O Faamanuiaga Silisili ona Taua a le Alii

Ou te faafetai mo tuaa amiotonu o e na aoaoina le talalelei i a latou fanau i le aiga ao le’i taitai ona i ai ni afiafi faaleaiga. O Ida Jesperson ma John A. Whetten, o matua ia o lo’u tina. Sa nonofo i la’ua i se tamai nuu o Colonia Juárez, Chihuahua, Mekisiko. Na aoaoina le fanau a le au Whetten e ala i faatonuga ma i le matauina o faataitaiga a o latou matua.

O le amataga o le vaitau o le 1920 i Mekisiko o ni taimi faigata ia. Faatoa maea le taua matautia i le lotoifale. Sa laiti ni tinoitupe na fefaasoloai ma o le tele lava, o tupe siliva. Na faatinoina e le toatele o tagata a latou pisinisi e ala i le faafesuiai o meaai ma auaunaga.

I se tasi aso ao taufaaiuiu le taumafanafana na sau ai i le fale Tama Matua John ina ua maea se fefaatauaiga ma na maua ai i se vaega o le faatauga ni peso se 100 i tupe siliva. Sa tuu e ia le tupe ia Ida ma faatonuina e faaaoga e totogi ai pili aoga o tamaiti.

Sa lagona e Ida le agaga faafetai mo le tupe ae na faamanatu atu ia John la te le’i totogiina se sefuluai i le taumafanafana atoa. E leai se la tupe maua, ae na faamanatu e Ida ia te ia o loo maua mai i manu ia fasipovi, fuamoa, ma susu. O le la togalaau aina na maua ai le tele o fualaau aina ma fualaau faisupo, ma na laua faia nisi fefaatauaiga mo mea e manaomia e le’i aofia ai ni tinoitupe. Na fautua atu Ida e tatau ona la tuuina atu le tupe i le epikopo mo le la sefuluai.

Sa i ai sina le fiafia o John aua semanu e matua tele lava le fesoasoani o le tinoitupe i aoga a tamaiti, peitai na ioe vave o ia e manaomia le totogi o le la sefuluai. Sa ave e ia le taga mamafa i le ofisa o le sefuluai ma totogi le tupe i le epikopo.

I se taimi puupuu mulimuli ane na ia maua ai se tala o le a taunuu mai i le vaiaso e sosoo ai se alii faipisinisi mauoa mai le Iunaite Setete o, Mr. Hord, faatasi ai ma nisi o alii e faaaluina ni nai aso i le mauga e tulimanu ma fagogota ai.

Sa feiloai atu Tama Matua John i le vaega o alii i le fale faatali pasese e le mamao ma Colonia Juárez. Sa ia te ia nofoa o solofanua ma ni solofanua na manaomia ua saunia e aveina ai ato ma mea e faaaoga i le tolauapiga i le mauga. Sa faaaoga le vaiaso na sosoo ai e taialaina ai ia alii ma vaai ai le tolauapiga ma manu.

I le faaiuga o le vaiaso, sa toe foi atu ia alii i le fale faatali pasese e pu’e ai le nofoaafi i le Iunaite Setete. Sa totogiina John i lena aso mo lana galuega ma na tuuina atu se taga o tupe siliva peso e totogi ai isi mea na faaaoga. Ina ua uma ona totogi ia John ma ana tamaloloa, sa toe faafoi atu e John le tupe na totoe ia Mr Hord, lea na te’i aua na te le’i faamoemoeina e totoe se tupe. Sa ia fesili ia John ia mautinoa ua totogiina uma mea na faaaoga, ma na tali atu John ua uma ona totogiina mea uma na faaaoga mo le malaga ma o le tupe lea na totoe.

Na ili le faili o le nofoaafi. Na faliu Mr. Hord e alu, ae na toe faliu mai i tua ma togi mai le taga tupe siliva mamafa ia John. “Lea, ave i le fale mo lau fanau tama,” o lana tala lea. Sa sapo e John le taga ma toe agai atu i Colonia Juárez.

