2010–2019
E Daumaka Sara Na Rai Cake
Okotova 2011


E Daumaka Sara Na Rai Cake

Kevaka o keda, me da vakataki Peresitedi Monson, noda cakacakataka na noda vakabauta ka rai vua na Kalou me vukei keda, eda na sega ni vakayalolailaitaki ena icolacola ni bula.

Ena kena mai cava e dua na siga oca dina ka mai cava kina na imatai ni noqu macawa me vaka e dua na Vakaitutu Raraba, sinai vutucoqa na noqu beqi ni vola ka curuoso tu ena noqu vakasama na taro “Au na rawata vakacava na ka oqo?” Au biubiu mai na valenivolavola ni Vitusagavulu ka vodoka yani na eleveita ni Vale ni Veiqaravi ni Lotu. Ena kena sa mua sobu tiko na eleveita, au cuva sobu ka rai lala tu yani ena kena buturara.

A tadola na katuba ka curu mai e dua, ia au a sega ni rai cake. Ni sa tasogo na katuba, au rogoca ni dua e taroga, “Na cava o raica sobu tiko oqori?” Au kila na domo o ya—sa ikoya o Peresitedi Thomas S. Monson.

Au rai cake vakatotolo kau sauma, “O, e sega.” (Au vakadeitaka ni vakauqeta na noqu nuitaki au na isau vuku ni taro o ya!)

Ia e sa raica vinaka tu mai na noqu nuiqawaqawa kei na beki bibi. A matadredre ka vakatura ena yalololoma, ena nona dusi tiko ilomalagi, “E daumaka cake na rai cake!” Ena neirau sirova sobu tiko e dua tale na itaba vale, a vakamacalataka ena mamarau ni sa gole tiko ki na valetabu. Ena nona vakamoce vei au, a vosa tale ki yaloqu na nona rai ni vakamoce, “Nanuma qo, e daumaka sara na rai cake.”

Ena neirau sa veitalatala, a lako mai noqu vakasama e dua na vosa ena ivolanikalou: “Mo ni vakabauta na Kalou; mo ni vakabauta ni sa … ; mo ni vakabauta ni sa nona kece na lewa kei na kaukauwa mai lomalagi kei vuravura.”1 Ena noqu vakasamataka na kaukauwa nei Tamada Vakalomalagi kei Jisu Karisito, a kunea na vakacegu na lomaqu ena noqu vakasaqaqara tawa yaga mai na buturara ni eleveita a siro sobu tiko o ya.

Me tekivu mai na gauna o ya au sa tugana tu na veika au sotava oqori vakakina na nodra itavi na parofita. Au a luvuci kau vakacuva ulu. Ena nona vosa na parofita, au a rai vua. A dusimaka tale o Koya na ka meu vakanamata kina meu rai cake vua na Kalou, na vanua e rawa meu vakabulai ka vaqaqacotaki kina mai na Veisorovaki nei Karisito. Sa ikoya oqori na veika era cakava na parofita me baleti keda. Era liutaki keda vua na Kalou.2

Au vakadinadinataka ni o Peresitedi Monson e sega wale ga ni parofita, daurairai, ka dau vakatakila; e sa dua na ivakaraitaki vakasakiti ni bulataki ni ivakavuvuli ni rai cake. Mai vei keda kece, e dodonu me tarabi sara vua na nona icolacola. Ia, e a ivakaraitaki ni vakabauta sa cecere sara ka vakasinaiti ena vakanuinui vinaka, vuku, kei na nona lomani ira tale eso. E dau nona ibole na “e rawa” kei na “sa rawa.” E vakabauta na Turaga ka vakararavi Vua ena veivakaukauwataki, ka sa dau vakalougatataki koya na Turaga.

Na veika au sotava e sa vakatavulica vei au ni kevaka o keda, me da vakataki Peresitedi Monson, noda cakacakataka na noda vakabauta ka rai vua na Kalou me vukei keda, eda na sega ni vakayalolailaitaki ena icolacola ni bula. Eda na sega ni yalolailai ena noda vakayacora na ka eda kacivi kina me da vakayacora se gadrevi vei keda me da vakayacora. Eda na vakaukauwataki, ka na vakasinaiti na noda bula ena vakacegu kei na reki.3 Ena qai yaco me da vakila ni vuqa na ka eda lomaleqataka tu e sega ni tawamudu na kedra yaga—ia kevaka me vaka kina, ena vukei keda na Kalou. Ia e dodonu me tu vei keda na vakabauta ni rai cake kei na yalodei ni muria na Nona veidusimaki.

Na cava e vakavuna e dua na bolebole ni dodonu me da dau rai cake tikoga ena noda bula? E rairai eda sega ni vakabauta ni rawa ni iwali ni noda leqa e dua na ka rawarawa wale tu ga. Me kena ivakaraitaki, ena gauna era a laukati kina na luvei Isireli mai na gata bati gaga, a vakaroti o Mosese me laveta cake e dua na gata varasa ena dua na kau. A matataki Karisito na gata varasa. O ira era raica cake na gata, me vaka a vakadreta na parofita, era a vakabulai.4 Ia o ira na lewe vuqa era sega ni rai cake, era sa vakarusai.5

A vakabauta o Alama ni vu ni nodra sega ni raica na gata o ira na Isireli sa ikoya ni ra sega ni vakabauta ni ra na vakabulai kevaka me ra a vakayacora. Na vosa nei Alama e yaga vei keda edaidai:

“Oi kemudou na wekaqu, kevaka sa rawa mo dou bula ni dou sa raica wale ga na ka sa vakaraitaki vei kemudou, dou na sega li ni rai kusarawa yani kina, ia kevaka dou sa yalokaukauwa tiko ga ka sega ni vakabauta, ka sega ni via raica na ka sa vakaraitaki vei kemudou … ?

