se avanoa foi lena sa ou maua a’o ou pulefaamalumalu o se epikopo talavou i le Aai o Sate Leki, i se uarota e 1,800 ona tagata, e aofia ai fafine e 84 ua oti a latou tane. Sa toatele i latou na manaomia le fesoasoani. Sa toatele i latou na manaomia le fesoasoani. Sa maeu lo’u lotofaafetai mo le polokalama o le Uelefea a le Ekalesia, ma le fesoasoani a le Aualofa ma korama o le perisitua.

Ou te tautino atu o le polokalama Uelefea a Le Ekalesia a Iesu Keriso o le Au Paia o Aso e Gata Ai, e musuia e le Atua Silisiliese.

Ia o’u uso e ma tuafafine, o lenei konafesi ua atoa i ai le tolu tausaga talu ona lagolagoina au o le Peresitene o le Ekalesia. E sa’o lava o ni tausaga sa pisi tele, sa faatumulia i le tele o luitau ae sa i ai ma faamanuiaga e le mafaitaulia. O le avanoa sa ou maua e faapaiaina ai ma toe faapaiaina ia malumalu, o se tasi o faamanuiaga e aupito sili ona paia ma fiafia ai, ma e faatatau i le malumalu ou te fia talanoa atu ai i le aso.

I le konafesi aoao ia Oketopa i le 1902, sa faaalia ai e le Peresitene o le Ekalesia, o Iosefa F. Samita i lana saunoaga amata, le faamoemoe o le a i ai se aso e i ai ni o tatou “malumalu e fausia i vaega eseese o le [lalolagi] o loo manaomia ai mo le faafaigofieina i tagata.”¹

I le 150 tausaga muamua ina ua mavae le faatulagaga o le Ekalesia, mai le 1830 i le 1980, sa 21 ia malumalu na fausia, e aofia ai malumalu o Katelani, Ohio, ma Navu, Ilinoi. Pe a faatusatusa i le 30 tausaga talu mai le 1980, e 115 malumalu na fausia ai ma faapaiaina. O malumalu fou e 3 na fofogaina atu ananafi, e 26 malumalu ua faaopoopo ua fausia nei po ua i ai i le uluai tulaga ua tapenapena ai mo le fausiaina. O le a faaauau pea ona faatupulaia nei fuainumera.

O le sini na faamoemoe i ai Peresitene Iosefa F. Samita mo le 1902, ua avea ma mea tonu. Matou te mananao ia matuai faigofie ona maua e tagata o le au paia le malumalu.

O se tasi o malumalu o loo fausia nei i Manaus, Pasila. I le tele o tausaga talu ai, sa ou faitau ai e uiga i se vaega e silia ma le toaselau tagata o le au paia na tuua Manaus, lea e i le totonugalemu o le vaomatua o Amasone, ae malaga atu i le malumalu e sili ona latalata ane, e tu i Sao Paulo, Pasila—e toeitiiti 2,500 maila mai Manaus. Na malaga na Au Paia faatuatua i se vaa mo aso e fa i le Vaitafe o le Amasone ma ona magavai. Ina ua mae’a lenei malaga i le vai, sa faaee i pasi mo le isi tolu aso e malaga ai i auala gaoa, ma nai meaai laiti ma sa leai se mea e momoe lelei ai.Ina ua mavae aso e fitu ma po e fitu, sa latou taunuu i le malumalu i Sao Paulo, lea na faatino ai sauniga o le faavavau. O le mea moni, na tutusa lava le faigata o la latou malaga toe foi. Peitai, sa latou mauaina sauniga ma faamanuiaga o le malumalu, ma e ui lava ina sa leai ni a latou tupe na totoe, ae sa faatumulia i latou lava i le agaga o le malumalu ma le lotofaafetai mo faamanuiaga sa latou mauaina.² O le taimi nei, ina mavae tausaga e tele mulimuli ane, ua olioli o tatou tagata i Manaus a o latou matamata atu i lo latou lava malumalu ua fausia i auvai o le Vaitafe o Rio Negro. E aumaia e malumalu le olioli i tagata faamaoni o le ekalesia i soo se mea e fausia ai.

O lipoti i osigataulaga na faia ina ia maua ai faamanuiaga e na o malumalu o le Atua e maua ai, e mautinoa lava e ootia ai lo’u loto ma aumaia ai ia te au se lagona faafouina o le agaga faafetai mo malumalu.

