2010–2019
Sa Sega Ni Mudu Na Loloma
Okotova 2011


Sa Sega Ni Mudu Na Loloma

Ni kerea vagumatua mo ni vakasinaiti ena isolisoli ni loloma cecere, na loloma savasava nei Karisito.

Wale ga oqo keirau a sikova vakaveiwatini na siti o Nauvoo, Illinois. Ena neirau tiko voli e kea keirau a laki dabe toka ena rumu e cake ni Red Brick Store, ka a tiko kina e dua na valenivolavola kei na dua na bisinisi nei Parofita Josefa Simici. Keirau a vakarorogo matua sara kivua na kenadau ni veivakasarasarataki, ena nona dusimaka tiko eso na ka me baleta na Veivakalesuimai ena gauna e liu ka yaco e kea.

Au vakasamataka sara na kena tauyavutaki na iSoqosoqo ni Veivukei kei na so na ivakavuvuli era a ciqoma na marama ni iSoqosoqo ni Veivukei ena rumu sara ga o ya mai vua na Parofita o Josefa. Na veituberi oqori a yaco me ivakavuvuli ka tauyavutaki kina na kena tara cake na iSoqosoqo ni Veivukei. Na inaki ni kena vakarabailevutaki na vakabauta, vaqaqacotaki ni veimatavuvale e Saioni, kei na nodra vakasaqarai ka vukei o ira era gadreva tu na veivuke ka ra a tauyavutaki mai na kena itekitekivu. Era sa vakayacora tiko ga mai na nodra ivakavuvuli na noda parofita.

Ena dua vei ira na soqoni oqori ena gauna e liu, a cavuvosa na Parofita o Josefa mai na volavola nei Paula kivei ira na kai Koronica. Ena nona ivunau kaukauwa ni loloma cecere, a vosa yani kina o Paula ena vakabauta, inuinui, kei na loloma, ka vakacavara ni “Sa uasivi cake vei iratou na loloma.”1

E vakamacalataka na uasivi ni veika e tu ena loloma cecere. A kaya:

“Sa dau vosota vakadede na loloma, sa yalovinaka; sa sega ni vuvu na loloma; sa sega ni vosa doudou na loloma; sa sega ni viavialevu,

“… Sa sega ni qara na ka me nona ga, sa sega ni cudrucudru, sa sega ni daulomaca;

“Sa sega ni rekitaka na ca, ia sa rekitaka na dina;

“Sa ubia na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.

“Sa sega ni mudu na loloma.”2

Ena nona vosa tiko kivei ira na marama, a kaya na Parofita o Josefa: “Kakua ni qiqo nomu rai ena vuku ni nona ivalavala dodonu na wekamu. … Mo vakarabailevutaka na yalomu vei ira na tani kevaka mo [na] vakataki Jisu. … Ni levu cake na nomu yalosavasava kei na ivalavala dodonu, ni tubu cake na nomu vinaka, me rabailevu na yalomu—me kovuti ira yani na tani—sa dodonu mo vosota vakadede ka ciqoma na caka cala ni tamata. Sa ka talei dina na yalo ni tamata!”3

Na ivunau vakaivolanikalou “Sa sega ni mudu na loloma” a yaco me ibole ni iSoqosoqo ni Veivukei baleta ni rokova na ivakavuvuli oqo kei na kena isau a solia na Parofita o Josefa Simici kivei ira na marama ena iSoqosoqo ni Veivukei me ra “vukei na dravudravua” ka “vakabula na yalodra.”4

Na yavu ni ivakavuvuli oqo e taucoko na kena ciqomi mai vei ira na marama ni iSoqosoqo ni Veivukei e vuravura raraba, ni sa ikoya oqo na ivakarau ni cakacaka ni iSoqosoqo ni Veivukei.

Na cava na loloma cecere? Eda rawata vakacava na loloma cecere?

