iVakatakila kei na iVakadinadina Yadua

Ena vuqa na yabaki sa oti niu se vuli tiko ena vuli torocake, au a vakarorogo tiko ena koniferedi raraba ni kaburaki tiko mai ena retio me vaka ni sega na retioyaloyalo ena vale lailai keitou tiko kina. Era vakasakiti dina na vosa ena koniferedi, kau marautaka tiko na kena sovaraki mai na Yalo Tabu.

Au nanuma vinaka tiko ena nona vosa e dua na Vakaitutu Raraba me baleta na iVakabula kei na Nona veiqaravi ka qai wasea e dua na ivakadinadina warumisa, a vakadeitaka ki yaloqu na Yalo Tabu ni tukuna tiko na ka dina. Ena gauna oqori au sega ni vakatitiqataka tale ni bula tiko na iVakabula. Au sega talega ni vakatitiqataka niu vakila tiko na ivakatakila vakatamata yadua ka vakadeitaka vei au ni “o Jisu Karisito e Luve ni Kalou.”¹

Niu yabaki walu au a papitaiso ka vakadeitaki ka ciqoma na isolisoli ni Yalo Tabu. A dua na veivakalougatataki vakasakiti ena gauna ko ya ia sa levu cake tiko ga na kena bibi niu sa tubu cake tiko ka vakila na isolisoli ni Yalo Tabu ena vuqa sara na sala me tekivu mai na gauna ko ya.

E vakavuqa ni da tubu cake mai na bula vagone ki na itabagone ka yacova yani na uabula, e dau tu na noda bolebole kei na veika eda vakila ena noda toso tiko ka da dau vakila kina ni da gadreva na veivuke vakalou ka dau yaco mai ena Yalo Tabu. Ni yaco mai na dredre, eda na tarogi keda, “Na cava beka na isau ni noqu lomaleqa?” ka “Au na kila vakacava na ka meu cakava?”

Au dau nanuma vakavuqa na itukutuku ena iVola i Momani me baleti Liai ena nona vakavulici ira na nona matavuvale ena kosipeli. E wasea vei ira e vuqa na ivakatakila kei na ivakavuvuli me baleta na veika ena yaco mai ena veisiga e muri. A vakasaqara o Nifai na veituberi ni Turaga me rawa kina ni kila vakavinaka cake na ivakavuvuli nei tamana. A laveti cake, vakalougatataki, ka vakauqeti me kila ni ra dina na ivakavuvuli nei tamana. Oqori a rawa kina vei Nifai me muria vakavinaka sara na ivakaro ni Turaga ka bula dodonu. A ciqoma na ivakatakila yadua me dusimaki koya.

Ena yasana kadua, eratou veileti tiko vakataki iratou na tuakana baleta ni ratou sega ni ciqoma rawa na ivakavuvuli nei tamadratou. Qai taroga o Nifai e dua na taro bibi sara: “Dou sa bau kerea mada vua na Turaga?”²

E malumalumu na nodratou sauma: “E sega; e sega ni dau vakatakila vei keitou na Turaga na veika vakaoqo.”³

A vakayagataka o Nifai na madigi oqori me vakavulica vei iratou na tuakana na ivakarau ni kena ciqomi na ivakatakila yadua. E kaya kina: “Dou sa guilecava beka na veika sa tukuna na Turaga?—Kevaka dou na sega ni vakaukauwataka na yalomudou ka kerekere vei au ena vakabauta, ka vakadinata ni na soli vei kemudou ka muria na noqu ivunau, ena vakatakilai vakaidina vei kemudou na veika oqo.”⁴

E matata vakavinaka toka na ivakarau me ciqomi kina na ivakatakila yadua. E dodonu me da gadreva me da ciqoma na ivakatakila, me da kakua ni vakaukauwataka na yaloda, oti me da qai kerea ena vakabauta, ka vakabauta vakaidina ni da na rawata na kena isau, ka qai muria ena yalodina na ivakaro ni Kalou.

