Eaha to outou huru e au ai?

« Ia riro e aore râ, eiaha ia riro ? » e uiraa maitai roa teie.¹ Ua ui te Faaora i teie uiraa i roto i te tahi huru hohonu atu, e ua riro mai ei uiraa haapiiraa faufaa rahi no tatou tata‘itahi : « Eaha to outou huru e au ai ? Amene e parau atu vau ia outou, mai to’u nei » (3 Nephi 27:27 ; faahauhia te faatomaraa). Ia paraparau ana‘e te hoê taata no ni‘a i to’na iho riroraa, e parau ïa oia O vau. Te ani mai nei Oia ia tatou ia rave i To’na i‘oa e To’na huru i ni‘a ia tatou.

No te riroraa mai Ia’na te huru e mea ti‘a atoa ia tatou ia rave i te mau ohipa Ta’na i rave : « Amene, amene, e parau atu vau ia outou, o ta’u evanelia teie ; e ua ite outou i te mea ti‘a ia ravehia i roto i ta’u ekalesia ; o ta’u ho’i ohipa i rave i to outou hi‘oraa ra, o ta outou ïa e rave » (3 Ne. 27:21 ; faahauhia te faatomaraa).

Ia riro e ia rave, aita raua e faataa-ê-hia. E ohipa apipiti teie na parau haapiiraa, e na te tahi e paturu i te tahi. Ei hi‘oraa, na te faaroo e faauru i te hoê taata ia pure, e na te pure e faaitoito i te faaroo o te hoê taata.

Ua faahapa pinepine te Faaora i te feia tei rave i te maitai ma te ore e riro ei feia maitai—e ua parau ia ratou e feia haavare : « Te faatura mai nei te vaha o teie nei feia ia’u, area to ratou aau ra tei te atea ê ïa » (Mareko 7:6). Te taata e rave i te maitai ma te ore e riro ei taata maitai, e taata haavare ïa, e aore râ, e taata o te faaite i te hoê huru taa ê atu i to’na huru mau—e taata faahua.

Ia huri-ana‘e-hia, mai te mea e, e faaite te hoê taata i te hoê huru, e ere nei hoi te reira to’na huru, e mea faufaa ore ïa, mai te au i te parau ra e, « te faaroo, aore e ohipa ra e mea pohe ïa, i te mea te vai hoê noa ra » (Iakobo 2:17 ; faahauhia te faatomaraa). Te riroraa ei taata maitai ma te rave ore i te maitai, e ere ïa i te taata maitai—te taata e ti‘aturi e, e taata maitai oia, o’na iho ïa te inoino, i te mea e, tei roto noa te reira i to’na iho mana‘o.

E rave ma te ore e riro—haavarevare—te faaite ra ïa i te hoho‘a haavare ia vetahi ê, area te riroraa ma te ore e rave te faaite ra ïa i te hoho‘a haavare ia’na iho.

Ua faahapa te Faaora i te mau papa‘i parau e te mau Pharisea no to ratou haavare : « Aue outou, e te mau papa‘i parau e te mau Pharisea, e haavare outou ! Te horo‘a na ho’i outou i te ahuru »—e ohipa teie ua ravehia e ratou —« o te mineta, e te aneto, e te kumina, e te haapae nei i te mau mea rarahi o te ture ra, i te parau-ti‘a, e te aroha e te haapa‘o mau ra » (Mataio 23:23). Aita ratou i riro mai tei titauhia ia ratou ia riro.

Ua ite Oia i te faufaa o te raveraa, ua faariro râ te Faaora i te riroraa ei « mea rarahi ». Na teie mau hi‘oraa i raro nei e faaite mai i te faufaa rahi a‘e o te riroraa :

• Te tomoraa i roto i te pape o te bapetizoraa, te ohipa ïa ta tatou e rave. Te riroraa o te mea ïa e titauhia na mua a‘e i te faaroo ia Iesu Mesia e tae noa’tu i te hoê tauiraa rahi o te aau.

• Te amuraa i te oro‘a mo‘a o te ohipa ïa ta tatou e rave. Area te riroraa tatou ei taata ti‘amâ no te amu i te oro‘a mo‘a, o te mea rahi a‘e ïa e te faufaa ho’i.

• Te faatoro‘araa i roto i te autahu‘araa, o te reira ïa te hoê ohipa e aore râ, te raveraa. Tera râ, te mea rarahi a‘e, o te puai ïa i roto i te autahu‘araa tei niuhia i ni‘a « i te parau tumu no te parau-ti‘a ra » (PH&PF 121:36) e aore râ, te riroraa.

