O Ira Na Daukaulotu Era iYau Vakamareqeti ni Lotu

Kazuhiko Yamashita

Ena Vitusagavulu


Au vakavinavinakataka vakalevu na nodra kacivi mai vua na Turaga na daukaulotu, ka ra sauma lesu na veikacivi o ya, ka vaka kina na nodra sa veiqaravi tiko ena veiyasai vuravura kece sara.

Ena dua na bogi ena vica na yabaki sa oti, rau a mai veisiko ena neitou vuvale e dua na daukaulotu se qai kacivi vou o Elder Swan kei na nona itokani iliuliu mai Japani. E kalougata niu a tiko e vale, au mani sureti rau mai ki loma ni vale. Ena noqu kidavaki rau e mata ni katuba, a coba sara na mataqu ena kote a daramaka tiko o Elder Swan. Au sega mada ni vakasamataka, noqu sa tukuna yani vua, “Dua dina na kote totoka o daramaka tiko oqori!” Ia, a sega ni kote vou, ka sa via siyawa toka. Au vakasamataka sara de rairai e nona e dua vei ira na daukaulotu i liu ka biuta tu mai ena nodra vale na daukaulotu.

A sauma vakatotolo sara mai na noqu vosa o Elder Swan, ka sa veibasai taucoko sara ga ni veika au a vakasamataka tiko. A kaya cacavukavuka mai vaka Japani, “Io, e dua na kote vinaka ‘qo. Na kote ‘qo a daramaka tu o tamaqu ena sivia e 20 na yabaki sa oti ena nona a kaulotu tu e Japani.”

O tamana a kaulotu ena Japan Okayama Mission. Ka ni gauna e sa biubiu kina na luvena tagane me laki kaulotu i Japani, a solia kina vua na nona kote. Na iyaloyalo oqo e vakaraitaka na kote ni rua na itabatamata nei Elder Swan ka rau a daramaka mai Japani.

Sa tara dina na yaloqu na noqu rogoca na vosa nei Elder Swan. Kau sa kila ena gauna oqo na vuni nona daramaka tiko o Elder Swan na kote nei tamana ena nona kaulotu tiko. A tekivutaka o Elder Swan na nona kaulotu ena levu ni nona lomani Japani kei ira na lewena ka dua na ivakarau ka tomana tu mai vei tamana.

Au vakadeitaka ni so vei kemuni ko ni sa sotava eso na ka e tautauvata kei na veika oqo. E so na daukaulotu era veiqaravi mai Japani era tukuna vei au ni o tamadra, o tinadra, o ira na tukadra se tamadra lailai era a kaulotu tale ga mai Japani.

Au gadreva meu vakaraitaka na noqu loloma dina, veidokai, kei na vakilai ni vakavinavinaka me baleti ira kece na daukaulotu oti ka ra a veiqaravi e vuravura raraba. Au vakadeitaka ni o ira o ni vukei ira me ra saumaki mai era na sega ni guilecavi kemuni. “Na kena lagilagi ena ulunivanua na yava ikoya sa kauta mai na irogorogo vinaka … !”1

O au e dua vei ira na saumaki mai oqori. Au a saumaki mai ena noqu yabaki 17, ena noqu a gonevuli tiko ena vuli torocake. Na daukaulotu ka papitaisotaki au o Elder Rupp mai Idaho. E se qai vakacegui wale ga oqo vaka peresitedi ni iteki e Idaho. Au se sega tale ni raici koya mai na gauna au a papitaiso vou kina, ia keirau dau veivolavolai tiko ena imeli ka keirau veivosaki tiko ena talevoni. E sega vakadua ni rawa meu guilecavi koya. Nona dauloloma, matadredredre e sa toqai tu ena noqu vakanananu. E marautaka vakalevu nona kila niu sa toso vinaka tiko.

Niu se yabaki 17, au sega ni kila vinaka sara na itukutuku e rau a vakatavulica tiko vei au na daukaulotu. Ia, a duatani sara na veika au vakila me baleti rau na daukaulotu, kau a vinakata meu vakataki rau. Kau vakila na kena titobu ka tudei tu ga na nodrau loloma.

Meu tukuna mada vei kemuni na siga au a papitaiso kina. Sa ikoya na ika 15 ni Julai, ka sa dua dina na siga katakata. A papitaiso tale ga vata kei au e dua na marama, ena siga o ya. Era a tara ga e ligadra na tobu ni papitaiso na daukaulotu, ka sega soti ni maqosa na kena irairai.

Ni oti ga neirau papitaiso, keirau a sa vakadeitaki tale ga. A vakadeitaki e liu na sisita oqo mai vei Elder Lloyd. Au a dabe vata toka kei ira na lewenilotu tale eso, au bobo, kau vakarogoca lo toka yani na nona vakadeitaki koya. A vakadeitaki koya o Elder Lloyd, oti sa qai tekivu me cavuta vua e dua na veivakalougatataki. Ia, a mai galu mada yani o Elder Lloyd, kau mani dolava na mataqu ka raici koya yani ena vakatataro.

