O Se Molimau

Ou te faafetai mo lenei avanoa e lauga atu ai ia te outou i lenei Sapati i se konafesi aoao o Le Ekalesia a Iesu Keriso o le Au Paia o Aso e Gata Ai. Ua i ai i tagata uma o le Ekalesia lea lava tiute paia e tasi. Sa tatou taliaina ma folafola atu e faataunuuina ina ua tatou papatiso. Ua tatou aoao mai i upu a Alema, le perofeta o le Tusi a Mamona, mea na tatou folafola atu i le Atua o le a avea ai i tatou: “Loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma atonu tou te i ai, seia oo lava i le oti, ina ia mafai ona togiolaina outou e le Atua, ma faitauina faatasi ma i latou o le uluai toetutu, ina ia mafai ona outou maua le ola e faavavau”¹

O se tiute paia lena ma se folafolaga mamalu mai le Atua. O la’u savali i le asō, o se savali faamalosiau. E pei lava ona faamanino mai e le Tusi a Mamona le tiute ia i tatou, ua faapena foi ona faasino atu ai i tatou i luga o le ala i le ola e faavavau.

Muamua, ua tatou folafola atu o le a tatou agaalofa. Lua, sa tatou folafola atu o le a avea ma molimau a le Atua. Ma le tolu, sa tatou folafola atu o le a tatou tumau. O le Tusi a Mamona o le taiala sili lea e iloa ai pe o faape’ī lo tatou lelei ma le auala e lelei atili ai.

Tatou amata i le avea ai ma tagata agaalofa. O le a ou faamanatu atu ia te outou ni aafiaga talu ai nei. O le toatele o outou sa auai i se aso o auaunaga. E faitau afe na auaunaga sa faatulagaina i le salafa o le lalolagi.

O se aufono o o outou uso a Au Paia sa tatalo ia iloa pe o le a se auaunaga e fuafua. Sa latou fesili atu i le Atua ia iloa pe o ai e tatau ona tatou auauna atu i ai, o a auaunaga e tuuina atu, ma pe o ai e valaaulia ia auai. Atonu foi sa latou tatalo ia aua ne’i galo suō po o vaiinu. Ae o le mea sili ona taua, sa latou tatalo ina ia lagona e ē na tuu atua auaunaga ma ē na taliaina le alofa o le Atua.

Ou te iloa o na tatalo sa taliina i se tasi o uarota. E silia ma le 120 tagata na ofo atu e fesoasoani. I totonu o le tolu itula na latou faamamaina ai le lotoa o se falesa i lo matou nuu. O se galuega faigata ma le fiafia. Sa lagona e taitai o lea ekalesia le faafetai. O tagata uma na galulue i lena aso sa lagona le lotogatasi ma se alofa sili atu. Fai mai nisi sa latou lagonaina le fiafia a o latou veleina le vao ma teu ia laau.

O upu mai le Tusi a Mamona na fesoasoani ia i latou ia iloa ai le mafuaaga na latou lagona ai lena olioli. O le Tupu o Peniamina lea na fai atu i lona nuu, ia “Aoaoina, pe a outou auauna atu i o outou uso-a-tagata, ua nao lo outou auauna atu lava lea i lo outou Atua.”² Ma o Mamona lea na aoao mai i ana upu i le Tusi a Mamona, “O le alofa mama o le alofa lē pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.”³

O loo tausia e le Alii Ana folafolaga ia te oe pe a e tausia foi au folafolaga. A o e auauna atu i isi mo Ia, Na te faatagaina oe ia e lagonaina Lona alofa. Ma o le taimi lea, o le a avea ai lagona o le alofa mama o se vaega o o ou lava natura. Ma o le a e mauaina le faamautinoaga a Mamona i lou loto a o e faaauau ai ona auauna atu i isi i le olaga, o le a lelei mea uma ia te oe.

E pei lava ona e folafola atu i le Atua o le a e agaalofa atu, ua e folafola atu ai foi o le a avea oe ma Ana molimau i soo se mea e te i ai i lou olaga. Ou te toe faapea atu, o le Tusi a Mamona o le taiala sili lea ua ou iloa e fesoasoani ia i tatou e tausia lena folafolaga.

