Ia Lototele e Tu Na o Oe

Ou uso pele e, o se avanoa matagofie le faatasi ai ma outou i le po nei. O i tatou o e ua umia le perisitua a le Atua ua fausiaina se sootaga maoae ma le usoga.

Ua tatou faitau i le Mataupu Faavae ma Feagaiga, vaega 121, fuaiupu 36, “o aia a le perisitua ua fesootai e le mavavaeeseina ma mana o le lagi.” O se meaalofa ofoofogia ua tuuina mai ia i tatou—e umia ai le perisitua, lea “ua fesootai e le mavavaeeseina ma mana o le lagi.” Peitai, o lenei meaalofa taua, ua le gata ua aumaia ai faamanuiaga faapitoa ae faapena foi ni tiute paia. E tatau ona tatou faatautaia o tatou olaga ina ia tatou agavaa pea mo le perisitua ua tatou tauaveina. Ua tatou ola i se taimi ua siosiomia ai i tatou e le tele o mea ua faamoemoe e faatosina atu ai i tatou i ala ia e mafai ona tau atu ai i lo tatou faafanoga. Ina ia aloese mai i ia ala, e manaomia se naunautaiga ma se lototele.

Ou te manatua se taimi—ma o le a faapena foi i nisi o outou o iinei i le po nei—sa talitutusa ai lava ia tulaga faatonuina o le tele o tagata ma o tatou tulaga faatonuina. E le o toe moni lenei mea. Talu ai nei lava sa ou faitau ai i se tusiga i le New York Times e faatatau i se suesuega na faia i le taimi o le taumafanafana o le 2008. O se tagata suesue lauiloa o uiga faaletagata mai Notre Dame sa taitaia se au sailiili i le faatautaia o ni faatalanoaga auiliili ma le 230 talavou matutua i le salafa o Amerika. Ou te talitonu e mafai ona tatou manatu i ai ma le mautinoa o le taunuuga o le a talitutusa lava ma le tele o vaega o le lalolagi.

Ou te faasoa atu ia te outou se vaega o lenei tusiga taua tele:

“Sa fai atu e le au suesue ni fesili tatala e uiga i le sa’o ma le sese, faafitauli o le amio mama ma le uiga o le olaga. I tali uumi ma le le mautonu, … tou te vaaia ai tagata talavou sa matua faigata ona tautala mai ma le atamai e uiga i nei mataupu. Ae sa latou le mauaina lava se manatu faavae po o se vaogagana e faamatala ai.

“Ina ua fesiligia e faamatala mai se faafitauli o le amio mama o loo feagai ma i latou, o le lua vaetolu o nei talavou, a le o le leiloa o se tali i le fesili ia po o le faamatala mai o ni faafitauli e le o ni amio mama, e pei o lo latou le gafatiaina ona totogi o se fale mautotogi po o le le lava foi o ni tupe e totogi ai le mita o le paka o taavale.”

Faaauau pea le tusiga:

“O le talitonuga taatele lava, lea na toe foi mai i ai pea lava pea le toatele o i latou, o filifiliga o amioga mama ua na o se mataupu tau i le tagata lava ia.‘E patino lava,’ o le tali lautele lea a i latou. E pule lava le tagata ia. O ai a’u e fai atu ai?’

“O le teenaina o le usiusitai e le fesiligia i le pule, ua toatele aitalavou ua o ese atu ai i isi mea matautia, [ma faapea mai]: ‘O le a ou faia mea ou te manatu ou te fiafia ai pe o mea ou te lagonaina. E le o i ai se isi lava ala ou te iloa ai se mea e fai vagana ai mea ou te lagonaina i lo’u loto.’”

O i latou na faatautaia ia faatalanoaga sa faamamafa atu e faapea o le toatele o tagata talavou ia na latou talanoa i ai sa “le’i tuu atua i ai ni punaoa—e a’oga, faalapotopotoga [po o] aiga—e faafailele ai o latou tomai masani mo amio mama”¹

Uso e, e leai ma se tasi o lagona maia lo’u leo e tatau ona i ai soo se masalosalo e uiga i mea e mama ma mea e lē mama, e leai foi se tasi e tatau ona masalosalo e uiga i mea ua faamoemoeina mai ia i tatou o ē o umia le perisitua a le Atua. Ua aoaoina i tatou ma o le a faaauau pea ona aoaoina i tulafono a le Atua. E tusa lava po o a mea tou te vaaia pe faalogo i ai i soo se mea, e le masuia lava nei tulafono.

