Filifili le Ola e Faavavau

I tausaga ua mavae, a o matou i ai ma lo’u aiga i le matafaga, sa ou vaaia ni faailo ma ni fu’a o lapataia ai matou e uiga i ni galu malolosi o loo agai ese atu mai le matafaga i le sami loloto ma le sousou. E le iloa e o’u mata e le’i aoaoina peitai na faigofie lava ona iloa e leoleo faaola o loo i luga o olo matamata o lata ane, ia galu malolosi ia o loo lamatia ai i latou o e tuua le tulaga saogalemu o le matafaga ma agai atu i le sami. Ou te manatua lo’u taumafai e fetuutuunai o’u manatu faapea, “O au o se tagata e aau malosi. O le a avea ma se faamalositino lelei le aau. O le a ou saogalemu lava i le vaega e papa’u.”

O le le amanaiaina o lapataiga ma le lagonaina o le talitonuina o a’u lava faaiuga, sa ou alu atu ai loa i le sami e fai se auau “manaia.” Ina ua mavae ni nai minute sa ou tepa ae i luga e tau vaai atu i lo’u aiga i le matafaga latalata ane, ae peitai ua mamao ese atu le matafaga! O le galu faasese tagata lea na lapataia ai au, na pueina au ma tosoese faavave atu ai au mai lo’u aiga.

Sa ou taumafai e aau agai i le matafaga, i le taimi muamua sa ou maua le to’a ona ou faatopetope lea,peitai sa atili ai ona toso au e le galu lē alofa i le itu loloto ma le sousou o le sami. Sa ou vaivai ma ua amata ona ou laoa i vai sa ou inumia. O le mea moni lava o le malemo le mea lea ua oo mai. Na leai so’u malosi, ma na iu lava ina ou valaau atu ma le popole mo se fesoasoani.

Na foliga mai, na pei o se vavega, le vave oo mai o le leoleo faaola i o’u autafa. Ou te lei iloa sa ia matauina lo’u alu atu i le sami. Sa ia iloa o le a pu’e au e le galu, ma sa ia iloa le mea o le a ave i ai au. I le taumafaiga e aloese mai le galu, sa ia aau faataamilo mai i le itu tonu lava lea sa ou tauivi ai; ma sa ia faatali ai ma le onosai i sa’u valaau mo se fesoasoani. Ona o lo’u vaivai tele e aau toatasi i le matafaga, sa ou faafetai ai mo lana laveai. Pe ana leai lana fesoasoani semanu ou te le toe foi mai i lo’u aiga.

O lena aso sa ou faia ai se filifiliga le lelei lea na maua ai se taunuuga matautia mo au ma lo’u aiga. A o tatou mafaufau faatasi nei e uiga i le meaalofa o le filifili, ou te tatalo ina ia fesoasoani mai le Agaga Paia ia i tatou taitoatasi ina ia iloilo a tatou filifiliga o loo faia.

Na aoao mai lo tatou perofeta pele o, Peresitene Thomas S. Monson: “E le o lava la’u faamamafa atu, o filifiliga e fuafua ai se taunuuga. E le mafai ona e faia ni faaiuga e faavavau e aunoa ma ni taunuuga e faavavau.”¹

O outou taitoatasi—e pei ona aoaoina ai tatou i lenei konafesi—o se atalii po o se afafine agaga faapelepele a ni matua faalelagi. Ua i ai sa outou natura ma se taunuuga paia.² I lou olaga i le muai olaga sa e aoao ai ia fiafia i le upumoni. Sa e faia ni filifiliga sao e faavavau. Sa e iloa o iinei i le olaga faaletino, o le i ai ni puapuaga ma ni faigata, faanoanoaga ma ni mafatiaga, tofotofoga ma luitau e fesoasoani i lou tuputupu ae ma le alualu i luma. Sa e iloa foi e mafai ona faaauau pea le faia o ni au filifiliga sao, ma e ala mai i le Togiola a Iesu Keriso, o le a mautofi ai i le ola e faavavau.