O lena afiafi ao faapotopoto le aiga ina ua maea le tausamiga o le afiafi e faalogo i tala o le malaga, na manatua ai e John le taga ma aumai ai ma tuu i luga o le laulau. Na fai mai John e na te le iloa pe fia se mea na i totonu o le taga, o lea i se taga malie na sasaa ai le taga i luga o le laulau—o se matua faaputuga—ma ina ua faitauina, e 100 tonu lava peso tupe siliva. E moni sa mafaufauina o se faamanuiaga maoae le fuafuaina e Mr. Hord e faia lena malaga. Sa maua e John ma lana fanau tama ni totogi lelei, ae o le 100 peso na totoe o se faamanatuaga lea o le aofaiga tonu lava o le sefuluai lea na totogiina i le vaiaso na muamua atu. Atonu i nisi, o se laki lea, ae i le aiga o Whetten o se lesona manino lava mai le Alii e Na te manatuaina Ana folafolaga ia i latou o e totogi ma le faamaoni a latou sefuluai.

Ao laitiiti, sa ou fiafia i lena tala aua sa faatatau i se malaga tolauapiga tietie solofanua i luga o mauga e tulimanu ma fagogota ai. Ma sa ou fiafia i ai aua na aoao mai ai afai tatou te usiusitai i poloaiga e faamanuiaina i tatou. E tele isi mea e mafai ona tatou filifili i ai e uiga i le sefuluai mai lenei tala.

Muamua, o le a e matauina o le totogiina o le sefuluai i lenei tulaga e le o fesootai i le aofaiga o le tupe maua. Na fuafua lava le au Whettens e faaaoga le la tinoitupe muamua o le tupe maua mo le sefuluai aua na lelei le tausiga o i latou mai manu ma fua o la latou togalaau o fualaau aina ma fualaau faisupo. Sa la iloa lelei lo latou nofo aitalafu i le Alii mo o latou faamanuiaga.

O se faamanatu lea o le mea na faatatau i ai le Alii i Lana fetalaiga: “Pe faoa e le tagata mea a le Atua? A o outou, ua outou faoa a’u mea.” Na fesili tagata, “Ni a ea au mea ua matou faoa?” Na toe fetalai mai le Alii ma le malosi, “O mea e sefulu a’i a outou mea, atoa ma taulaga” (Malaki 3:8). Ioe, uso e ma tuafafine, e pei ona iloa e John ma Ida Whetten i lena taumafanafana i vaitau ua mavae, tatou te nonofo aitalafu uma lava i le Alii. Aua ne’i tuuaia i tatou i le faoa o mea a le Alii. Ia tatou faamaoni ma totogi a tatou aitalafu i le Alii. E na o le 10 pasene lava o loo Ia talosaga mai ai. O le faamaoni i le totogiina o a tatou aitalafu i le Alii o le a fesoasoani lea ia i tatou ina ia faamaoni i o tatou uso a tagata.

O le isi mea na ou matauina i lena tala o le totogiina lea e o’u matua matutua o le sefuluai e tusa lava po o le a le matitiva na i ai le tulaga o mea tautupe a lo latou aiga. Sa la silafia poloaiga a le Alii, sa la faatatauina tusitusiga paia ia i laua (tagai i le 1 Nifae 19:23–24) ma usitaia le tulafono. O le mea lea o loo faamoemoe i ai le Alii i Ona tagata uma. Na te faamoemoe tatou te totogi le sefuluai e le faapea pe a tele se tupe, e le mai “tupe totoe” o le paketi a le aiga, ae e pei ona Ia poloaiina anamua, e mai a tatou tupe maua “muamua”, e tusa lava pe laitiiti pe tele. Ua poloaiina mai e le Alii, “Aua e te faatuai mai le faapolopolo o le fua … o le ulumatua” (Esoto 22:29). O le auala sili ona mautinoa e totogi ai ma le faamaoni le sefuluai, lea ua avea ma o’u aafiaga patino, o le totogiina lea i le taimi lava lea ou te maua ai soo se tupe. O le mea moni lava, ua na o le pau lea o le auala.