Sa i ai se taimi na valaaulia ai a’u ou te lauga i se sauniga o le faauuga i se iunivesite. Sa manao le peresitene e valaaulia Peresitene Gordon B. Hinckley, ae sa maua e le avanoa o ia. O lea sa ou maua ai le valaaulia. O le taimi lena o avea au o se sui fou o le Korama a Aposetolo e Toasefululua.

Sa oo ina popole le tagata lea na valaauliaina a’u e lauga, ina ua ia iloa atili e uiga i la’u matafaioi, o se Aposetolo. Sa ia valaau mai i le telefoni ma faapea mai ua ia malamalama nei i lo’u tiute o se molimau a Iesu Keriso.

I se leo manino lava sa ia faapea mai ai e le mafai ona ou faia lena mea pe a ou lauga atu. Sa ia faamalamalama mai e faaaloalogia e le iunivesite ia tagata o talitonuga faalelotu uma, e aofia ai i latou e faafitia le i ai o se Atua. Sa ia toe faapea mai, “E le mafai ona e faataunuuina ou tiute iinei.”

Sa ou tuu i lalo le telefoni ma ni fesili taua i lo’u mafaufau. Pe tatau ea ona ou ta’u atu i le iunivesite o le a ou le tausia la’u ioega e lauga ai? Ua toe o ni nai vaiaso ona oo lea i le faamoemoe. Ua uma ona faasilasila lo’u auai atu. O le a se aafiaga o le igoa tauleleia o le Ekalesia ona o lo’u le tausia o la’u maliega?

Sa ou tatalo ia iloa le mea e finagalo le Atua ou te faia. Sa ou iloa o faataitaiga a Nifae, Apinati, Alema, Amoleka, ma atalii o Mosaea sa uunaia mea na ou oo i ai. O i latou o ni molimau totoa a Iesu Keriso ina ua fetaiai ma tulaga lamatia o le oti.

O lea sa na o le pau le filifiliga e fai o le auala e saunia ai. Sa ou sailiili i mea uma sa mafai e aoao ai e uiga i le iunivesite. A o latalata mai le aso o le lauga, sa faatupulaia lo’u popole ma sa faateleina a’u tatalo.

Sa faamamaluina le iunivesite mo le faia o mea o loo faia foi e le Ekalesia i ana taumafaiga o galuega alofa i le salafa o le lalolagi. Ma i la’u tautalaga sa ou faamatalaina ai mea sa tatou faia ma sa latou faia e siitia ai tagata o loo manaomia tele le fesoasoani. Sa ou faapea atu ou te iloa o Iesu Keriso o le punavai o faamanuiaga ma ua oo mai lena i olaga o i latou na tatou auauna atu i ai, ma latou auauna atu foi i ai.

Ina ua maea le fonotaga sa tutulai le aofia ma patipati, lea sa foliga mai sa fai si o’u le masani ai. Sa ou maofa ae o loo i ai pea sina popole. Sa ou manatua le mea na tupu ia Apinati. Na o Alema sa taliaina lana molimau. Ae o lena po, i se taumafataga aloaia tele, sa ou faalogo ai i le peresitene o le iunivesite o saunoa e faapea i lena tautalaga sa ia faalogo ai i afioga a le Atua.

O lena tuuina atu faavavega lea e tulaga ese i o’u aafiaga o se molimau a Keriso. Ae o le aafiaga o le Tusi a Mamona i ou uiga, mana ma le lototele e avea ai ma se molimau mo le Atua ua mautinoa. O aoaoga faavae ma faataitaiga lototoa o i lena tusi o le a siitia ai, taialaina ai, ma faamalosia ai oe.

O faifeautalai uma o loo folafolaina atu le suafa ma le talalelei a Iesu Keriso o le a faamanuiaina e ala i le taumamafa i aso uma mai le Tusi a Mamona. O matua o loo tauivi e faavae se molimau i le Faaola i le loto o se tamaitiiti, o le a maua le fesoasoani a o latou saili atu mo se auala e aumai ai upu ma le uunaiga a le Tusi a Mamona i totonu o le fale ma olaga uma o lo latou aiga. Ua faamaonia le moni o lena mea mo i tatou.

