2010–2019
E Dua na Gauna ni Vakavakarau
Okotova 2011


E Dua na Gauna ni Vakavakarau

Sa dodonu me da solia na noda gauna ena veika era bibi duadua.

Na ikawalu ni iwase ni Vunautaka na Noqu Kosipeli e vagolea na noda rai ena vakayagataki vakayalomatua ni gauna. Ena wase oqo, e taumuria kina vei keda o Elder M. Russell Ballard ni dodonu me da vakadavora na takete ka vulica me da kenadau na iwalewale me da rawata kina (raica na Vunautaka na Noqu Kosipeli: iDusidusi ki na Veiqaravi ni Daukaulotu [2004], 164). Me da kenadau na iwalewale e gadrevi me da rawata kina na noda takete e oka kina me da kenadau ena vakatulewataki ni noda gauna.

Au vakavinavinaka ki na nona ivakaraitaki o Peresitedi Thomas S. Monson. Ena loma ni veika kece e dau cakava vakaparofita ni Kalou, e dau raica, me vaka a cakava na iVakabula, ni vo tiko na gauna me sikovi ira kina na tauvimate (raica na Luke 17:12–14), me laveti ira cake na dravudravua vakayalo, ka me dauveiqaravi vei ira kecega na tamata. Au vakavinavinaka talega ena nodra ivakaraitaki e vuqa tale ka ra dau solia na nodra gauna me ra qaravi ira kina na kai nodra. Au vakadinadinataka ni noda solia na noda gauna ena veiqaravi vei ira na tani sa dau marautaka na Kalou, oqori ena kauti keda voleka yani Vua. Ena dina na noda iVakabula ki na Nona vosa ni a kaya “ko koya sa yalodina ka gugumatua ena bula oqo, ena rawata na tikina sa vakarautaka ko Tamaqu me nona” (V&V 72:4).

E sega vakadua ni volitaki na gauna; se vakacava na levu ni nomu tovolea, na gauna e dua na ka e sega ni rawa ni voli mai na dua na sitoa ena isau cava ga. Ia ni vakayagataki vakayalomatua, e sega ni vakaiyalayala na kena yaga. Ena veisiga kecega sa dau soli vei keda, sega ni saumi, na iwiliwili vata ga ni miniti kei na auwa me da vakayagataka, ka da vulica kina vakatotolo, me vaka e vakavuvulitaka vakamatau sara na serenilotu kilai levu, “Totolo ni gauna sega ni lesu mai” (“Na Gauna Lagilagi,” Serenilotu, naba 134). Se gauna cava ga e tu vei keda me da vakayagataka vakayalomatua. E kaya o Peresitedi Brigham Young, “Ka da sa vakavinavinakataka ga vua na Kalou ena vuku ni kena vakayagataki na gauna me yaga vei keda, ka na tarogi keda ena vuku ni noda vakayacora vakadodonu na tikina oqori” (Nodra iVakavuvuli na Peresitedi ni Lotu: Brigham Young [1997], 316).

Ena veika e namaki vei keda, sa dodonu me da vulica me da tuva na noda digidigi me sota vata kei na noda takete de na qai tadravi keda na cagi ni lokuyara ka da cagina kina mai na dua na vakaoti gauna ki na dua tale. Eda sa vakavulici vakavinaka sara mai vua na iVakavuvuli Levu me baleta na tuvalaki ni veika me vakaliuci ena Nona kaya ena Nona Vunau ena Ulunivanua, “Ia dou vakasaqara taumada na matanitu ni Kalou, kei na nona yalododonu,” (Maciu 6:33, ivakamacala e ra a; mai na iVakadewa i Josefa Simici, Maciu 6:38). (Raica talega na Dallin H. Oaks, “Vakatabakidua ka Liu Taumada,” Liaona, Julai 2001, 99–102.)

