2010–2019
E Sili Atu Lava le Tepa Ae i Luga
Oketopa 2011


E Sili Atu Lava le Tepa Ae i Luga

Afai tatou te faapei o Peresitene Monson, faaaoga lo tatou faatuatua ma tepa a’e i le Atua mo se fesoasoani, o le a le lofituina i tatou i avega o le olaga.

I le faaiuga o se aso na patino lava le vaivai e agai atu i le faaiuga o lo’u vaiaso muamua o se Pulega Aoao, sa matuai faatumulia la’u atopa’u ma faatumulia foi lo’u mafaufau i le fesili “E mafai faapefea ona ou faia lenei mea?” Sa ou i ai i le ofisa o le Au Fitugafulu ma ulufale atu i le lifi o le Maota o le Pulega o le Ekalesia. A o agai atu i lalo le lifi, sa punou lo’u ulu ma ou sioa ma le aganoa i le fola.

Sa matala le faitotoa ma ulufale mai se tagata, ae ou te le’i tepa ae i luga. Ina ua tapuni le faitotoa, sa ou faalogo ua fesili mai se tasi, “O le a le mea ua e pulato’a ai i lalo?” Na ou iloaina le siufofoga—o Peresitene Monson.

Sa vave ona ou tepa ae i luga ma tali atu, “Oi, e leai se mea.” (Ou te mautinoa o lena tali atamai na musuia ai le talitonuga i o’u tomai!)

Ae sa ia vaai mai i ou foliga toilalo ma la’u atopa’u mamafa. Sa ia ata ma fautua mai ma le agaalofa, a o tusi [lona aao] i le lagi, “E sili atu lava le tepa ae i luga!” A o ma malaga atu i lalo i le isi fogafale, sa ia faamatala mai ma le fiafia o ia lea e agai atu i le malumalu. Ina ua ia faatofa mai ma savali ese atu sa foliga mai i lana vaai e pei o ia toe faapea mai, “Ia, manatua, e sili atu lava le tepa ae i luga.”

A o ma faamavae, na oo mai i lo’u mafaufau ni upu o se mau: “Ia talitonu i le Atua; ia talitonu o loo soifua o ia … ; ia talitonu ua ia te ia le poto uma, ma le mana uma i le lagi ma le lalolagi.”1 A o ou mafaufau i le mana o le Tama Faalelagi ma Iesu Keriso, na maua elo’u loto le mafanafana sa ou sailia ma le faatauvaa mai le fola o lena lifi na alu ifo i lalo.

Talu mai lena taimi ua ou mafaufau loloto ai lava i lenei aafiaga ma le matafaioi a perofeta. Sa ou mafatia ma sa punou lo’u ulu. Sa ia toe faatonutonuina le mea ou te taulai i ai ia tape a’e i le Atua, lea e mafai ai ona faamaloloina ma faamalosia a’u e ala i le Togiola a Keriso. O le mea lena a perofeta e fai mo tatou. Latou te taitaia i tatou i le Atua.2

Ou te molimau atu e le gata ina avea Peresitene Monson o se perofeta, tagatavaai, ma talifaaaliga; ae o ia foi o se faataitaiga maoae o le ola ai i mataupu faavae o le tepa ae i luga. Mai tagata uma lava, e mafai ona ia lagonaina le mamafatu o ona tiutetauave. Ae, o loo ia faatinoina se faatuatua maoae ma ua faatumulia i le faamoemoe, poto, ma le alofa mo isi. O ona uiga faaalia o se tasi o le “e mafai ona fai” ma le “o le a fai.” Na te faatuatuaina le Alii ma faalagolago ia te Ia mo le malosi, ma o loo faamanuiaina o ia e le Alii.