Sei ou faasoa atu ia te outou le tala ia Tihi ma Tararaina Mou Tham ma le la fanau e toa 10. Sa auai le aiga atoa i le Ekalesia, vagana ai le afafine e toatasi, i le amataga o le 1960 ina ua o atu faifeautalai i lo latou motu, pe tusa ma le 100 maila (160 km) i saute o Tahiti. E lei leva ae o latou mananao mo faamanuiaga o se aiga e faavavau ua faamauina i le malumalu.

O le taimi lena, o le malumalu aupito latalata ane i le aiga o Mou Tham, o le Malumalu o Hamilton i Niu Sila, e silia ma le 2,500 maila i saute sisifo, ma e na o le malaga taugata i vaalele e mafai ona oo ai i ai. Sa leai se tupe a le aiga toatele o Mou Tham e pasese ai i le vaalele, aua o lea sa ola taufaasoasoa mai mea uma sa faigata ona latou maua mai se tamai faatoaga, ma sa leai foi se avanoa e faigaluega ai i lo latou motu i le Pasefika. O lea sa faia ai e uso Mou Tham ma lona atalii o Gerard se faaiuga faigata, e o e faigaluega i Niu Kaletonia, i le mea o loo faigaluega ai le isi atalii.

Sa faigaluega alii nei e toatolu o le au Mou Tham mo tausaga e fa. Sa na o Uso Mou Tham na faa-tasi ona foi i le aiga talu mai lena taimi mo le faaipoipoga a sona afafine.

Ina ua mavae tausaga e fa, sa lava se tupe na teuina e Uso Mou Tham ma ona atalii e ave ai le aiga i le malumalu i Niu Sila. Sa o uma i latou, sei vagana ai le afafine e toatasi, sa maitaga. Sa faamauina i latou mo le olaga nei ma le faavavau, o se aafiaga e le mafaamatalaina ma le fiafia.

Na toe taliu sa’o mai lava Uso Mou Tham mai le malumalu i Niu Kaletonia, lea sa ia faigaluega ai mo le isi lua tausaga e totogi ai le pasese o le afafine e toatasi lea sa lei mafai ona latou o—o se afafine ua faaipoipo ma lana tama ma lona toalua.

I tausaga mulimuli ane, na mananao ai Uso ma Tuafafine Mou Tham e faamisiona i le malumalu. E oo atu i le taimi lena, ua fausia ma faapaiaina le Malumalu o Papeete Tahiti, ma e fa misiona na la faia ai iina.³

Ou uso e ma tuafafine, o malumalu ua le na o ni ma’a ma sima. Ua faatumulia i le faatuatua ma anapogi. Ua fausia i tofotofoga ma molimau. Ua faapaiaina i osigataulaga ma auaunaga.

O le uluai malumalu lava na fausia i lenei tisipenisione o le malumalu lea o Katelani, Ohio. O le taimi lena sa matitiva le Au Paia, ae sa poloaiina lava e le Alii e tatau ona fausia se malumalu, ma o lea sa latou fauina ai.⁴ Sa mulimuli ane so latou malutaga—e ui ina le umi se taimi—i auvai o le Vaitafe o le Misisipi i le setete o Ilinoi. Sa latou faaigoaina lena nofoaga o Navu, ma sa latou toe naunau foi e tuuina atu a latou mea uma, faatasi ai ma lo latou faatuatua maua’i, ma sa latou toe faatuina ai se isi malumalu i lo latou Atua. Sa matamataita sauaga, peitai, na toetoe ina a le uma le Malumalu i Navu, ae toe tutulieseina foi i latou mai o latou aiga, ma sa latou sailia ai se malutaga i se toafa.

Sa latou tauivi ma sa toe amatalia foi osigataulaga, a o latou galulue mo le 40 tausaga e faatu le Malumalu o Sate Leki lea o loo tu malualii nei i le poloka i le itu i saute o i tatou o loo i ai nei iinei i le aso i le Maota Autu mo Konafesi.

E maualuga lava osigataulaga e o faatasi ma le fausia o malumalu faapea foi le auai i le malumalu. E le mafaitaulia i latou sa galulue ma tauivi ina ia mafai ona mauaina mo i latou lava ma mo o latou aiga ia faamanuiaga o loo maua i malumalu o le Atua.