A o tatou ola ai mai lea aso i lea aso, e toetoe lava a muai iloaina o le a luitauina lo tatou faatuatua. Atonu o nisi taimi tatou te iloa ai le siosiomia o i tatou lava e isi ae o loo tutu pea o ni vaega toalaiti pe oo foi lava i le tutu na o i tatou e tusa ma mea ua taliaina ma mea e le taliaina. Pe i ai ea so tatou lototele a’ia’i e tutu mausali ai mo o tatou talitonuga, e tusa lava pe afai o le faia o lea mea e tatau ai ona tatou tutu na o i tatou? I le avea ai ma ē o umia le perisitua a le Atua, e taua lo tatou gafatia ona fetaiai—faatasi ma le lototele—ma soo se luitau e oo mai ia i tatou. Manatua upu a Tennyson: “O lo’u malosi e pei o le malosi o le sefulu, aua e mama lo’u loto.”²

O loo faatupulaia pea, o nisi o tagata lauiloa ma isi o ē—mo soo se mafuaaga lava—ua taulai atu i ai tagata lautele, ma o i ai se lagona e taufaifai i tapuaiga i tulaga lautele ma, o nisi taimi, ua patino i le Ekalesia. Afai e le o matuai lava le mauaa o a tatou molimau, o ia faitioga e mafai ona tupu ai lo tatou masalosalo i o tatou talitonuga pe faatuai ai foi lo tatou naunautaiga [e tausi poloaiga].

I le miti a Liae e uiga i le laau o le ola, o loo maua i le 1 Nifae 8, faatasi ma isi sa vaai i ai Liae, sa i ai i latou sa pipii atu i le ai uamea seia oo ina taunuu atu ma aai i le fua o le laau o le ola, lea ua tatou iloa o se faatusa o le alofa o le Atua. Ma o le mea e faanoanoa ai, ina ua uma ona latou aai i le fua, o nisi sa maasiasi ona o i latou sa i ai i le “fale tele ma le ateatea,” o le faatusa o le faamaualuluga o le fanau a tagata, o e sa tusitusilima atu ia i latou ma faatauemu ia i latou; ma latou pauu ese atu ai i ala faasaina ma sa leiloloa ai.³ O se meafaigaluega malosi tele lena a le fili o le taufaifai ma le faatauemu! Ou te toe fai atu, uso e, pe tatou te lototetele ea e tutu malosi ma le mausali i tulaga o ia mea faafeagai faigata?

Ou te talitonu o lo’u aafiaga muamua lava i le mauaina o le lototele i ou talitonuga na tupu a o ou tautua ai i le Neivi a le Iunaite Setete i le faaiuga o le Taua Lona Lua a le Lalolagi.

O aoaoga mo tagata fou i le Neivi sa le o se aafiaga faigofie mo au, pe mo soo se tasi foi sa onosaia. Aua mo vaiaso muamua lava e tolu sa ou lagonaina ua lamatia lo’u ola. E le o taumafai le Neivi e aoao au; o loo taumafai e fasioti au.

Ou te manatua pea le Aso Sa ina ua uma le vaiaso muamua. Sa matou maua ai se talafou fiafia mai le ofisa sinia. A o matou tutu sa’o ai ma faamalō i le malae o aoaoga i se savili mālū o Kalefonia, sa matou faalogo i lana faatonuga: “O le aso lenei e o uma ai tagata i le lotu—tagata uma lava, vagana ai a’u. O le a ou alu e malolo!” Ona ia alaga mai lea, “Outou uma o Katoliko, potopoto i le Camp Decatur—ma aua nei outou foi mai seia ta le itula e tolu. Savavali i luma!” Sa o ese atu se vaega tele o tagata. Ona toe alaga mai foi lea o le isi ana faatonuga, “O outou na o le au Iutaia, tou te potopoto i le Camp Henry—ma aua nei outou foi mai seia ta le itula e tolu. Savavali i luma!” Sa savavali ese atu sina vaega toalaiti o latou. Ona ia fai mai lea, “Outou uma na e totoe o Porotesano, tou te potopoto i le falefaafiafia o le Camp Farragut—ma aua nei toe foi mai seia ta le itula e tolu. Savavali i luma!”

