Feagaiga

Ina ua tuanai se vaiaso se tasi talu ona uma so’u tofiga lata mai nei o le faatuina o le siteki muamua i Moscow, Rusia,¹ sa ou auai atu ai i se konafesi faaleitu i St. Petersburg. A o ou faasoa atu e uiga i lo’u agaga faafetai mo uluai faifeautalai ma taitai i le lotoifale o e na aumaia le malosiaga i le Ekalesia i Rusia, sa ou ta’ua ai le suafa o Vyacheslav Efimov. O ia lea o le tagata Rusia muamua na liliu mai sa avea ma se peresitene o le misiona. Sa maoae le lelei o le la tautua ma lona faletua i lena tofiga. E le’i leva ona uma le la misiona, o se faanoanoaga tele, ona sa maliu faafuasei Peresitene Efimov.² Sa na o le 52 tausaga o lona soifua.

A o ou talanoa e uiga i lenei ulugalii paionia, sa musuia au e fesili atu i le faapotopotoga pe mata o auai mai Sister Efimov. Sa tulai ae se tamaitai i le pito lava i tua. Sa ou valaaulia o ia e susu mai i le masini faaleotele leo. Ioe, o Sister Galina Efimov lava lea. Sa saunoa o ia ma le mautinoa ma tuuina atu se molimau mamana e uiga i le Alii, o Lana talalelei, ma Lana Ekalesia toefuataiina. Sa faamauina o ia ma lana tane i le malumalu paia. Fai mai a ia, ua faatasia i laua e faavavau. Sa avea pea i laua ma se soa faifeautalai, o ia i lenei itu ae o lana tane i le isi itu.³Faatasi ai ma loimata o le fiafia, sa ia faafetai ai i le Atua mo feagaiga paia o le malumalu. Sa ou tagi foi au, faatasi ai ma le iloa lelei o le tuufaatasia e faavavau na faaalia e lenei ulugalii faamaoni, o se taunuuga amiotonu lea o le osia, tausia, ma le faamamaluina o feagaiga paia.

O se tasi o manatu faavae aupito taua o le ekalesia moni, o le manatu lea e uiga i se feagaiga paia. I le gagana faaletulafono, e masani lava, o se feagaiga o lona uiga o se maliega i le va o ni itu se lua pe sili atu. Ae i se anotusi faalelotu, o se feagaiga o se mea e sili atu ona taua. O se tautoga paia ma le Atua. O Ia e filifilia tuutuuga. E mafai e tagata taitoatasi ona filifili e talia na tuutuuga. Afai e talia e se tagata ia tuutuuga o le feagaiga ma usitai i le tulafono a le Atua, e maua e ia faamanuiaga e o faatasi ma le feagaiga. Ua tatou iloa “a tatou maua se faamanuiaga mai le Atua, e maua i le usiusitai i lena tulafono ua faavae ai i luga.”⁴

I augatupulaga uma, na osia ai e le Atua ia feagaiga ma Lana fanau.⁵ O Ana feagaiga na faia i le fuafuaga atoa o le ata o le faaolataga ma o lea e avea ai o se vaega o le atoatoaga o Lana talalelei.⁶ Mo se faataitaiga, sa folafola mai e le Atua e auina mai se Faaola o Lana fanau,⁷ ma talosaga atu ai e fai ma taui o lo latou usiusitai i Lana Tulafono.⁸

I le Tusi Paia tatou te faitau ai e uiga i alii ma tamaitai i le Lalolagi Tuai o e na ta’ua o fanau o le feagaiga. O le a le feagaiga? “Le feagaiga sa faia e le Atua ma o [latou] tama, ua faapea mai ia Aperaamo, o so lau fanau foi e manuia ai aiga uma lava o le lalolagi.”⁹

I le Tusi a Mamona tatou te faitau ai i tagata o le Lalolagi Fou o e foi sa ta’ua o fanau o le feagaiga.¹⁰ Sa faailoa atu e le Alii toetu ia i latou: “Faauta foi, o outou o fanau a perofeta; ma o outou o lo le aiga o Isaraelu; ma o outou o lo le feagaiga lea na faia e le Tama ma o outou tama, na fetalai atu ai ia Aperaamo: Ma o lau fanau o le a manuia ai aiga uma o le lalolagi.”¹¹

Sa faamatala atu e le Faaola le taua o lo latou faasinomaga o ni fanau o le feagaiga. Sa fetalai o Ia, “Ua faatu mai au e le Tama e muamua ia te outou, … auina mai au e faamanuia ia te outou le liliu ese o outou taitoatasi mai i ana amioletonu; ma o le pogai ona o outou o fanau o le feagaiga.”¹²

O le feagaiga na osia e le Atua ma Aperaamo¹³ ma mulimuli ane toe faamautuina ma Isaako¹⁴ ma Iakopo¹⁵ e matuai sili ona taua. Na i ai ni isi o folafolaga, e aofia ai le:

• O Iesu le Keriso o le a soifua mai i le gafa o Aperaamo.

