E pee te măta‘u i te aroha ti‘a mau ra

E te Peresideni Monson, te oaoa nei matou no te mau parau apî faahiahia no te tahi atu mau hiero apî. E mea faahiahia mau ra no e rave rahi, e rave rahi o to’u mau fetii fatata i roto i te tuhaa no Wyoming

Te rave nei te Ekalesia i te hoê ohipa i roto i te ao taato‘a ia hamani-ana‘e-hia te hoê hiero apî, e peu tumu hoi no te Mau Hau Amui no Marite e Canada—te faatupu nei tatou te hoê opani iriti. I te mau hepetoma na mua noa‘e i te haamo‘araa i te hiero apî, e iritihia te mau opani e e titau-manihini-hia te mau faatere o te fenua e o te mau faaroo, te mau melo o te Ekalesia e noho râ i reira, e te mau taata o te tahi atu mau faaroo ia haere e maita‘ita‘i i te hiero hamani-apî-hia.

Teie te tahi mau oro‘a faahiahia roa no te tauturu i te feia aita i matau i ta tatou Ekalesia ia ite i te tahi maa mea iti no ni‘a i te Ekalesia. Fatata pauroa te taata e haere e mata‘ita‘i i te hoê hiero apî e maere i te nehenehe o te rotoraa e te rapae auraa. E faahiahia ratou i te ohipa rave-rima-hia e te maitai o te mau tufaa o te hoho‘a tata‘itahi o te hiero. Hau atu â, e rave rahi o te mau taata mata‘ita‘i e ite i te hoê mea taa ê roa a arata‘ihia‘i ratou na roto i te hiero tei ore â i haamo‘ahia. Teie te mau pahonoraa matauhia a te feia mata‘ita‘i i ta tatou mau opani iriti, e ere noa râ te reira te pahonoraa. Te mea ta ratou e faahiahia roa‘e o te mau melo ïa o te Ekalesia ta ratou e farerei i ta tatou mau opani iriti. E vai noa teie faahiahiaraa i roto ia ratou no to ratou mau taata farii, te mau feia mo‘a o te mau mahana hopea nei.

Te tau‘a-rahi-hia nei te Ekalesia i teie nei i te ao taato‘a nei. I te mau mahana ato‘a te papa‘i e te parauparau nei te mau ve‘a no ni‘a i te Ekalesia, e ta’na mau ohiparaa e rave rahi. E rave rahi te mau pû parau apî tuiroo i te Mau Hau Amui no Marite e aparau pinepine nei no ni‘a i te Ekalesia aore râ i to’na mau melo. Te tupu ato‘a nei teie tau‘araa parau ati a‘e te ao nei.

Te ite-ato‘a-hia nei te Ekalesia i roto i te Itenati tei taui rahi, mai ta outou i ite, i te huru e faaiteite ai te taata i te parau apî. I te mau mahana ato‘a ati a‘e te ao nei, te aparauhia nei te Ekalesia e ta’na mau haapiiraa na roto i te Itenati, i roto i te mau buka aamu e te mau faanahoraa farereiraa e te mau taata aore roa i papa‘i a‘e nei no te hoê ve‘a. Te hamani nei ratou i te mau hoho‘a e te opere nei na roto i te reni Itenati. E mau taata matau-noa-hia teie—e mau melo no ta tatou Ekalesia e no te tahi atu Haapa‘oraa—raua o te paraparau nei no ni‘a i te Ekalesia a Iesu Mesia i te Feia Mo‘a i te Mau Mahana Hopea Nei.

Te mau tauiraa i roto i te rave‘a faaiteiteraa o te tumu ïa i tau‘a-rahi-hia‘i tatou « Te mau Momoni » i teie nei. Te tere e te tupu ato‘a nei râ te Ekalesia i te rahi. Te rahi nei te mau taata e to ratou mau hoa e to ratou mau taata tapiri mai, e melo ïa no te Ekalesia, e te vai ra te mau melo no te Ekalesia e ti‘araa teitei to ratou i roto i te faatereraa o te fenua, te mau taiete ohipa, i roto i te ohipa faaoaoaraa, te haapiiraa, e e au ra e i te mau vahi ato‘a. Ua ite ato‘a te feia melo ore no te Ekalesia i te reira, e te maere nei ratou i te mea e tupu nei. E mea faahiahia i te mea e e rave rahi o te ite nei, i teie nei, i te Ekalesia e te Feia Mo‘a i te Mau Mahana Hopea Nei.