Ou te vaaia o loo tupu lena mea i sauniga faamanatuga uma ma vasega a le Ekalesia ou te auai. O loo faaalia e failauga ma faiaoga se alofa ma se malamalama loloto i tusitusiga paia, aemaise le Tusi a Mamona. Ma o molimau patino ua aumai manino lava mai le taele o o latou loto. Latou te aoao atu i se talitonuga ua faateleina ma molimau atu i le mana.

Ua ou vaai foi i faamaoniga ua lelei atu lo tatou faatinoina o le vaega lona tolu o le folafolaga sa tatou faia i le papatisoga. Ua tatou osifeagaiga ia tutumau, ia tausia poloaiga a le Atua a o tatou ola.

Sa ou asiasi atu i le potu o le falemai o se uo matua ua maua i le ma’i e le toe foi i se lelei o le kanesa. Sa ou alu ma ave o’u afafine e toalua. Ou te lei faamoemoeina e na te iloaina i la’ua. Sa tutu lona lava aiga ma siomia lona moega a o matou ulu atu i totonu.

Sa ia tepa mai i luga ma ata. O le a ou manatua pea ona foliga ina ua ia vaai mai ua ma o atu ma avatu o ma afafine. Sa ia geno mai ia i laua e soso atu ia te ia i luga o le moega. Sa ia nofo i luga, opo i la’ua, ma faailoa i la’ua i lona aiga. Sa ia talanoa i le maoae o na teineiti laiti e toalua. Sa pei o loo ia faailoa atua ni purinisese i se aiga tupu.

Sa ou faamoemoe e vave maea le matou asiasiga. Sa ou manatu, e mautinoa lava, ua le lavā o ia. Ae a o ou vaavaai atu sa pei ua mou atu ni tausaga. Sa fiafia o ia ma sa iloagofie le faatumuina o ia i le alofa mo i matou uma.

Sa foliga mai o loo ia olioli i le taimi lea e pei ua taofi le taimi. Sa ia faaaluina le tele o lona taimi e tausia ai fanau mo le Alii. Sa ia iloa mai le tala o le Tusi a Mamona sa ave e le Faaola ia fanau laiti, taitoatasi, ma faamanuia i latou, ona tutulu lea i le olioli.⁴ Ma sa umi se taimi na oo ai o ia lava i lena olioli lea sa mafai ai ona tumau i Lana auaunaga agaalofa e oo i le iuga.

Sa ou vaaia foi lena lava vavega e tasi i le potumoe o se alii sa lava ni auaunaga faamaoni na ia tuu atu sa ou manatu ai ua lava ana galuega ma ua ao ai ona malolo.

Sa ou iloa sa faia ni ona togafitiga uumi ma le tigaina mo se faamai lea na ta’u atu e fomai ia te ia o se faamai oti. Latou te le’i toe tuuina atua se isi togafitiga po o se faamoemoe.

Na avatu a’u e lona toalua i se potumoe i lo latou fale. Sa i ai o ia iina, na taoto o ia i luga o se moega ua teu lelei. Sa ia laeiina se ofutino paepae faatoa uma ona auli, se fusiua, ma ni seevae fou.

Sa ia vaaia lo’u te’i ma ata lemu ma faamalamalama mai, “A uma ona e tuu maia ia te au se faamanuiaga, ou te manao ia ou saunia e tali atu i le valaau e tulai i luga ma ave lou moega.” Sa ou iloa ai ua ia saunia mo le faatalanoaga o le a vave oo mai ma le Matai, o lē na ia galue ai ma le faamaoni tele.

Sa avea o ia ma se faataitaiga o ni Au Paia o Aso e Gata Ai na liua atoatoa na ou feiloai i ai ina ua uma ona latou tuuina maia se olaga o auaunaga tuuto. Sa latou agai pea i luma.

Sa faamatala e Peresitene Marion G. Romney i lenei ala: “O le tagata ua liua atoatoa, o lona uiga ua mate moni lona manao i mea e feteenai ma le talalelei a Iesu Keriso ma o lea ua suia ai i se alofa i le Atua, faatasi ma se naunautaiga moni ia tumau i le tausiga o ana poloaiga.”⁵

O lena naunautaiga tumau e masani lava ona faatupulaia pea e soo poto masani o Iesu Keriso. E pei o le tuafafine na faafeiloaia o’u afafine ma le alii i ona seevae fou ua sauni e tulai ma savavali mo le Alii, sa mulimuli i Ana poloaiga e oo i le iuga. Ua outou tagai uma i lena mea.