Aisea ua toatele naua ai ua naunau e tuuina atu le anoanoai o mea ina ia maua ai faamanuiaga o le malumalu? O i latou o ē malamalama i faamanuiaga e faavavau e maua mai i le malumalu, ua latou iloa e leai se taulaga e telē naua, leai se tau ua mamafa tele, leai se tauiviga ua faigata naua ia maua ai na faamanuiaga. E leai se mamao e le mafai ona laasia, leai ni mea faalavefau e le mafai ona foia, e leai foi ni faigata e le mafai ona onosaia. Latou te malamalama o sauniga faaola e maua i le malumalu e mafai ai i se aso ona tatou toe foi atu i lo tatou Tama Faalelagi i se mafutaga faaleaiga e faavavau, ma faaeeina ai i faamanuiaga ma le mana mai luga, e matuai aoga ai lava a tatou osigataulaga uma ma taumafaiga uma.

O le taimi nei, o le toatele lava o i tatou ua le mafatia i ni faigata ina ia ō ai i le malumalu. E valusefulu lima pasene o tagata auai o le Ekalesia, ua nonofo nei i totonu o le 200 maila (320 km) mai se malumalu, ae o le toatele lava o i tatou ua matua vavalalata lava.

Afai ua outou ulu atu i le malumalu mo outou lava, ma afai foi tou te nonofo latalata atu i se malumalu, o lau osigataulaga o le faataatia ese lea o se taimi mai o outou olaga pisi, e asiasi soo ai i le malumalu. E anoanoai mea e tatau ona faia i o tatou malumalu mo i latou ua maliliu. A o tatou faia galuega mo i latou, o le a tatou iloaina ua tatou faataunuuina mea latou te le mafai ona faia mo i latou lava. Sa ta’ua e Peresitene Iosefa F. Samita i se tautinoga maoae: “O a tatou taumafaiga mo i latou [ua maliliu], o le a toulu ese ai mai ia i latou o latou filifili o noataga, ma o le a aveesea ai le pogisa o loo siomia ai i latou, ina ia mafai ai ona susulu atu le malamalama ia i latou ma latou faalogo ai i le lalolagi o agaga i le galuega ua faia mo i latou, e a latou fanau iinei, ma o le a olioli ai faatasi ma outou i le faatinoga o nei tiute.”⁵ O’u uso e ma tuafafine, o la tatou galuega lea e fai.

I lo’u lava aiga, o nisi o o matou aafiaga aupito paia ma faapelepele na tutupu a o matou aufaatasi ai i le malumalu e faatino ia sauniga faamau mo o matou augatama ua maliliu.

Afai e te lei alu i le malumalu, pe ua e alu foi ae o le taimi nei ua e le agavaa ai mo se pepa faataga, e leai se isi sini e sili atu ona taua mo oe e te galue agai i ai, nai lo le agavaa e alu i le malumalu. Atonu o lau osigataulaga o le faaogatusa o lou olaga ma le mea e manaomia ina ia maua ai se pepa faataga, atonu foi o le lafoa’ia o mausa ua leva ona e umia, ua e le agavaa ai. Atonu foi o le i ai o le faatuatua ma le amio pulea e totogi ai lau sefuluai. Po o le a lava le mea, faaagavaa oe e ulu atu i le malumalu o le Atua. Ia maua sau pepa faataga o le malumalu ma manatu i ai o se ‘oa taua, aua o se ‘oa taua lava.

A e le ulu atu i le Maota o le Alii ma maua faamanuiaga uma o loo faatalitali mai mo oe iina, e te lei mauaina mea uma o loo ofoina atu e le Ekalesia. O faamanuiaga taua uma ma sili ona maualuga o le avea ai ma tagata o le Ekalesia, o faamanuiaga na tatou te maua i malumalu o le Atua.

Ia, a’u uo talavou e, o ē o i ai i o outou tausaga o le talavou, ia i ai pea lava pea a outou vaaiga i le malumalu. Aua lava nei faia se mea o le a taofia ai oe mai le ulufale atu i ona faitotoa ma ‘ai ai i faamanuiaga paia ma le faavavau iina. Ou te faamalo atu ia te outou o ē o atu soo i le malumalu ma faia ai papatisoga mo e ua maliliu, i lo outou alapopo i taeao ina ia mafai ai ona outou auai i le faatinoga o na papatisoga a o lei amataina a’oga. Ou te le iloa po o le a se isi auala sili atu e amata ai se aso.