O le a se mea na aoao mai e le perofeta o Liae e faatatau i le filifiliga? Sa ia fautua mai ua tatou “saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti, e tusa ma le faatagataotauaina ma le mana o le tiapolo.” Sa ia toe aoao mai, “Ia outou tepa taulai i le Puluvaga sili, ma faalogologo i ana poloaiga silisili, ma faamaoni i ana afioga, ma filifili le ola e faavavau.”³

Uso e ma tuafafine, i mea o loo tatou filifili e mafaufau i ai, lagona, ma faia, pe o tatou filifili ea le ola e faavavau?

Ua aoaoina le fanau a le ma fanau afai latou te faia se filifiliga, ua latou filifili foi sona taunuuga. Talu ai nei lava sa musu ai se tasi o fanau teine e tolu tausaga a le ma fanau e ‘ai lana meaai o le afiafi. Sa faamatala atu i ai e lona tina, “Ua toeitiiti lava oo i le taimi moe. Afai la e te filifili e ai, ua e filifili foi e ai le aisa kulimi. Afai e te filifili e te le ai, ua e filifili foi e alu sao loa e moe i le taimi nei, e aunoa ma se aisa kulimi.” Sa iloilo e le tamaitai lea ana filifiliga ona fai mai lea ma le mautinoa, “Ou te manao i le filifiliga lenei—e taalo ma ai na o le aisa kulimi ma ou te le fia alu e moe.”

Uso e ma tuafafine, pe o tatou mananao ea tatou te taaalo, taumafa na o le aisa kulimi, aua nei momoe, ma i sea ala tatou te aloese ai mai taunuuga e pei o le le lelei o le soifua maloloina ma le le lavā?

O le mea moni lava e na o le lua lava a tatou filifiliga e faavavau, e tofu ma ni taunuuga e faavavau: filifili e mulimuli i le Faaola o le lalolagi ona e filifili lea o le ola e faavavau faatasi ma lo tatou Tama Faalelagi po o le filifili e mulimuli i le lalolagi ua e filifilia e vavaeeseina ai e faavavau i tatou mai le Tama Faalelagi.

E le mafai ona tatou filifili ma le manuia mea uma ia e lua o le saogalemu o le amiotonu ma le tulaga lamatia o le lalolagi. O le savalivali atu i le lalolagi e ono foliga e le lamatia, ae na faapena foi la’u auauga “malu”!

Faapei o le galu lea semanu e suia ai le ala o olaga o lo’u aiga, o galu o le lalolagi i le asō, o talitonuga taufaasese, aoaoga pepelo, ma le ola le mama ua le taofiofia o loo saili e tosoese atu ma le faavavau i tatou mai i o tatou aiga ma lo tatou Tama Faalelagi.

O loo silasila mai ma saili e o tatou perofeta soifua, tagatavaai, ma talifaaaliga e lapataia i tatou mai galu aave matautia o le lalolagi ua faamata’uina ai i tatou. O loo latou valaaulia, faamalosiau, aoao, toe faamanatu mai, ma lapatai mai i tatou ma le alofa. Ua latou silafia e faalagolago lo tatou saogalemu i le filifilia o mea nei (1) malamalamaaga tatou te maua mai i le suesuega o tusitusiga paia ma le tatalo i aso uma, (2) o le taitaiga a le Agaga Paia, ma (3) a latou fautuaga faaperofeta. Ua latou silafia ua na o lo tatou Faaola o, Iesu Keriso, ma le ola ai i Lana talalelei tatou te maua ai le saogalemu ma le olioli sili. E pei ona aoao mai ia Elder Dallin H. Oaks, sa tautinoa ma e lo tatou Faaola, “O Au nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au.”⁴

