Veiyalayalati

Russell M. Nelson

Ena Kuoramu ni iApositolo Le Tinikarua


Ena gauna eda kila kina ni da sa luve ni veiyalayalati, eda sa kilai keda ka kila na veika e namaka vei keda na Kalou.

Ni oti e dua na macawa mai na dua na ilesilesi ena dua na gauna lekaleka sa oti me laki tauyavu na imatai ni iteki e Moscow mai Rusia,1 au a laki tiko ena dua na koniferedi ni tikina mai St. Petersburg. Niu tukuna tiko na noqu vakavinavinaka ena vukudra na daukaulotu taumada kei ira na veiliutaki e kea ka ra kauta mai na igu ki na Lotu e Rusia, au a mani cavuta na yacai Vyacheslav Efimov. O koya na imatai ni saumaki mai ki na Lotu mai Rusia a yaco me peresitedi ni kaulotu. Erau a veiqaravi sara vakavinaka ena ilesilesi oya kei na watina. Sega ni dede mai na gauna ka mai cava kina na nodrau veiqaravi, keimami sa mai rarawataka sara vakalevu, na nona a mai takali yani vakasauri o Peresitedi Efimov.2 Se qai yabaki 52 walega.

Niu tukuna tiko me baleti rau na veiwatini painia oqo, au a vakauqeti meu tarogi ira na ivavakoso kevaka e tiko voli e kea o Sisita Efimov. A tucake mai na mua ni rumu e muri e dua na marama. Au sureti koya me lako mai ki na gusunivosa. Io, o Sisita Galina Efimov. A vosa ena yalodei ka wasea e dua na ivakadinadina qaqa me baleta na Turaga, na Nona kosipeli, kei na Nona Lotu vakalesui mai. Erau sa vauci kei na watina ena valetabu. E kaya ni rau sa duavata tu me tawamudu. Erau se veitokani voli ga vakadaukaulotu, o koya ena yasa ni ilati oqo kei na watina ena yasana kadua.3 Ena wainimata ni reki a vakavinavinaka vua na Kalou ena vuku ni veiyalayalati tabu ni valetabu. A drodro talega na wainimataqu, ena noqu kila vakamatata tu ni duavata tawayalani erau sa kena ivakaraitaki na veiwatini yalodina oqo sai koya na vua dodonu ni kena caka, maroroi ka rokovi tiko na veiyalayalati tabu.

E dua vei ira na vakasama bibi duadua ni lotu vakatakilai mai sai koya na veiyalayalati tabu. Ena vosa vakalawa, na veiyalayalati sai koya na nodrau veidinadinati e rua se sivia na tamata. Ia ena vakasama vakalotu, e bibi cake sara na veiyalayalati. Sai koya na yalayala tabu vua na Kalou. E vakadavora o Koya na kena ivakarau. E rawa vei keda na tamata yadua me da digia me da ciqoma na ivakarau oqori. Kevaka e ciqoma e dua, na ivakarau ena veiyalayalati ka talairawarawa ki na Nona lawa na Kalou, ena rawata o koya na veivakalougatataki e sala vata kei na veiyalayalati. Eda kila ni “da sa muria e dua na ivakaro, ena vakalougatataki keda na Kalou ena veika sa yalataki tu kina.”4

Ena veitabayabaki kece sa dau cakava na Kalou na veiyalayalati kei ira na Luvena.5 Sa dau yaco tiko na Nona veiyalayalati ena loma ni ituvatuva taucoko sara ni veivakabulai ka ra sa tiki ni taucoko ni Nona kosipeli.6 Me vaka oqo, a yalataka na Kalou ni na tala mai e dua na nodra iVakabula na Luvena,7 ka kerea me kena isau na nodra talairawarawa ki na Nona lawa.8

Ena iVolatabu eda wilika kina me baleti ira na tagane kei na yalewa ena Vuravura Makawa ka ra kilai me luve ni veiyalayalati. Na veiyalayalati cava beka? “Kei na vosa ni veiyalayalati ka cakava na Kalou vei ira na noda qase, ni sa kaya vei Eparama, ena kalougata na veimataqali kecega e vuravura ena vuku ni nomu kawa.”9

