Na iVakadinadina

Au vakavinavinaka ni soli vei au e dua na gauna meu vosa vei kemuni ena Sigatabu ni Koniferedi Raraba ni Lotu i Jisu Karisito ni Yalododonu Edaidai. Na lewe ni Lotu kece ena tautauvata na nodra itavi vakalou. Eda sa vakadonuya ka yalataka ni da na dina kina ena noda a papitaiso. Eda vulica mai na ivola i Alama, na parofita cecere ni iVola i Momani, na ka eda yalataka vua na Kalou ni da na cakava: “Mo dou tagi vata kei ira sa tagi; ka vakacegui ira sa rarawa, ka vakadinadinataka na Kalou ena veigauna kecega, ena veika kecega, kei na veivanua kecega dou sa tiko kina, me yacova na mate, io me vakabulai kemudou na Kalou ka okati kemudou vata kei ira ena imatai ni tucaketale mai na mate, me nomudou kina na bula tawamudu.”¹

O ya e dua na itavi cecere ka yalayala totoka mai vua na Kalou. E itukutuku tiko ni veivakauqeti na noqu vosa nikua. Me vaka ga na kena vakamatatataka vei keda na iVola i Momani, ena dusimaki keda cake talega ki na bula tawamudu.

Matai, eda a yalataka ni da na dau yalololoma. Karua, eda yalataka nida na dau vakadinadinataka na Kalou. Katolu, eda yalataka ni da na vosota ki na ivakataotioti. Na iVola i Momani sa ikoya na idusidusi vinaka duadua meda vulica kina se da sa caka vinaka tiko kei na ka meda na cakava meda vinaka cake kina.

Meda tekivu mada ena yalololoma. Au na vakananumi kemuni ena veika e se qai yaco oti walega oqo. E lewe levu vei kemuni ko ni a vakatavi ena dua na siga ni veiqaravi. E udolu vaka udolu era a vakarautaki ena veiyasai vuravura.

E dua na matabose ni Yalododonu era masulaka na veiqaravi cava mera na laki cakava. Era kerea vua na Kalou mera kila se o cei me laki qaravi, vakakina na sala ni veiqaravi, kei cei me na sureti me lako yani ka laki vakaitavi. Era na masulaka tale beka ga me kakua ni guileca mai na iyaya ni cakacaka kei na wainigunu. Vakabibi tale ga na nodra masulaka mera na vakila na loloma ni Kalou o ira era vakaitavi kei ira era laki qaravi.

Au kila ni a saumi na masu o ya ena dua na tabanalevu. Rauta ni 120 na lewenilotu era bole mera laki vakaitavi. Era veisautaka sara ga na irairai ni lomanibai ni dua na valenilotu ena neitou itikotiko ena loma ni tolu na auwa. Sa dua na cakacaka dredre ka marautaki. Era vakavinavinaka kina o ira na italatala ni lotu. O ira kece era laki vakaitavi ena siga o ya era duavata ka vakasinaiti ena loloma. E so mada ga era tukuna ni ra vakasinaiti ena marau ena nodra werewere ka sasamaki tiko.

A vukei ira na vosa mai na iVola i Momani mera kila na vuna era vakila tiko kina na reki o ya. E a tukuna o Tui Penijamini vei ira na nona tamata, “Mo ni kila ko ni sa qaravi Koya tiko na nomuni Kalou … ena nomuni qaravi ira tiko na wekamuni.”² Ka sai Momani ka vakavulica ena nona kaya ena iVola i Momani, “Ia sa vu mai vei Karisito na loloma sa uasivi sara, ka sa ia tikoga ka sega ni mudu, ia sa kalougata ko koya sa kunei vua na loloma oqo ena siga mai muri.”³

Ena vakayacora na Kalou na nona yalayala vei kemuni, ni ko ni sa vakayacora vaka kina. Ni ko ni veiqaravi vei ira na tani baleti Koya, ena laiva o Koya mo ni vakila na Nona loloma. Ni toso na gauna ko ni na vakila ni loloma oqo sa tiki sara ga ni nomuni bula ena veisiga. Ka sa na soli vei kemuni na yalayala nei Momani e lomamuni ena nomuni veiqaravi vei ira na tani, ko ni na vakalougatataki.

Me vaka ga o ni sa yalataka vua na Kalou ni ko ni na yalololoma, o ni sa yalataka mo ni dauvakadinadinataki Koya se evei ga ena nomuni bula taucoko.Vakadua tale na iVola i Momani sa idusidusi vinaka duadua me na vukei keda meda cakava na ka eda sa yalataka.