E rave rahi o tatou o te hamani i te tapura ohipa e rave no te faahaamana‘o ia tatou i te mau mea ta tatou e hinaaro e faaoti. Tera râ, e mea varavara roa te taata e hamani i te tapura ohipa no te riroraa. No te aha ? Te mau tapura ohipa e rave, e mau ohipa ïa e aore râ, e mau faanahoraa ïa, o te nehenehe e tapu i ni‘a i te tapura, ia oti ana‘e te reira i te ravehia. Area te riroraa ra, e ore roa ïa e hope i te rave. Eita te tapa‘o no te faaiteraa e, ua oti, e roaa ia outou i ni‘a i te tapura riroraa. E nehenehe au e afa‘i i ta’u vahine e faaorihaere i te hoê pô mahana pae nehenehe roa, o te ohipa ïa te reira e rave. Tera râ, te riroraa ei tane faaipoipo maitai e ere ïa i te hoê faanahoraa ; e titauhia râ ia riro ei tuhaa no to’u huru taata, ei tuhaa no to’u feruriraa, e aore râ, ia riro, o vau iho.

E aore râ, o vau te metua, eaha te taime e tapu ai au i ta’u tamarii i ni‘a i te tapura, ei faaiteraa e, ua oti i te ravehia ? Aita e hopearaa to tatou riroraa ei metua maitai. E no te riroraa ei metua maitai, te hoê o te mau mea faufaa roa a‘e ta tatou e nehenehe e haapii i ta tatou mau tamarii maori râ, nahea ia rahi atu te riroraa mai te Faaora te huru.

Te rirooraa mai te huru o te Mesia ra, eita ïa e ite-mata-hia, e riro râ te reira ei faaitoitoraa ia tatou i roto i te ohipa ta tatou e rave, o te ite-mata-hia. Ei hi‘oraa, ia haapii ana‘e te hoê metua i te hoê tamarii i te haere, e ite tatou i te metua ia rave i te mau mea mai te tamaruraa e te haapoupouraa i ta’na tamarii. Na teie mau raveraa e faaite mai i te here ite-mata-ore-hia e vai ra i roto i to’na aau, e i to’na faaroo e to’na ti‘aturi ite-mata-ore-hia i roto i te puai o ta’na tamarii. E tamau noa oia i ta’na tautooraa aore e mahana tuua—e mau faaiteraate reira no te mau maitai ite-mata-ore-hia o te faaoroma‘i e o te itoito.

To tatou huru te tumu no te ohipa ta tatou e rave, e e tumu ïa no te raveraa, mai te mea e, e haapiihia te taata i te huru e titauhia ia ratou, e maitai a‘e ïa ta ratou peu i te peu e roaa ia ratou ahiri e, i haapii-noa-hia ratou i te ohipa ta ratou e rave.

Ia rave ana‘e te tamarii i te peu tano ore, mai te huru e, e tama‘i te tahi e te tahi, pinepine tatou i te faaafaro i te fifi ia au i te ohipa i ravehia e ratou e aore râ, ia au i te tatama‘iraa ta tatou i ite mata’tu. Tera râ, te ohipa i ravehia—oia ho’i, ta ratou peu—e faaiteraa noa te reira no te mana‘o ite-ore-hia’tu i roto i to ratou aau.E ti‘a ia tatou ia ui ia tatou iho e, « Eaha te mau ateributi [maitai] e nehenehe e faatiti‘aifaro i te reira peu i te mau taime i muri nei ? Te faaoroma‘i e te faaore i te hapa anei ia tupu ana‘e mai te inoino ? Te here e te faatupuraa anei i te hau ?Te amoraa anei i te hopoi‘a a te tahi ma te faahapa ore ? »

Nahea te mau metua i te haapii i te reira mau ateributi [maitai] i ta ratou mau tamarii ? Aita’tu e taime maitai roa no tatou no te haapii e no te faaite i ta tatou mau tamarii i te huru o te Mesia maori râ i roto i te huru no ta tatou faatiti‘aifaroraa ia ratou. No roto mai te parau ra discipline (oia ho‘i, faatiti‘aifaroraa) i te parau ra disciple (oia ho’i, pĭpĭ), e i roto i te reira parau, ua titauhia ia tatou ia faaoroma‘i e ia haapii. Eiaha e faatiti‘aifaro na roto i te riri. E nehenehe, e e mea ti‘a ia tatou ia faatiti‘aifaro mai ta Te Parau Haapiiraa e Te Mau Parau Fafau 121 e haapii mai nei ia tatou, « na roto i te faaoroma‘i-noa-raa, na roto i te marû e te haehaa e na roto ho’i i te here mau ra ; na roto i te aroha, e te ite ateate ra » (irava 41–42) O te reira te taatoaraa o te huru o te Mesia ia riro mai e o te reira o te ti‘a ia riro mai ei hoê huru no tatou, ei mau metua e e mau pĭpĭ na te Mesia ia riro mai.

