Faatalitali i le Auala i Tamaseko

Sa avea se tasi o tuafafine pele ma se tagata faamaoni o le Ekalesia i lona olaga atoa. Peitai sa ia tauaveina se faanoanoaga patino. O tausaga na muamua atu, sa maliu ai lana tama teine i se gasegase sa le’i leva ona maua ai, ma o manu’a mai lenei faalavelave sa aafia ai pea lava o ia. Sa pagatia o ia i fesili loloto ia e o mai faatasi ma se faalavelave e pei o lenei. Sa ia tautino faamaoni mai, sa le toe pei lana molimau o le mea sa masani ona i ai. Sa ia manatu, a le matala le lagi mo ia, o le a le toe mafai lava ona ia toe talitonu.

O lea sa na ona faatalitali ai o ia.

E toatele lava isi, ona o mafuaaga eseese, ua latou faatalitali ai i le ala i Tamaseko. E faatuai ona latou galulue atoatoa a o avea ai ma ni soo. Latou te faamoemoe e maua le perisitua ae mumusu e ola agavaa mo lena avanoa. Latou te mananao e ulu atu i le malumalu ae latou te tolopoina le gaoioiga mulimuli e agavaa ai. O loo latou faatalitali lava mo le tuuina atu o le Keriso ia i latou e pei o le atavali matagofie a Carl Bloch—ina ia aveese atoa ai o latou masalosaloga ma atugaluga.

O le mea moni, o i latou o e saili ma le filiga ia iloa Keriso, e iu lava ina latou iloa o Ia. O ia vaega taitasi atonu e le faigofie ona iloaina—atonu e le manino foi pe o le a lona faiā i le [ata] atoa. O fasimea taitasi e fesoasoani e manino atili ai la tatou vaai i le ata tele. Mulimuli ane, afai e lava ia fasimea e tuufaatasi, ona tatou iloa ai o le matagofie naua o le ata atoa. Ma, o le toe tepa i o tatou aafiaga, tatou te iloa ai, e moni lava sa faatasi mai le Faaola ma i tatou—e le’i faapea o le taimi lava lena, ae i se auala filemu, malu, ma na toetoe lava a le iloaina.

E mafai ona avea lenei mea ma o tatou aafiaga pe afai tatou te agai i luma ma le faatuatua ae aua le faatalitali umi i le ala i Tamaseko.

Ou te molimau atu ia te outou e alofa lo tatou Tama oi le Lagi i Ana fanau. E alofa o Ia ia te oe. A talafeagai ai, e iu lava ina sapai oe e le Alii i luga a’e o ou faafitauli, a o e sailia Lona filemu ma se loto momomo ma se agaga salamo. E masani ona Ia fetalai mai ia i tatou i auala e na o o tatou loto e mafai ona tatou lagonaina ai. Ina ia tatou lagonaina lelei Lona siufofoga, o se mea atamai le tuutuu i lalo o leo o le lalolagi i o tatou olaga. Afai tatou te le amanaia pe poloka ia uunaiga a le Agaga, po o le a lava le mafuaaga, o le a iu ina tau le iloa seia oo lava ina tatou le lagonaina lava. Ia tatou aoao e faalogo i uunaiga a le Agaga ona naunau lea e usitai i ai.

O lo tatou perofeta peleina o Thomas S. Monson, o lo tatou faataitaiga lea i lenei tulaga. E tele naua tala i lona mataala i musumusuga a le Agaga. Na faamatala e Elder Jeffrey R. Holland se tasi o na faataitaiga:

I se tasi taimi, a o i ai Peresitene Monson i se tofiga i Louisiana, na talosagaina ai o ia e se peresitene o le siteki pe mata e i ai sona taimi e asiasi ai i se teineitiiti e 10 tausaga le matua e igoa ia Christal o lē sa i ai i toe taimi o lona ma’i o le kanesa. Sa tatalo le aiga o Christal ina ia mafai ona oo atu Peresitene Monson. Peitai sa mamao tele lo latou fale, ma sa pisi lava foi fuafuaga faatulagaina o le aso, o lea sa leai ai se taimi e asiasi atu ai. O lea, na talosagaina ai e Peresitene Monson i latou sa saunia tatalo o le konafesi ia aofia ai ma Christal i a latou talosaga. E mautinoa lava o le a malamalama le Alii ma le aiga.

I le taimi o le sauniga o le konafesi i le Aso Toonai, a o tulai Peresitene Monson e saunoa, sa musumusu mai le Agaga, “Ina tuu mai ia o tama iti e o mai ia te a’u, aua le vavao ia te i latou: aua e faapei o i latou nei o e o i le malo o le Atua.”³

“Sa nenefu ana faamatalaga na tusitusia. Sa taumafai e faaauau le autu o le sauniga e pei ona sa faatulagaina, peitai sa le mafai ona aluese ma lona mafaufau le igoa ma foliga o le [teineitiiti laitiiti].”⁴

Sa faalogo o ia i le Agaga ma toe faatulaga ai ana fuafuaga faataatitia. I le taeao po o le aso na sosoo ai, na tuua ai e Peresitene Monson le ivasefulu ma le iva ae malaga atu i le tele o maila ina ia i ai i talaane o le moega o le toatasi.