Na faafuasei ona oo mai le manatu i lo’u mafaufau, “Monson, e le o oe o se Katoliko; e le o oe o se Iutaia; e le o oe o se Porotesano. O oe o se Mamona, ia tu ai pea iina!” Ou te faamautinoa atu ia te outou sa ou lagona atoa le tuua na o a’u. O le lototele ma le naunautai, ioe—ae sa tuuatoatasi.

Ona ou faalogo atu lea i upu e sili ona mālū faato’a ou faalogo ai lava ua fai mai e se ofisa sinia. Sa ia tilotilo mai ia te au ma fesili mai, “A o le a le igoa e faaigoa ai outou alii?” I lena taimi faatoa ou iloa ai e i ai isi tagata o loo tutu i o’u tua atu i le malae o aoaoga. Toeitiiti lava matou tali faatasi atu uma, “Mamona!” E faigata ona faamatalaina le olioli sa faatumulia ai lo’u loto ina ua ou faliu atu ma vaaia sina vaega toaitiiti o isi seila.

Sa valu le ulu o le ofisa sinia i se faailoga o le le mautonu ona fai mai lea, “Ia, o e sue se mea tou te potopoto ai. Ma aua nei foi mai seia ta le itula e tolu. Savavali i luma!”

A o matou savavali ese atu, sa ou mafaufau i upu o se solo na ou aoaoina i le Peraimeri i tausaga na muamua atu:

E ui lava sa ese se taunuuga o le aafiaga mai le mea sa ou faamoemoe i ai, ae sa ou loto lava e tu atu na o au, i le mea sa talafeagai ai.

Talu mai lena aso, na i ai taimi sa leai ai se tasi na tu i o’u tua atu ma o lea sa ou tu ai na o au. Ou te matua faafetai lava aua sa ou faia le faaiuga i se taimi ua leva ia tumau malosi ma le faamaoni, ia saunia i taimi uma ma sauni e puipui la’u tapuaiga, pe a manaomia.

I ni tulaga tatou te lagonaina ai i soo se taimi le le atoatoa mo ni galuega o i o tatou luma atu, uso e, sei ou faasoa atu ia te outou se faamatalaga sa faia i le 1987 e le Peresitene o le Ekalesia i lena taimi o Ezra Taft Benson a o ia lauga atu i se vaega toatele o tagata o le ekalesia i Kalefonia. Fai mai Peresitene Benson:

“I tupulaga uma, sa vaavaai mai ai le au perofeta i le gasologa mai o tausaga i o tatou aso. E faitau piliona e ua maliliu ma e o le a fananau mai o loo vaavaai mai ia i tatou.”Aua ne’i e sasi ai—o outou o se tupulaga filifilia. …

Mo le toetoe lava atoa le ono afe tausaga sa taofiofia ai outou e le Atua ma faapolopolo ina ia fananau mai i aso mulimuli a o le’i oo i le afio mai faalua o le Alii. O nisi tagata o le a pauu ese atu [ma le Ekalesia], ae o le a tumau pea le atoatoa o le malo o le Atua e faafeiloaia le toe foi mai o lona Taitai—o Iesu Keriso.

E ui o lenei tupulaga ua tali tutusa lava ma le amioleaga i vaitaimi o Noa, ina ua faamamaina e le Alii le lalolagi i le lolo, ae o loo i ai se eseesega tele lava i le taimi lenei. O lena eseesega, ua faasaoina ai e le Atua nisi o Ana fanau malolosi mo le taimi mulimuli, o e o le a fesoasoani e tauave ma le manumalo le malo.⁴

Ioe, uso e, ua avea i tatou ma nisi o Ana fanau malolosi. O lo tatou tiutetauave o le agavaa lea mo faamanuiaga mamalu uma ua faapolopolo e lo tatou Tama i le Lagi mo i tatou. Soo se mea tatou te o i ai, tatou te o ma lo tatou perisitua. O tatou tutu ea i nofoaga paia? Faamolemole, ae e te le’i tuua oe lava ia ma lou perisitua i se tulaga lamatia e ala i lou alu i nofoaga po o le auai i gaoioiga ia e le talafeagai mo oe ma lena perisitua, ia e tu ma toe mafaufau i taunuuga. O i tatou uma lava ua uma ona faaee i ai le Perisitua Arona. I le faagasologa, sa tatou maua uma ai le mana lea e umia ia ki o auaunaga a agelu. Sa saunoa mai Peresitene Gordon B. Hinckley:

“E le tatau ona outou faia se mea e atiae ai se pa i le va o outou ma le galuega a agelu mo outou.