Ena iVola i Momani eda wilika kina me baleti ira na tamata ena Vuravura Vou ka ra a kilai talega me luve ni veiyalayalati.10 A kaya kina vei ira na Turaga sa vakaturi cake mai na mate: “Ia dou sa nodra kawa na parofita; dou sa yavusa i Isireli; dou sa tamata ni veiyalayalati ka cakava ko Tamaqu vei ira na nomudou qase, ni a kaya vei Eparama: Ena kalougata na veimatanitu kecega e vuravura ena vuku ni nomu kawa.”11

A vakamacalataka na iVakabula na bibi ni kedra ivakatakilakila ni ra luve ni veiyalayalati. E kaya kina, “Sa vakaturi au cake ko Tamaqu ka talai au meu vakalougatataki kemudou, ia mo dou saumaki mai na nomudou ivalavala ca, ni dou sa gone ni veiyalayalati.”12

Na veiyalayalati a cakava na Kalou vata kei Eparama13 ka qai vakadeitaka tale e muri vei Aisake14 kei Jekope15 e duatani sara na kena bibi. E tiko kina e vica na yalayala, ka oka kina na:

  • Ni na sucu mai ko Jisu Karisito ena kawa i Eparama.

  • Ena sega ni wili rawa na kawa i Eparama, ka na tubu me tawamudu era na taura talega na matabete.

  • Ena yaco ko Eparama me tama ni vuqa na veimatanitu.

  • Era na taukena na nona kawa na veivanua eso.

  • Era na vakalougatataki na veimatanitu kecega ni vuravura ena vuku ni nona kawa.16

  • Ena tawayalani na veiyalayalati oqori—io ka yacova “na itabatamata e udolu.”17

Eso vei ira na yalayala oqo sa vakayacori; eso tale se bera. Au cavuta mada e dua na parofisai taumada ena iVola i Momani: “Ia a sega ni vosa ko tamadatou [Liai] me baleti ira walega na nodatou kawa, ia sa baleti ira taucoko na mataqali i Isireli, ka sa tukuna na veiyalayalati ena vakayacori ena siga mai muri; io na veiyalayalati ka cakava na Turaga vua na tamada ko Eparama.”18 E sega beka ni vakasakiti oya? Rauta ni 600 na yabaki ni bera ni sucu mai Peceliema ko Jisu, era sa kila tu na parofita ni na qai vakayacori ga na veiyalayalati vaka-Eparama ena siga mai muri.

Me vakayacori na yalayala oya, a rairai mai na Turaga ena veisiga e muri oqo me vakavouya na veiyalayalati vaka-Eparama. A kaya kina na iVakavuvuli vua na Parofita o Josefa Simici:

“A sa yalataki vei Eparama ni na tubu tikoga na nona kawa kei na vua ni tolona—ia ko iko Josefa na noqu tamata, … ko sa nona kawa talega. …

“Ia ena yaco talega vei iko na ka sa yalataki oqo vei Eparama.”19

Ena kena vakavoui oqo, eda sa ciqoma kina, me vakataki ira ena gauna makawa, na matabete tabu kei na kosipeli tawayalani. Sa tu vei keda na dodonu me da ciqoma na taucoko ni kosipeli, marautaka na veivakalougatataki ni matabete, ka rawata me noda na nona veivakalougatataki cecere duadua na Kalou—sai koya na bula tawamudu.20

Eso vei keda eda kawa dina i Eparama; eso tale eda vakasoqoni vata mai ki na nona matavuvale ena veivakubeci. E sega ni vakaduiduitaka na Turaga.21 Eda na rawata vata na veivakalougatataki yalataki oqo—kevaka eda vakasaqara na Turaga ka talairawarawa ki na Nona ivakaro.22 Ia kevaka e sega, eda na sega ni rawata na veivakalougatataki ni veiyalayalati.23 Me vukei keda, sa vakarautaki ena Nona Lotu na veivakalougatataki vakapeteriaki me soli kina vei ira era ciqoma e dua na rai me baleta na nodra veigauna ni mataka, ka vakakina e dua na isema ki na veigauna sa oti, io e vakadeitaki talega kina na keda isema me yacovi iratou yani o Eparama, Aisake kei Jekope.24