A ite-rahi-hia‘i te Ekalesia, te vai nei â te taata e rave rahi o te ore e maramarama nei i te reira. Ua haapiihia te tahi ia hi‘o huru ê atu i te Ekalesia e te ti‘aturi nei ratou i te mau mana‘o hape no ni‘a i te Ekalesia ma te ore e imi no hea mai e e parau mau anei teie mau mana‘o hape. Te vai ato‘a nei e rave rahi parau hape e te arepurepu no ni‘a i te Ekalesia e te mea ta’na e ti‘a nei. E parau mau te reira mai te tau mai â o te peropheta Iosepha Semita.

Ua papa‘i o Iosepha Semita i te hoê tufaa o to’na aamu « no te faaore i te mau mea hape i roto i te mana‘o o te taata nei, e no te horoa’tu i te mau taata o te imi nei i te parau mau, te mau mea tei tupu » (Iosepha Smita—Aamu 1:1). E parau mau e te vai noa ra te feia o te taui i te parau mau e e o te faahuru ê i te mau haapiiraa a te Ekalesia. Te rahiraa râ o ratou o te uiui nei no ni‘a i te Ekalesia ua hinaaro ïa ratou ia maramarama. Te hinaaro nei teie mau taata mana‘o maitai ia ite mau no ni‘a ia tatou.

Te horo‘a nei teie iteraa rahi e te roo o te Ekalesia i te hoê rave‘a faahiahia ia tatou ta’na mau melo. E nehenehe ta tatou e tauturu« no te faaore i te mau mea hape i roto i te mana‘o o te taata nei », e ia faatitiaifaro i te hape no ni‘a ia tatou. Noa’tu ra te reira, te mea faufaa roa‘e, e nehenehe ia ta tatou e faaite e ô vai râ tatou.

Te vai ra e rave rahi mau mea ta tatou e nehenehe e rave—ta outou e rave—no te faarahi i te maramarama no ni‘a i te Ekalesia. Mai te mea e rave tatou mai te au i taua huru râ e ia faariro tatou ia tatou iho mai te au i te taime a faatupu ai tatou i te hoê opani iriti, e rahi a‘e â ïa te maramarama o to tatou mau hoa e mau taata tapiri mai no ni‘a ia tatou. E ore ïa to ratou mau mana‘o huru ê, e mo‘e ê atu ïa te mau mana‘o hape e e haamata ïa ratou i te maramarama no ni‘a i te Ekalesia e to’na ti‘araa mau.

E horo‘a atu vau i te tahi mau mana‘o i te mea ta tatou e nehenehe e rave.

A tahi, e ti‘a ia tatou ia faaite hua no ni‘a ia Iesu Mesia. E hinaaro tatou ia ite te taata e te ti‘aturi nei tatou e o Oia te taata faufaa roa‘e i roto i te aamu o te ao nei. To’na oraraa e Ta’na mau haapiiraa o te parau tumu ïa a te Bibilia e a te tahi atu mau buka papa‘iraa mo‘a. E faaineine te Faufaa Tahito ia tatou no te misioni a te Mesia i ni‘a i te fenua nei. E faaite te Faufaa Apî i Ta’na misioni. E horo‘a mai te Buka a Moromona i te pitiraa o te ite no Ta’na misioni. Ua haere mai Oia i te fenua nei no te faaite i Ta’na Evanelia tei riro ei niu no te taata ato‘a ia nehenehe i te taato‘araa o te mau tamarii a te Atua ia ite e ia pee i Ta’na mau haapiiraa. Ua horo‘a Oia i To’na ora ia riro ei Faaora e ei Taraehara no tatou. Na roto ana‘e ia Iesu Mesia e noaa ai ia tatou te Faaoraraa. Teie te tumu e ti‘aturi ai tatou e o Oia te taata faufaa roa‘e i roto i te aamu o te ao nei. Tei roto noa to tatou ora mure ore i To’na na rima. E ohipa faahiahia mau ia ti‘aturi Ia’na e ia farii e o Oia to tatou Faaora, to tatou Mesia, e to tatou Fatu.

Te ti‘aturi ato‘a nei tatou e na roto ana‘e i te Mesia e noaa ai te mauruururaa, te ti‘aturiraa, e te oaoa rahi roa‘e— i roto i teie oraraa e i te oraraa mure ore. Te faaite nei ta tatou haapiiraa tumu, mai tei haapiihia i roto i te Buka a Moromona e : « E teie nei, ia haere tia’tu outou i mua i te tia-maite-raa i te Mesia, ma te tiai papu roa, e te here i te Atua e te taata atoa. E tena na, ia haere tia outou i mua ma te oaoa i te ite i te parau a te Mesia, ma te tapea hoi e tae noa’tu i te hopea ra, inaha, te na ô maira te Metua, E ora mure ore to outou i reira ra » (2 Nephi 31:20).