O le taimi lava na taunuu atu ai iina, sa tilotilo ifo o ia “i le teineitiiti na vaivai tele e nofo a’e i luga, ma na vaivai foi e tautala. O lona ma’i sa le mafai ai ona pupula. O lona ootia tele i lenei vaaiga ma le Agaga o le Alii, sa uu mai ai e Uso Monson le lima vaivai o le teineitiiti. ‘Christal,’ na ia musumusu atu ai, ‘o lea ua ou iinei.’

Faatasi ai ma se taumafaiga malosi sa musumusu ane ai o ia, ‘Brother Monson, na ou iloa lava o le a e sau.’”⁵

O’u uso ma tuafafine pele, tatou taumafai ia avea i tatou ma e e mafai ona faalagolago mai i ai le Alii e faalogo i Ana musumusuga ma tali atu, e pei ona faia e Saulo i lona ala i Tamaseko, “Le Alii, se a le mea e te finagalo i ai ou te faia?”⁶

O le isi mafuaaga tatou te le iloa ai i nisi o taimi le siufofoga o le Alii i o tatou olaga, ona atonu e le sau sa’o ia i tatou faaaliga a le Agaga o tali o a tatou tatalo.

E finagalo lo tatou Tama oi le Lagi ia tatou suesue muamua ona tatalo atu ai lea mo le taitaiga, a o tatou saili i tali o fesili ma faafitauli i o tatou lava olaga. Ua tatou maua le faamautinoaga a lo tatou Tama Faalelagi o le a Ia faafofoga ma tali mai i a tatou talosaga. O tali atonu e oo mai e ala i le leo ma le poto o ni uo ma aiga faatuatuaina, o tusitusiga paia, ma saunoaga a perofeta.

Ua ou iloa o nisi o uunaiga e sili ona malolosi tatou te maua, e le gata e mo lo tatou lava manuia ae e mo le manuia foi o isi.Afai e na o i tatou lava tatou te mafaufau i ai, atonu o le a tatou misia nisi o aafiaga faaleagaga e sili ona mamana ma faaaliga loloto o o tatou olaga.

Sa aoao mai e Peresitene Kimball lenei manatu ina ua ia saunoa, “E silafia e le Atua i tatou, ma silasila mai ia i tatou. Ae e masani lava, o se isi tagata e faaauala mai ai lona taulimaina o o tatou manaoga. O le mea lea, e taua ai lo tatou auauna atu o le tasi i le isi.”⁷ Uso e ma tuafafine, ua tofu i tatou ma se tiutetauave tuuto ia nofouta i manaoga o isi ma auauna atu e pei ona sa faia e le Faaola e aapa atu ai, ma sii a’e i latou e siomia i tatou.

E masani lava, o le tali i la tatou tatalo e le oo mai a o tatou tootutuli, ae pe a o tatou savavali, e auauna atu i le Alii ma auauna atu ia i latou e siomia i tatou. O galuega le manatu faapito o le auauna atu ma le faapaiaina e faamamaina ai o tatou agaga, aveese ai una mai o tatou mata faaleagaga, ma toina mai ai pupuni o le lagi. O le avea ma tali i le tatalo a se isi tagata, e masani lava ona maua ai le tali o a tatou lava tatalo.

E i ai taimi e faaali mai ai e le Alii ia i tatou mea ua faamoemoeina mo na o i tatou lava. E ui i lea, i le tele ma le tele o tulaga, Na te tuuina mai ai se molimau o le upumoni ia i latou o le a faasoaina atu i isi. O le tulaga lenei o loo i ai i perofeta uma lava talu mai aso o Atamu. E sili atu foi ona faamoemoe mai foi le Alii ia i tatou o tagata o Lana Ekalesia e “tautala atu [o tatou gutu] i aso uma, i le folafolaina o [Lana] talalelei i le leo o le fiafia.”⁸

E le o taimi uma e faigofie ai lenei mea. O nisi e sili atu ia i latou le tosoina o se taavaletosolima e sopoia ai se laufanua, nai lo le ta’ua o le mataupu o le faatuatua ma tapuaiga i a latou uo ma e latou te faigaluega faatasi. Latou te popole i manatu o tagata e uiga ia i latou pe ina nei faaleagaina ai foi a latou fegalegaleaiga. E le tatau ona faapena, aua ua ia i tatou se savali fiafia e faasoa atu, ma ua i ai foi sa tatou savali o le olioli.