O ira na tagane ni veiyalayalati e tu vei ira na dodonu me ra vakaivotavota ena bubului kei na veiyalayalati ni matabete.25 Kevaka o “yalodina ki na ilesilesi ruarua vakabete au sa tukuna … ka vakayacora vakavinaka na [nomu] itavi ena vakasavasavataki [iko] na Yalo Tabu ka [ko na] vakavoui.”26 E sega ni o koya ga oqori. O ira na tagane era ciqoma ena kilikili na matabete era sa ciqoma na Turaga o Jisu Karisito, ia ko ira era ciqoma na Turaga era sa ciqoma na Kalou na Tamana.27 ia ko ira era ciqoma na Tamana era sa ciqoma na veika kece e taukena ko Koya.28 Na veivakalougatataki vakaiyanaqa e drodro mai na bubului kei na yalayala ni matabete oqo vei ira na tagane, yalewa, kei na gone bula kilikili e vuravura taucoko.

Sa noda itavi me da veivuke ena kena vakayacori na veiyalayalati vaka-Eparama. Na noda na kawa sa tabaki taumada mai ka vakarautaki me vakalougatataki ira na tamata kecega e vuravura.29 Oqori na vuna e oka kina ena itavi ni matabete na cakacaka ni kaulotu. Ni oti e rauta ni 4,000 na yabaki ni nanamaki kei na vakavakarau, oqo na siga sa lesi me kau yani kina na kosipeli vei ira na matatamata kecega e vuravura. Oqo na gauna sa yalataki tu ni na vakasoqoni kina o Isireli. Eda sa vakaitavi kina! E sega beka ni taleitaki oya? Sa vakanuinui tu vei keda kei ira na luveda tagane na Turaga—ka sa vakavinavinaka talega vakalevu ena vukudra na luveda yalewa—ka ra veiqaravi ena bula kilikili vakadaukaulotu ena gauna cecere oqo ni kena vakasoqoni vata o Isireli.

Na iVola i Momani sa ivakatakilakilaka rawa ni laurai ni sa tekivuna na Turaga na nodra vakasoqoni vata na Luvena ni veiyalayalati mai Isireli.30 Na ivola oqo, ka volai me baleta na noda gauna, e tukuna me vaka ni dua na kena inaki me “dou na qai kila ni sa tekivu vakayacori na veiyalayalati a cakava ko Tamada vei ira na Isireli. … raica ena vakayacora vakaidina na Turaga na veiyalayalati a cakava vei ira na nona tamata, na yavusa i Isireli.”31

Sa dina sara, e sega ni se guilecava na Turaga! Sa vakalougatataki keda ko Koya kei ira tale eso e vuravura raraba ena iVola i Momani. E dua na kena inaki me ra “kila kina na Jiu kei ira na Veimatanitu Tani ni Karisito ko Jisu.”32 E vukei keda me da veiyalayalati kei na Kalou. E sureti keda me da dau nanumi Koya ka kila na Luvena Lomani. E dua tale na ivakadinadina kei Jisu Karisito.

E tu na nodra dodonu na luve ni veiyalayalati me ra ciqoma na Nona ivunau ka kila na ituvatuva ni veivakabulai. Era na taura me nodra ena nodra vakayacora na veiyalayalati bibi sara na kena tabu. E kaya kina o Brigham Young: “O ira kece na Yalododonu Edaidai era sa curuma na veiyalayalati vou ka tawayalani ena nodra curu mai ki na Lotu oqo.… Era na curuma na veiyalayalati vou ka tawavakaiyalayala me ra tokona na Matanitu ni Kalou.”33 Era na maroroya na veiyalayalati ena nodra talairawarawa ki na Nona ivakaro.

Ena gauna ni papitaiso eda sa yalataka kina me da qarava na Turaga ka muria na Nona ivakaro.34 Ni da vakayagataka na sakaramede, eda vakavouya kina na veiyalayalati oya ka vakadeitaka na noda sa tu vakarau me da taura na yaca i Jisu Karisito. O koya eda sa vakubeci kina me da Luvena tagane kei na yalewa ka da kilai me da veitacini ka veiganeni. O Koya na tama ni noda bula vou.35 Ka kena ilutua, ena loma ni valetabu, sa rawa ni yaco me da vakaivotavota vata ena veivakalougatataki ni matavuvale tawamudu, me vaka a yalataki ena dua na gauna vei Eparama, Aisake, kei Jekope, kei ira na nodratou kawa.36 Oqori na vuna, e veiyalayalati kina ni bula vakacerecerei na vakamau vakaselesitieli.