Ni da muria na ivakarau oqo e sega ni kena ibalebale ni ena veigauna kece eda taroga kina e dua na ka vua na Kalou, ena basika sara mai na kena isau kei na matailalai ni veika me da cakava. Ia e kena ibalebale kevaka eda muria ena yalodina na ivakaro ka kerekere ena vakabauta, ena yaco mai na kena isau ena nona sala ga na Turaga kei na Nona gauna.

Niu se gone au dau nanuma tu ni ivakatakila yadua se na isau ni masu ena dau yaco mai ena dua na domo eda rawa ni rogoca. Io e dina sara, eso na ivakatakila e dau yaco mai ena noda rogoca dina e dua na domo. Ia, au sa vulica ni dau vosa na Yalotabu ena vuqa na sala.

Na Vunau kei na Veiyalayalati, wase 6 e vakamacalataka e vica na sala eda rawa ni ciqoma kina na ivakatakila:

“Raica ko sa dau masuti au ka sa vakacegui iko kina na noqu Yalo Tabu.”⁵

“Niu sa dau vakatakila ki lomamu.”⁶

“Au a sega li ni vakaceguya kina na yalomu?”⁷

Ena so tale na ivolanikalou eda vulica kina e so tale na ka me baleta na ciqomi ni ivakatakila:

“Raica ena vakatakila vei iko na Yalo Tabu, io ena lako yani vei iko ko koya ka tukutuku sara ki lomamu. Ia sai koya oqo na yalo ni ivakatakila.”⁸

“Au na uqeta na yalomu ka na katakata mai na lomamu, raica ko na qai kila sara ni sa dodonu.”⁹

“Au sa solia vei iko na noqu Yalo Tabu, io ena vakavukui iko ko Koya ka vakasinaita na nomu marau.”¹⁰

Ena vakavuqa ni na dau yaco mai na ivakatakila yadua ena noda vulica na ivolanikalou, vakarorogo ka muria na nodra ivakasala na parofita kei na iliuliu tale eso ni Lotu, kei na noda segata me da bulataka na bula yalodina, ka buladodonu. Ena so na gauna ena yaco mai na veivakauqeti ena dua ga na tiki ni ivolanikalou se mai na dua na iyatuvosa ni koniferedi. De na lako mai na isau ni nomu kerekere ni ra lagata tiko na gone ena Lalai e dua na sere totoka. Oqori kece na sala ni ivakatakila.

Ena veisiga taumada ni Veivakalesui Mai, era dau vakasaqara ena yalodina e vuqa na lewenilotu na ivakatakila ka ra vakalougatataki ka vakauqeti me ra kila na ka me caka.

A bolei o Sisita Eliza R. Snow mai vua na parofita o Brigham Young me veivuke ena nodra laveti ka vakavulici na marama ena Lotu. A vakavuvulitaka ni rawa vei ira yadua na yalewa me ra ciqoma na veivakauqeti me tuberi ira ena nodra dui bula yadua, ena nodra matavuvale, kei na nodra itavi ena Lotu. E kaya kina: “Tukuna vei ira na marama me ra lako ka qarava na nodra itavi, ena yalomalua kei na yalodina ena qai tiko vata kei ira na Yalo ni Kalou ka ra na vakalougatataki ena nodra cakacaka. Me ra vakasaqara na yalomatua ka sega na kaukauwa, ia ena qai tu vei ira na kaukauwa kece ka tu vei ira na kena yalomatua me ra vakayagataka kina.’”¹¹

E vakavulica vei ira na marama o Sisita Snow me ra vakasaqara na veituberi ni Yalo Tabu. E kaya kina ni Yalo Tabu ena “vakamamautaka ka vakasinaita na gagadre kece ni yalo ni tamata, ka vakasinaita na veitikina kece e lala tu. Niu vakasinaiti tu ena Yalo o ya, sa vakacegu na yaloqu.’”¹²

Sa vakavuvulitaka o Peresitedi Uchtdorf ni “sega ni dau yaco mai ena kaukauwa levu na ivakatakila kei na ivakadinadina. Vei ira e vuqa, e dau yaco mai vakamalua na ivakadinadina—dua na tikina ena dua na gauna.” E vakuria ena nona kaya: “me da vakasaqara vagumatua na rarama ni veivakauqeti yadua. Me da vakatakekere vua na Turaga me vakalougatataka na noda vakasama kei na yaloda ena lidi ni vakabauta ka na rawa kina vei keda me da ciqoma ka kila na cakacaka vakalou ni Yalo Tabu.”¹³

