Mas Maayo nga Mohangad

Human sa makapoy nga adlaw sa hapit na matapos ang akong unang semana isip General Authority, ang akong briefcase napuno pag-ayo ug ang akong hunahuna nabalaka sa pangutana “Unsaon ko kaha sa pagbuhat niini?” Mibiya ako sa opisina sa Seventy ug misulod sa elevator sa Church Administration Building. Samtang nagpaubos ang elevator, nagduko ako ug nagtutok sa salog nga blangko ang hunahuna.

Miabli ang pultahan ug usa ka tawo misulod, apan wala ako mohangad. Sa pagsira sa pultahan, akong nabatian ang usa ka tawo nga nangutana, “Unsay imong gitan-aw diha sa ubos?” Nailhan ko kadto nga tingog—kang Presidente Thomas S. Monson.

Dali akong mihangad ug mitubag, “Ah, wala.” (Sigurado ako nga kadtong alisto nga tubag mihatag og pagsalig sa akong mga abilidad!)

Apan iyang nakita ang akong seryoso nga panagway ug ang akong bug-at nga briefcase. Siya mipahiyum ug mahigugmaong misugyot, samtang nagtudlo sa langit, “Mas maayo nga mohangad!” Samtang nagpaubos pa kami og usa pa ka andana, siya malipayong mipasabut nga siya paingon ngadto sa templo. Sa dihang nanamilit siya kanako, ang iyang pasiplatnga pagpanamilit misulti pag-usab sa akong kasingkasing, “Karon, hinumdumi, mas maayo nga mohangad.”

Sa among pagbulag, ang mga pulong sa kasulatan misulod sa akong hunahuna: “Tuo sa Dios, tuo nga siya mao … ;tuo nga siya aduna sa tanan nga kaalam, ug tanan nga gahum, sa langit ug sa yuta.”¹ Samtang ako naghunahuna sa gahum sa Langitnong Amahan ug ni Jesukristo, nakaplagan sa akong kasingkasing ang kahupayan nga akong gipangita sa kawang gikan sa salog nianang nagkaubos nga elevator.

Sukad niadto nakapamalandong ako niini nga kasinatian ug sa tahas sa mga propeta. Nabug-atan ako ug ako nagduko. Samtang ang propeta misulti, mitan-aw ako kaniya. Iyang giusab ang direksyon sa akong atensyon sa paghangad ngadto sa Dios, diin ako mamaayo ug malig-on pinaagi sa Pag-ula ni Kristo. Mao kana ang gibuhat sa mga propeta alang kanato. Sila naggiya kanato ngadto sa Dios.²

Mopamatuod ako nga si Presidente Monson dili lamang usa ka propeta, manalagna, ug tigpadayag; siya usab talagsaon nga ehemplo sa nagsunod sa baruganan sa paghangad. Sa tanang mga tawo, makapamati siya nga nabug-atan pag-ayo pinaagi sa iyang mga responsibilidad. Bisan pa niana, siya naggamit og dakong hugot nga pagtuo ug napuno uban sa pagsalig, kaalam, ug gugma alang sa tanan. Ang iyang kinaiya mao ang “makahimo” ug “mohimo.” Nagsalig siya sa Ginoo ug nagsalig Kaniya alang sa kalig-on, ug ang Ginoo nanalangin kaniya.

Ang kasinatian nagtudlo kanako nga kon kita, sama ni Presidente Monson, mogamit sa atong hugot nga pagtuo ug mohangad sa Dios alang sa panabang, kita dili mabug-atan sa mga palas-anon sa kinabuhi. Kita dili mobati nga dili makahimo sa unsay gitawag nga atong buhaton o kinahanglang buhaton. Kita malig-on, ug ang atong kinabuhi mapuno sa kalinaw ug hingpit nga kalipay.³ Kita makaamgo nga kasagaran sa atong gikabalak-an dili mahangturon ang hinungdan—ug kon kini mao, ang Ginoo motabang kanato. Apan kinahanglan nga kita adunay hugot nga pagtuo sa paghangad ug kaisug sa pagsunod sa Iyang direksyon.

Nganong kini usa ka hagit ang kanunay nga paghangad diha sa atong mga kinabuhi? Tingali kita kulang sa hugot nga pagtuo nga ang ingon ka yano nga buhat makasulbad sa atong mga problema. Sama pananglit, sa dihang ang mga anak sa Israel gipaak sa makahilo nga mga bitin, si Moises gisugo sa pagpataas og usa ka bitin nga tumbaga diha sa usa ka tukon. Ang bitin nga tumbaga nagrepresentar kang Kristo. Kinsa kadtong mihangad sa bitin, sama sa gitambag sa propeta, nangaayo.⁴Apan daghan ang wala mohangad, ug sila nangamatay.⁵

Si Alma miuyon nga ang rason nga ang mga Israelita wala mohangad ngadto sa bitin tungod kay sila wala motuo nga ang pagbuhat niini makaayo kanila. Ang mga pulong ni Alma atong magamit karon:

“O akong mga kaigsoonan, kon kamo mamaayo pinaagi lamang sa pagpunting sa inyong mga mata aron kamo mamaayo, dili ba kamo motan-aw diha-diha, o kamo magpatig-a lamang sa inyong mga kasingkasing diha sa walay pagtuo, ug magtinapulan … ?