E mafai ona e toe tagai i ai pe a e toe susueina le Tusi a Mamona. O loo ou lagonaina pea le faamemelo i lo’u loto pe a ou faitau i nei upu a se auauna ua matua le soifua ma naunautai a le Atua: “Ona e oo lava i lenei taimi, ua gatete tele lava lo’u tino atoa a’o ou taumafai e tautala atu ia te outou; peitai ua lagolagoina a’u e le Alii … ma ua ia tuu mai a’u ou te tautala atu ia te outou.”⁶

E mafai ona faalototeleina outou e pei o au mai le faataitaiga o le tumau na tuuina mai ia i tatou e Moronae. Sa na o ia i lana galuega. Sa ia silafia ua lata mai le iuga o lona soifua. Ae se’i faalogo lava i le mea sa ia tusia mo tagata e le’i fananau mai ma tupuaga o ona fili i la le tino: “Ioe, o mai ia Keriso, ma faaatoatoaina ia te ia, ma faafiti outou lava mai mea uma e lē faaleatua, ma alolofa i le Atua ma o outou manatu atoa, mafaufau ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso.”⁷

Na tuu mai e Moronae lena molimau o se lauga faamavae mo lona soifua ma lana galuega. Sa ia uunaia le alofa mama e pei ona faia e perofeta i le Tusi a Mamona atoa. Sa ia faaopoopo atu lana molimau i le Faaola a o latalata lona maliu. Sa avea o ia ma atalii liua moni lava o le Atua, e pei ona tatou mafaia foi: faatumuina i le alofa mama, avea ma se molimau maumaututu ma le le fefe a le Faaola ma Lana talalelei, ma naunau e tumau e oo i le iuga.

Na aoao mai e Moronae ia i tatou le mea e manaomia mai ia i tatou. Sa ia fai mai o le laasaga muamua lava i le liua atoatoa, o le faatuatua. O le suesue ma le agaga tatalo i le Tusi a Mamona o le a fausia ai le faatuatua i le Atua le Tama, i Lona Alo Pele, ma i Lana talalelei. O le a fausia ai lou faatuatua i perofeta a le Atua, o anamua ma ona po nei.

E mafai ona e latalata atili ai i le Atua nai lo se isi lava tusi. E mafai ona suia ai se olaga mo le lelei. Ou te uunaia outou ia fai le mea sa faia e sa’u soa faifeautalai. Ina ua ia sola ese mai lona aiga a o laitiiti, sa tuu e se tagata se Tusi a Mamona i se pusa na ia aveina i lana sailiga mo se fiafia e sili atu.

Sa mavae tausaga. Sa ia si’i atu mai lea nofoaga i lea nofoaga i le salafa o le lalolagi. Sa tuua na o ia ma le le fiafia i se tasi o aso ma sa vaaia ai le pusa lea. Sa tumu le pusa i mea sa ia feaveaia. I le taele o le pusa, sa ia maua ai le Tusi a Mamona. Sa ia faitau i le folafolaga na i ai ma faataitai ai. Sa ia iloa e moni. O lena molimau sa suia ai lona olaga. Sa ia maua le fiafia e sili atu nai lo ana miti na faamemelo i ai.

Atonu e le o faitauina lau Tusi a Mamona i le tele o taimi e tatau ai ona o le tele o ou tiute ma gaoioiga o loo e taulai atu i ai i aso uma. Ou te augani atu ia te outou ina ia e inu soo mai le loloto o ona itulau. Ua i ai i totonu le atoaga o le talalelei a Iesu Keriso, le ala e tasi e toe foi atu ai i le Atua.

Ou te tuu atu ia te outou la’u molimau mautinoa o loo soifua le Atua ma o le a tali mai i au tatalo. O Iesu Keriso o le Faaola o le lalolagi. O le Tusi a Mamona o se molimau moni ma le mautinoa o loo soifua o Ia ma o Ia o lo tatou Faaola toetu ma o loo soifua.

O le Tusi a Mamona o se molimau taua. Ou te tuua nei outou ma la’u molimau i le suafa paia o Iesu Keriso, amene.