E faaite hua tatou i to tatou ti‘aturiraa ia Iesu Mesia e e farii nei tatou Ia’na ei Faaora no tatou. E haamaitai e e arata‘i Oia ia tatou i roto i ta tatou mau tautooraa ato‘a. A rohi ai tatou i ô nei i roto i te oraraa tahuti nei, e haapuai e e horo‘a ïa Oia ia tatou i te hau i te mau taime tamataraa. Te ora nei te mau melo o te Ekalesia a Iesu Mesia i te Feia Mo‘a i te Mau Mahana Hopea Nei ma te faaroo Ia’na e Na’na hoi teie Ekalesia.

Te piti, ia riro ei hi‘oraa parau-ti‘a no vetahi ê. I muri a‘e i ta tatou faaite huaraa i to tatou mau ti‘aturiraa, e ti‘a ia tatou ia pee i te a‘o tei horo‘ahia mai i roto i te 1 Timoteo 4:12 : « Ei haapaoraa râ oe na tei faaroo ra, i te parau, i te haerea, i te aroha, i te huru o te aau, i te faaroo, i te viivii ore ».

Ua haapii te Faaora i te faufaa ia riro ei hi‘oraa no to tatou faaroo ma te parau e, « Oia ato‘a to outou maramarama, ia anaana ïa i mua i te aro o te taata nei, ia hi‘o ratou i ta outou parau maitai, e ia haamaitai i to outou Metua i te ao ra » (Mataio 5:16).

Ia riro to tatou mau oraraa ei hi‘oraa no te maitai e te viretu e ti‘a’i, a tamata ai tatou i te pee i To’na hi‘oraa maitai i to te ao nei. E nehenehe ta tatou mau ohipa maitai e haamaitai a‘e â i te roo o te Faaora e o Ta’na Ekalesia. A rave ai outou i te ohipa maitai, a riro ai outou ei mau tane e e mau vahine parau-ti‘a e te roo maitai, e itehia ïa te maramarama o te Mesia i roto i to outou mau oraraa.

I muri mai, a parau no ni‘a i te Ekalesia. I roto i to tatou mau oraraa i te mau mahana ato‘a, ua haamaitaihia tatou e te mau rave‘a e rave rahi no te faaite ia vetahi ê te mea ta tatou e ti‘aturi nei. Ia uiui ana‘e mai to tatou mau hoa ohipa no ni‘a i to tatou mau ti‘aturiraa faaroo, te titau nei ïa ratou ia tatou ia faaite e o vai râ tatou e eaha ta tatou e ti‘aturi nei. E anaanatae paha ratou aore râ aita no ni‘a i te Ekalesia, tera râ e anaanatae ratou i te ite hohonu ia tatou.

Te parau atu nei ia outou ia farii i ta ratou mau titauraa. Aita to outou mau hoa ohipa e titau nei ia outou ia haapii, ia a‘o, ia tatara i te parau, aore râ ia faaa‘o. A vaiiho ia ratou ia aparau e o outou—a faaite i te tahi mea no ni‘a i to outou mau ti‘aturiraa, a ui ato‘a râ i to ratou mau ti‘aturiraa. A fâfâ i te faito o to ratou anaanatae na roto i ta ratou mau uiraa. Mai te mea e mea rahi ta ratou mau uiraa, a faatumu te aparauraa i ni‘a i te pahonoraa i ta ratou mau uiraa. A haamana‘o noa e mea maitai a‘e e na ratou e ui eiaha ra na outou e faaite atu.

E au ra e hinaaro te tahi mau melo ia vai mo‘emo‘e noa to ratou ti‘araa melo i roto i te Ekalesia. Te vai ra ïa te tumu. Ei hi‘oraa, e mana‘o paha ratou e ere te vahi tano no te faaite i to ratou mau ti‘aturiraa. Peneia‘e paha e măta‘u ratou i te hape e aore râ, e uihia ia ratou te hoê uiraa aita ta ratou e nehenehe e pahono. Mai te mea te vai ra tera huru mana‘o i roto ia outou, te vai nei te tahi mau mana‘o ta’u e horoa’tu. A haamana‘o noa i te mau parau a Ioane : « Aore o te aroha ra e măta‘u ; e pee te măta‘u i te aroha tia mau ra » (1 Ioane 4:18). Mai te mea ua here tatou i te Atua e i to tatou mau taata tupu, ua fafauhia ia tatou e upooti‘a tatou i ni‘a i to tatou mau mana‘o măta‘u.