A vosa tiko o Alama ena veika me liu ena nona vakavuvulitaka ni “oqo na gauna me vakarautaki koya kina me lesu tale vua na Kalou” (Alama 12:24). Ena gadrevi na veituberi me baleta na kena ivakavakayagataki vinaka duadua na iyau talei oqo ni gauna me da vakarautaki keda me da lesu tale vua na Kalou, ia e sega ni cala ni da na biuta na Turaga kei na noda matavuvale ena ulu ni ituvatuva. E vakananuma vei keda o Peresitedi Dieter F. Uchtdorf ni “isema vakamatavuvale ena loloma e sipelitaki me g-a-u-n-a” (“Of Things That Matter Most,” Liahona, Nov. 2010, 22). Au vakadinadinataka ni gauna e vakasaqarai kina ena yalodina kei na masumasu na veivuke, ena vukei keda na Tamada Vakalomalagi me da vakabibitaka na veika e gadrevi kina vakalevu cake ena noda gauna mai na veika tale eso.

Na vakayagataki vakaca ni gauna erau veiwekani voleka kei na vakawelewele. Ni da muria na ivakaro me da “kakua ni dau vakawelewele” (V&V 88:124), sa dodonu me da vakadeitaka ni gauna eda osooso tiko kina eda vuavuai vinaka tale tikoga kina. Me vakaoqo, e daumaka ni sa toka ga e qaqalo ni ligada na sala ni veitaratara totolo sara, ia me da vakadeitaka me da kakua ni bobula ki na sala eso ni veitaratara vakaoqo. Au vakila ni so era sa coriti tu ena so na ivalavala ni veivakabobulataki—na kena e vakabobulataki keda me da raica tiko ka vakauta tiko e veigauna na itukutuku ni veitalanoa ka vaka me da osooso tu kina.

E levu na ka vinaka e basika ena sala rawarawa ni veitaratara kei na itukutuku. Au sa raica na kena veivuke meu curuma kina na veitukutuku au via dikeva, na vosa ni koniferedi, kei na ivolatukutuku ni kawa, kei na ciqomi ni imeli, na ivakananumi ena Facebook, na tuita, kei na itukutukuvolai. Ena levu ni kedra vinaka na veika oqo, e sega ni rawa ni da vakatara me biliraka tani ki na dua na yasana na veika e bibi cake. Sa dua na ka vakaciriloloma kevaka ena vakaluvuca tani yani na rawarawa ni dua na masu ena yalodina vua na Tamada mai Lomalagi dau loloma na talevoni kei na komipiuta, ena kedrau veisala vereverea. Me da totolo ni dau tekiduru me vaka ga na totolo ni noda dau vakau itukutukuvolai ena talevoni.

Era sega ni rawa ni vakaisosomitaka vakadua na itokani dina era dau mokoti keda ka vakayaloqaqataki keda, o ira era dau masulaki keda ka vakasaqara na veika eda dau taleitaka na veiqito vakalivaliva kei na veiwekani dau semati ena initaneti. Au dau vakavinavinakataka vakalevu na noqu raici ira na lewe ni kuoramu, kalasi, kei ira ena iSoqosoqo ni Veivukei ena nodra dau veivukei. Ena veigauna vakaoqori sa yaco meu kila vakavinaka cake kina na ibalebale ni nona a kaya na iApositolo o Paula, “Dou sa qai sega tiko ni vulagi kina se kai tani, dou sa koro vata ga kei ira era sa lotu” (Efeso 2:19).

Au kila na noda marau levu duadua e dau yaco mai ni da vagolei keda vua na Turaga (raica na Alama 37:37) kei na veika e kauta mai na icovi tudei mai na noda vagolei keda tu ena yalowai ki na vei auwa sega ni wili rawa ena initaneti ni veimaliwai, na qito ni teitei ena Initaneti, kei na vana manumanu. Au vakauqeti keda yadua me da taura ka meda lewa na veika oqori ka dau butakoca na noda veigauna vakamareqeti, me da kua ni vakatarai ira ena nodra iwalewale ni veivakabobulataki me ra lewai keda.

