Faia o le Mea Sa’o i le Taimi Sa’o, e aunoa ma le Faatuai

O le taimi nei, e toatele tagata o loo ola ma le faanoanoa ma le tele o le le mautonu. Latou te le o maua tali i a latou fesili ma ua le mafai ona taulima o latou manaoga. O nisi ua leai se lagona o le fiafia ma le olioli. Ua folafola mai e perofeta e faapea, o le fiafia moni e maua i le mulimuli i faataitaiga ma aoaoga a Keriso. O Ia o lo tatou Faaola, o Ia o lo tatou Faiaoga, ma o Ia o le Faataitaiga ua atoatoa.

O Lona soifuaga o se soifuaga o le auauna atu. A tatou auauna atu i o tatou tuaoi, ua tatou fesoasoani atu ia i latou o loo manaomia le fesoasoani. I le faagasologa, tatou te maua ai fofo o o tatou lava faafitauli. A o tatou faataitai i le Faaola, tatou te faaali atu lo tatou alolofa i lo tatou Tama Faalelagi ma Lona Alo o Iesu Keriso, ma avea atili ai i tatou e faapei o i Laua.

Sa saunoa le Tupu o Peniamina e uiga i le taua o le auauna atu, i le faapea mai pe a tatou “auauna atu i o [tatou] uso a tagata, ua na o lo [tatou] auauna atu lava lea i lo [tatou] Atua.” ¹ E tofu tagata uma ma avanoa e tuuina atu ai auaunaga ma faaali atu le alofa.

Ua talosagaina i tatou e Peresitene Thomas S. Monson ia tatou o atu “e laveai” ma auauna atu i isi. Na saunoa o ia: “O le a tatou iloa o i latou o loo tatou auauna atu i ai, o e ua lagonaina le pa’i atu o le aao o le Matai e ala i a tatou galuega, e le mafai ona latou faamatalaina le suiga lea e oo mai i o latou olaga. O loo i ai se manao e auauna atu ma le faamaoni, ia savavali ma le faamaualalo, ma ia ola atili e pei o le Faaola. O le mauaina o la latou vaaiga faaleagaga ma iloa atu folafolaga o le faavavau, ua latou tautatala ai foi i upu a le tagata tauaso lea na toe faapupulaina e Iesu, lea na fai mai, ‘O le mea e tasi ua ou iloa, sa ou tauaso, a o lenei ua ou vaai.’”²

O aso taitasi tatou te maua ai le avanoa e tuuina atu ai le fesoasoani ma le auaunaga—o le faia o le mea sa’o, i le taimi sa’o, e aunoa ma le faatuai. Mafaufau i le toatele o tagata o loo faigata ona maua se galuega pe o gasegase, o e o lagona le tuua toatasi, o e foi o mafaufau faapea ua aveesea a latou mea uma. O le a se mea e mafai ona e faia e fesoasoani atu ai? Vaai faalemafaufau e faapea, ua telefoni atu lou tuaoi ia te oe mo se fesoasoani ona ua faaletonu lana taavale ae o loo timuga. O le a le mea sa’o e tatau ona fai mo ia? O le a le taimi sa’o e tatau ona fai ai?

Ou te manatua se mea na tupu ina ua ō lo matou aiga i le taulaga o le Aai o Mekisiko e faatau mai ni lavalava mo le ma fanau e toalua. Sa laiti lava i laua. Faatoa atoa le lua tausaga o lo ma atalii matua, ae o le atalii laitiiti sa na o le tasi lona tausaga. Sa tumu le auala i tagata. A o fai le matou faatauga, sa ma uuina lima o le ma fanau, ona matou tutu lea mo se taimi e tilotilo atu i se mea, ma e aunoa ma le iloaina, ua leiloa lo ma atalii matua! Ma te lei iloa pe na faapefea, ae sa le’i i ai faatasi o ia ma i matou. E aunoa ma se toe faatali, sa ma taufetuli solo loa e sue o ia. Sa ma sue solo ma taufono o ia, sa lagona le ita tele, ma manatu a nei e leiloa atu o ia e faavavau. I o maua mafaufau, sa ma tau fai augani atu i le Tama Faalelagi e fesoasoani mai ia ma maua o ia.

Ina ua mavae sina taimi itiiti, sa ma mauaina o ia. A lale, sa matamata o ia ma le le malamalama i meataalo i le faamalama o se faleoloa. Sa ma tau fai opoina o ia ma feasogi atu i ai, ma sa ma faia le tautinoga ia ma filiga i le vaaiga o le ma fanau, ina ia le toe leiloa se tasi o i laua. Sa ma aoaoina, ina ia mafai ona ma oo atu e laveai lo ma atalii, sa le manaomia ona tau fuafuaina ni fonotaga. Sa na ona ma gaoioi loa, ma o atu e saili le tasi sa leiloa. Sa ma aoaoina foi, sa le’i iloa lava e lo ma atalii na leiloa o ia.