Nikua mada ga au se nanuma vakamatata tu ga na veika au a raica o ya. E drodro na wai ni matai Elder Lloyd ena tagi. Ka sa ikoya na imatai ni gauna ena noqu bula, meu vakila na veiovici ni Yalo Tabu. O koya gona mai na Yalo Tabu vaka ikoya, au rawata dina mai kina na veivakadeitaki ni rau lomani keimami o Elder Lloyd ka lomani keimami na Kalou.

Ni oti o ya sa noqu na madigi meu vakadeitaki. A vakayacora talega o Elder Lloyd. A tabaka na uluqu ka vakadeitaki au meu lewe ni Lotu, vakatikora na isolisoli ni Yalo Tabu, ka sa qai tekivu cavuta e dua na veivakalougatataki. A baci galu tale. Ia, au a kila na cava e sa yaco tiko. Au kila vakaidina mai na Yalo Tabu ni ra lomani au na daukaulotu ka lomani au na Kalou.

Ena gauna oqo au na vinakata meu cavuta e vica na vosa vei kemuni na daukaulotu o ni veiqaravi tiko e vuravura raraba ena gauna oqo. Na nomuni ivakarau kei na loloma o ni vakaraitaka tiko kivei ira tale eso, era sa itukutuku kilai tani duadua sara. E dina ga ni a sega ni totolo sara na noqu kila na ivunau taucoko e rau a vakatavulica vei au na daukaulotu, au vakila na nodrau loloma uasivi, ka vakatavulica vei au na veilesoni bibi na nodrau vei cakacaka ni yalovinaka. Na nomuni itukutuku sa ikoya e dua na itukutuku ni loloma, e dua na itukutuku ni vakanuinui, kei na dua na itukutuku ni vakabauta. E sureta na Yalo Tabu na nomuni ivakarau kei na ka o ni cakava, ka sa rawa kina vei keda mai vua na Yalotabu, me da kila na veika bibi. Na ka au vinakata meu vakamacalataka vei kemuni sa ikoya mai na nomuni loloma, o ni sa wasea tiko mai kina na loloma ni Kalou. O ni sa dua na iyau vakamareqeti ni Lotu oqo. Au via vakavinavinaka vakalevu vei kemuni kece sara ena nomuni solibula kei na nomuni gugumatua.

Au na via vosa tale ga kivei kemuni na daukaulotu ena gauna sa bera mai. Ena noqu matavuvale, eratou lewe va na luvei keirau eratou sa kaulotu oti, ka sa na gole tiko yani na neirau ikalima ni daukaulotu ki na Provo Missionary Training Centre ena mua ni vula oqo. Ena yabaki mai oqo e sa nakita tale tiko ga na luvei keirau gone duadua me lako ki kaulotu ni oti na nona qeretueti mai na vuli torocake.

Kau vosa vakakina vei iratou na luvequ tagane kei kemuni kece sara o ni vakavakarau tiko mo ni kaulotu. E sa ka yaga mo ni kauta vata kei kemuni ena nomuni kaulotu e tolu na ka:

  1. 1.

    E dua na gagadre mo ni vunautaka na kosipeli. E vinakata na Turaga mo ni tarogi ira na Nona sipi, ka vakasaqarai ira.2 Na tamata kece e vuravura taucoko era sa waraki kemuni tu. Ni yalo vinaka ka lako yani vakatotolo ki na vanua era sa tu kina. E sega ni dua e vakataki ira na daukaulotu ena nodra sasaga vakaukauwa me ra vakabulai ira tale eso. Oi au e dua vei ira oqori ka rau vakabulai au mai na daukaulotu.

  2. 2.

    Vakatorocaketaka na nomu ivakadinadina. Na Turaga e vinakata na “yalo sa malumalumu ka talairawarawa.”3

  3. 3.

    Mo lomani ira na tamata me vakataki Elder Swan, ena nona a kauta vata tiko kei koya na kote nei tamana kei na loloma nei tamana me baleti Japani kei ira na kena tamata ena nona laki kaulotu.

O i kemuni o ni sega ni kila mo ni vakavakarau vakacava ena veiqaravi ni kaulotu, ni yalo vinaka ka laki raici nomuni bisopi. Au kila ni na vukei kemuni o koya.

Au vakavinavinakataka vakalevu na nodra kacivi mai vua na Turaga na daukaulotu, ka ra sauma lesu na veikacivi o ya, ka vaka kina na nodra sa veiqaravi tiko ena veiyasai vuravura kece sara. Au sa vakavinavinakataka dina vakalevu na nomuni sasaga kece sara. O ni sa dua na iyau vakamareqeti ni Lotu oqo. Ka mo ni tomana tikoga na nomuni kaulotu ka dau vakataki ira na tisaipeli i Karisito.

Au vakadinadinataka ni o keda eda luvei Tamada mai Lomalagi, e lomani keda o Koya, ka ni a tala mai o Koya na Luvena Lomani, o Jisu Karisito, me rawa me da lesu tale yani ki na Nona iserau. Au cavuta na veika oqo ena yaca tabu i Jisu Karisito, emeni.