“Kon mao, kaalaot sa inyong dangatan; apan kon dili mao, diha niana ipunting ang inyong mga mata ug sugdi ang pagtuo sa Anak sa Dios, nga siya moanhi sa pag-ula sa iyang dugo alang sa iyang mga katawhan, ug nga siya mag-antus ug mamatay aron sa pagtubos sa [atong] mga sala; ug nga siya mobangon pag-usab gikan sa mga patay.”⁶

Ang awhag ni Presidente Monson sa paghangad usa ka pasumbingay aron paghinumdom ni Kristo. Samtang kita naghinumdom Kaniya ug nagsalig sa Iyang gahum, kita makadawat og kalig-on pinaagi sa Iyang Pag-ula. Kini mao ang paagi diin kita mahupay sa atong mga kabalaka, palas-anon, ug pag-antus. Kini mao ang paagi diin kita mapasaylo ug mamaayo sa kasakit sa atong mga sala. Kini mao ang paagi diin kita makadawat sa hugot nga pagtuo ug kalig-on sa paglahutay sa tanang mga butang.⁷

Bag-ohay lang si Sister Cook ug ako mitambong og komperensya sa mga babaye sa South Africa. Human kami maminaw sa pipila ka makapadasig nga mensahe sa paggamit sa Pag-ula diha sa atong mga kinabuhi, ang presidente sa Relief Society sa stake midapit sa tanan sa pag-adto sa gawas. Kaming tanan gihatagan og helium balloon. Siya mipasabut nga ang among balloon nagrepresentar sa bisan unsa nga palas-anon, pagsulay, o kalisud nga nagpugong sa atong mga kinabuhi. Sa pag-ihap og tulo, among gibuhian ang among mga balloon, o ang among “mga palas-anon.” Samtang kami mihangad ug mitan-aw sa among mga palas-anon nga milupad, dihay madungog nga “Ahhhh.” Kadtong yano nga buhat sa pagbuhi sa among mga balloon naghatag og talagsaong pahinumdom sa dili mahulagway nga kalipay nga naggikan sa paghangad ug paghunahuna kabahin ni Kristo.

Dili sama sa pagbuhi sa helium balloon, ang espirituhanong paghangad dili usa lamang ka higayon nga kasinatian. Kita nagkat-on gikan sa pag-ampo sa sakrament nga kita sa kanunay mohinumdom Kaniya ug mohupot sa Iyang mga sugo, aron kita makabaton sa Iyang Espiritu uban kanato matag adlaw sa paggiya kanato.⁸

Sa dihang ang mga anak sa Israel naglatagaw sa kamingawan, ang Ginoo migiya sa ilang panaw matag adlaw samtang sila naghangad Kaniya alang sa direksyon. Diha sa Exodo atong mabasa, “Ug ang Dios milakaw nga nag-una kanila pinaagi sa usa ka haligi nga panganod, aron sa pagmando kanila sa dalan, ug sa kagabhion pinaagi sa usa ka panganod sa kalayo, sa pag-iwag kanila.”⁹ Ang Iyang paggiya makanunayon, ug akong ihatag kaninyo ang akong mapainubsanong pagsaksi nga ang Ginoo makahimo sa sama alang kanato.

Busa unsaon Niya sa paggiya kanato karon? Pinaagi sa mga propeta, apostoles, ug mga lider sa priesthood ug pinaagi sa mga pagbati nga moabut kanato human nato ibu-bu ang atong kasingkasing ug mga kalag ngadto sa Langitnong Amahan diha sa pag-ampo. Siya naggiya kanato samtang kita nagbiya sa mga butang sa kalibutan, naghinulsol, ug nag-usab. Siya naggiya kanato samtang kita nagsunod sa Iyang mga sugo ug maningkamot nga mas mahisama Kaniya. Ug Siya naggiya kanato pinaagi sa Espiritu Santo.¹⁰

Aron magiyahan sa panaw sa kinabuhi ug adunay makanunayon nga pakig-uban sa Espiritu Santo, kita kinahanglan nga dunay “mapatalinghugon nga igdulungog” ug “matinan-awong mata,” nga nakadirekta sa itaas.¹¹Kita kinahanglang mosunod sa giya nga atong nadawat. Kita kinahanglang mohangad ug mobuhat. Ug samtang kita nagbuhat, nasayud ako nga kita magmaya, kay ang Dios gusto nga kita malipay.

Kita mga anak sa Langitnong Amahan. Siya gusto nga mahimong kabahin sa atong mga kinabuhi, sa pagpanalangin kanato, ug sa pagtabang kanato. Siya moayo sa atong mga samad, mopauga sa atong mga luha, ug motabang kanato diha sa dalan sa pagbalik ngadto sa Iyang presensya. Samtang kita naghangad Kaniya, Siya mogiya kanato.

Ako mopamatuod nga ang atong mga sala mapasaylo ug ang atong palas-anon mogaan samtang kita mohangad kang Kristo. “Ato siya nga hinumduman, … ug dili iduko ang atong mga ulo,”¹³ kay,sama sa gisulti ni Presidente Monson, “Mas maayo nga mohangad.”

Ako mopamatuod nga si Jesus mao ang atong Manluluwas ug Manunubos sa pangalan ni Jesukristo, amen.