O ni tausaga ua mavae, sa nonofo ai lo matou aiga ma galulue faatasi ai ma ni tagata o e, i le tele lava o tulaga, sa le auai i lo tatou faatuatuaga. Pe a latou fesili mai pe na a mai le faaiuga o lo matou vaiaso, sa matou taumafai e faamisi autu masani—pei o taaloga, tifaga, po o le tau—ae taumafai e faasoa atu i ai ni aafiaga faalelotu a lo matou aiga i le faaiuga o le vaiaso—mo se faataitaiga, o se lauga a se talavou e uiga i tulaga faatonuina mai le Mo Le Malosi o le Autalavou po o le auala foi sa ootia ai i matou i ni upu a se alii talavou ua alu i se misiona, po o le auala foi na fesoasoani ai le talalelei ma le Ekalesia i lo matou aiga e faatoilalo se matou luitau patino. Sa matou taumafai ia matou le talai tele atu pe soona fai foi. O lo’u toalua o Harriet, sa sili atu i taimi uma ona lelei i le sailia o se mea musuia, faagaeetia pe malie foi e faasoa atu. O lenei faiga sa masani ona oo atu ai i ni talanoaga e sili atu ona loloto. O le mea e malie ai, soo se taimi lava matou te talanoa ai ma uo e uiga i le taulimaina o luitau o le olaga, sa masani ona matou faalogo i le faaupuga “E faigofie atu ia te outou; ona o loo i ai la outou ekalesia.”

Faatasi ai ma le anoano o punaoa faasalalau faaagafesootai, ma le tele naua o mea laiti e tele pe laiti foi ni aoga ua tatou maua, ua faigofie atu ai le faasoaina atu o le tala fiafia, ma o ona aafiaga ua sili atu ona loloto nai lo le taimi muamua. O le mea moni, ou te fefe ua i ai nisi o faalogologo mai, ua uma ona latou auina atu ni feau i telefoni feavea’i e pei o le, “Ua 10 minute o lauga, ae leai lava ma se talafaatusa i le aveina o vaalele!” Au uo talavou e, atonu o le faamalosiauga a le Alii e “tatala o tatou gutu”⁹ i le asō e ono aofia ai le “faaaogaina o ou lima,” e faailoa i le initoneti, ma tesi atu le feau o le talalelei i le lalolagi uma! Ae faamolemole ia manatua, ia faia ia mea uma i le nofoaga sa’o ma le taimi sa’o.

Uso e ma tuafafine, faatasi ai ma faamanuiaga o tekinolosi i ona po nei, e mafai ona tatou faailoa atu le agaga faafetai ma le fiafia i le fuafuaga sili a le Atua mo Ana fanau, i se auala e mafai ai ona lagonaina e le gata i o tatou falefaigaluega ae o le lalolagi atoa foi. O nisi taimi o se fuaiupu se tasi o le molimau e mafai ona faatulagaina ai mea e tutupu e aafia ai le olaga o se tagata mo le faavavau.

O le auala sili ona lelei e talai atu ai le talalelei, e ala lea i faataitaiga. Afai tatou te ola e tusa ai ma o tatou talitonuga, o le a faapea ona mātau e tagata. Afai e susulu atu foliga o Iesu Keriso i o tatou olaga,¹⁰ afai tatou te fiafia ma lelei ma le lalolagi, o le a fia iloa e tagata pe aisea. O se tasi o lauga aupito maoae ua fofogaina e uiga i le galuega faafaifeautalai, o le manatu faatauvaa lenei na faia ia St. Francis o Assisi: “Tala’i le talalelei i taimi uma, ma a manaomia, faaaoga upu.”¹¹ Ua siomia i tatou i avanoa e fai ai. Aua le misia e ala i le faatalitali umi i le ala i Tamaseko.

Ou te molimau atu e fetalai mai le Alii i Ana perofeta ma aposetolo i o tatou aso. E fetalai mai foi o Ia ia i latou uma o e o mai ia te Ia ma se loto faamaoni ma le manatu tonu i ai.¹²

Aua le masalosalo. Manatua, “Amuia o e le vaai mai, a e talitonu mai pea.”¹³ E alofa le Atua ia te outou. E faafofoga mai i a outou talosaga. E fetalai mai o Ia i Ana fanau ma tuuina mai le faamafanafanaga, filemu, ma le malamalama ia i latou o e saili ia te Ia ma faamamalu ia te Ia e ala i le savavali i Ona ala. E tuuina atu la’u molimau paia O Le Ekalesia a Iesu Keriso o le Au Paia o Aso e Gata Ai, o loo i ai lava i le ala. O loo i ai so tatou perofeta soifua. O loo taitaiina lenei Ekalesia e Ia, o lē ona le suafa o loo tatou tauaveina, o le Faaola o Iesu Keriso.

Uso e ma tuafafine, uo pele, aua nei o tatou faatalitali umi i lo tatou auala i Tamaseko. Ae, ia tatou agai ma le lototele i luma i le faatuatua, faamoemoe, ma le alofa moni, ona faamanuiaina lea o i tatou i le malamalama o loo tatou sailia uma i le ala e avea ai ma soo moni. Ou te tatalo atu ai mo nei mea, ma tuuina atu a’u faamanuiaga mo outou i le suafa o Iesu Keriso, amene.