Au a sureti meu laki vosa ena dua na soqo ni tuvaitutu ni univesiti. E a vinakati Peresitedi Gordom B. Hinckley mai na kena peresitedi, me laki vulagi kina, ia a qai osooso kina o koya. Au a qai mani veisosomitaki kina. Ena gauna o ya au a se gone sara ena Kuoramu ni iApositolo Le Tinikarua.

A lomatarotarotaka o koya meu sureti me keirau veivosaki ni sa raica na veika au vakaitavitaki au kina me vaka e dua na iApositolo. A qiri mai ena talevoni ka kaya ni sa qai mai kila ni noqu itavi meu dau vakadinadinataki Jisu Karisito.

Sa vakabibitaka sara ga mai o koya ena neirau veitalanoa meu na kakua sara ni cakava o ya ena gauna au na laki vosa kina. E vakamacalataka mai o la na marama keirau veivosaki ni rokova na univesiti na vakabauta vakalotu ni tamata kece sara, vakakina o ira era sega ni vakadinata ni dua tiko na Kalou. Tokaruataka o koya ka kaya, “ena sega ni rawa ni ko mai vakayacora na nomu itavi eke.”

Au biuta sobu na talevoni ka lomatarotaro na lomaqu. Meu sa tukuna beka ki na univesiti meu sa vakasuka ka kakua ni vosa? Sa vo tiko ga oqo e vica na macawa. Sa kacivaki oti mai kea na noqu na yaco yani kina. Ena vakacava na kena revurevu ki na yaca vinaka ni Lotu na noqu na sega ni yaco yani?

Au masuta me vukei au na Kalou ena ka meu cakava. A yaco mai na kena isau e veivakurabuitaki vei au. Au vakila ni ka e a yaco vei Nifai, Apinatai, Alama, Amuleki kei iratou na luvei Mosaia sa vukei au sara. Eratou gumatua ena vakadinadinataki Jisu Karisito ena mata sara ga ni meca.

Na digidigi ga me caka, o ya na vakavakarau. Au vakasaga na ka kece e rawa meu kila kina e so na ka baleta na univesiti. Ni sa voleka mai na siga ni soqo, sa vaka me tosocake na noqu lomaleqa kau sa qai masu ga vakawasoma.

Me vaka na cakamana ni kena tawase na Wasa damudamu, au a raica e dua na itukutuku. E a vakacerecerei na univesiti ena nona a cakava e dua na ka sa cakava tu mai na Lotu ena veiyasai vuravura ena veivuke raraba. Niu sa laki vosa au qai vosa ena ka e cakava tiko na univesiti vakakina o keda ka rawa ni laveti cake kina na nodra bula o ira era leqa tu. Au tukuna niu kila ni o Jisu Karisito sa itakataka ni veivakalougatataki kecega ka sa lako vei ira era sa vukei mai vei keda vaka kina o ira.

Ni oti na soqoni era tucake na tamata ka vakasausau, ka vaka me ka vou toka vei au. Au kurabui ka vaka meu lomaleqa tikoga. Au nanuma na ka e a yaco vei Apinatai. O Alama duadua ga e vakabauta na nona ivakadinadina. Ia ena bogi oya ena dua na kana magiti levu, au rogoca kina na peresitedi ni univesiti ni kaya ni a rogoca ni vosa na Kalou ena noqu vosa.

E vaka na cakamana na ka e a yaco ka dau tu yadua sara na kena yaco ena noqu bula niu vakadinadinataki Jisu Karisito tiko. Sa vakadeitaki tu na ka e rawa ni cakava na i Vola i Momani ena nomuni bula, kaukauwa, kei na yalodei mo ni ivakadinadina ni Kalou. Na ivunau kei na veivakaraitaki e tiko ena ivola oqo ena vueti kemuni cake, ena dusimaki kemuni, ka na vaqaqacotaki kemuni.

O ira kece na daukaulotu ka ra sa vunautaka tiko na kosipeli i Jisu Karisito era na vakalougatataki ni ra vulica na i Vola i Momani. O ira na itubutubu ka ra segata tiko me dua na nodra ivakadinadina na luvedra baleta na Turaga o Jisu Karisito, era na vukei kevaka mera na vaqara e dua na sala me vulici kina na iVola i Momani ena loma ni nodra vale kei na nodra bula na lewe ni matavuvale. Na ka o ya sa dina taucoko sara ena neitou matavuvale.