Uso e ma tuafafine, atonu e toatele i latou, ona o ni mafuaaga, ua leiloloa ai mai la tatou vaaiga, ma e le o iloa o loo leiloloa i latou. Afai tatou te faatuai, e ono leiloloa i latou e faavavau.

Mo le toatele o e o loo manaomia la tatou fesoasoani, e le tau manaomia ona faia ni polokalama fou pe fai ni taumafaiga faigata pe taugata. Pau le mea latou te manaomia o lo tatou naunau e auauna atu—e fai le mea sa’o i le taimi sa’o, e aunoa ma le faatuai.

Ina ua faaali atu leFaaola i tagata o le Tusi a Mamona, sa Ia tuuina mai ia i tatou se faataitaiga maoae e uiga i le le faatali e tuuina atu se toomaga ia i latou o e ua leai se lagona o le fiafia ma le olioli. O le aoaoina o tagata, sa Ia silasila atu sa le mafai ona malamalama i latou i Ana upu uma. Sa Ia valaaulia i latou e o i o latou aiga ma mafaufau loloto i mea sa Ia fai atu ai ia i latou. Sa Ia ta’u atu ia i latou e tatalo i le Tama ma saunia i latou lava e toe o mai [i le aso e sosoo ai], pe a toe foi atu o Ia e aoao i latou.³

A o Ia faaiuina [Ana] aoaoga, sa silasila atu o Ia i le motu o tagata ma vaaia ai ua fetagisi i latou, aua sa mananao e nofo atu o Ia e faatasi ma i latou.

“Ma sa ia fetalai mai ia te i latou: Faauta, ua tumu lo’u loto i le agaalofa ia te outou.

“E i ai ea ni isi o ia te outou ua mama’i? Ia aumai i latou iinei. E i ai ea ni isi o outou ua pipili, pe ua tauaso, pe ua setu, pe ua manua, pe ua lepela pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lo’u loto i le alofa mutimutivale.”⁴

Ma sa latou aumai o latou tagata mama’i ia te Ia, ma sa Ia faamaloloina i latou. Sa punonou le motu o tagata i lalo i Ona vae ma tapuai atu ia te Ia ma sogi i Ona vae, “ma sa oo ina latou faataeleina ona vae i o latou loimata.” Ona Ia poloaiina lea o i latou ia aumai a latou fanau iti, ma sa Ia faamanuia taitoatasi ia i latou.⁵ O le faataitaiga lena ua tuuina mai e le Faaola ia i tatou. O Lona alofa e mo tagata uma, ae sa lei misi lava se tasi i Lana vaai.

Ou te iloa o lo tatou Tama Faalelagi e alofa, malamalama, ma onosai. E faapena foi le alofa o Lona Alo o Iesu Keriso, ia i tatou. La te tuuina mai le fesoasoani ia i tatou e ala i a Laua perofeta. Ua ou iloaina o loo i ai le saogalemu tele i le mulimuli i perofeta. O loo alu pea “le laveai”. Fai mai Peresitene Monson: “O loo faatalitali mai le Alii i o tatou manatu. O loo faatali mai i a tatou faatinoga. O loo faatali mai i a tatou galuega. O loo faatali mai i a tatou molimau. O loo faatali mai i lo tatou tautino atu.”⁶

Ua ia i tatou se tiutetauave ma se avanoa maoae. E toatele o loo manaomia le toe maua o le tofo suamalie o le fiafia ma le olioli e ala i le toaaga i le Lotu. O lena fiafia e oo mai i le mauaina o sauniga, osiaina ma le tausiaina o feagaiga paia. E manaomia i tatou e le Alii e fesoasoani atu ia i latou. Ia tatou faia le mea sa’o, i le taimi sa’o, e aunoa ma le faatuai.

Ou te molimau atu o loo soifua le Atua ma [o Ia] o lo tatou Tama. O loo soifua Iesu Keriso ma na Ia ofoina mai Lona soifua ina ia mafai ai ona tatou toe foi atu i le afioaga o lo tatou Tama Faalelagi. Ua ou iloa o Ia o lo tatou Faaola. Ua ou iloa o lo Laua agalelei e le iu ma o loo faaauau pea ona faailoa mai. Ou te tautino atu o Peresitene Thomas S. Monson o la La’ua perofeta ma na o le pau lenei o le Ekalesia moni i luga o le fogaeleele. Ua ou iloa o le Perofeta o Iosefa Samita o le perofeta o le Toefuataiga. Ou te molimau atu o le Tusi a Mamona o le afioga a le Atua. E tuuina mai ai ia i tatou le taitaiga ma faataitaiga e mulimuli ai ina ia mafai ona avea atili i tatou e pei o le Atua ma Lona Alo Pele. Ou te tautino atu ai i le suafa o lo tatou Alii o Iesu Keriso, amene.