Na roto i te faatiti‘aifaroraa te tamarii e haapii ai i te mau hopearaa. I roto i taua mau taime ra, e mea maitai roa ia huri i te mea ino ei mea maitai. Mai te mea e, e faî mai te tamarii i te hoê hape, a haapoupou i te itoito i roaa ia’na no te faî mai. A ani i te reira tamarii eaha ta’na i haapii mai i roto i taua hape ra e aore râ, taua ohipa ti‘a ore ra, tei horo‘a ia outou, e te vahi faufaa roa’tu, tei horo‘a i te rave‘a i te Varua ia faauru e ia haapii ia’na. Ia haapii ana‘e tatou i te mau tamarii i te parau haapiiraa na roto i te Varua, e mana to te reira parau haapiiraa no te taui i to ratou huru amuri a‘e, te riroraa.

Ua ite-atoa-hia ia Alama taua parau tumu ra, oia ho’i « e mana rahi to te a‘oraa i te parau a te Atua ia arata‘i i te taata ia rave i te ohipa ti‘a—oia ïa, ua hau to reira mana i ni‘a i te aau o te taata i to te ‘o‘e… » (Alama 31:5 ; faahauhia te faatomaraa). No te aha ? No te mea e faatumu noa te ‘o‘e i ni‘a i te faahaparaa i te peu—e aore râ te raveraa—area te haapiiraa i te parau ra, e taui te reira i te huru mau o te taata—o vaimau o ratou e aore râ, eaha to ratou huru amuri a‘e.

Eita te metua tane e te metua vahine e haapii rahi roa i te ohipa a te metua mai te mea e, e tamarii marû e te faaroo ta raua. Mai te mea râ e, ua haamaitaihia outou na roto i te fariiraa i te hoê tamarii o te tamatamata i to outou faaoroma‘i haere roa i te faito teitei hopea, tei roto mau ïa outou i te parau no te haapiiraa i te ohipa a te Metua. Eiaha outou e feruri e, eaha râ ho’i ta outou i rave i roto i te ao varua, i farii ai outou i teie ati, e feruri râ outou e, ua riro teie tamarii ei haamaitairaa e ei rave‘a no outou ia faarahi atu i to outou huru Atua. I tei hea tamarii to outou haamahu e to outou faaoroma‘i roa e te tahi atu mau huru no te Mesia e tamatahia ai, e faahotuhia ai e e tamâhia ai ? E ti‘a anei ia parau e, te hinaaro nei outou i teie tamarii mai teie tamarii i hinaaroo ia outou ?

Ua faaroo paatoa tatou i te parau a‘o ra e, e faahapa i te hara eiaha râ i te taata rave hara. Mai te reira atoa ïa no ta tatou mau tamarii ia rave ana‘e ratou i te hape, e ara maitai i te mau parau ta tatou e parau, o te mana‘o ho’i ratou e, te hape ta ratou i rave, o te reira ïa to ratou huru. « Eiaha e vaiiho i te manuïa ore o te hoê ohipa i ravehia, ia riro mai ei huru », ma te apitihia mai i to’na mau tapa‘o, mai te « maau », « taere », « hupehupe » e aore râ, « ma‘ua ».² E mau tamarii na te Atua ta tatou mau tamarii. To ratou ïa huru mau e to ratou ïa puai. Ta’na faanahonahoraa, o te tautururaa ïa i Ta’na mau tamarii ia upooti‘a i ni‘a i te mau hape e te mau ohipa ti‘a ore, e ia haere i mua e ia riro mai mai Ia’na te huru. No reira, e mea ti‘a ia faariro i te huru au ore, ei huru no te hoê taime poto noa—e ere te huru tamau, te hoê ohipa i ravehia, e ere râ i te hoê â huru.

Oia’toa, ia faatiti‘aifaro ana‘e tatou, e mea ti‘a ia haapa‘o maitai i te mau parau mai te, « Mai tera noa to oe huru … » e aore râ, « Aita ihoâ oe e… ». Haapa‘o maitai atoa te mau parau mai te « Aita oe e tau‘a mai to’u mau mana‘o », e aore râ, « No te aha e tia‘i noa matou ia oe ? » E nehenehe taua mau huru parau e faahuru ê i te feruriraa a te tamarii no ni‘a iho i to’na huru mau.