O aafiaga ua aoaoina ai a’u afai tatou te faaaogaina lo tatou faatuatua ma vaai i le Atua mo se fesoasoani, e pei o Peresitene Monson, o le a le lofituina i tatou i avega o le olaga. O le a tatou le lagonaina le le mafai ona faia le mea ua valaauina i tatou e fai pe ua manaomia foi ona fai. O le a faamalosia i tatou, ma o le a faatumuina o tatou olaga i le filemu ma le olioli.3O le a oo ina tatou iloa o le tele o mea o loo tatou popole ai e le o ni mea e i ai se taua e faavavau—ma afai o i ai, o le a fesoasoani mai le Alii ia i tatou.Ae e tatau ona i ai ia i tatou le faatuatua e tepa ae ai i luga ma le lototele e mulimuli i Lana taitaiga.

Aisea e avea ai le tepa ae pea i luga ma se luitau i o tatou olaga?Atonu tatou te le o maua le faatuatua i lea faatinoga faigofie e mafai ai ona foia o tatou faafitauli.Mo se faataitaiga, ina ua ū e gata ūogo le fanauga a Isaraelu, na poloaiina ia Mose ina ia siitia i luga se gata apamemea i luga o se pou. O le gata apamemea sa suitulaga ia Keriso, o i latou sa tepa ae i luga i le gata, e pei ona poloaiina ai e le perofeta, sa faamaloloina.4 Ae e toatele isi na le mafai ona tepa ae i luga, ma na fano i latou.5.

Na ioe Alema o le mafuaaga na le tetepa ai Isaraelu i le gata ona latou te le’i talitonu o le faia o lea mea o le a faamaloloina ai i latou.E talafeauga foi upu a Alema ia i tatou i aso nei:

“E, ou uso e, afai e mafai ona faamaloloina outou i le nao le tepa atu o o outou mata ina ia mafai ona faamaloloina outou, pe tou te le fia tetepa vave atu ea, pe sili atu ia te outou le faamaaa o o outou loto i le le talitonu, ma … ?

“Afai o lea, o le a oo mai le malaia i o outou luga; ae afai e le o lea, ona tetepa ae lea o o outou mata ma amata ona talitonu i le Alo o le Atua, o le a afio mai o ia e togiola ona tagata, ma o le a mafatia ma maliu o ia e togiola mo a [tatou] agasala; ma o le a toetu mai o ia mai le oti.”6

O le uunaiga a Peresitene Monson ia tepa ae i luga o se faatusa lea mo le manatuaina o Keriso. A o tatou manatuaina o Ia ma faalagolago i Lona mana, tatou te mauaina le malosi e ala i Lana Togiola. O le auala lea tatou te mafai ai ona faamatuu ese atu o tatou popolega, a tatou avega, ma o tatou puapuaga.O le auala lea e mafai ona faamagaloina ai i tatou ma faamaloloina mai le tiga o a tatou agasala.O le auala lea e mafai ai ona tatou mauaina le faatuatua ma le malosi e onosaia ai mea uma.7

Talu ai nei lava, sa ma auai atu ai ma Sister Cook i se konafesi a tamaitai i Aferika i Saute. Ina ua maea ona matou faalogologo atu i nisi o savali musuia i le faaaogaina o le Togiola i o matou olaga, sa valaaulia tagata uma e le peresitene o le Aualofa o le Siteki e o atu i fafo. Sa tofu i matou ma se paluni ua feulaina i le kasa (helium).Sa ia faamalamalama mai o le a suitulaga a matou paluni i soo se avega lava, tofotofoga, po o mea faigata sa taofiofia ai o matou olaga. Sa faitau upu e tolu, sa faamamulu ese atu a matou paluni, po o a matou “avega.” A o matou tepa ae i luga ma vaavaai atu i a matou avega o lelea ese atu, sa lagona ni leo manino “Ahhhh.” O lena faatinoga faigofie o le faamamulu atu o a matou paluni na maua ai se faamanatuga ofoofogia o le olioli e le mafaamatalaina lea e oo mai i le tepa ae i luga ma mafaufau ia Keriso.

