2010–2019
O Le Vavega o le Togiola
Aperila 2011


O Le Vavega o le Togiola

E leai se agasala po o se solitulafono, tiga po o le faanoanoa, e le mafai ona faamagaloina i le mana faamalolo o Lana Togiola.

A o sauniuni la’u lauga mo le konafesi lenei, sa ou mauaina se telefoni e lei faamoemoeina mai lo’u tama. Fai mai faatoa maliu lava lo’u uso laitiiti i lena taeao. Sa nutimomoia lo’u fatu. E na o le 51 ona tausaga. A o o’u mafaufau ia te ia, sa uunaia au e faasoa atu nisi o mea na tutupu i lona olaga. Ua ou faia ona ua faatagaina a’u.

A o talavou o ia, sa aulelei lava lo’u uso, e agalelei ma tautalatala—sa matuai tuuto atoatoa lava i le talalelei. Ina ua maea lana misiona mamalu, sa faaipoipo o ia i lana manamea i le malumalu. Sa faamanuiaina i la’ua i se atalii ma se afafine. Sa tumu lona lumanai i folafolaga.

Ona oo ai lea ina ua lolo atu i se vaivaiga. Sa filifili o ia e ola i se olaga faatuinanau, lea na maumau ai lona malosi, malepe ai la la’ua ulugalii, ma lē toe avea ai o ia o se tagata o le Ekalesia.

Sa alu ese mamao mai lona aiga. Sa fai pea lana amio faataumaoi mo le silia i le sefulu tausaga, ae sa lei faagaloina lava e le Faaola o ia pe tuulafoaia. Mulimuli ane sa faatagaina e le tiga o lona faavauvau se agaga o le lotomaualalo e ulufale atu i lona agaga. Sa amata ona mou atu ona lagona o le ita, fouvale ma le faamisa. “Ona atamai ai lea o ia,”1 e faapei o le atalii faamaumauoa. Sa amata ona ia aapa atu i le Faaola ma toe foi mai i le aiga i ona matua faamaoni o ē sa lei lafoaia lava o ia.

Sa ia savalia le ala o le salamo. Sa lei faigofie. Ina ua mavae le sefululua tausaga o i tua ma le Ekalesia, sa toe papatisoina o ia ma toe maua ai le meaalofa o le Agaga Paia. Na toefuatai mulimuli ane i ai lona perisitua ma faamanuiaga o le malumalu.

Sa faamanuiaina o ia ina ua maua se fafine sa naunau e faasēloa lana vaai i luitau faifai pea faalesoifua maloloina mai lona olaga sa ola ai, ma sa faamauina i la’ua i le malumalu. Sa maua se la fanau e toalua. Sa auauna faamaoni o ia i le au epikopo mo ni tausaga.

Na maliu lo’u uso i le taeao o le Aso Gafua, 7 o Mati. O le afiafi o le Aso Faraile i tua atu na o ai ma lona toalua i le malumalu. I le taeao o le Aso Sa, le aso na sosoo ma le aso na maliu ai, sa ia faia ai le lesona a le au perisitua i lana vaega o faitaulaga sili. Na alu o ia e moe i lena afiafi, ma e lei toe ala mai ai lava i lenei olaga—ae o le a toetu mai i le toetutu o e amiotonu.

Ou te faafetai mo le vavega o le Togiola i le olaga o lo’u uso. O loo avanoa le Togiola a le Faaola mo i tatou taitoatasi—i taimi uma.

Tatou te maua le togiola e ala i le salamo. A tatou salamo, e faatagaina e le Alii i tatou e lafoai mea sese ua tuanai.

“Faauta, o le ua salamo i ana agasala, e faamagaloina o ia, ma o a’u le Alii, ou te le toe manatua lava.

“Tou te iloa faapea se ua salamo i ana agasala—faauta, na te ta’uta’u atu ma lafoa’ia.”2

Ua tofu iloa e i tatou se tagata sa feagai ma ni luitau matuia i lona olaga—o se tasi ua feseseta’i pe ua faamelea. Atonu o lena tagata o se uo po o se tagata o le aiga, se matua po o se tamaitiiti, se tane po o se ava. Atonu o lena tagata o oe lava lea.

Ou te talanoa atu ia i tatou uma, ma oe foi. Ou te talanoa atu i le vavega o le Togiola.