Na noda ivakadinadina ena vakaukauwataki keda ka vaqaqacotaki keda ena noda sotava na bolebole ni noda bula ena veisiga yadua. Eso era sotava na leqa ni tauvimate; eso e sotava na leqa ni bula vakailavo; eso tale era sotava tu na dredre ena nodra bula vakawati se vei ira na luvedra; eso era bula galili se so na vakanuinui se tatadra a sega ni vakavotukana. Na noda ivakadinadina, ka waki vata kei na noda vakabauta na Turaga o Jisu Karisito kei na noda kila na ituvatuva ni veivakabulai, ena vukei keda me da curuma kina na gauna ni veivakatovolei kei na dredre.

Ena ivola na Luvequ Yalewa ena Noqu Matanitu, eda wilika kina me baleti Sisita Hedwig Biereichel, e dua na marama ni Jamani ka sotava vakalevu na rarawa kei na veivakuwai ena iKarua ni iValu Levu. Ena nona loloma kei na nona bula ni dauveivukei, ena gauna sara mada ga e sotava tu kina na leqa levu, e wasea ena lomasoli na kena kakana vua e dua na kaivesu vakaivalu waloloi. E muri, ni tarogi vua se rawa vakacava me “maroroya tiko e dua na ivakadinadina ena loma ni gauna ni veivakatovolei oqori,” a sauma vaqo, “Au a sega ni maroroya tiko e dua na ivakadinadina ena gauna oqori—a maroroi au na ivakadinadina.”¹⁴

Ni dua tu na noda ivakadinadina tudei e sega ni kena ibalebale ni na vaka tiko ga kina. Me da na vakania ka vaqaqacotaka tiko me rawata kina na kaukauwa me na tokoni keda tiko. Oqori e dua na vuna me da dau “soqoni vata wasoma”—me da vakaivotavota kina ena sakaramede, vakavouya na noda veiyalayalati, ka “vakavulici ena ivakavuvuli ni Kalou.” Sai koya na ivakavuvuli ni Kalou sa vakauqeta “me ra dau masu tikoga ka vakararavi tabakidua ki na loloma i Karisito, o Koya sa vakatekivuna ka sauma talega na no[da] vakabauta.”¹⁵

E vakavulici keda o Elder David A. Bednar: “Ni o segata vakadodonu ka vakayagataka na yalo ni ivakatakila, au yalataka ni ko na ‘lako ena rarama i Jiova’(Aisea 2:5; 2 Nifai 12:5). Ena so na gauna ena cakacaka na yalo ni ivakatakila ena gauna vata ga vakaukauwa, ena so tale na gauna ena vakamalua ka taura e dua na gauna, ka vakavuqa ni dau malumu ka da sega ni dau vakila. Ia se cava ga na ivakarau e dau ciqomi kina na veivakalougatataki oqo, ena vakararamataka na yalomu ka vakalevutaka, ka vakararamataka na nomu kila ka na rarama e solia mai (raica na Alama 5:7; 32:28), ka dusimaki iko ka taqomaki iko kei na nomu matavuvale.”¹⁶

E gadreva na Turaga me vakalougatataki keda ena veituberi, ena vuku, kei na idusidusi ena noda bula. E gadreva o Koya me sovaraka mai na Yalona vei keda.Vakadua tale, me baleta na ivakatakila yadua e vinakati me da gadreva me da ciqoma, me da kakua ni vakaukauwataka na yaloda, ka da qai gadreva me da kerea ena vakabauta, ka vakabauta vakaidina ni da na rawata na kena isau, ka da qai muria vagumatua na ivakaro ni Kalou. Oti ni da qai vakasaqara na isau ni noda taro, ena vakalougatataki keda o Koya ena Yalona. Oqori au vakadinadinataka ena yaca i Jisu Karisito, emeni.