Sauniuniga i le Perisitua: “Ou Te Manaomia Lau Fesoasoani”

O’u uso pele, o se olioliga mo a’u lo tatou mafuta ai i lenei sauniga mo le lalolagi atoa a le au perisitua a le Atua. Ou te talanoa atu i le po nei i le sauniuniga a le perisitua, mo i tatou lava faapea mea tatou te fesoasoani e tuuina atu mo isi.

O le toatele lava o i tatou e taumanatunatu i taimi, “Pe ua ou saunia ea mo lenei tofiga i le perisitua?” O la’u tali o le “Ioe, ua e saunia.” O lo’u faamoemoega i le asō, o le fesoasoani atu lea ia e iloaina lena sauniuniga ma e maua mai ai le lototele.

E pei ona e iloa, o le Perisitua Arona ua atofaina o se perisitua sauniuni. O le toatele lava o tiakono talavou, aoao, ma ositaulaga e i le va o le 12 ma le 19 tausaga le matutua.

Atonu tatou te manatu o le sauniuniga a le perisitua e fai i tausaga o le Perisitua Arona. Ae na saunia lava i tatou e lo tatou Tama Faalelagi talu mai le taimi na aoaoina ai i tatou i Lona afioaga i Lona malo ae tatou te le’i fananau mai. O loo Ia saunia foi i tatou i le po nei. Ma o le a Ia faaauau pea ona saunia i tatou pe afai tatou te faatagaina o Ia.

O le faamoemoega o sauniuniga uma a le perisitua, i le muai olaga ma lenei olaga, o le tapenaina lea o i tatou ma ē tatou te tautuaina, mo le Alii mo le ola e faavavau. O nisi o lesona muamua i le muai olaga e mautinoa lava na aofia ai le ata o le faaolataga, faatasi ai ma Iesu Keriso ma Lana Togiola i le totonugalemu. E le gata sa aoaoina i tatou i le fuafuaga ae sa tatou i ai foi i aufono ia na tatou filifilia ai le fuafuaga.

Ona sa tuu se veli o le le manatuaina o mea i o tatou mafaufau ina ua tatou fananau mai, o lea e tatau ai ona tatou sailia se ala e toe aoao ai i lenei olaga mea sa tatou muai iloaina ma puipuia. O se vaega o a tatou sauniuniga i lenei olaga o le sailia lea o lena upumoni taua ina ia mafai ai ona tatou toe tuuto atu i ai e ala i feagaiga. E manaomia ai e lena mea le faatuatua, lotomaualalo, ma le lototele i la tatou vaega atoa ai ma fesoasoaniga mai tagata ua mauaina le upumoni ona faasoa mai lea ia i tatou.

Atonu o matua, faifeautalai, po o ni uo. Ae o lena fesoasoani o se vaega o a tatou sauniuniga. O a tatou sauniuniga faaleperisitua e aofia ai lava isi ua uma ona sauniaina e ofo mai ia i tatou le avanoa e talia ai le talalelei ona filifili lea e faatino e ala i le tausiaina o feagaiga ina ia mauaa ai i o tatou loto. Mo i tatou ina ia agavaa mo le ola e faavavau, o la tatou auaunaga i lenei olaga e tatau ona aofia ai le galulue ma o tatou loto atoa, mafaufau, ma le malosi atoa e taumafai ai e saunia isi e toe foi atu i le Atua faatasi ma i tatou.

O se vaega la o sauniuniga a le perisitua o le a tatou maua i lenei olaga o le maua lea o avanoa e auauna atu ai ma aoao isi. Atonu e aofia ai le avea ma ni faiaoga i le Ekalesia, ni tamā atamamai ma alolofa, ni uso o korama, ma ni faifeautalai mo le Alii o Iesu Keriso. O le a ofoina mai e le Alii ni avanoa, ae o le a faalagolago lava ia i tatou lo tatou saunia pe leai. O lo’u faanaunauga i le po nei o le faasino atu lea o nisi o filifiliga taua e manaomia mo sauniuniga faaleperisitua ina ia manuia ai.

O filifiliga lelei a le tagata o loo aoaoina ma le tagata ua aoaoina e faalagolago i sina malamalama i le auala e saunia ai e le Alii Ana auauna perisitua.