A vakamacalataka na parofita o Momani ni “sa vu mai vei Karisito na loloma sa uasivi sara,”5 ka vakavulica o Paula ni “sa ivau vinaka sara … na dauloloma,”6 ka tukuna tale vei keda o Nifai ni “sa vakaroti ira kece ga na Turaga na Kalou me ra lomasoli, ia na lomasoli sa ikoya na loloma.”7

Ni raici lesu tale na ivakamacala e liu nei Paula ena loloma, eda vulica ni loloma cecere e sega ni dua ga na cakacaka se eso na ka eda solia yani ia e dua na ituvaki, e dua na ituvaki ni yalo, na yalo vinaka ka vakavuna na cakacaka ni yalololoma.

A vakavulica tale ga o Momani ni loloma cecere o ya a soli kivei ira na tisaipeli dina ni Turaga vakakina ni loloma cecere o ya e vakasavasavataki ira era sa rawata.8 Me kena ikuri, eda vulica ni loloma cecere o ya sa ikoya e dua na isolisoli vakalou ka sa dodonu me da vakasaqara ka masulaka. E gadrevi me tu e lomada na loloma cecere me rawa kina ni da rawata na matanitu vakasilesitieli.9

E dodonu me da taroga se itagede cava ena vukea na noda vakatorocaketaka na loloma cecere, na noda kila ni Turaga e kerei keda “me[da] vakaisulu ena loloma.”10

Taumada e dodonu me tu vei keda na gagadre me vakalevutaki kina na loloma cecere ka da vakalevutaka cake noda vakataki Karisito.

Na ikalawa e tarava sa ikoya na masumasu. E vakamasuti keda o Momani me da “masuta na Tamada ena yalomudou taucoko me vakasinaiti [kemudou] ena loloma oqo.” Na loloma vakalou oqo sa ikoya na loloma cecere, kei na noda sa vakasinaiti ena loloma oqo, io “eda na tautauvata kei Koya.”11

Na wiliki ni ivolanikalou e veisiga e rawa me kauta yani noda vakasama kivua na iVakabula kei na dua na gagadre me da ucui Koya vakalevu cake.

Au digitaka meu vakaliliga e dua na droini mai vei Minerva Teichert ena noqu valenivolavola, ka kena iulutaga Vakabulai ni Luve Ni Sipi Sa Yali. E vakaraitaki tu kina na iVakabula ena nona tucake tu ena kedra maliwa na Nona sipi a keveta vakamalua tu e dua na luve ni sipi lailai e Ligana. E vukea noqu raitayaloyalotaka na Nona kerekere: “Vakani ira na noqu sipi,”12 ka kena ibalebale vei au me da qaravi ira kece sara era vakavolivoliti keda ka vakabibi kivei ira era gadreva tu na veivuke.

Sa ivakaraitaki uasivi ni kena vakadewataki na loloma na iVakabula. Ena Nona cakacaka vakalotu a vakaraitaka o Koya na yalololoma me baleti ira na viakana tu, me baleti ira na ivalavala ca, ira na vakararawataki, kei ira na tauvimate. A veiqaravi kivei ira na dravudravua kei ira na vutuniyau; kivei ira na marama, gonelalai, kei na turaga; ki na matavuvale, itokani, kei ira na vulagi. A vosoti ira sa daubeitaki Koya, ka vakararawataki ka mate ena vukudra na tamata kece ga.

Ena nona bula taucoko, a vakaraitaka tale ga na loloma cecere na Parofita o Josefa Simici ena nona lomani ira ka dokai ira na tani. E kilai levu o koya ena nona yalovinaka, veinanumi, yalololoma, kei na nona kauwaitaki ira era vakavolivoliti koya.

Nikua, eda sa vakalougatataki ena nona vakaraitaka tiko e dua na noda parofita na loloma cecere. E sa ivakaraitaki kivei keda kei na vuravura o Peresitedi Thomas S. Monson. E daramaka na iubi ni loloma. E yalovinaka, yaloloma, ka dausolisoli; ka dua na dauveiqaravi dina ni Turaga o Jisu Karisito.