Au raica rawa ni sa yaco tikoga na cakamana ena soqoni ni sakaramede yadua kei na kalasi yadua au tiko kina ena Lotu. Era sa vakaraitaka tiko na qasenivuli kei ira na dauvunau na nodra lomana na ivolanikalou vakabibi ga na iVola i Momani. Ka yaco mai na ivakadinadina ni tamata yadua mai na vu ni yalodra dina. Era veivakavulici ena gugumatua torocake ka soli ivakadinadina ena kaukauwa.

Au raica talega ni da sa vinaka cake sara ena ikatolu ni yalayala eda a cakava ena gauna ni papitaiso. Eda yalataka meda na dau vosota, ena talairawarawa ki na ivunau ni Kalou ena noda bula taucoko.

Au a sikova na rumu e valenibula i noqu itokani ka sa laurai vua na kenisa. Erau a tomani au e rua na luvequ yalewa. Au a sega ni namaka me na rawa ni kila o koya. Era a tucake wavoki tu ena nona imocemoce na nona matavuvale ena gauna keitou a curu yani kina.

E a rai cake mai ka matadredredre. Au na dau nanuma tu ga na kena irairai ni raica ni keirau kauti rau tiko yani na luvei keirau yalewa. A yalovi rau me rau toso voleka yani vua ena nona loga. E a duri cake mai, tauri rau ka vakatakilai rau vei iratou na nona matavuvale. E a vakamacalataka na cecere ni nodrau bula na goneyalewa lalai oqori. E vaka sara ga e vakamacalataka tiko e rua na raluve ena dua na itikotiko vakatui.

Au a namaka me na oti totolo na neitou veisiko. Au nanuma, ni o koya sa na rairai wawale sara. Ia niu rai yani, e vaka me sa tasiri ga na veiyabaki. E totoka sara na kena rairai ka laurai ni lomani keitou kece sara.

Sa vaka sara ga me taleitaka o koya na gauna o ya, ni vaka me sa tu vakadua na gauna. Sa dau nona cakacaka me dau vueti ira na lalai vua na Turaga. Sa kila o koya mai na iVola i Momani ni volai tu kina ni iVakabula ena nona sa tucaketale e tauri ira yadudua na lalai, vakalougatataki ira, masulaki ira ka sa qai tagi ena reki.⁴ O koya e sa sotava oti na marau o ya ka rawa kina vua me vosota na Nona veiqaravi ni yalololoma me yacova na ivakataotioti.

Au raica na cakamana vata vaka o ya ena rumu ni dua ka sa veiqaravi yalodina vakalevu sara, ka sa nanuma ni sa kena gauna me vakacegu.

Au kila ni sa caka oti vua e dua na veiqaravi vakavuniwai balavu sara, baleta e dua na mate e tiko vua ka sa tukuna o vuniwai ni sa rawa mena mate kina. Eratou sa na sega tale ni rawa ni vakabulai koya se solia vua e dua na vakanuinui na vuniwai.

Kauti au yani o watina ki na dua na nodratou rumu ni moce. A davo koto vakatadraicake o koya ena idavodovo ka sa caka sara vakamatau. Sa dara tu o koya e dua na sote vulavula yani sara vakavinaka, vaka-neketai ka dara koto e dua na ivava vou.

Ni raica o koya niu kurabui ena noqu raici koya, a dredre vakamalua, ka kaya mai, “Ni sa oti na nomu masulaki au, au sa vinakata meu vakarau ki na kaci ka taura na noqu imocemoce ka laki veiqaravi.” A kena irairai ni sa vakarau o koya me lako yani ka laki veivakatarogi kei na iVakavuvuli, o Koya ka sa qarava tu mai ena yalo-vakabauta.

O koya sa ivakaraitaki ni sa veisautaki koya sara ga me Yalododonu Edaidai ka dua vei ira au dau sotava wasoma ni ra sa soli-bula ki na veiqaravi. Era cakacaka tikoga.

E vakamacalataka vakaoqo o Peresitedi Marion G. Romney: “Ni dua e sa veisautaki sara ga, ka sa gadreva e yalona taucoko me dina ki na Kosipeli i Jisu Karisito, sa mate sara ga e kea, ka sa bula cake mai kina e dua na itagede ni lomana na Kalou ena nona sa yalodina me sa talairawarawa ki na nona ivunau.”⁵

O ya na ka ena dau laurai vei ira era sa qaseta na bula-vakatisaipeli nei Jisu Karisito. Me vaka sara ga na marama ka a kidavaki rau na luvequ yalewa kei na tagane ka sa vakaivava vou tu me vakarau laki veiqaravi vua na Turaga, erau muria na nona ivakaro me yacova na ivakataotioti. Ko ni sa raica kece sara.