Ena gauna eda kila kina ni da sa luve ni veiyalayalati, eda sa kilai keda ka kila na veika e namaka vei keda na Kalou.37 Sa volai tu e yaloda na Nona lawa.38 O Koya na noda Kalou ka da Nona tamata o keda.39 O ira na luve ni veiyalayalati yalodina era na tudei, ena loma sara mada ga ni veika dredre. Ni sa tei vakatitobu ki yaloda na ivunau oqori, na batigaga sara mada ga nei mate ena vakamanoataki ka qaqaco cake na noda igu vakayalo.

Na veivakacaucautaki cecere duadua eda rawa ni rawata ena bula oqo me da kilai tu ni da dau maroroya na veiyalayalati. Na isau ni dau maroroya na veiyalayalati ena vakilai eke ka vakakina ni oti eke. E tukuna na ivolanikalou ni “mo ni dau nanuma tiko ni ra sa kalougata ka marau ko ira sa muria na vunau ni Kalou. Raica era sa vakalougatataki ena veika, … ia kevaka era sa yalodina tiko me yacova na ivakataotioti, era na curu ki lomalagi … ka tiko marau vata kei na Kalou me tawamudu.”40

E bula na Kalou. O Jisu na Karisito. Sa vakalesui mai na Nona Lotu me vakalougatataki kina na tamata kecega. Na Nona parofita nikua o Peresitedi Thomas S. Monson. O keda, me vaka ni da luvena yalodina ni veiyalayalati, eda na vakalougatataki ena gauna oqo ka tawamudu. Au vakadinadinataka ena yaca i Jisu Karisito, emeni.

Show References

  1.  

    1. A tauyavutaki na iTeki mai Moscow e Rusia ena Sigatabu, 5 ni June 2011.

  2.  

    2. A peresitedi ni Tabana ni Kaulotu na Russia Yekaterinburg o Vyacheslav Efimov mai na 1995 ki na 1998. A mate ena ika 25 ni Feperueri, 2000.

  3.  

    3. Raica na Vunau kei na Veiyalayalati 138:57.

  4.  

    4.  Vunau kei na Veiyalayalati 130:21.

  5.  

    5. Me vakaoqo, ni oti na Waluvu levu, e kaya o Koya “ena qai raici na drodrolagi ena o: kau na qai nanuma na noqu veiyalayalati au sa ia vei kemudou … ; ia ena sega ni yaco tale na wai me waluvu” (Na iVakatekivu 9:14–15, idusidusi e ra; mai na iVakadewa nei Josefa Simici, (Na iVakatekivu 9: 20).

  6.  

    6. Raica na Vunau kei na Veiyalayalati 66:2; 133:57.

  7.  

    7. Raica na Joni 3:16.

  8.  

    8. Raica na Eparama 3:25.

  9.  

    9.  Cakacaka 3:25.

  10.  

    10. Raica na 3 Nifai 20:26.

  11.  

    11.  3 Nifai 20:25.

  12.  

    12.  3 Nifai 20:26.

  13.  

    13. Raica Na iVakatekivu 17:1–10, 19; Na Vunau ni Soro 26:42; Cakacaka 3:25; Bible Dictionary, “Abraham, Covenant of.”

  14.  

    14. Raica Na iVakatekivu 26:1–5, 24.

  15.  

    15. Raica na Na iVakatekivu 28:1–4, 10–14; 35:9–13; 48:3–4.

  16.  

    16. Raica na idusidusi e cake ena idusidusi e ra 13–15.

  17.  

    17.  Na iVakarua 7:9; 1 Veigauna 16:15; Same 105:8.

  18.  

    18.  1 Nifai 15:18; vakaikuritaki.

  19.  