E vakatavulica vakaoqo o Peresitedi Monson: “Na loloma cecere sa ikoya na noda vosota e dua e vakararawataki keda. Sa ikoya na noda sega ni vakatara me da cudru vakarawarawa. Sa ikoya na noda ciqoma na malumalumu kei na guce. Sa ikoya na noda ciqomi ira na tamata ena kedra ituvaki dina. Sa ikoya na noda raibaleta na kedra ituvaki vakayago ka na sega ni katabuto mai ni toso tiko o gauna. Sa ikoya na noda vorata na yalo ni veivakaduiduitaki.”13

Ni tu vei keda na loloma cecere, eda na guta me da veiqaravi ka vukei ira na tani ena gauna mada ga ni dredre, ka sega ni vinaka me kilai se mo saumi lesu kina. E sega ni da waraka me da lesi se veivuke baleta ni sa noda ivakarau sara ga. Eda na raica ni da na vakasinaiti ena loloma cecere ena noda digitaka me da yalovinaka, veikauwaitaki, lomasoli, veiciqomi, veivosoti, sega ni veivakaduiduitaki, ka sega ni nanumi koya ga vakai koya.

E vakarautaka na iSoqosoqo ni Veivukei e vuqa sara na sala mera qaravi kina eso. E dua vei ira na sala bibi duadua me cakacakataki kina na loloma cecere sa ikoya na dauveisiko. Ena noda vakayacora vinaka na noda veisiko eda na sotava kina e vuqa na madigi ni loloma, veiqaravi, ka qaravi ira tale eso. Na vakayacori ni loloma cecere, se loloma, ena vakasavasavataka ka vakatabui kina na yaloda, ka vukei keda me da yaco me da vakataka vakalevu sara na i Vakabula vakalevu.

Au qoroqoro ena noqu vakadinadinataka na cakacaka sega ni wiliki rawa ni loloma cecere ka vakayacori tiko ena veisiga mai vei ira na dauveisiko e vuravura raraba ka ra qarava ga vakai ira mai na nodra gagadre o ira vakayadudua na marama kei na nodra matavuvale. Kivei kemuni na dauveisiko, au kaya, “Mai na cakacaka lalai ni loloma cecere oqori, o ni sa muria tiko kina na iVakabula ka iyaya tiko ni cakacaka ni Ligana ena nomuni veivuke, veikauwaitaki, veilaveti, veivakacegui, vakarorogo, veivakayaloqaqataki, veisusu, veivakavulici, ka vakaukauwataki ira na marama ko veiqaravi tiko kina.” Meu wasea mada vakacaca eso na ivakaraitaki ni veiqaravi vakaoqo.

E vakaleqai Rosa tiko na malumalumu ni matenisuka kei na so tale na mate lalai. A lewena na Lotu ena vica na yabaki sa oti. E tinanigone sega ni vakawati ka tiko kei luvena tagane cauravou.E wasoma nona dau curu vagauna tiko i valenibula, me siga vica. O ira na nona dauveisiko yalololoma e sega wale ga ni ra dau kauti koya ki valenibula, ia era veisiko ka vakacegui koya ena valenibula ka ra dau qarauna na luvena tagane e vale vakakina ni laki vuli. O ira na nona dauveisiko era veiqaravi me vaka era nona itokani ka lewe ni nona matavuvale.

Ni oti e vica na imatai ni veisiko bibi kivua e dua na marama, a kunea o Kathy ni marama oqo e sega tu ni kila na wilivola ia a vinakata me vulica. A lomasoli o Kathy me veivuke e dina ga ni kila tu ni na kania sara ga na gauna, gadreva na yalovosota, kei na yalodei.

O Emily e dua na marama vakawati gone ka vakasaqara tiko na dina. E sega soti ni taleitaka na lotu, na turaga watina Michael. Ena nona a tauvimate o Emily ka curu ki valenibula ena dua na gauna, e dau kau kakana ki na matavuvale, o Cali, e dua na marama lewe ni iSoqosoqo ni Veivukei ka rau tiko veivolekati tale ga, meimei vei luvedrau, samaka na vale, ka vakarautaka me ciqoma o Emily na veivakalougatataki ni matabete. Na veicakacaka ni loloma cecere oqo a vakamalumalumutaka na lomai Michael. A nanuma me sa lako kina ki na soqoni ni Lotu ka laki sotavi ira na daukaulotu. E rau sa qai papitaiso wale ga oqo o Emily kei Michael.