Ua tatou aoao mai i o’u matua matutua o Whetten o le sefuluai e le o se mataupu e faatatau i tupe; o se mataupu o le faatuatua—faatuatua i le Alii. Ua Ia folafola mai faamanuiaga pe a tatou usiusitai i Ana poloaiga. Na manino lava, le faaalia o le faatuatua maoae o, John ma Ida Whetten i le totogiina o le la sefuluai. Ia tatou faaali atu lo tatou faatuatua i le Alii e ala i le totogiina o a tatou sefuluai. Totogi muamua, totogi ma le faamaoni. Aoao a tatou fanau e totogi le sefuluai e oo lava i a latou tupe e avatu e matua po o nisi tupe maua, ma tatou aveina i latou i le faatalanoaga faaiu o le sefuluai ina ia latou iloa a tatou faataitaiga ma lo tatou alolofa i le Alii.

E i ai se tulaga e ono sese ai le faaliliuina o lenei tala mai o’u matua matutua. Atonu tatou te manatu faapea, talu ai ona tatou te totogiina le sefuluai i tupe, o le a faamanuiaina pea lava i tatou e le Alii i tupe. Sa ou mafaufauina foi lena tulaga a o laitiiti. Ua ou iloaina talu mai lena taimi e le otometi ona faapena. Ua folafola mai e le Alii ia faamanuiaga ia i latou o e totogi a latou sefuluai. Ua folafola mai e “toina … pupuni o le lagi mo outou, ma sasaa … atu le manuia mo outou, ina seia silisili ona tele” (Malaki 3:10). Ou te molimau atu e Na te faataunuuina Ana folafolaga, ma pe a tatou totogi ma le faamaoni a tatou sefuluai tatou te le oge i mea e manaomia o le olaga, peitai Na te lei folafola mai le tulaga mauoa. O tupe ma teuga tupe i le faletupe e le o ni Ana faamanuiaga taua ia. Na te faamanuiaina i tatou i le atamai e pulea ai a tatou punaoa faatapulaa o mea totino, o le atamai tatou te mafai ai ona ola i le 90 pasene o a tatou tupe maua nai lo le 100 pasene. O le mea lea, e malamalama ai tagata e totogiina ma le faamaoni le sefuluai i le ola fuafua lelei mo le lumanai ma ua ola faalagolago ia te ia lava.

Ua ou malamalama o faamanuiaga sili ona taua a le Alii e faaleagaga, ma e masani lava e faatatau i aiga, uo, ma le talalelei. E masani lava ona Ia tuu mai se faamanuiaga i se tulaga maaleale faapitoa i le uunaiga ma le taitaiga a le Agaga Paia, aemaise lava i tulaga o faaipoipoga ma aiga e pei o le tausiaina o le fanau. O lea ituaiga tulaga maaleale faaleagaga e mafai ona fesoasoani ina ia tatou fiafia i faamanuiaga o le lotogatasi ma le filemu i le aiga. Na fautua mai Peresitene James E. Faust o le totogiina o le sefuluai “o se inisiua sili lea e tetee atu ai i le teteaga” (“Faaoaina o Lau Faaipoipoga,” Liahona, Ape. 2007, 5).

E fesoasoani ia i tatou le totogiina o le sefuluai i le atiina ae o se loto agamalu ma le lotomaualalo, ma le loto faafetai lea e “tautino atu … lana pule i mea uma” (MFF 59:21). O le totogiina o le sefuluai e uunaia i totonu o i tatou se loto limafoai ma le loto faamagalo, ma se loto agaalofa e faatumulia i le alofa mama o Keriso. Tatou te naunau e auauna atu ma faamanuia i isi ma le loto usiusitai e taliaina le finagalo o le Alii. O i latou o e totogiina e le aunoa le sefuluai, o le a faamalolosia o latou faatuatua i le Alii o Iesu Keriso ma e latou te atiina ae se molimau mausali ma le tumau o Lana talalelei ma i Lana Ekalesia. E leai ma ni faamanuiaga tautupe po o ni mea totino i soo se tulaga o nei mea, ae peitai e moni lava o ni faamanuiaga silisili lea ona taua a le Alii.

Ou te molimau atu, pe a tatou totogiina ma le faamaoni a tatou sefuluai, o le a toina mai e le Alii ia pupuni o le lagi ma sasaa mai i o tatou luga Ana faamanuiaga e silisili ona taua. I le suafa o Iesu Keriso, amene.