Te mau Haamaitairaa Faufaa roa a‘e a te Fatu

Te oaoa nei au no te mau tupuna parau-ti‘a tei haapii i te evanelia i ta ratou mau tamarii i roto i te utuafare hou roa a haamauhia ai te faanahoraa o te pô utuafare. O Ida Jesperson e o John A. Whetten na metua o to’u mama. Ua ora raua i roto i te oire iti ra no Colonia Juarez, Chihuahua, Mehiko. Ua roaa i te mau tamarii Whetten te ite i te evanelia na roto i te haapiiraa e na roto i te iteraa i te hi‘oraa o to ratou na metua.

E mau matahiti fifi roa te mau matahiti 1920 i Mehiko. No hope noa’tura te orureraa hau. E mea iti roa te ohuraa moni, e te rahiraa o te reira, e mau toata ïa. E mea pinepine te taata i te faatere i ta ratou ohipa imiraa moni na roto i te aitauiraa i te tauihaa e te ohipa.

I te hoê mahana, i te pae hopea o te pu‘e tau mahanahana, ua ho‘i mai o papa ruau John i te fare, ua oti ta’na tapihooraa i te tahi tapu i‘o puaatoro, e ua roaa mai ta’na 100 pesos toata ario. Ua horo‘a oia i te moni ia Ida ra, ma te parau e, no te aufau teie moni i te mau haamau‘araa no te haapiiraa a te mau tamarii.

Ua oaoa o Ida no te moni, tera râ ua faahaamana‘o oia ia John e, aita ratou i aufau i te hoê noa a‘e tuhaa ahuru i te roaraa o te pu‘e tau mahanahana. Aita ta ratou e moni, tera râ, ua faahaamana‘o o Ida ia’na e, e i‘o puaa ta ratou, e huero moa, e e û. E mea rahi te maa hotu e te pipi i roto i te aua, e ua hoo ratou i te tahi mau maa ma te faaohipa ore i te moni. Ua parau o Ida e, e ti‘a ia ratou ia horo‘a i te moni i te episekopo no te faati‘a i ta ratou tuhaa ahuru.

Ua au ore rii o John i te mea e, e riro taua moni ra ei tautururaa rahi i te haapiiraa a te mau tamarii, tera râ, ua farii oioi oia e mea ti‘a ia ratou ia aufau i ta ratou tuhaa ahuru. Ua taitai oia i taua pute teiaha ra i te piha aufauraa tuhaa ahuru, e ua aufau i te moni i te episekopo ra.

Aita i maoro i muri a‘e, ua faaroo oia e, i te hepetoma i muri, e tae mai te hoê taata moni faatupu ohipa no te Hau Amui no Marite mai, o Hord tane, e e rave rahi atu â mau taata, no te haere i ni‘a i te mou‘a te tahi tau mahana no te auau animala e no te tai‘a.

Ua farerei o papa ruau John i taua pŭpŭ taata ra i te vahi tape‘araa pereoo auahi tapiri mai ia Colonia Juarez. Te vai ra te mau puaa-horo-fenua e ua ineine atoa te mau animala no te faauta i te tauhaa no te taata e no te puhaparaa i ni‘a i te mou‘a. Te taatoaraa o te hepetoma i muri iho, ua pau ïa i ni‘a i te arata‘iraa i te taata e i te haapa‘oraa i te puhaparaa e i te animala.

I te hopea o te hepetoma, ua ho‘i te mau taata i te vahi tape‘araa pereoo auahi no te pa‘uma i ni‘a i te pereoo auahi no te ho‘i i te Hau Amui no Marite. I taua mahana ra, ua aufauhia o John no ta’na ohipa, e ua horo‘ahia mai ia’na te hoê pute moni ario peso no te aufau i te tahi atu mau tarahu. Ia oti te mau rave ohipa i te aufauhia, ua faaho‘i atu ra o John i te toe‘a o te moni ia Hord Tane ra, tei maere roa i te mea e, aita oia i mana‘o e, e toe mai te moni. Ua haapapû oia ia John e, ua aufauhia anei te taatoaraa o te mau haamau‘araa, e ua pahono atu ra o John e, ua pee pauroa te haamau‘araa no taua tere ra, e teie te moni toe.

Ua ta‘i maira te hio o te pereoo auahi. Ua fariu atu ra o Hord tane no te haere, i muri iho, ua fariu faahou maira i muri e ua taora maira i te pute toata ia John ra. « Tera, afa‘i tera i te fare na ta oe mau tamaiti », ta’na i parau. Ua haru maira o John i te pute e ua ho‘i atu ra i Colonia Juarez.