E nehenehe atoa e tupu mai te taa ore o te ihotaata ia ani tatou i te hoê tamarii eaha ta ratou e hinaaro ia riro mai ia paari ratou, mai te mea râ te raveraa a te hoê taata i roto i te oraraa o ta ratou ia e riro mai. Eiaha roa te mau ti‘araa ohipa e aore râ te mau tao‘a ia faataa i te ihotaata e aore râ i te faatura ia’na iho. E taata tamuta haehaa te Faaora, e mea fifi ra i te faataa i to’na oraraa.

Na roto i te tautururaa i te hoê tamarii ia ite o vai ra ratou e te haapuairaa i to ratou faatura ia’na iho, e nehenehe tatou e haapoupou i te ohipa ta ratou i rave e aore râ, ta ratou peu—te ohipa i ravehia. Tera râ, e mea maitai a‘e ia faatumu i ta tatou haapoupouraa rahi i ni‘a i to ratou huru e to ratou mau ti‘aturiraa—o vai o ratou.

I roto i te hoê ha‘utiraa tu‘aro, te hoê rave‘a maitai roa no te haapoupou i te ohipa i ravehia e ta tatou mau tamarii, te raveraa, na roto ïa i te hi‘oraa i to ratou huru, mai to ratou puai, te rohi tamau, te vairaa ma te aueue ore i mua i te enemi, e te vai atu ra… ua haapoupou ïa tatou i na mea e piti, te riroraa e te raveraa.

Ia ani ana‘e tatou i te mau tamarii ia rave i te ohipa, e nehenehe tatou e imi i te mau rave‘a no te haapoupou ia ratou i ni‘a i to ratou huru, mai teie te huru « E mea oaoa roa na’u ia rave ana‘e outou i ta outou mau ohipa ma te aau tae ».

Ia farii ana‘e te hoê tamarii i te hoê parau faataaraa na te fare haapiiraa, e nehenehe tatou e haapoupou ia’na no to’na ti‘araa maitai, tera râ, e mea maitai roa’tu ia haapoupou tatou ia’na no to’na itoito : « Ua faaoti oe i te mau ohipa atoa i faauehia ia oe. Ua ite oe nahea ia rave e ia faaoti i te mau mea teimaha. Te haapeu nei au ia oe ».

I te taime tai‘oraa papa‘iraa mo‘a na te utuafare, a imi e a tau‘a parau i te tahi mau hi‘oraa o te mau ateributi (maitai) tei itehia i roto i ta outou tai‘oraa i taua mahana ra. Te mau maitai mai to te Mesia e mau horo‘araa ïa no ô mai i te Atua ra e eita e nehenehe ia faatupu i te reira mai te mea e, aita Oia e tauturu mai³ a pure no taua mau horo‘a ra i roto i te mau pure fetii e te mau pure no te taata iho.

I te taime tamaaraa i te pô, a paraparau no ni‘a i te mau ateributi (maitai), te mau ateributi ihoa râ tei itehia e outou i roto i te mau papa‘iraa mo‘a i te po‘ipo‘i. « E mea nahea to outou riroraa ei mau hoa maitai i teie mahana ? E mea nahea to outou faaiteraa i te aroha ? E mea nahea to te faaroo tautururaa i outou i mua i te mau fifi no teie tau ? E mea nahea to outou riroraa ei taata ti‘aturihia ? Ei taata parau ti‘a ? Ei taata horo‘a ? Ei taata ha‘ehaa ? E rave rahi ateributi i roto i te mau papa‘iraa mo‘a o te ti‘a ia haapiihia e ia tape‘a mai.

Te rave‘a maitai a‘e no te haapii ia riro mai oia ho’i ia riro ei mau metua no ta tatou mau tamarii mai to tatou Metua i te Ao ra i ni‘a ia tatou. Oia te metua maitai hope roa, e ua horo‘a mai oia i Ta’na buka arata‘i no te ohipa a te metua—te mau papa‘iraa mo‘a.

No te mau metua na mua roa ta’u mau parau i teie mahana, tera râ, no te mau taata tata‘itahi te mau parau tumu i vauvauhia’tu. Te pure nei au ia manuïa outou i te faahoturaa i te mau ateributi o te Mesia, ia roaa ho’i ia outou to’na hoho‘a i to outou mata na e ia itehia To’na mau ateributi i roto i ta outou mau peu. E ia ite ho’i ta outou mau tamarii e aore râ, vetahi ê, i to outou here e ia hi‘o i ta outou peu, e huti te reira ia ratou Ia’na ra, ta’u ïa pure e to’u iteraa papû, na roto i te i‘oa o Iesu Mesia ra, amene.