E le pei la o le faamamulu atu o se paluni, o le tepa ae i luga faaleagaga e le o se aafiaga mo na o se taimi se tasi. Ua tatou aoao mai le tatalo o le faamanatuga e ao ona tatou manatua pea o Ia ma tausi Ana poloaiga, ina ia tatou maua Lona Agaga e faatasi ma i tatou i aso uma e taialaina i tatou.8

A o feseseai le fanauga a Isaraelu i le togavao, na taialaina e le Alii la latou faigamalaga i aso taitasi a o latou tepa ae ia te Ia mo le taitaiga. I le Esoto tatou te faitau ai, “Ua afio Ieova i o latou luma i le ao faaniutu i le ao, e taitaiina ai i latou i le ala, a o le afi faaniutu i le po e faamalamalama a’i i latou.”9 Sa tumau Lana taitaiga, ma ou te tuuina atu la’u molimau faatauvaa e mafai foi e le Alii ona faia lea lava mea e tasi mo i tatou.

E faapefea la ona Ia taitaia i tatou i le asō? E ala i perofeta, aposetolo, ma taitai perisitua ma e ala i lagona ia e oo mai ia i tatou pe a maea ona tatou sasaa atu o tatou loto ma agaga i le Tama Faalelagi i le tatalo. Na te taitaia i tatou pe a tatou lafoaia mea a le lalolagi, salamo, ma sui. Na te taitaia i tatou pe a tatou tausia Ana poloaiga ma taumafai ia avea atili e faapei o Ia. Ma e Na te taitaia i tatou e ala i le Agaga Paia.10

Ina ia mafai ona taitaia i le malaga o le olaga ma maua le mafutaga faifai pea a le Agaga Paia, e tatau ona tatou maua se “taliga e faalogo” ma se “mata e vaai,” ma ia taulai uma atu mea ia e lua i lugā.11 E tatau ona tatou galulue e tusa ma le taitaiga tatou te maua. E tatau ona tatou tepa ae i luga ma siitia o tatou tulaga.Ma a o tatou faia na mea, ou te iloa o le a faafiafiaina i tatou, aua e finagalo le Atua ia tatou fiafia.

O i tatou o fanau a le Tama Faalelagi. E finagalo e avea o Ia ma se vaega o o tatou olaga, ina ia tatou manuia ai, ma fesoasoani ai ia i tatou. O le a Ia faamaloloina o tatou manua, solo o tatou loimata, ma fesoasoani ia i tatou i le gasologa o o tatou ala e toe foi atu ai i Lona afioaga. A o tatou tepa ae ia te Ia, o le a Ia taitai i tatou.

O Iesu lo’u sulu; pe fefe i se a?

O ao ma po uma e lata mai o Ia. …

[O Ia] lo’u fiafia ma viiga.

Na te taitai au i le ao atoa ma le po.12

Ou te molimau atu e faamagaloina a tatou agasala ma faamāmāina a tatou avega pe a tatou tepa ae ia Keriso. “Ia tatou manatua o ia, … ma aua le faatautau i lalo o tatou ulu,”13 e pei ona saunoa mai Peresitene Monson, “e sili atu lava le tepa ae i luga.”

Ou te molimau atu o Iesu o lo tatou Faaola ma le Togiola i le suafa o Iesu Keriso, amene.

  1. Mosaea 4:9.

  2. Tagai 2 Nifae 2:23, 26.

  3. Tagai i le Mosaea 24:15.

  4. Tagai i le Numera 21:8–9.

  5. Tagai 1 Nifae 17:41.

  6. Alema 33:21–22; tagai foi fuaiupu 19–20.

  7. TagaiAlema 36:3, 17–21; 3 Nifae 9:13.

  8. Tagai Mataupu Faavae ma Feagaiga 20:77.

  9. Esoto 13:21.

  10. Tagai 2 Nifae 9:52; 31:13; Mataupu Faavae ma Feagaiga 121:46.

  11. Faataoto 20:12.

  12. “O Iesu Lo’u Sulu,” Viiga, nu. 89.

  13. 2 Nifae 10:20.