Na Siga ni Vakacecegu kei na Sakaramede

Kemuni na taciqu kei na ganequ e vuravura taucoko, eda gole mai ena mataka nikua meda mai rogoca na domo ni dua na parofita. Au sa vakadinadinataka ni domo eda se qai rogoca walega oqo sa domo tiko ni parofita bula ni Kalou e vuravura nikua, o ya o Peresitedi Thomas S. Monson. Eda sa kalougata dina ena nona veivakavulici kei na ivakaraitaki!

Sa soli oti vei keda ena yabaki oqo na madigi meda vulica na nodra vosa na parofita ena Veiyalayalati Vou. Era vulici ena Veiyalayalati Makawa na parofita kei ira na tamata, ia e vakatabakiduataki tiko ena Veiyalayalati Vou na nona bula kei na veivakauqeti ni dua na Tamata ka mai bula vakayago ka lewenivanua ruarua e lomalagi kei vuravura talega—na noda iVakabula ka Dauveivueti, o Jisu Karisito.

Sa veimedrayaki tu o vuravura ena ivakavuvuli vakatamata ka rawa sara me guilecavi ka yali na vakabauti tiko ni itukutuku bibi ni nona bula na iVakabula kei na nona ilesilesi vakalotu—o ya na Veiyalayalati Vou. Na ivola vakalou oqo sai koya na iusutu ni ivolaitukutuku ni ivolanikalou, me vaka ga ni sa iusutu ni noda bula na iVakabula. E dodonu meda yalodinataka na kena vulici ka karona sara!

Era sa mataniciva talei sara ni veivakavukui eda na kunea rawa ena noda vulica na Veiyalayalati Vou. Au dau taleitaka na vakawilika na italanoa ni nona veilakoyaki o Paula ka tauyavutaka na Lotu ni iVakabula, vakabibi na nona vakavulici Timoci. Eda wilika kina ena ikava ni wase ni ivola nei Paula vei Timoci: “A veika oqo mo vakarota ka vakatavuvulitaka. … Ia mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalosavasava.”¹E sega tale ni tiko e dua tale na sala meda tekivu se tomana tiko meda nodra ivakarau era sa vakabauta me vakataka na noda rokova na Siga ni Vakacecegu.

Vakatekivu mai na kena buli na vuravaura, a vakatabui e dua na siga mai na siga kece tale eso.“A sa vakalougatataka na kena ikavitu ni siga ka vakatabuya.”² Na Kalou mada ga a cegu mai na Nona cakacaka ena siga oqo, ka sa namaka o Koya mera vakayacora vakakina o ira na Luvena. A solia kina na ivakaro oqo vei ira na luvei Isireli:

“Mo nanuma na siga ni vakacecegu mo vakatabuya.

“E ono na siga mo dau cakacaka kina, ka kitaka kina na nomu cakacaka kecega:

“Ia na ikavitu ni siga sa siga ni vakacecegu i Jiova na nomu Kalou. …

“… O koya sa vakalougatataka kina ko Jiova na siga ni vakacecegu, ka vakatabuya.”³

E dodonu me okati na sokalou ena ivakarau ni kena rokovi na Siga ni Vakacecegu. Ena gauna rau sa mai bula kina vakayago o Atama kei Ivi rau a vakaroti me rau “vakarokoroko vua na Turaga na nodrau Kalou, ka … vakacabora na ulumatua ni nodrau sipi me madrali vua na Turaga … sa ivakatakarakara ni nona cabori Koya na Le Duabau Ga nei Tamana.”⁴ Na madrali manumanu oqo sa vakavotui tiko kina vei ira na kawa i Atama ni dua na siga ena solia na Lami ni Kalou, o Jisu Karisito na Nona bula vakai Koya me baleti keda.

E dau tukuna tiko na iVakabula na solibula oqo ena Nona bula taucoko.⁵ Ena yakavi ni se bera ni laki Vakoti ena Kauveilatai, sa tekivu vakayacori kina na ka sa tukuna tu mai. A vakasoqoni iratou na Nona tisaipeli ena tabavale e cake, me vakatikitiki mai na veivakataotaki ni vuravura oqo. Sa tauyavutaka kina na sakaramede ni Vakayakavi ni Turaga.