“E le mafai ona outou faia ni amioga le mama i soo se itu. E le mafai ona outou lē faamaoni. E le mafai ona outou faaimamago pe talapepelo. E le mafai ona outou ta’u fua le suafa o le Atua pe tautatala i gagana eleelea ae maua pea le aiā tatau i auaunaga a agelu.”⁵

Afai o i ai se tasi o outou o loo i ai ni agasala i o outou olaga, ou te manao ia outou malamalama e aunoa ma se fesili po o se isi lava mea, o loo i ai se ala e toe foi atu ai. O le faagasologa ua ta’ua o le salamo. Sa foai mai e le Faaola Lona soifua ina ia tatou maua ai lena meaalofa faamanuiaina. E ui lava o le mea moni o le ala i le salamo e le faigofie, ae o folafolaga e moni. Ua uma ona ta’u mai ia i tatou, “E ui lava ina pei o ofu mumu a outou agasala, e sisina ia e pei o le kiona.”⁶ “Ma ou le toe manatua [na agasala].”⁷ E maeu lea faamatalaga. E maeu lea faamanuiaga. E maeu lea folafolaga.

Atonu o loo i ai nisi o outou o loo mafaufau ia te outou lava, “Ia, ou te le o tausia uma ia poloaiga ma ou te le o faia mea uma e tatau ai, ae o lea lava o loo sologa lelei pea lo’u olaga. Ou te manatu e mafai ona ou fiafia i le olaga e aunoa ma le tausia o poloaiga.” Uso e, ou te folafola atu o le a le aoga lea i le faavavau.

I nai masina talu ai sa ou maua ai se tusi mai se alii sa manatu e mafai ona ia ola e aunoa ma poloaiga. Ua salamo nei o ia ma toe faafoi lona olaga ia ogatasi ma mataupu faavae o le talalelei ma poloaiga. Ou te fia faasoa atu ia te outou se parakalafa mai lana tusi, aua o se faatusa lea o le moni o mafaufauga sese: “Sa tatau ona ou aoaoina mo au lava ia (i le ala faigata) e faapea sa matuai sa’o lava le Faaola ina ua Ia fetalai, ‘E leai se na te mafaia ona auauna i alii e toalua; aua e inoino o ia i le tasi, a e alofa atu i le tasi, a le o lea, e faapipii atu ia te ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.’⁸ Sa ou taumafai i le mea e gata ai, e fai mea uma e lua. I le iuga,” sa ia fai mai ai “sa ou maua ai le tuuaunoaina, pogisa, ma le tuuatoatasi lea e aumai e Satani ia i latou o e talitonu i ana togafiti, faatosinaga ma pepelo.”

Ina ia mafai ona tatou malolosi ma tetee atu i malosiaga uma o loo tosoina ai i tatou i le itu sese po o leo uma o loo uunaia i tatou e o i ala sese, e tatau ona i ai ni a tatou lava molimau. Pe ua e 12 pe 112—po o soo se mea lava i le va—e mafai ona e iloaina mo oe lava ia o le talalelei a Iesu Keriso e moni. Faitau i le Tusi a Mamona. Mafaufau loloto i ana aoaoga. Ole atu i le Tama Faalelagi pe moni. Ua tatou maua le folafolaga e faapea “afai tou [te] ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.”⁹

Pe a tatou iloa le moni o le Tusi a Mamona, ona tatou iloa foi lea o Iosefa Samita o se perofeta moni ma sa ia vaai i le Atua le Tama ma Lona Alo, o Iesu Keriso. Ona tatou iloa foi lea ua toefuataiina mai le talalelei i aso nei e gata ai e ala mai ia Iosefa Samita—e aofia ai le toefuataiga o le Perisitua Arona ma le Mekisateko.

O le taimi lava tatou te maua ai se molimau, o lo tatou tiute la o le faasoa atu o lena molimau i isi. O le toatele o outou uso sa auauna atu o ni faifeautalai i le lalolagi atoa. O le toatele o outou alii talavou o le a o atu e talai. Ia saunia outou lava ia i le taimi nei mo lena avanoa. Ia mautinoa ua outou agavaa e auauna atu.

