Ni Da Mai Sota Tale

Sa dua na ka vinaka, kemuni na taciqu kei na ganequ, niu mai kidavaki kemuni ena ika 181 ni Koniferedi Raraba Vakayabaki ni Lotu i Jisu Karisito ni Yalododonu Edaidai.

Na koniferedi oqo sa ika 48 ni yabaki—vakasamataka mada oya, 48 na yabaki—mai na gauna e kacivi au kina o Peresitedi David O. McKay ki na Kuoramu ni iApositolo Le Tinikarua. O ya ena Okotova ni 1963. E via sega toka ni vakabauti na kena sa tasoro yani na veiyabaki sa sivi.

Ni da osososo, e vaka me dau totolo na toso ni gauna, ka sa vaka sara ga o ya na ono na vula sa oti qo. E dua vei ira na ka cecere au a cakava o ya na noqu vakatabuya tale na Valetabu mai Atlanta Georgia ena 1 ni Me. Ratou a tomani au voli kina o Elder kei Sisita M. Russell Ballard, Elder kei Sisita Walter F. González, kei Elder kei Sisita William R. Walker.

Ena gauna ni veivakamarautaki ka vakatokai na, “Southern Lights,” ena bogi ni bera na veivakatabui, keimami a saravi ira kina e lewe 2,700 na cauravou kei na goneyalewa mai na iwasewase ni vanua ka qarava na valetabu, ena nodra vakalasalasa. Sa dua na parokaramu totoka au qai sarava ka vakavuna nodra tucake vakavica na sarasara mera vakasausau.

Sa qai vakatabui tale na valetabu ena siga ka tarava ena rua na soqoni, ka keimami vakila vakaukauwa sara na kena tiko maliwai keimami na Yalo ni Turaga.

Ena mua ni vula o Okosita e a laki vakatabuya kina, o Peresitedi Henry B. Eyring na Valetabu mai San Salvador El Salvador. E tomani koya yani kina o Sisita Eyring vakakina o Elder kei Sisita D. Todd Christofferson, Elder kei Sisita William R. Walker, kei Sisita Silvia Allred na peresitedi raraba ni iSoqosoqo ni Veivukei kei watina, o Jeffry. E mai tukuna o Peresitedi Eyring ni a dua dina na soqoni ka vakilai vakaukauwa kina na yalotabu.

Ena mua ni yabaki oqo ena laki vakatabuya tiko o Peresitedi Dieter F. Uchtdorf na noda valetabu mai Quetzaltenango, Guatemala ka na tomani koya yani o Sisita Uchtdorf kei na so tale na Vakaitutu Raraba.

Sa tomani tikoga ka sega ni vakataotaki kemuni na taciqu kei na ganequ na tara valetabu. Sa ka dokai vei au meu kacivaka nikua na tara ni vica na valetabu vou.

Na imatai ni ka au via tukuna ni valetabu na vale bibi taudua vei ira kece na vale e tarā na Lotu. Na valetabu na vanua era mai vauci kina na isema ni veiwekani me yacova yani na veigauna tawamudu. Eda vakavinavinaka ena vuku ni valetabu era sa tara tu oqo ena veiyasai vuravura, me vukea na nodra vakalougatataki na noda lewenilotu.

Ena yabaki sa oti a vakacacani vakaca sara na Valecavu e Provo mai na dua na kama rerevaki. A vo walega na lalaga e tautuba ni vale vakasakiti oqo, ka ra dau taleitaka e vuqa na itabatamata ni Yalododonu Edaidai. Ni oti na kena vakasamataki vakayalomatua, keimami sa nanuma kina me na tara vou tale ka vakalesui mai na kena veitikina kece sara ni lalaga e tautuba, me sa na ikarua kina ni valetabu ni Lotu ena siti o Provo. Na Valetabu e Provo ka tu ena gauna oqo e dua vei ira na kena osooso duadua ena Lotu, ni dua na kena ikarua era na qaravi kina na iwiliwili ni lewe ni Lotu yalodina sa tubucake tikoga na kedra iwiliwili mai Provo kei na veitikotiko volekata.

Au marau talega meu kacivaka na veivaletabu vovou ena veivanua oqo: Barranquilla, Colombia; Durban, Sauca Aferika; Kinshasa ena Democratic Republic of the Congo; kei Star Valley, Wyoming. Me kena ikuri sa toso tikoga na navunavuci me tara e dua na valetabu mai Parisi e Varanise.

Na matailalai ni itukutuku ni valetabu oqo ena qai tukuni yani ena dua na gauna mai muri ni sa rawa na kena qele ka yaco na kena veivakadonui e ganita.

Au sa tukuna oti ena veikoniferedi sa oti na kena sa toso tiko na sasaga me kau yani vakavoleka na valetabu vei kemuni na lewenilotu. E dina ni sa rawarawa tu vei ira e levu na lewe ni Lotu, e se tiko ga eso na vanua ka yawa sara kina na valetabu mai vei ira na lewenilotu, ka ra sega ni rawa ni sauma na ivodovodo me ra yaco yani kina. Sa sega gona kina ni rawa mera marautaka na veivakalougatataki e rawa ni solia na valetabu. Me veivuke ena ka oqori sa tiko oqo na ka e vakatokai na General Temple Patron Assistance Fund (iLavo ni Veivuke Raraba vei ira na Petereni ni Valetabu). Na ilavo oqo ena soli ga ena imatai ni nona lako ki valetabu e dua ka sa dau dredre sara na nona lako ia e gadreva vakaukauwa tu na madigi oqo. O koya ena via cau ki na isolisoli oqo me na qai vakacuruma ga ena nona isolisoli ka dau soli vei bisopi ena veivula.

Sa noqu masu kemuni na taciqu kei na ganequ ni da na vakasinaiti ena yalo ni Turaga, ni da na vakarorogo ki na ivunau nikua vaka kina ni mataka, ka vulica na veika ena gadreva na Turaga me da na kila. Oqori na noqu masu ena yaca i Jisu Karisito, emeni.