2010–2019
Na Mana ni Veisorovaki
Epereli 2011


Na Mana ni Veisorovaki

E sega ni dua na ivalavala ca se caka cala, rarawa se tagi, me sega ni vakabulai rawa ena kaukauwa ni Nona Veisorovaki.

Niu vakarautaka tiko na noqu vosa ni koniferedi oqo, au ciqoma e dua na qiri veivakurabuitaki mai vei tamaqu. A kaya ni sa leqa o taciqu gone ena nona moce toka ena mataka o ya. E mosita dina na utoqu. E se qai yabaki 51 ga o koya. Niu se vakasamataki koya tikoga. Au sa vakauqetimeu wasea eso na ka baleta na nona bula vei kemuni. Sa soli oti mai na veivakadonui.

E cauravou totoka o taciqu ni se qai tubu tiko mai ka dau veikilai, ka veimaliwai―ka dina sara ena kosipeli. Ni vakacavara vakavinaka na nona kaulotu, a vakamautaki nona daulomani ena valetabu. Rau a vakalougatataki ena dua na luvedrau tagane ka dua na yalewa. Sa dua na ka na yalayala ni veivakalougatataki era tu ena nona bula.

Ia a mani luluqa vakalailai na nona bula. Sa tekivu me bulataka na marau vakavuravura, ka vakacacana na nona bula vakayago, nona vakamau, kei na nona lewena na Lotu.

Sa laki tu vakayawa mai vale. E tini vakacaca na yabaki na nona sa vakacacani koya tikoga vakaoqo, ia a sega ni guilecavi koya na iVakabula se biuti koya. Mai na rarawa ni veilecayaki, a yaco me curuma na yalona e dua na yalomalumalumu. Sa vaka me takali yani na nona cudrucudru, veivorati kei na veivala. Me vaka ga na gone cidroi, “ni sa kilai yalona tale.”1 Sa tekivu me gole yani vua na iVakabula ka lesu tale ki nona vale kei rau na nona itubutubu yalodina ka rau a sega vakadua ni guilecavi koya.

Sa muria sara na salatu ni veivutuni. A sega ni rawarawa. Ni oti e 12 na yabaki na nona yali tu mai ena Lotu, a papitaisotaki tale o koya ka ciqoma tale na isolisoli ni Yalo Tabu. A vakalesui tale vua na nona matabete kei na veivakalougatataki ni valetabu.

A kalougata o koya ni a raica e dua na marama ka sega ni kauwaitaka na tauvimate veitaravi ka vu mai na ivakarau ni nona bula e liu, ka rau vauci vata sara ena valetabu. Sa mai rua na luvedrau. A yalona dina sara na nona veiqaravi ena matabisopi ena vica na yabaki.

A mai leqa o taciqu ena mataka ni Moniti, na ika 7 ni Maji. Ena yakavi ni Vakaraubuka yani e liu rau a gole vakaveiwatini ki na valetabu. Ena mataka ni Sigatabu, ni vo e dua na siga me leqa kina, a vakavulica na lesoni ni matabete ena ilawalawa ni bete levu. A laki moce ena yakavi o ya, ka sega ni yadra tale mai ki na bula oqo―ia ena tucake vata mai kei ira na tamata dodonu.

Au sa vakavinavinakataka kina vakalevu na mana ni Veisorovaki ena bula nei taciqu. Sa vakarautaki tu kivei keda yadua na Veisorovaki ni iVakabula—ena veigauna.

Ni da veivutuni eda na rawata na Veisorovaki. Ni da sa veivutuni, sa vakatara vei keda na Turaga meda guilecava vakadua na noda caka cala sa oti.

“Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca.

“Raica oqo ga na sala dou na kila kina na tamata sa veivutuni vakaidina―ena tusanaka na nona ivalavala ca, ka biuta laivi sara vakadua.”2

Eda na kila tiko e dua a bolei sara vakalevu na nona bula―e dua ka sa gole yani se vuki tani. O koya e rawa ni nomu itokani se wekamu, itubutubu se gone, tagane se yalewa vakawati. E rawa sara ga ni o iko.

Au sa vosa raraba tiko, kivei iko sara mada ga. Kau tukuna tiko na mana ni Veisorovaki.