“Ia ni ra sa kana tiko, sa taura na madrai ko Jisu, ia ni sa lotutaka oti, sa dovia, ka solia vei ira na tisaipeli, ka kaya, Taura, kania, oqo na yagoqu.

“Sa qai taura na bilo ko koya, ia ni sa vakavinavinaka oti, sa solia vei ira ka kaya, Dou gunu kece kina;

“Oqo na noqu dra ni veiyalayalati vou sa liviraki ena vukudra na lewevuqa, me bokoci na ivalavala ca.”⁶

Vakatekivu mai na gauna o ya, sa yaco kina na Veisorovaki ni Turaga me isolibula cecere ka kena iotioti talega. Ena gauna a tadu yani kina ki na vanua o Amerika ni sa Tucaketale, a laki vakatikora na Nona matabete vei ira na Nona tisaipeli ka tauyavutaka na sakaramede ka kaya:

“Ia mo dou vakayacora ena kena icakacaka, … me vaka au sa dovia na madrai ka lotutaka.

“… Oqo me ivakadinadina vei Tamaqu ni dou sa daunanumi au tikoga. Ia kevaka dou sa daunanumi au tikoga, ena tiko ga kei kemudou na noqu Yalo Tabu.”⁷

E veivakakurabuitaki ni a vakayacori tiko mada ga ena gauna butobuto ni Vukitani na ivakarau ni sokalou enaSiga ni Vakacecegu kei na sakaramede ena vuqa sara na sala.

Ena gauna sa vakalesuimai kina na kosipeli, e ratou a rairai vei Josefa Simici kei Oliver Cowdery e tolu vei iratou na iApositolo, o ya o Pita, Jemesa, kei Joni, ka ratou a ciqoma taumada na sakaramede mai vua na iVakabula. Ena nodratou veidusimaki sa vakalesuitale mai kina na lewa ni matabete e gadrevi me qaravi kina na sakaramede vei ira na lewe ni Lotu.⁸

A vakatikora na iVakabula vei ira na Nona parofita kei na iApositolo, vakadewataki mai vei ira kivei keda, na lewa ni matabete sa mai tiko nikua e vuravura. Sa rawa kina vei ira na lewe ni matabete cauravou e vuravura taucoko mera cakacaka ena kaukauwa ni matabete ena nodra yalodina tiko ena maroroya na vunau ka bula voli ena ivakatagedegede ni kosipeli. Ni ra sa liga savasava tiko vakayalo ka savasava na yalodra na cauravou oqo, era sa qai vakarautaka, masulaka, ka vota yani na sakaramede ena ivakarau ni iVakabula—na ivakarau a tauyavutaka o Koya ena 2,000 na yabaki sa oti.

Sa iusutu ni kena rokovi na Siga ni Vakacecegu na kena votai na sakaramede. Sa vakaroti keda taucoko kina na Turaga ena Vunau kei na Veiyalayalati:

“Raica sa kilikili sara mo qarauni iko vinaka me kakua ni tauvi iko na duka ni ka vakavuravura, io mo lako ki na vale ni soqoni e na siga ni vakacecegu ka qaravi au kina;

“Ia oqo na siga sa vakaroti vei iko mo vakacegu kina mai na nomu cakacaka kecega, ia mo qaravi koya ga sa Cecere Sara. …

“Raica mo kakua ni kitaka e dua na cakacaka ena siga ko ya.”⁹

Ni da vakayacora na ivakarau ni Siga ni Vakacecegu kei na sakaramede ena noda bula, sa tiko kina e tolu na ka e vinakata vei keda na Turaga: imatai, meda vagalalataki keda mai na duka ni vuravura oqo; ikarua, meda gole yani ki na vale ni masumasu ka laki cabora kina na noda sakaramede; ka ikatolu, mo cegu mada mai na nomu cakacaka.