Ia te outou matua o fanau laiti, se’i ou faasoa atu se fautuaga atamai mai ia Peresitene Spencer W. Kimball. Fai mai a ia: “O se mea lelei tele pe afai … o le a tuu e matua i potumoe uma i o latou fale se ata o le malumalu ina ia mafai ai e [a latou fanau], mai lea taimi i lea taimi [e] laiti ai, ona vaavaai atu i le ata i aso uma [seia oo lava] ina avea o se vaega o [latou] olaga. A [latou] aulia le tausaga [latou te] manaomia ai ona faia [le] faaiuga taua tele [e faatatau i le ulu atu i le malumalu] a o la ua uma ona fai.”⁶

E usuina e a tatou fanau i le Peraimeri:

Ou te aioi atu ia te outou ia aoao a outou fanau i le taua o le malumalu.

E mafai ona avea le lalolagi ma nofoaga luitau ma faigata e ola ai. E tele taimi e siomia ai i tatou i mea e ono tosopalaina i tatou i lalo. A tatou o i maota paia o le Atua, a tatou manatua feagaiga tatou te osia i totonu, o le a sili atu ona tatou mafaia ona onosaia tofotofoga uma ma faatoilaloina faaosoosoga taitasi. O totonu o lenei maota paia, o le a tatou maua ai le filemu; o le a faafouina ai ma faamalolosia i tatou.

Ia, o ‘u uso e ma tuafafine, toe tasi lava se malumalu ou te fia ta’ua a o le’i faaiuina. E le o toe mamao se taimi i le lumanai, a o fauina malumalu fou i le salafa o le lalolagi, o le i ai se malumalu e fausia i se aai na tulai mai i le luaafe limaselau tausaga ua mavae. Ou te tautala atu e uiga i le malumalu ua fausia nei i Roma, Italia.

O malumalu uma o se maota o le Atua, e tutusa lava galuega e faia ai ma faamanuiaga ma sauniga. O le Malumalu o Roma, e tulaga ese lava, ma o loo fauina i se tasi o nofoaga e aupito logologoa i le lalolagi, o se aai na folafola atu ai e aposetolo anamua o Peteru ma Paulo le talalelei a Keriso, ma lea sa faamaturoina ai i la’ua.

O Oketopa talu ai, a o matou potopoto ai i se vaega i faoā aai matagofie i le itu i matu sasae o Roma, sa ou maua ai le avanoa e faia ai se tatalo o le faapaiaga a o matou sauniuni mo le suatiaina o le eleele. Sa uunaia a’u e valaaulia le Senate Italia o Lucio Malan ma le sui pulenuu o Roma o Giuseppe Ciardi ia i ai faatasi ma ē na tamua e suaina le eleele. O i la’ua o se vaega o le au faitonu na faatagaina ai i tatou e fausia se malumalu i lo latou aai.

Sa puaoa le aso ae sa mafanafana, ma e ui ina sa faamata’u mai le timu, ae sa na o se mataua se tasi pe lua foi na toulu. A o lagiina e le aufaipese matagofie, i le gagana Italia le lagisolo malie o “Le Agaga Paia,” sa lagona e tagata uma e pei ua aufaatasi le lagi ma le lalolagi i se viiga mamalu o le faaneetaga ma le lotofaafetai i le Atua Silisiliese. Sa le mafai ona taofia loimata.

I se aso a sau, o le a maua ai e le au faatuatua i lenei Aai e Faavavau, ia sauniga o le faavavau i se Maota paia o le Atua.

E faailoa atu lo’u agaga faafetai e le muta i lo’u Tama Faalelagi mo le malumalu ua fausia nei i Roma, ma mo o tatou malumalu uma, po o fea lava o i ai. Ua avea malumalu taitasi o se sulu ta’iala i le lalolagi, o se faailoga o la tatou molimau o loo soifua lo tatou Tama Faavavau, e finagalo o Ia e faamanuiaina i tatou, ioe, ia faamanuiaina Ona atalii ma afafine ma tupulaga uma. O o tatou malumalu taitasi, o se faailoga o la tatou molimau e moni le ola i talaatu o le tuugamau, ma e mautinoa lava e pei foi o lo tatou ola i lenei lalolagi. Ou te molimau atu ai.

O’u uso ma tuafafine pele, ia tatou faia soo se osigataulaga e tatau ai ina ia o ai i le malumalu ma ia maua ai le agaga o le malumalu i o tatou loto ma o tatou aiga. Ia tatou mulimuli i tulaga aao o lo tatou Alii ma le Faaola, o Iesu Keriso, Lē na faia le taulaga silisili mo i tatou, ina ia mafai ai ona tatou maua le ola e faavavau ma le faaeaga i le malo o lo tatou Tama Faalelagi. O la’u tatalo lea ma lo’u loto atoa, ma ou te faia ai i le suafa o Iesu Keriso, amene.