Na afio mai le Mesia e togiolaina tagata mai le Pa’ū o Atamu.3 O mea uma lava i le talalelei a Iesu Keriso e faasino atu agai i le taulaga togiola a le Mesia, le Alo o le Atua.4

Semanu e le mafai ona aumaia le ata o le faaolataga e aunoa ma se togiola. “O le mea lea ua togiola ai e le Atua lava mo agasala a le lalolagi, ina ia faataunuuina le ala o le alofa, e faamalie ai iuga o le faamasinoga, ina ia sa’o ona lelei le Atua, o le Atua amiotonu, o le Atua foi ua finagalo alofa.”5

Sa tatau ona faataunuuina le taulaga togiola e le Alo o le Atua e leai se agasala, aua e le mafai e le tagata pa’ū ona togiolaina ana lava agasala.6 E tatau ona i ai le Togiola e le i’u ma e faavavau—mo tagata uma, e oo i le faavavau atoa.7

E ala mai i ona puapuaga ma le maliu, sa togiolaina ai e le Faaola agasala a tagata uma.8 Na amata Lana Togiola i Ketesemane ma sa faaauau ai i luga o le satauro, ma le faatumutumuga faaiu o le Toetu.

“Ioe, … e taitaiina atu o ia, ma faasatauroina, ma fasiotia, o loo gauai le tino e oo lava i le oti, ua faaumatia foi le loto o le Alo i le finagalo o le Tama.”9 O Lana taulaga togiola, na Ia faia ai “lona ola ma taulaga mo agasala.”10

I le avea ai ma Alo e Toatasi na Fanaua o le Atua, na Ia maua ai le mana e pulea ai le oti faaletino. O lena mea na mafai ai e Ia ona faatumauina Lona soifua, a o Ia puapuagatia “e sili i mea e mafai ona onosai ai tagata, vagana ona ua oo le oti; aua faauta, e sau le toto ai mea uma e afu ai, e faapea [ona] tele lona puapuaga ona o le amioleaga ma mea inosia a lona nuu.”11

E le gata ina sa Ia totogia le tau mo agasala a tagata uma, ae na Ia “tauaveina foi i ona luga puapuaga ma ma’i o lona nuu.” Ma sa Ia “ave foi i ona luga o latou vaivai, ina ia faatumuina lona alo i le alofa, … ina ia silafia e ia e tusa ma le tino le ala e tausi a’i lona nuu e tusa ma o latou vaivai.”12

Sa lagona e le Faaola le mamafatū o le loto mafatia o tagata uma—o le loto mafatia i le agasala, ma le faanoanoa. “E moni, ua na tauave o tatou tiga, na tauave foi o tatou faanoanoa.”13

O Lana Togiola ua Ia faamaloloina ai e le gata i le tagata agasala, ae ua Ia faamaloloina ai foi lē ua tauamiotonuina o loo mafatia ona o na soligatulafono. A faaaoga e lē ua tauamiotonuina le faatuatua i le Faaola ma Lana Togiola ma faamagalo i le tagata solitulafono, ona mafai foi lea ona faamaloloina i la’ua.

E i ai taimi e manaomia ai e i tatou taitoatasi le “mapusaga mai lagona o le tausalaina lea e maua mai i mea sese ma agasala.”14 A tatou salamo, ona aveesea lea e le Faaola o le tausalaga mai o tatou agaga.

E ala i Lana taulaga togiola, e magalo ai a tatou agasala. Vagana o agasala o le malaia e faavavau, ae o loo avanoa le Togiola mo tagata uma, i taimi uma, e tusa po o le a le tele po o le laitiiti o le agasala, “i le agaga o le salamo.”15

Ona o Lona alofa e le i’u, ua valaaulia ai i tatou e Iesu Keriso ia salamo ina ia tatou le mafatia ai i le mamafatu o a tatou lava agasala:

“Salamo—salamo, ne’i … faigata tele ou puapuaga—o le tiga e te le’i iloa, ma o le uiga ese o le tiga e te le’i iloa, o le faigata ona onosa’i e te le’i iloa.

“Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“Ae afai latou te le salamo, e ao ina latou tiga e pei o a’u;

“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga.”16

Ua ofo mai e le Faaola le faamalologa i ē o mafatia mai i le agasala. “Pe tou te le foi mai nei ea ia te au, ma salamo i a outou agasala, ma ia faaliliuina ina ia ou faamaloloina outou?”17

O Iesu Keriso o le Fomai Sili o o tatou agaga. Vagana ai agasala o le malaia e faavavau, e leai se agasala po o se solitulafono, tiga po o le faanoanoa, e le mafai ona faamagaloina i le mana faamalolo o Lana Togiola.