Me noda na vakacegu e tukuna tiko na iVakabula (raica na Joni 14:27), sa dodonu me da solia na noda gauna ena veika era bibi duadua, io na veika ni Kalou e bibi duadua. Ni da semati keda vua na Kalou ena masu ena yalodina, wiliwili ka vuli e veisiga yadua mai na ivolanikalou, meda vakasamataka vakatitobu na veika eda sa wilika ka vakila, ka da qai vakayagataka ka bulataka na veilesoni e vulici kina, eda na voleka cake yani ki Vua. Na nona yalayala na Kalou ni kevaka eda vakasaqaqara vagumatua mai na veiivola vivinaka “Ena solia vei kemudou na [Kalou] na nona Yalo Tabu mo [dou] vuku kina” (V&V 121:26; raica talega na V&V 109:14–15).

Ena temaki keda o Setani me da vakayagataka vakatani na noda gauna ena veika vakalecaleca dau veivagolei tani. E dina ni na yaco mai na veitemaki, e vakavuvulitaka o Elder Quentin L. Cook ni o ira na“Yalododonu era rogoca na nona itukutuku na iVakabula era na sega ni vagolei tani mai na veisasaga veivakarusai ni veivagolei tani” (“O Iko Beka e Dua na Yalododonu?” Liaona, Nov. 2003, 96). E vakavulica vei keda o Hiram Page, e dua vei iratou na walu na ivakadinadina ni iVola i Momani e dua na lesoni yaga sara me baleta na veivagolei tani. A tiko vua e dua na vatu e dau raica mai kina na veika e qai vola ka kaya ni ivakatakila me baleta na Lotu (raica na V&V 28). Ena veivakadodonutaki nei Hiram, e tukuni ena dua na itukutuku ni qai kau na vatu ka laki qaqi me kuvu me kakua tale ni veivagolei tani.1 Au sureti keda me da raica na veika dau veivagolei tani ka vakaoti gauna e tu ena noda bula ka me qaqiraki yani me vaka na kuvu. Sa dodonu me da na yalomatua ena noda vakatulewa me laurai ni sa vakatautauvatataki na ivakarau ni gauna me okati kina na Turaga, na matavuvale, cakacaka, kei na itaviqaravi e taucoko. Me vaka era sa kila oti na lewevuqa, ni dau levu cake na marau ni bula ni da vakayagataka na noda gauna me da vakasaqara kina na veika e vinaka, totoka, se rogorogo vinaka, se daudokai” (Yavu ni Vakabauta 1:13).

Sa toso tikoga vakatotolo ki liu na gauna ena toso ni kaloko. Nikua na siga vinaka ni se toso tiko na kaloko ni bula oqo, me da railesuva kina na veika eda sa cakava tiko me da vakarautaki keda kina me da sota kei na Kalou. Au vakadinadinataka ni levu na kedra isau o ira era dau taura na gauna ena bula oqo me ra vakarautaki ira ki na bula sa bera mai kei na bula tawamudu. Ena yaca i Jisu Karisito, emeni.

  1. Raica na ivolatukutuku ni bose ni Provo Utah Central Stake, Apr. 6, 1856, vol. 10 (1855–60), Church History Library, Salt Lake City, 273 (sa vakavoutaki na sipeli, pagitueti, kei na vakamatanivola levu): “E kaya o Father [Emer] Harris ni kaya na iApositolo ni da na veivala vata kei ira na veimatanitu vakatui kei na kaukauwa ena veivanua cecere. A kelia mai loma ni qele o Baraca Hiram Page e dua na vatu loaloa ka tawana ena nona taga. Ni yaco ki vale, a vakaraica tu mada. Sa laurai mai kina e dua na yatuvosa e vaka me volai tu ena pepa. Ena gauna ga sa tekivu me vola e dua na yatuvosa, sa basika tale mai ena vatu e dua tale na yatuvosa, me yacova ni sa vola rawa e 16 na draunipepa. A tukuni vei Baraca Josefa na ka oqo. A tarogi Josefa e dua na tamata kevaka e dina. Qai kaya o koya ni sega ni kila, ia a masu qai vakatakilai mai vua ni vatu oqori e vu mai vua na tevoro. A mani qaqiraki me pouta ka vakamai na veika sa volai tu. O ya e dua na cakacaka ni kaukauwa ni butobuto. Emeni.”