Sa tadu mai kina na Mesaia me mai vakabulai ira na tamata mai na Lutu i Atama.3 Na veika kece e tiko ena kosipeli i Jisu Karisito e dusia tikoga na nona isoro ni veivakaduavatataki na Mesaia, na Luve ni Kalou.4

Ena sega ni rawa ni yaco na yavu ni veivakabulai ke sega na veisorovaki.“Ia sa mai sorovaka na Kalou na nodra ivalavala ca na kai vuravura me ra bula kina; io me vakayacori kina na lewa dodonu ni Kalou, ni sa yalododonu ka dauloloma talega ko Koya.”5

Sa dodonu kina vua na Luve ni Kalou sa tawa cala me vakayacora na solibula veisorovaki, ni sa sega ni rawa me vakabulai koya ga na tamata mai na nona ivalavala ca.6 Sa dodonu kina me tawayalani ka tawamudu na Veisorovaki oqo―me baleta na tamata kecega ki na veigauna tawamudu. 7

Mai na Nona vakararawataki ka mate, sa sorovaka kina na iVakabula na ivalavala ca ni tamata kecega.8 A tekivu mai Kecisemani na Nona Veisorovaki ka laki tomani ena kauveilatai ka laki cecere sara ena Tucaketale.

“Ia, … ena kau yani ko koya, me vakoti ki na kauveilatai, ka vakamatei, ia sa talairawarawa ga me mate; ni sa duavata ga na loma i Tamana kei na Luvena.”9 Mai na Nona solibula veisorovaki, sa cakava “na yalona me isoro ena vuku ni ivalavala ca.”10

Ni sa Luvena Duabau ga na Kalou, sa soli Vua na kaukauwa me vakadrukai mate. Sa yaco kina Vua me taura tale na Nona bula ni sa vakararawataki ka “o koya sa sega ni vosota rawa na tamata; me yaco sara ki na mate, ena vuku ni nodra i valavala ca kei na nodra i tovo vakasisila na nona tamata, ka sa bunotaka kina na dra.”11

A sega walega ni sauma o Koya na nodra ivalavala ca na tamata kecega, ia “sa colata ko Koya na nodra rarawa kei na nodra ivalavala ca na Nona tamata.” Ka yaco Vua “me kila kina na nodra malumalumu na nona tamata, ka vakabulai ira ena nona yalololoma.”12

Sa vakila kina na iVakabula na bibi ni nodra rarawa na kawatamata―na mosi ni ivalavala ca kei na tagi.“E dina sa colata ko Koya na noda rarawa, ka sa colata na rarawa ni lomada.”13

Mai na Nona Veisorovaki a sega walega ni vakabulai ira era sa caka cala; sa vakabulai ira vakakina na tawa cala era vakararawataki ena vuku ni ivalavala ca o ya. Ni ra sa vakabauta na Veisorovaki ni iVakabula o ira na tawa cala ka vosoti ira na caka cala, era sa na vakabulai talega kina.

Eso na gauna “[eda] gadreva tu [meda] sereki mai na [noda] kilai [yalodataka] na [noda] caka cala kei na ivalavala ca.”14 Ni da sa veivutuni, ena vagalalataka sara na iVakabula na kila oqo mai na yaloda.

Sa vosoti kina na noda ivalavala ca mai na Nona solibula ni veisorovaki. Vakavo ga o ira na luve ni ivalavala ca e sega ni vosoti rawa, sa vakarautaki tu na Veisorovaki ki na tamata yadua ena veigauna kece, se cava ga na levu se lailai ni ivalavala ca, “ia ko ira kecega sa veivutuni.”15

Me baleta na Nona loloma tawayalani. Sa sureti keda tiko o Jisu Karisito meda veivutuni me na kakua kina ni da sotava na rarawa taucoko ni noda ivalavala ca vakai keda:

“Mo veivutuni—…raica ko na rarawa vakalevu—ia ko na sega ni vosota rawa na kena bibi, na kena mosi kei na kena kaukauwa.

“Raica koi au na Kalou, au sa vosota oti na veika oqo, me ra bula kina ko ira sa veivutuni;

“Ia kevaka era sa sega ni veivutuni, era na vakararawataki me vakataki Au;

“Raica koi au na Kalou sa kaukauwa sara, au sa sautaninini ena mosi ni veivakararawataki ko ya; au a bunotaka na dra ka sa yaluma sara kina na yagoqu kei na yaloqu.”16

Sa solia tu na iVakabula na veivakabulai kivei ira era sa vakararawataki tu ena ivalavala ca.“Ia dou na sega li ni veivutunitaka na nomudou ivalavala ca ka saumaki ka lesu mai vei au meu vakabulai kemudou?”17

Sa Dauveivakabulai Cecere ni yaloda o Jisu Karisito. Vakavo ga na ivalavala ca e sega ni vosoti rawa, e sega ni dua na ivalavala ca se caka cala, rarawa se tagi, me sega ni vakabulai rawa ena kaukauwa ni Nona Veisorovaki.