• O le a toatele le fanau a Aperaamo, e agavaa i se faatoateleina e faavavau ma agavaa foi e umia le perisitua.

• O le a avea Aperaamo ma tama o atunuu e tele.

• O le a mautofi lana fanau i ni laueleele faapitoa.

• O le a faamanuiaina malo uma o le lalolagi e ana fanau.¹⁶

• Ma o lena feagaiga o le a faavavau—e oo lava “i le afe o tupulaga.”¹⁷

O nisi o nei folafolaga ua faataunuuina; o isi o loo tatalia pea. Ou te sii maia mai se valoaga anamua i le Tusi a Mamona: “E le na o o tatou fanau sa tautala i ai lo tatou tama [Liae], ae o le aiga uma foi o Isaraelu, e faasino i le feagaiga lea o le a faataunuuina i aso e gata ai; o le feagaiga lea na faia e le Alii i lo tatou tama o Aperaamo.”¹⁸ Pe le o se mea ofoofogia ea lena? O le 600 tausaga a o le’i soifua mai Iesu i Peteleema, sa silafia ai e perofeta o le a iu lava ina faataunuuina le feagaiga Faa-Aperaamo i aso e gata ai.

Ina ia fesoasoani i le faataunuuina o lena folafolaga, na faaali mai ai le Alii i nei aso e gata ai e toe faafou lena feagaiga Faa-Aperaamo. Sa tautino atu e le Matai i le Perofeta o Iosefa Samita:

“Na maua e Aperaamo folafolaga e faatatau i ana fanau, ma e faatatau i le fua o ona sulugatiti—o lē o ona sulugatiti ua e sau ai, … la’u auauna o Iosefa. …

“O lenei folafolaga e o outou foi, aua o outou e tupuga mai ia Aperaamo.”¹⁹

Faatasi ai ma lenei faafouga, ua tatou maua ai, e pei foi o aso anamua, le perisitua paia ma le talalelei e faavavau. O loo ia i tatou le aia tatau e maua ai le atoatoaga o le talalelei, olioli i faamanuiaga o le perisitua, ma agavaa ai mo faamanuiaga silisili a le Atua—o le ola lea e faavavau.²⁰

O nisi o i tatou o suli moni o Aperaamo; o isi ua faapotopotoina mai i lona aiga e ala i le vaetamaina. E le faailogaina e le Alii se tagata.²¹ Tatou te maua faatasi nei faamanuiaga folafolaina—pe a tatou saili le Alii ma usitai i Ana poloaiga.²² Ae afai tatou te le usiusitai, e aveesea mai ia i tatou faamanuiaga o le feagaiga.²³ Ina ia fesoasoani ia i tatou, ua tuuina mai ai e Lana Ekalesia ia faamanuiaga faapeteriaka ina ia tuuina atu ai i tagata taitoatasi e mauaina se vaaiga mamao mo lona lumanai, faapea ai foi ma se sootaga ma aso ua tuanai, e oo lava foi i se folafolaga o lona tupuaga e tau atu i tua ia Aperaamo, Isaako, ma Iakopo.²⁴

Ua i ai i uso o le feagaiga le aia tatau e agavaa ai mo le tautoga ma le feagaiga o le perisitua.²⁵ Afai e te “faamaoni i le mauaina o ia perisitua e lua … ma le faalauteleina [o outou] valaauga, e faapaiaina [outou] e le Agaga i le faafouina o o [outou] tino.”²⁶ E le na o le pau lena. O alii o e taliaina ma le agavaa le perisitua, ua talia foi le Alii o Iesu Keriso, ma o i latou o e talia le Alii ua talia le Tama.²⁷ Ma o i latou o e talia le Tama, e maua mea uma ua i ai ia te Ia.²⁸ E tafe mai faamanuiaga silisili mai lenei tautoga ma le feagaiga i alii, tamaitai, ma fanau agavaa i le lalolagi atoa.