A tatou agasala, e ta’u mai e Satani ua tatou leiloloa. I se eseesega, ua ofo mai e lo tatou Togiola le faaolataga mo tagata uma—e tusa lava po o le a le mea sese ua tatou faia—o lena ofo e mo oe ma au.

A o e manatunatu i lou lava olaga, pe o i ai ni mea e manaomia ona suia? Pe na e faia ni mea sese e manaomia ona faasa’o?

Afai o e mafatia mai lagona o le tausalaina po o le faanoanoa, oona matuitui po o le ita, po o le leai o se faatuatua, ou te valaaulia oe e saili mo se mapusaga. Salamo ma lafoai au agasala. Ona tatalo lea i le Atua mo se faamagaloga. Saili se faamagaloga mai ia i latou sa e sese i ai. Faamagalo i latou sa faia mea sese ia te oe. Faamagalo foi ia te oe lava.

Alu i le epikopo pe afai e tatau ai. O ia o le avefeau o le alofa mutimutivale a le Alii. O le ia fesoasoani ia te oe ia toe faamamaina e ala i le salamo.

Faatofu oe lava i le tatalo ma le suesueina o tusitusiga paia. A e faia na mea, o le a e lagonaina le faatosinaga faapaiaina a le Agaga. Na fetalai mai le Faaola, “Ia faapaiaina outou lava; ioe, ia faamama o outou loto, ma fufulu o outou lima … i o’u luma, ina ia ou faamamaina outou.”18

A o faamamaina i tatou e ala i le mana o Lana Togiola, o le a avea le Faaola ma o tatou puluvaga i le Tama, o augani atu:

“Tama e, faauta i le puapuaga ma le oti o lē na le faia se agasala, o le na e fiafia lava i ai; faauta i le toto o lou Atalii na faamaligiina, o le toto o lē na e tuuina atu ina ia faamamaluina oe lava;

“O le mea lea, Tama e, ia faasaoina ai o’u uso nei o e talitonu i lo’u igoa, ina ia latou o mai ia te au ma maua le ola faavavau.”19

Ua tofu i tatou ma le meaalofa o le faitalia e filifili ai le mea tonu. “Ua saoloto tagata … e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le … mana o le tiapolo.”20

I tausaga ua mavae sa faaaoga ai e lo’u uso lana lava faitalia ina ua ia filifilia se ituaiga olaga na maumau ai lona malosi, o lona aiga ma lona avea ai ma tagata o le Ekalesia. I ni tausaga mulimuli ane, sa ia faaaoga ai foi lea lava faitalia ina ua ia filifili e salamo, ia faaogatusa ai lona olaga ma aoaoga a le Faaola, ma ia toe fanauina moni ai lava e ala i le mana o le Togiola.

Ou te molimau atu i le vavega o le Togiola. Ua ou vaaia lona mana faamalolo i le olaga o lo’u uso, ma ua ou lagonaina foi i lo’u lava olaga. O le mana faamalolo laveai o le Togiola, o loo avanoa mo i tatou uma taitoatasi—i taimi uma.

Ou te molimau atu o Iesu o le Keriso—o Fomai o o tatou agaga. Ou te tatalo ina ia filifili uma i tatou taitoatasi e tali atu i le valaaulia a le Faaola, “Pe tou te le foi mai nei ea ia te au, ma salamo i a outou agasala, ma ia faaliliuina, ina ia ou faamaloloina outou?”21 I le suafa o Iesu Keriso, amene.

  1. Luka 15:17.

  2. Mataupu Faavae ma Feagaiga 58:42–43.

  3. Tagai 2 Nifae 2:25–26.

  4. Tagai Alema 34:14.

  5. Alema 42:15.

  6. Tagai Alema 34:11.

  7. Tagai Alema 34:10.

  8. Tagai Alema 22:14.

  9. Mosaea 15:7.

  10. Mosaea 14:10.

  11. Mosaea 3:7.

  12. Alema 7:11–12.

  13. Mosaea 14:4.

  14. Tala’i La’u Talalelei: O Se Taiala mo le Galuega Faafaifeautalai (2004), 2.

  15. Mataupu Faavae ma Feagaiga 18:12.

  16. Mataupu Faavae ma Feagaiga 19:15–18.

  17. 3 Nifae 9:13.

  18. Mataupu Faavae ma Feagaiga 88:74.

  19. Mataupu Faavae ma Feagaiga 45:4–5.

  20. 2 Nifae 2:27.

  21. 3 Nifae 9:13.