I taua pô ra, a putuputu ai te utuafare i muri a‘e i te tamaaraa no te faaroo i te mau aamu o te tere, ua haamana‘o a‘e ra o John i te pute e ua ta‘ita‘i maira i te reira e ua tuu atu ra i ni‘a i te amuraa maa. Ua parau o John e, aita oia i ite e, e hia moni i roto i te pute, no reira, no te faaarearea, ua maniihia te pute i ni‘a i te amuraa maa—e apaparaa maitai, e ia oti a‘e ra i te tai‘ohia, ua ti‘a maitai 100 pesos moni ario. Oia ïa, ua riro te faaotiraa a Hord tane ia faatupu i taua tere ra ei haamaitairaa rahi roa. E moni maitai roa tei roaa mai ia John e ta’na mau tamaiti, tera râ, te 100 peso i toe mai, ua riro ïa ei faahaamana‘oraa i te reira atoa tino moni no te tuhaa ahuru tei aufauhia i te hepetoma na mua’tu. No te tahi mau taata, ua riro ïa te reira ei mea hape noa i te aifaitoraa na tino moni, area no te utuafare Whetten ra, e mea papû maitai ïa e, e haapiiraa te reira na te Fatu no te faaiteraa e, e haamana‘o Oia i Ta’na mau fafauraa i fafau i te feia o te aufau i ta ratou tuhaa ahuru ma te faaroo.

I to’u tamariiraa, ua au roa vau i taua aamu ra i te mea e, e aamu ïa no te hoê tere puhapa na ni‘a i te puaa-horo-fenua na ni‘a i te mou‘a no te auau i te animala e no te tai‘a. E ua au roa vau no te mea ua haapii mai te reira e, ia haapa‘o ana‘e tatou i te mau faaueraa e haamaitaihia tatou. E rave rahi mau mea o te ti‘a ia tatou ia apo mai i roto i teie aamu no ni‘a i te tuhaa ahuru.

A tahi, e ite outou e, te aufauraa i te tuhaa ahuru i roto i teie hi‘oraa, aita ïa to’na e tuatiraa i ni‘a i te moni i apihia mai. Ua faaoti te utuafare Whetten ia faaohipa i ta ratou moni apî no te tuhaa ahuru no te mea ua ora maitai ratou i ta ratou mau animala e ta ratou mau hotu no te faaapu. E mea papû e, ua feruri ratou e, e tarahu ta ratou i te Fatu ra no to ratou mau haamaitairaa.

Na teie e faahaamana‘o ia tatou i te mea ta te Fatu e hinaaro ra a parau ai Oia e : « E haru anei te taata nei i ta te Atua ? Ua haru maira outou i ta’u ra ». Ua ui atu ra te taata e, « i haru matou i ta oe i te aha ? » E ua pahono papû maira te Fatu e : « I te ahuru o te tao‘a ra e te mau ô » (Malaki 3:8). Oia mau, e te mau taea‘e e te mau tuahine, mai ia John e o Ida Whetten i ite i taua pu‘e tau mahanahana ra i ma‘iri a‘e nei, ua aitarahu tatou paatoa i te Fatu. E mata na tatou i te hi‘o eiaha tatou ia parihia i te haru i ta te Atua ra. E mata na tatou i te riro ei taata parau-ti‘a, e ia aufau i ta tatou tarahu i te Fatu ra. Ta’na noa e ani mai nei, te 10%. E tauturu te parau-ti‘a i roto i te aufauraa i ta tatou tarahu i te Atua ra ia tatou ia vai haavare ore noa i to tatou mau taata tupu.

Te ohipa i muri iho ta’u i ite no ni‘a i taua aamu ra, maori râ, ua aufau to’u papa ruau i te tuhaa ahuru ma te hi‘o ore i te huru vêvê o ta ratou faufaa utuafare. Ua ite ratou i te faaueraa a te Fatu, ua faaau ratou i te mau papa‘iraa mo‘a atoa ia ratou iho (a hi‘o 1 Nephi 19:23–24) e ua haapa‘o i te ture. Tera ïa ta te Fatu e hinaaro i To’na mau taata atoa. Te hinaaro nei oia ia aufau tatou i te tuhaa ahuru, eiaha i te tau auhune noa, eiaha atoa i ni‘a i te moni « e toe mai » i roto i te tapura haamau‘araa a te utuafare, mai Ta’na râ i faaue mai i tahito ra, oia ho’i, mai roto mai i ta tatou « apî » i te taime a farii ai tatou i te reira, noa’tu e apî ha‘iha‘i e aore râ, e apî rarahi. Ua faaue mai te Fatu e, « te oho matamua i te mau maa… eiaha oe e tape‘a i te reira ia’u nei » (Exodo 22:29). Ua ite papû roa vau e, te rave‘a papû roa a‘e no te aufau i te tuhaa ahuru ma te faaroo, o te aufauraa ïa i te reira i te taime iho a farii ai au i te moni. Ua ite atoa vau e, o te reira ana‘e te rave‘a.