I le taimi o le faigata ma mafatiaga sa i ai i Soviet Rusia, sa filifili ai Anatoly ma Svetlana Reshetnikov i le amiotonu nai lo mea o le lalolagi. Ina ua la auai i le Ekalesia, sa sauaina i laua. Sa tuuitiitia lona tulaga i le galuega. Sa la mafaufau ma le lototetele, “O lea la ua tele le taimi ta te auauna ai i le Atua!” Sa faaauau pea ona faamata’uina i laua, ae peitai sa la filifili e ola i ni olaga e taulai atu i le talalelei. O Elder Anatoly Reshetnikov sa tofia e avea ma uluai Fitugafulu Eria o Rusia. O a la’ua filifiliga, sa faaauau ai pea e le au Reshetnikov ona filifili le ola e faavavau.

Tatou te feagai uma lava ma faigata. E faaosoosoina uma foi i tatou. E tofu foi i tatou ma ni mea sese. Ae e le o faigata tele pe ua tuai tele ona faia ni filifiliga sao. O le salamo o se tasi lea o na filifiliga sao taua.

Na aoao mai Peresitene Dieter F. Uchtdorf:

“O nai mea sese laiti ma nai se’e ese laiti mai aoaoga faavae o le talalelei a Iesu Keriso e mafai ona aumaia ai ni taunuuga faanoanoa i o tatou olaga. O lea e matuai taua ai lava lo tatou lotopulea ma vave faia ni faaiuga e faasa’o ai ina ia toe foi atu ai i luga o le ala sao ae aua le faatalitali pe faamoemoe o le a faasa’oina e mea sese i latou lava.

“O le umi ona tatou faatuai e faasa’o, o le tele foi lena o le a oo i ai ni suiga e moomia, ma o le umi foi lena ona toe foi mai luga o le ala sao—e oo lava i le tulaga e ono faamalumalu mai ai ni faigata.”⁵

O loo faaloaloa mai pea aao o le alofa mutimutivale o le Faaola ia i tatou taitoatasi.⁶ Pe a tatou salamo faamaoni ma le atoatoa, o le a mafai ona faamagaloina atoatoa a tatou mea sese ma o le a le toe manatuaina e le Faaola a tatou agasala.⁷

I le iloiloina o au filifiliga ma o latou taunuuga, atonu e mafai ona e fesili ifo ia te oe lava faapea:

• Pe o ou sailia se taitaiga paia e ala i suesuega o tusitusiga paia ma le tatalo i aso uma, pe o ou filifili ina ia ou matua pisi lava pe le fiafia i ai ma ou le faaaoga ai se taimi e suesue ai i afioga a Keriso, mafaufau loloto i ai, ma talanoa atu i lo’u Tama Faalelagi?

• Pe o ou filifili e mulimuli i fautuaga a perofeta a le Atua, pe o ou mulimuli i ala o le lalolagi ma manatu o isi o loo tetee i fautuaga a perofeta?

• Pe o ou sailia le taitaiga a le Agaga Paia i aso uma i mea o loo ou filifili e mafaufau i ai, lagona, ma faia?

• Pe o ou aapa atu pea ea e le aunoa e lagolago, auauna atu, pe fesoasoani e lavea’i isi?

Ou uso e ma tuafafine pele, o o outou taunuuga e faavavau o le a lē o se taunuuga o se avanoa ae o se filifiliga. E le o tuai lava ona amata ona filifili le ola e faavavau!

Ou te molimau atu ona o le fuafuaga sili o le fiafia a le Tama Faalelagi, ua mafai ai e i tatou taitoatasi ona faaatoatoaina e ala i le Togiola a Iesu Keriso. Faatasi ma o tatou aiga, ua mafai ona tatou mau faatasi ma lo tatou Tama Faalelagi i le faavavau ma maua le atoaga o le fiafia. Ou te molimau atu ai i nei mea uma i le suafa o Iesu Keriso, amene.