“Sa sega ni mudu na loloma. … Na loloma … sa yalovinaka, … sa sega ni qara na ka me nona ga, … sa ubia na ka kecega, sa vosota na ka kecega.”14

A kaya o Peresitedi Henry B. Eyring:

“Na itukutuku ni iSoqosoqo ni Veivukei e sinai tu ena italanoa ni nodra veiqaravi totoka dauveinanumi. …

“Na isoqosoqo oqo era lewena o ira na marama era dauloloma e yalodra dina ka ra rawata ni ra kilikili kaya ka mororoya tiko na nodra veiyalayalati ka soli wale ga ena Lotu dina ni Turaga. Na nodra loloma cecere e lako mai Vua ena vuku ni Nona Veisorovaki. E dusimaki ira kina nodra cakacaka ni loloma cecere na Nona ivakaraitaki—kei na vakavinavinakataki ni Nona isolisoli tawayalani ni loloma vakalou—kei na Yalo Tabu, ka a tala mai o Koya me mai nodra itokani na Nona italai ena nodra ilesilesi ni loloma vakalou. Ena vuku ni ka oqori, era sa vakayacora rawa ka cakava na veika vovou baleti ira na tani ka kune marau ena gauna mada ga era sotava tu kina na leqa lelevu”15

Na vakayacori ni veiqaravi kei na vakatetei ni loloma cecere kivei ira eso e vukea noda vorata na duidui ni veika dredre ka vakalailaitaka na bolebole era kauta mai.

Au lesu tale ena gauna oqo ki na nona veivakatavulici o Parofita Josefa kivei ira na marama ena gauna ni Veivakalesuimai e liu. A kaya ena nona vakauqeta tiko na kena vakayacori na loloma cecere kei na gugumatua: “Kevaka mo na bula rawata na ivakavuvuli kece oqo, sa na qai levu ka lagilagi na kemu isau ena matanitu vakasilesitieli! Kevaka ko na rawata tiko mo caka dodonu, era na sega ni tarovi na agilosi me ra mai nomu itokani.”16

Me vaka ga na gauna e liu sa vakakina nikua mai Nauvoo, ena nodra veilakoyaki na marama ena vakasaqaqara ka vukei ira era gadreva tu na veivuke. O kemuni na marama ena matanitu o ni yavudei ni veivaqaqacotaki vakayalo, veiqaravi ena yalololoma, kei na yalodina. Era dauveisiko gugumatua ka daukauwaitaki ira tale eso. Era muria na ivakaraitaki ni iVakabula ka cakava na veika e cakava o Koya.

Na marama kece ni iSoqosoqo ni Veivukei e rawa me ra vakasinaiti ena loloma, ni ra kila ni nodra cakacaka lalai ni loloma cecere e tiko kina na kaukauwa ni veivakabulai kivei ira eso vaka kina o ira. E yaco me ra kila ena veivakadeitaki ni loloma cecere sa ikoya na loloma savasava nei Karisito ka sega ni mudu.

Ena nomu wilika na itukutuku ni iSoqosoqo ni Veivukei, ena vakauqeti iko mo raica ni ivakavuvuli bibi oqo ni kosipeli sa ikoya e dua na iulutaga kilai vinaka ena loma ni ivola taucoko.

Meu tinia ena dua na veisureti kivei kemuni kece sara na marama ena Lotu mo ni kerea vagumatua mo ni vakasinaiti ena isolisoli ni loloma cecere, na loloma savasava nei Karisito. Ni vakayagataka na nomuni ivurevure kece sara ni caka vinaka, ena kauta mai na vakacegu kei na veivakabulai kivei ira era vakavolivoliti kemuni, oka kina na nomuni dui matavuvale. Ena vakalougatataka na Turaga na nomuni sasaga mo ni rawata.

Me kauti keda me da vakatorocaketaka ka cakacakataka na loloma cecere kivei ira kece sara era vakavolivoliti keda, na noda kila na loloma levu ka vakarautaka tu na Tamada kei na Luvena me baleti keda, vakakina na noda vakabauta kei na vakavinavinakataka na Veisorovaki. Sa noqu masu oqo ena yaca i Jisu Karisito, emeni.