Afai ua tatou saunia e faasoa atu le talalelei, ua tatou sauni foi e tali atu i le fautuaga a le Aposetolo o Peteru, o le na augani mai, “Ia saunia pea lava outou e tali atu … ia i latou uma o e fesili mai ia te outou i le uiga o le faamoemoe o loo ia te outou.”¹⁰

O le a tatou maua pea avanoa i o tatou olaga e faasoa atu ai o tatou talitonuga, e ui lava tatou te le iloa pea le taimi o le a valaauina ai tatou e faia lena mea. O sea avanoa faapea na oo mai ia teau i le 1957 a o ou faigaluega ai i se pisinisi lomitusi ma sa faatonuina au ou te alu i Dallas, Texas, o nisi taimi sa ta’ua ai “o le aai o lotu,” ou te lauga i se fonotaga faapisinisi. Ina ua maea le fonotaga, sa ou alu ai i se maimoaga e malaga i le pasi i nuu tau lalata ane i le aai. A o matou pasia le tele o lotu, e faapea mai le avepasi, “I le itu agavale tou te vaaia ai le lotu Metotisi,” po o le “I le itu taumatau o le falesa Katoliko.”

A o matou pasia se fale matagofie piliki mumu sa tu mai se maupuepue, sa valaau mai le avepasi, “O le fale le la e potopoto ai le Au Mamona.” Sa valaau mai se tamaitai i le pito i tua o le pasi, “Avepasi, e mafai ona e ta’u mai ia i matou se mea e uiga i le Au Mamona?”

Sa faatu e le avepasi le pasi i autafa o le ala, faliu mai i lona nofoa ma tali mai, “Tamaitai, na o le pau le mea ou te iloa e uiga i le Au Mamona e potopoto i le fale pikili mumu le la. Pe i ai se tasi i luga o lenei pasi e iloa se mea e uiga i Mamona?”

Sa ou faatali mo se tasi e tali mai. Sa ou sioa atu i foliga vaaia o tagata taitasi mo sina faailoga lava e iloa ai, sina manao e faamatala mai. E leai ma se mea. Sa ou iloa ai e pule lava la a’u pe fai e pei ona fautua mai le Aposetolo o Peteru, ina “ia saunia pea lava outou e tali atu … ia i latou uma o e fesili mai ia te outou i le uiga o le faamoemoe o loo ia te outou” Sa ou iloa ai foi le moni o le muagagana, “A oo mai le taimi mo faaiuga, ua le toe i ai se taimi e sauni ai.”

Mo le isi 15 minute pe ā, sa ou maua ai le avanoa e faasoa atu ai ia i latou i luga o le pasi la’u molimau e uiga i le Ekalesia ma o tatou talitonuga. Sa ou faafetai mo la’u molimau ma faafetai foi sa ou saunia e faasoa atu.

Faatasi ai ma lo’u loto atoa ma lo’u agaga atoa, ou te tatalo ai mo alii uma o loo umia le perisitua ina ia faamamaluina lena perisitua ma faamaoni i le faatuatua lea na tuuina atu i le taimi na faaee atu ai. Tau ina ia iloa e i tatou uma o umia le perisitua a le Atua, mea ua tatou talitonu i ai. Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi.

A o tatou mafaufau i meaalofa sili ua tuuina mai ia i tatou—“o aia a le perisitua ua fesootai e le mavavaeeseina ma mana o le lagi”—tau ina ia avea pea lo tatou naunautaiga e leoleo ma puipui le perisitua ma ia agavaa mo ana folafolaga sili. Tau ina ia tatou mulimuli i faatonuga a le Faaola mo i tatou, o loo maua i le 3 Nifae: “Ia tuu i luga lo outou malamalama ina ia susulu atu i le lalolagi. Faauta, o au o le malamalama lea e tatau ona outou tuu i luga—mea ia na outou vaai ua ou faia.”¹¹

Ia tatou mulimuli pea i lena malamalama ma tuu i luga mo le lalolagi uma ina ia vaai i ai, o la’u tatalo lea atoa ma a’u faamanuiaga i luga o outou uma o lagona mai lo’u leo, i le suafa o Iesu Keriso, amene.