    19.  Vunau kei na Veiyalayalati 132:30–31. A tukuna talega na Turaga vua na Parofita o Josefa Simici, “Ia me vaka na vosa kau a tukuna vei Eparama me baleti ira na veimataqali kecega e vuravura, au sa tukuna talega vakakina vei Josefa na noqu tamata, raica ena kalougata na veimataqali kecega e vuravura ena vukumu kei ira na nomu kawa” (Vunau kei na Veiyalayalati 124:58).

  20.  

    20. Raica na Vunau kei na Veiyalayalati 14:7.

  21.  

    21. Raica na Cakacaka 10:34–35.

  22.  

    22. Raica na Lako Yani 19:5.

  23.  

    23. E vakadeitaka na ivolanikalou “Koi au, na Tauraga, au na vakayacora na noqu yalayala kevaka dou sa muria na noqu ivakaro, ia kevaka dou sa sega ni muria na noqu ivakaro, dou na sega ni rawata na ka sa yalataki” (Vunau kei na Veiyalayalati 82:10).

  24.  

    24. Ena ika 21 ni Sepiteba, 1823, a vakatakilai kina ena imatai ni gauna vua na Parofita o Josefa Simici na vakasama vakaveiyalayalati oqo. A qai vakadeitaka na agilosi o Moronai ni na lako mai na Parofita o Ilaija me vaka e dua na italai mai lomalagi me tea e yalodra na gone na kila ka me baleta na yalayala ka a vakayacori vei ira na qase ena yavusa e Isireli (raica na Vunau kei na Veiyalayalati 2:1–3).

  25.  

    25. Raica na Vunau kei na Veiyalayalati 84:33–34, 39–40.

  26.  

    26.  Vunau kei na Veiyalayalati 84:33.

  27.  

    27. Raica na Vunau kei na Veiyalayalati 84:35, 37.

  28.  

    28. Raica na Vunau kei na Veiyalayalati 84:38.

  29.  

    29. Raica na Alama 13:1–9.

  30.  

    30. Raica na 3 Nifai 29.

  31.  

    31.  3 Nifai 29:1, 3.

  32.  

    32. Na tabana ni ulutaga ni iVola i Momani: E Dua Tale na iVakadinadina kei Jisu Karisito.

  33.  

    33.  Nodra iVakavuvuli na Peresitedi ni Lotu: Brigham Young (1997), 62.

  34.  

    34. Raica na Vunau kei na Veiyalayalati 20:37.

  35.  

    35. “Io eda sa tukuni Karisito ka rekitaki Karisito, ka vunautaki Karisito ka parofisaitaki Karisito, …me ra kila kina na noda kawa na sala me bokoci kina na nodra ivalavala ca” (2 Nifai 25:26).).

  36.  

    36. Raica na Kalatia 3:29; Vunau kei na Veiyalayalati 86:8–11.

  37.  

    37. Na vakasama oqo e baleti keda: “Ia ni sa vakaraitaki Koya oti vakayago na Mesaia vei ira na luve ni tamata, ka sa oti e vuqa na yabaki ka vuqa na itabatamata, sa na qai kau yani vei ira na matanitu tani na uto ni itukutuku vinaka ni Mesaia, ia era na qai kauta lesu mai na Matanitu tani vei ira na vo ni nodatou kawa—ia era na qai kila ena siga ko ya na vo ni nodatou kawa, ni ra sa yavusa i Isireli ka ra sa tamata ni veiyalayalati ni Turaga; ia era na qai kila na kedra itukutuku na nodra qase, kei na itukutuku vinaka ni nodra iVakabula ka a vakatavulica vei ira na nodra qase ko Koya; ia era na kila na nodra iVakabula kei na usutu ni nona ivakavuvuli, ka ra na kila talega na sala me ra lako mai kina vua ka vakabulai” (1 Nifai 15:13–14).

  38.  

    38. Raica na Aisea 55:3; Jeremaia 31:33; Roma 2:15; 2 Korinica 3:2–3; Iperiu 10:16.

  39.  

    39. Raica Same 95:7; 100:3; Jeremaia 24:7; 31:33; 32:38; Isikeli 11:20; 37:23, 27; Sakaraia 8:8; 2 Korinica 6:16; Iperiu 8:10.

  40.  

    40.  Mosaia 2:41.