Ua haapii mai matou mai roto mai i to’u papa ruau Whetten e, te tuhaa ahuru e ere ïa i te parau no te moni ; e parau râ no te faaroo—te faaroo i te Fatu. E fafau mai oia i te mau haamaitairaa mai te mea e, e haapa‘o tatou i ta’na mau faaueraa. Ua faaite o John e o Ida Whetten i te faaroo rahi na roto i te aufauraa i ta ratou tuhaa ahuru. E mata na tatou i te faaite i to tatou faaroo i te Fatu na roto i te aufauraa i ta tatou tuhaa ahuru. A aufau na mua i te reira, a aufau ma te parau-ti‘a. A haapii i ta tatou mau tamarii ia aufau i te tuhaa ahuru, e tae roa’tu i ni‘a i te moni pute ta ratou e farii, e ia arata‘i ia ratou na muri iho ia tatou i roto i te farereiraa faaafaroraa i te tuhaa ahuru, ia ite ho’i ratou i to tatou hi‘oraa e to tatou here i te Fatu.

E nehenehe teie aamu to to’u papa ruau i te tatara-hape-hia. E riro paha te hoê taata i te parau e, mai te mea e, e aufau tatou i te tuhaa ahuru i te moni, e haamaitai noa ïa te Fatu ia tatou i te moni. Ua haamata atoa vau i te feruri mai te reira i to’u tamarii-rii-raa. Tera râ, mai taua taime ra, ua haapii mai au e, e ere mai te reira i te mau taime atoa. E fafau mai te Fatu i te mau haamaitairaa i te feia e aufau i ta ratou tuhaa ahuru. Te fafau nei Oia e, « e iriti [Oia] i te mau haamaramarama o te ra‘i ra, a ninii atu ai i te tao‘a rahi roa ei maitai no [tatou] » (Malaki 3:10). Te faaite papû nei au e, e faatupu Oia i Ta’na mau fafauraa, e mai te mea e aufau tatou i ta tatou tuhaa ahuru ma te faaroo, e ore ïa tatou e ere i te mau mea faufaa o te oraraa, eita râ Oia e fafau mai i te tao‘a rahi. E ere te moni e te afata moni i te fare moni i ta’na mau haamaitairaa faufaa a‘e. E haamaitai oia ia tatou ma te horo‘a mai i te paari no te faatere i to tatou mau haamaitairaa materia ha‘iha‘i, te paari e ti‘a ai ia tatou ia ora maitai a‘e i te 90% o ta tatou faufaa, i te 100%. I reira, te feia aufau tuhaa ahuru faaroo e taa maitai ai te ara-maite-raa e te faariroraa ei taata faarava‘i ia’na iho.

Ua haapii mai au e, te mau haamaitairaa faufaa a‘e a te Fatu e mau haamaitairaa varua ïa, e mea pinepine no ni‘a i te utuafare, te mau hoa e te evanelia. E mea pinepine Oia i te horo‘a mai i te haamaitairaa ia au i te hoê huru taa ê, na roto i te faaururaa e te arata‘iraa a te Varua Mo‘a, i roto hoa râ i te faaipoiporaa e i te mau ohipa no te utuafare, mai te aupururaa i te mau tamarii. E nehenehe taua huru taa ê ra e tauturu ia tatou ia fana‘o i te haamaitairaa o te au maite e te hau i roto i te utuafare. Ua parau mai te peresideni James E. Faust e, ua riro te aufauraa i te tuhaa ahuru ei « hoê parururaa maitai roa no arai i te faataa-ê-raa » (« Te haamaitairaa atu â i to outou faaipoiporaa » Liahona, Eperera 2007, 2–6).

Na te aufauraa i te tuhaa ahuru e tauturu ia tatou ia faatupu i te aau auraro e te haehaa, e i te aau mehara o te hinaaro e « fa‘i mai i to’na rima ra i roto i te mau mea atoa » (PH&PF 59:21). Na te aufauraa i te tuhaa ahuru e faatupu i roto ia tatou i te hoê aau horo‘a noa e te faaore hapa, e i te hoê aau aroha tei î i te hinaaro mau i te Mesia. E roaa te hinaaro puai ia tatou ia tavini e ia haamaitai ia vetahi ê na roto i te aau haapa‘o ma te auraro i te hinaaro o te Fatu. Te feia e aufau tamau i te tuhaa ahuru, e haapuaihia to ratou faaroo i roto i te Fatu ia Iesu Mesia, e e haapaarihia to ratou iteraa papû i Ta’na evanelia e i ta’na Ekalesia. Aita te hoê o teie mau haamaitairaa i faaauhia i ni‘a i te moni e aore râ, i te mau huru materia atoa, e mea papû râ e, o teie ïa te mau haamaitairaa tao‘a rahi roa a‘e a te Fatu.

Te faaite papû nei au e, mai te mea e, e aufau tatou i ta tatou tuhaa ahuru ma te faaroo, e iriti mai te Fatu i te mau haamaramarama o te ra‘i e a ninii mai ai i Ta’na mau haamaitairaa faufaa rahi i ni‘a iho ia tatou. Na roto i te i‘oa o Iesu Mesia ra, amene.