Ena rawa ni ko ni na raica tale kevaka mo ni lesu ki na iVola i Momani. Dau curumi au na yalo ni veivakacaucautaki niu dau wilika na nona vosa e dua na ilumuti ka italai gugumatua ni Kalou ka sa qase sara mai: “Raica sa sautaninini tu na yagoqu ena noqu vosa tiko oqo vei kemuni; ia na Turaga … sa vakaukauwataki au, kau sa vosa rawa tiko kina oqo vei kemuni.”⁶

Sa na rawa ni ko ni na vakaukauwataki me vakataki au ena ivakaraitaki ni vosota vakadede nei Moronai. Sa mai tu duadua ena nona veiliutaki. E kila ni sa voleka sara ni cava na nona bula. Ia, ni rogoca na ka e a vola me baleti ira ka ra se bera ni sucu kei ira na luve ni nona meca: “Io, dou lako vei Karisito ka biuta tani na ivalavala sa sega ni vakalotu, mo dou vinaka kina; ia kevaka dou sa biuta tani na ivalavala sa sega ni vakalotu ka lomana na Kalou ena lomamudou taucoko, kei na yalomudou taucoko, kei na nomudou igu taucoko, sa na qai rauti kemudou na nona loloma, ia na nona loloma dou sa vinaka kina ena vuku i Karisito, ia kevaka dou sa vinaka ena loloma ni Kalou ena vuku i Karisito sa sega ni rawa mo dou cakitaka na kaukauwa ni Kalou.”⁷

E a solia o Moronai na ivakadinadina o ya me nona vosa ni tatau ki na nona bula ni veiqaravi. E vakabibitaka na yalololoma me vakataki ira kece na parofita ena iVola i Momani. E vakuria na nona ivakadinadina baleta na iVakabula ena gauna sara ga sa voleka tu kina ni mate. O koya e dua na luve ni Kalou sa taucoko na nona saumaki, ka da rawa ni vaka o ya: meda vakasinaiti ena yalololoma, meda tudei ka dina ki na noda ivakadinadina ni iVakabula kei na Nona kosipeli, ka tu vakarau meda vosota me yacova na ivakataotioti.

Vakavulica vei keda o Moronai na ka ena gadrevi vei keda. E kaya ni imatai ni ka me caka me rawa ni taucoko sara ga kina na noda saumaki, sa ikoya na vakabauta. Ni da masulaka na noda wilika na iVola i Momani ena taraicake kina na noda vakabauta na Tamada na Kalou, na Luvena Vakamareqeti, kei na nona kosipeli. Ena tara cake na nomuni vakabauta na parofita ni Kalou ena gauna makawa kei ira ena gauna oqo.

Ena kauti kemuni vakavoleka sara vua na Kalou ka sega ni vaka tale e dua na ivola. Ena rawa ni veisautaka e dua na bula me vinaka. Au vakauqeti kemuni mo ni cakava na ka e a cakava e dua na noqu itokani daukaulotu. Ena nona vaqara lasa, e a dro mai nodratou vale ni se qai yabaki tini vakacaca, ia, e dua na tamata a biuta e dua na iVola i Momani ena kato lailai a kauta voli.

Sa sivi e vica vata na yabaki. E toki ena veivanua e veiyasai vuravura. Dua na siga ni sa baci tiko duadua voli ka sega soti ni yalomarau, e qai raica na kato lailai. E sinai tu ena kato lailai oqo na veika e a kauta voli mai. Davo sara koto ena boto ni kato lailai mai ra na iVola i Momani. E wilika na yalayala e tiko kina ka vakatovolea sara. Sa kila sara ni sa ka dina. Na ivakadinadina o ya e veisautaka na nona bula. E a sotava na marau tawa vakaiyalayala ka uasivia na nona veitatadra kece sara.

Na nomu ilavelave ni iVola i Momani, ena rairai vunitaki toka ena nomuni sa rui osooso ena veika o ni sa rawata ena nomuni bula tiko eke. Au kerei kemuni mo ni dau gumatua na vakawilika. E tiko kina na taucoko ni kosipeli i Jisu Karisito, ka sa ikoya walega na sala ni lesu tale vua na Kalou

Au vakadinadinataka vei kemuni ni bula dina tiko na Kalou, ka na sauma dina mai na nomuni masu. Na iVakabula kei vuravura o Jisu Karisito. Na iVola i Momani sa ivakadinadina ni bula dina tiko o Koya ka sa iKoya sa tucaketale ka sa noda iVakabula.

Na iVola i Momani sa ivakadinadina vakamareqeti dina. Au sa laiva vei kemuni na noqu ivakadinadina ena yaca tabu i Jisu Karisito, emeni.