“Raica ena ca vei kemudou kevaka dou sa vakakina; ia kevaka e sega, dou rai cake yani ka vakabauta na Luve ni Kalou, ni sa lako mai me vakabulai ira na nona tamata, ia ena mai kune ka rarawa ka mate tale ga me isoro ni [noda] ivalavala ca; ia ena tucake tale mai na mate.”6

Na veivakauqeti ni rai cake nei Peresitedi Monson e tautauvata kei na noda dodonu me da nanumi Karisito. Ena noda nanumi Koya ka vakararavi ena Nona kaukauwa, eda ciqoma kina na kaukauwa ni Nona Veisorovaki. Sa ikoya na ka e rawa me vakaceguya na noda nuiqawaqawa, noda icolacola, kei na noda vakaleqai. Sa ikoya na inaki e rawa kina me da vosoti ka vakabulai mai na mosi ni noda ivalavala ca. Sa ikoya na inaki e rawa me da ciqoma kina na vakabauta kei na kaukauwa me da vosota na veika kece sara.7

Ena dua na koniferedi ni marama wale tiko ga oqo mai na Ceva kei Aferika keirau a tiko kina kei Sisita Cook. Ni oti na neirau vakarogoca tiko eso na itukutuku veivakauqeti ena kena vakayagataki na Veisorovaki ena noda bula, a sureti keimami vakayadua na peresitedi ni iteki ni iSoqosoqo ni Veivukei me keimami lako ki tautuba. A soli vakayadua vei keimami e dua na baluni sega na rokana. A vakamacalataka ni vaka me neimami icolacola, veivakatovolei, se dredre cava ga e vakataotaka tu na neimami bula, na baluni. Ni na wili ga me tolu, me keimami laiva sara na neimami baluni, se na neimami “icolacola.” Ni keimami sa rai cake ka sarava na ciri yawa yani ni neimami icolacola, a rogoci rawa na “Ahhhh.” Na cakacaka rawarawa o ya na laivi yani ni baluni a solia e dua na vakanananu lesu vakasakiti ni reki e sega ni vakamacalataki rawa ka yaco mai ena rai cake kei na vakananumi Karisito.

E sega ni tautauvata kei na laivi ni baluni sega na rokana na rai cake vakayalo baleta ni sega ni yaco ga vakadua. Eda vulica mai na masu ni sakaramede me da dau nanumi Koya ka muria na Nona vunau, ka me tiko ga vei keda na Nona Yalotabu ena veisiga me dusimaki keda.8

Ena nodra sa lakosese tu na luvei Isireli ena loma ni veikau, a dusimaki ira na Turaga ena nodra ilakolako ena veisiga ena nodra vakararavi tiko ki na Nona veiliutaki. Ena Lako Yani eda wilika, “A sa liutaki ira tiko ko Jiova ena duru o ena siga, me tuberi ira ena sala; kei na duru buka waqa ena bogi me vakararamataki ira.”9 Nona veiliutaki e dua tu ga, ena yalomalua au vakadinadinataka vei kemuni ni Turaga e rawa me cakava na ka vata ga oqori me baleti keda.

Ia me na dusimaki keda vakacava nikua o Koya? Mai vei ira na parofita, apositolo, kei na iliuliu ni matabete kei na veika eda vakila ni na lako mai ena noda sovaraka na lomada kei na yaloda ena masumasu vua na Tamada Vakalomalagi. Ena tuberi keda o Koya ena noda biuta laivi na veika vakavuravura, veivutuni, ka veisau. Ena tuberi keda o Koya ena noda muria na Nona ivunau ka tovolea vakalevu cake me da vakataki Koya. Ka liutaki keda o Koya ena Yalo Tabu.10

Me rawa ni da dusimaki ena ilakolako ni bula ka ciqoma na veitokani tudei ni Yalo Tabu, e dodonu me tu vei keda na “daliga rogo” kei na “mata rai,” ka dusimaki ruarua ki cake.11 E dodonu me da cakacakataka na veiliutaki eda ciqoma. E dodonu me da rai cake ka vakayacora. Ena noda vakayacora, au kila ni da na marautaka, baleta ni Kalou e vinakata me da marau.

Eda luvena na Tamada Vakalomalagi. E vinakata me dua na tiki ni noda bula, me vakalougatataki keda, ka vukei keda. Ena vakamaca na noda mavoa, qusia na wai ni matada, ka vukei keda ena noda ilakolako lesu ki na Nona iserau. Ena tuberi keda o Koya, ni da rai Vua.

Noqu rarama meu rere tu li?

Ke siga se bogi tiko kei au. …

Vuni reki sere ga.

Siga se bogi, sa liu … sa liutaki au.12

Au wasea noqu ivakadinadina ni vosoti noda ivalavala ca ka vakamamadataki na noda icolacola ena noda rai vei Karisito.“Me da nanumi koya sara, … ka laveta cake na uluda,”13 baleta, me vaka a kaya o Peresitedi Monson, “e daumaka sara na rai cake.”

Au vakadinadinataka ni o Jisu e noda i Vakabula ka Dauveivueti ena yaca i Jisu Karisito, emeni.