Sa dua na ka lagilagi meda tamata sa Vakarisito, meda sa tisaipeli dina i Karisito. A kaya kina baleti keda, “Era sa sega ni vakavuravura, me vaka kau sa sega ni vakavuravura.”¹⁰ Na noda sega ni vakavuravura, sa namaka o Koya meda drotani mai na veivakayarayarataki kei vuravura ena veika vakabisinisi kei na veivakamarautaki eso ena Siga ni Vakacecegu.

Au vakabauta ni gadreva talega o Koya meda isulusulu rakorako. Era na kaya beka o ira na itabagone ni sa oti na kena gauna na “iSulu ni Siga Tabu” ena ivosavosa makawa. Eda sa kila kina ni gauna eda vakatorosobutaka kina na noda isulusulu ena Siga Tabu sa tarava sara mai na kena itovo kei na ivakarau. E dina ni sega sara ni gadrevi vei ira na luveda lalai mera vakaisulu tudei tiko ena Siga Tabu taucoko. Ia, ena isulusulu eda tukuna vei ira mera dara kei na itaviqaravi eda tuvanaka, eda sa vukei ira tiko mera vakavakarau ki na sakaramede ka marautaka na kena veivakalougatataki ena siga taucoko o ya.

Na cava na ibalebale meda cabora kina na noda sakaramede vua na Turaga? Eda sa vakadinadinataka kina ni da sa caka cala kecega. Eda sa gadrevi kina vakayadua meda vakatusa ka biuta tani vakadua na noda ivalavala ca kei na caka cala vua na Tamada Vakalomalagi kei ira eda a caka cala kina. Sa veivakarautaki kina na Siga ni Vakacecegu meda sa cabora kina oqo—na noda sakaramede—vua na Turaga. A kaya o Koya, “Ia mo nanuma tiko, mo vakacabora e na siga ni Turaga na nomu isoro kei na madrali vei Koya sa Cecere Sara, io mo vakatusa na nomu ivalavala ca vua na Turaga kei ira na wekamu.”¹¹

E vakatura kina vakaoqo o Elder Melvin J. Ballard, “Keimami gadrevi ira kece na Yalododonu Edaidai mera gole mai ki na teveli ni sakaramede ni sai koya oqo na vanua meda vaqaqai keda kina vakai keda, vakadikevi keda, ka vulica kina meda vakadodonutaka na noda ilakolako ka vakatudonutaka na noda bula, me salavata kei na ivakavuvuli ni Lotu vakakina vei ira na tacida kei na ganeda vakalotu.”¹²

Ni da sa votai kilikili ena sakaramede, eda sa vakadinadinataka kina ni da sa gadreva meda taura na yaca ni iVakabula ka maroroya na Nona vunau kadaunanumi Koya ka me tikoga kei keda na Nona Yalotabu . Ena sala oqo sa vakavoui kina na noda veiyalayalati ni papitaiso. Sa vakadeitaka kina na Turaga vei iratou na Nona tisaipeli, “[Ni dou sa vakayacora tiko vakaoqo dou na nanuma kina na auwa au a tiko vata kina kei kemudou].”¹³

Eso na gauna eda nanuma meda sa cegu mada na cakacaka ka biuta tu ga yani na ivesu co madu ena were ka vakabira na ivakatakilakila Sa Sogo ena katuba ni bisinisi. Ia ena vuravura nikua, na cakacaka sai koya talega na cakacaka kece sara ni noda bula ena veisiga. E oka talega kina na veiqaravi ni bisinisi eda dau rawata mai vale, na veitau cici, kei na sasaga tale eso ka kauti keda laivi mai na sokalou ena Siga Tabu kei na madigi ni nodra qaravi na tamata.