Mai te mea ua haere iho nei outou i ni‘a i te Mormon.org, te tahua Itenati a te Ekalesia no te feia e anaanatae nei i te ite no ni‘a i te Ekalesia, ua ite ïa outou i te mau melo tei faaite i te haamaramaramaraa no ni‘a ia ratou iho. Ua hamani ratou i te mau faaiteraa i ni‘a i te Itenati no te haamaramarama e o vai ratou e no teaha to ratou mau ti‘aturiraa i riro ai e mea faufaa no ratou. Te aparau ra ratou no ni‘a i to ratou faaroo.

E ti‘a ia tatou ia rave i teie mau aparauraa faahiahia e tei raveraa na roto i te here o te HuruMesia. E ti‘a i to tatou ta‘iraa reo ia parau anei e aore ra ia papa‘i anei, ia riro ei reo faatura e te mărû, noa’tu te huru o te pahoraa a vetahi ê. E ti‘a ia tatou ia vai parau-ti‘a e ia matara e ia parau ma te maramarama. Eiaha roa’tu tatou e pato‘ito‘i e aore râ, e aro atu.

Ua haamaramarama te aposetolo Petero e, « Mai ia’na hoi i parau mai ia outou e mo‘a ra, ia mo‘a ato‘a outou i ta outou mau parau ato‘a » (1 Petero 1:15).

E au ra te faaohipa rahi noa’tura â te « rave‘a paraparauraa » o teie tau i te Itenati. Te faaitoito nei matou i te feia apî e te feia paari, ia faaohipa i te Itenati e te mau rave‘a haamatauraa ato‘a no te faaite i ta ratou mau tia’turiraa faaroo.

A faaohipa ai outou i te Itenati, e faaroo paha outou i te mau aparauraa tuutuu ore no ni‘a i te Ekalesia. Ia arata‘i te Varua ia outou, eiaha e măta‘u i te tuu atu i to outou mana‘o i roto te reira mau aparauraa.

E mea taa ê roa te parau poro‘i o te evanelia a Iesu Mesia i te tahi atu mau mea ta outou e faaite atu ia vetahi ê. I roto i te mau haamaramaramaraa ato‘a, o te haamaramaramaraa hau atu i te faufaa i roto i te ao taato‘a nei. Aita roa e uiraa no ni‘a i to’na ti‘araa. E poe maitai roa ïa te reira (a hi‘o Mataio 13:46).

Ia parau ana‘e no ni‘a i te Ekalesia, eiaha tatou e tamata i te faanavenave. Eiaha tatou e faananea i ta tatou poro‘i. E faaite râ tatou i te parau poro‘i ma te ti‘a e te parau mau. Ia iriti tatou i te mau reni no te aparauraa, e faaite ihoa te parau poro‘i no te evanelia a Iesu Mesia tei faaho‘i-faaou-hia mai i te parau mau i te feia o tei ineine i te farii i te reira.

Te vai nei te hoê mea taa ê rahi roa—hoê area aano no te maramarama—i rotopu i te huru o to tatou hi‘oraa i te Ekalesia mai roto atu e te huru o te hi‘oraa a vetahi ê mai rapae au mai. Teie te tumu hoê roa e faatupu ai tatou i te hoê opani iriti na mua‘e e haamo‘ahia’i te hoê hiero apî tata‘itahi. Te tamata nei te feia e rohi ra i roto i te opani iriti i te tauturu ia vetahi ê ia ite i te Ekalesia a hi‘o ai ratou mai roto atu. E ite ratou e te Ekalesia o te hoê ïa ohipa maere e te umere, e e hinaaro ratou ia vetahi ê ia ite ato‘a i te reira. Te ani nei au ia outou ia na reira ato‘a.

Te fafau nei au ia outou e mai te mea e pahono outou i te mau titauraa ia faaite i to outou mau ti‘aturiraa e mau mana‘o no ni‘a i te evanelia a Iesu Mesia tei faaho‘ihia mai, e riro ïa te hoê varua no te here e te itoito ei hoa papû no outou, no te mea « e pee te măta‘u i te aroha tia mau ra » (1 Ioane 4:18).

Teie te taime no te faarahi i te mau rave‘a no te faaite i te evanelia a Iesu Mesia ia vetahi ê. Ia faaineine tatou ia tatou iho no te faaohipa i te mau rave‘a i horo‘ahia ia tatou tata‘itahi no te faaite i to tatou mau ti‘aturiraa, o ta’u ia pure haehaa na roto i te i‘oa o Iesu Mesia, amene.