Ni da sa ivalavala ca, ena tukuna o Setani ni da sa yali. E sega ni vakakina, sa veivakabulai ki na tamata taucoko—na noda Dauveivueti, se cala cava ga eda cakava—vakakina vei iko kei au.

Ni o vakasamataka na nomu bula, e tiko beka na ka me na veisautaki kina? Se vo beka na ka cala e dodonu mo vakavinakataka?

Kevaka o se vakararawataki tiko ena yalo ni kila vakaiiko na nomu cala se veivutuni, se cudru, se yali na vakabauta, au sureti iko mo vakasaqara na vakacegu. Veivutuni ka biuta vakadua na nomu ivalavala ca. Mo qai masu, ka kerea vua na Kalou mo vosoti. Kere veivosoti vei ira o caka cala kina. Vosoti ira era caka cala vei iko. Vosoti iko vakaiiko.

Ke rawa gole vei bisopi. O koya na idewadewa ni loloma vakalou ni Turaga. Ena vukei iko ena nomu saga tiko mo bula savasava ena nomu veivutuni.

Vakatitobutaka na nomu bula ena masu kei na vulica na ivolanikalou. Ni ko vakayacora oqo, ko na vakila na veivakauqeti savasava ni Yalotabu. E kaya kina na iVakabula, “Io dou vakasavasavataki kemudou, ka yalosavasava sara; raica dou savata na ligamudou … e mataqu, meu qai vakasavasavataki kemudou.”18

Ni da sa vakasavasavataki ena kaukauwa ni Nona Veisorovaki, sa yaco kina na iVakabula me noda daunitataro vua na Tamada, a sa kaya kina;

“Tamaqu, mo ni nanuma na nona rarawa ka vakamatei ko Koya sa tawacala; io ko ni sa dau lomani Koya vakalevu; mo ni nanuma ni sa mai dave na nona dra na Luvemuni; io ko ni sa lewa me mai dave na nona dra, mo ni vakarokorokotaki kina;

“Ia Tamaqu, mo ni lomani ira na wekaqu oqo ka ra sa vakabauta na yacaqu; io me ra lako mai vei au ka rawata na bula tawamudu.”19

Sa soli tu vei keda yadua na isolisoli ni bula galala. “A ra sa sereki na tamata kecega … me ra digitaka na galala kei na bula tawamudu, ena vuku i koya na Dauveisorovaki ni tamata kecega, se me ra digitaka na tiko vakabobula kei na mate, me vaka na nona … inaki na tevoro.”20

Ena vuqa na yabaki sa oti a vakayagataka o taciqu na galala ni nona digidigi ena nona digitaka e dua na bula ka vakacacani kina na nona bula vakayago, nona matavuvale, kei na nona lewena na Lotu. Ni oti e vica na yabaki, a vakayagataka tale na galala ni digidigi vata ga o ya me veivutuni kina, me tuvanaka na nona bula ki na ivakavuvuli ni iVakabula, ka me sucu vou vakaidina ena kaukauwa ni Veisorovaki.

Au sa vakadinadinataka eke na mana ni Veisorovaki. Au sa raica na kena kaukauwa ni veivakabulai vei taciqu ka vakila talega ki na noqu bula. Sa vakarautaki tu kivei keda yadua na kaukauwa veivakabulai ni Veisorovaki—ena veigauna kece.

Au sa vakadinadinataka ni o Jisu na Karisito—na Dauveivakabulai ni yaloda. Sa noqu masu ni da na digitaka meda vakaio ki na veisureti ni iVakabula, “Ia dou na sega li ni veivutunitaka na nomudou ivalavala ca ka saumaki ka lesu mai vei au meu vakabulai kemudou?”21 Ena yaca i Jisu Karisito, emeni.

  1. Luke 15:17.

  2. Vunau kei na Veiyalayalati 58:42–43.

  3. Raica na2 Nifai 2:25–26.

  4. Raica na Alama 34:14.

  5. Alama 42:15

  6. Raica na Alama 34:11.

  7. Raica na Alama 34:10.

  8. Raica na Alama 22:14.

  9. Mosaia 15:7.

  10. Mosaia 14:10.

  11. Mosaia 3:7.

  12. Alama 7:11–12.

  13. Mosaia 14:4

  14. Vunautaka na Noqu Kosipeli: E Dua na iDusidusi ni Veiqaravi ni Daukaulotu (2004), 2.

  15. Vunau kei na Veiyalayalati 18:12.

  16. Vunau kei na Veiyalayalati 19:15–18

  17. 3 Nifai 9:13.

  18. Vunau kei na Veiyalayalati 88:74.

  19. Vunau kei na Veiyalayalati 45:4–5.

  20. 2 Nifai 2:27.

  21. 3 Nifai 9:13.