A vakatakila na Turaga vei ira na Yalododonu taumada me ra “Kakua ni vakawaletaka na veika tabu,” ¹⁴me vakavotuya tiko vei keda na veika a kaya vei iratou na Nona tisaipeli, “Sa caka na siga ni vakacecegu ena vukudra na tamata, e sega ni caka na tamata ena vuku ni siga ni vakacecegu.”¹⁵

Kemuni na taciqu kei na ganequ, ena gugumatua ko meca ena iotioti ni gauna ke da vakawalena na noda dina vua na iVakabula, ka vakanadakuya na Nona ivakavuvuli ena Veiyalayalati Vou kei na ivolanikalou tale eso, ka sega ni muri Koya. Sa kena gauna oqo, meda vakavulici ira na luveda mera sa nodra ivakarau era sa vakabauta ena nodra tiko ena soqoni ni sakaramede. Ni sa mataka ni Siga Tabu, ni vukei ira mera vakacegu vakavinaka, vakaisulu maqosa, ka vakavakarau vakayalo mera votai ena ivakatakarakara ni sakaramede ka ciqoma na kaukauwa veivakararamataki, veivakatataki, kei na veivakadeitaki ni YaloTabu. Me vakasinaiti na nomuni matavuvale ena loloma ena nomuni rokova tiko na Siga ni Vakacecegu ka vakila na kena veivakalougatataki vakayalo ena macawa taucoko o ya. Sureti ira na luvemuni tagane kei na goneyalewa mera “tu cake ka rarama mai,” ena nodra rokova ka vakatabuya na Siga ni Vakacecegu, me “cila yani na [nodra] rarama me ivakaraitaki vei ira na veimatanitu.”¹⁶

Ni toso tiko na yabaki, au dau vakananuma lesu na Siga ni Vakacecegu niu se cauravou lailai kei na noqu sa cauravou levu sara. Au se nanuma toka ga na imatai ni siga au a qarava kina na Sakaramede niu se dikoni, kei na bilo lalai lase au a vota vei ira na lewenilotu ena neimami tabanalevu. Ena vica na yabaki sa oti a vakavoutaki kina e dua na vale ni Lotu ena noqu taoni, a vakoti tu kina e dua na kovate ena itutu ni vunau. Ni sa dolavi, era kunei kina eso na bilo lalai lase ka ra biu tu kina ena vica vata na yabaki. A qai soli vei au e dua me ivakananumi.

Au nanuma talega e dua na kovate drokadroka keimami dau kauta voli na Mataivalu ni Amerika. E tiko e loma ni kovate oqo e dua na tere kau kei na so na pakete bilo ni sakaramede, me keimami vakalougatataki ena vakacegu kei na inuinui ni Vakayakavi ni Turaga ena gauna talega ni veiravuravui kei na veivakaleqai ni ivalu.

Niu dau vakasamataka na bilo ni sakaramede oqo mai na gauna ni noqu cauravou, e dua ena buca maroroi ena noqu vanua ni gonetagane, kei na kena ena udolu na maile vakayawa ena Pasivika, au a vakasinaiti kina ena vakavinavinaka vua na iVakabula kei Vuravura ena nona lomasoli me gunu mai na “bilo ni cudru” o ya, ¹⁷ ena vukuqu. Ni sa mai vakayacora o Koya, au sa domovata kina kei Daunisame, “Sa vuabale na mequ bilo” ¹⁸ ena veivakalougatataki tawamudu ka tawayalani ni Nona Veisorovaki.

Ena siga oqo ni bera na Siga ni Vakacecegu, ni sa mai tekivu na koniferedi cecere oqo, meda vakananuma sara na veivakalougatataki kei na madigi sa noda meda tiko rawa ena soqoni ni sakaramede ena veimacawa ena noda tabanalevu kei na tabana. Meda vakarautaka ka vakaitovotaki keda ena Siga ni Vakacecegu ena ivakarau ka na sureta mai na veivakalougatataki sa yalataki tu me noda vakakina o ira na noda matavuvale. Sa noqu ivakadinadina dokai oqo ni marau cecere eda ciqoma ena bula oqo sa tiko ena noda muria na iVakabula. Sanoqu masu meda muria na Nona ivunau ena noda doka tiko na Nona siga vakatabui oqo, ena yaca i Jisu Karisito, emeni.