O lo tatou tiutetauave o le fesoasoani e faataunuu le feagaiga Faa-Aperaamo. O i tatou o le fanau na muai faauuina ma saunia e faamanuia ai tagata uma o le lalolagi.²⁹ O le pogai lena ua aofia ai le galuega faafaifeautalai i tiute o le perisitua. Ina ua mavae ni tausaga e 4,000 pe ā o le nofo faatalitali ma sauniuniga, o le taimi atofaina lenei e tatau ona avatu ai le talalelei i tagata uma o le lalolagi. O le taimi lenei o le faapotopotoina lea na folafolaina mo Isaraelu. Ma ua tatou maua le avanoa e auai ai! E le o se mea matagofie ea lena? O loo faamoemoe mai le Alii ia i tatou ma o tatou atalii—ma e matuai faafetai o Ia mo o tatou afafine—o e o auauna atu ma le agavaa o ni faifeautalai i lenei taimi maoae o le faapotopotoina o Isaraelu.

O le Tusi a Mamona o se faailoga vaaia na amata ai ona faapotopoto mai e le Alii Lana fanau o le feagaiga o Isaraelu.³⁰ O lenei tusi, na tusia mo o tatou aso, o loo taua ai o se tasi o ona faamoemoega o le ia “outou iloa lea ua amata ona faataunuuina le feagaiga lea na faia e le Tama faatasi ma le fanauga a Isaraelu. … Aua faauta, o le a manatua e le Alii lana feagaiga lea na ia faia i lona nuu o le aiga o Isaraelu.”³¹

Ioe, e le’i galo i le Alii! Ua Ia faamanuiaina i tatou ma isi i le lalolagi atoa i le Tusi a Mamona. O se tasi o ona faamoemoega e mo “le faatalitonuina o tagata Iutaia ma Nuu Ese o Iesu o le Keriso.”³² E fesoasoani tatou te osia ai feagaiga ma le Atua. E valaaulia ai i tatou ia manatua o Ia ma ia iloa Lona Alo Pele. O se tasi molimau ia Iesu Keriso.

Ua i ai i fanau o le feagaiga le aia tatau e maua ai Ana aoaoga faavae ma ia iloa ai le ata o le faaolataga. E fai mo i latou e ala i le osia o feagaiga paia ma taua. Fai mai Polika Iaga: “E ulufale atu tagata uma o le Au Paia o Aso e Gata Ai i le feagaiga fou faavavau pe a latou ulufale mai i lenei Ekalesia. … Latou te ulu atu i le feagaiga fou faavavau e lagolago le Malo o le Atua.”³³ Latou te tausia le feagaiga e ala i le usiusitai i Ana poloaiga.

I le papatisoga tatou te osifeagaiga ai e auauna atu i le Alii ma tausi Ana poloaiga.³⁴ A tatou fetagofi atu i le faamanatuga, tatou te faafou lena feagaiga ma tautino atu lo tatou naunautaiga e tauave i o tatou luga le suafa o Iesu Keriso. O lea la, ua vaetamaina ai i tatou o ni Ona atalii ma afafine ma ua ta’ua o uso ma tuafafine. O Ia o le tama o lo tatou olaga fou.³⁵ Mulimuli ane, i totonu o le malumalu paia, e mafai ona avea ai i tatou o ni suli faatasi i faamanuiaga o se aiga e faavavau, e pei ona folafola atu ia Aperaamo, Isaako, Iakopo ma a latou fanau.³⁶ O lea la, o le faaipoipoga faaselesitila o le feagaiga lea o le faaeaga.

Pe a tatou iloa o i tatou o fanau o le feagaiga, ua tatou iloa ai pe o ai i tatou ma mea ua faamoemoeina e le Atua mai ia i tatou.³⁷ Ua tusia Lana tulafono i o tatou loto.³⁸ O Ia o lo tatou Atua ma o i tatou o Lona nuu.³⁹ O fanau tuuto o le feagaiga e tumau mausali, e tusa lava po o totonugalemu o faigata. A tatou teufatuina loloto lena aoaoga faavae, e oo lava foi i le tui o le oti e faapea ona faamāmāina ma faamalosia ai lo tatou tumau faaleagaga.

O le faamālo sili e mafai ona ausia iinei i lenei olaga, o le ia ta’ua o se tagata tausi feagaiga. O taui mo se tagata tausi feagaiga o le a maua uma iinei ma le olaga a sau. Ua tautino mai i tusitusiga paia e faapea, “ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, … ma afai latou te tutumau i le faamaoni e oo i le iuga, e talia i latou i le lagi … [ma] mau faatasi ma le Atua i se tulaga o le fiafia e le gata.”⁴⁰

O loo soifua le Atua. O Iesu o le Keriso. Ua toefuatai mai Lana Ekalesia e faamanuia ai tagata uma. O Peresitene Thomas S. Monson o Lana perofeta i aso nei. Ma o i tatou, i le avea ai ma ni fanau faamaoni o le feagaiga, o le a faamanuiaina i le taimi nei ma le faavavau. Ou te molimau atu ai i le suafa o Iesu Keriso, amene.