Muamua, na te valaauina tagata, talavou ma matutua, atonu e foliga mai o tagata o le lalolagi, ma e oo lava foi ia i latou, o e vaivai ma faatauvaa. E mafai e le Alii ona liua na vaivaiga ua matauina, e avea ma malosiaga. O le a suia ai le ala e filifili ai le taitai atamai po o ai e aoao ae pe faapefea foi ona aoao atu. Ma e mafai ai foi ona suia le auala e tali atu ai le o umia le perisitua i avanoa fatufatuai ua ofoina atu ia te ia.

Tatou mafaufau i nai faataitaiga. Sa avea a’u ma se ositaulaga e le’i i ai se poto masani i se uarota tele. Sa valaau mai lo’u epikopo ia te au i le telefoni i se tasi o aoauli o se Aso Sa. Ina ua ou tali atu, sa ia faapea mai, “E i ai sou taimi ta te o ai ma a’u? Ou te manaomia lau fesoasoani.” Sa ia faamalamalama mai e na ona ia manao lava e fai au ma ana soa e asiasi i se tamaitai ou te le’i iloaina ae ua leai ni ana meaai ma ua manaomia ona aoao i auala e pulea lelei ai ana mea tau tupe.

Ia, sa ou iloa e i ai ni ona fesoasoani atamamai i lana au epikopo. O i laua uma o ni alii faatagata matutua e i ai ni poto masani sili. O se tasi o fesoasoani e i ai sana pisinisi tele lea na mulimuli ane avea ma se peresitene o se misiona ma se Pulega Aoao. O le isi fesoasoani o se faamasino lauiloa i le aai.

O a’u o le fesoasoani muamua faatoa valaauina o le epikopo i le korama a ositaulaga. Sa ia silafia e itiiti so’u malamalama i mataupu faavae o le uelefea. Ou te le’i tusia foi se siaki, leai sa’u teugatupe i le faletupe, ma ou te le’i vaai lava i se paketi patino.Ae, e ui lava i so’u le atamai, sa ou lagonaina le faamaoni o lana tala “Ou te manaomia lau fesoasoani.”

Sa oo ina ou malamalama i le mea sa manao i ai lena epikopo musuia. Sa ia vaaia ia te au se avanoa faaauro e saunia ai sē o umia le perisitua. Ou te mautinoa na te le’i muai vaaia i lena taulealea e le’i aoaoina, o se sui o le Au Epikopo Pulefaamalumalu i le lumanai. Ae sa ia taulimaina a’u i lena aso, ma isi aso uma i le tele o tausaga, o se galuega faatino sauniuni o se folafolaga sili.

Sa foliga mai na ia fiafia ai, ae o se galuega mo ia. Ina ua ma toe foi i lo’u fale ina ua mae’a le ma asiasiga i le tina ua oti lana tane sa manaomia se fesoasoani, sa ia faatu le taavale. Sa ia tatala ana tusitusiga paia e faaaoga soo ua makaina. Sa ia tuu mai ia te au ni faasao’ga agalelei. Ae masalo sa ia vaaia lo’u vaivai ma le faatauvaa e faigofie ai ona aoaoina. E oo mai i lenei aso, ou te manatuaina pea le mea sa ia aoao mai ia te au i lena aoauli. Ae e sili atu foi ona ou manatuaina lona talitonuga mautinoa o le a mafai ona aoaoina au ma lelei atili—ma o le a ou lelei ai atili.

Sa ia vaai i tala atu o tulaga moni o lo’u tagata i mea e mafai ona ou ausia i le lumanai, se tagata o loo lagonaina le lava o le vaivai ma le faatauvaa e manaomia ai le fesoasoani a le Alii e talitonu ai i mea o le a oo mai.

O epikopo, peresitene o misiona, ma tamā e mafai ona filifili e galuluei na mea e mafai ona ausia. Sa ou vaai o tupu talu ai nei i se sauniga anapogi, a o tuuina mai e se peresitene o se korama a tiakono lana molimau. Sa oo ina o le a avea ma se aoao ma tuua uso o lana korama.

Sa ia molimau atu ma se lagona sili i lona leo o le tuputupu ae i le lelei ma le mana i uso o lana korama. Ou te lei faalogo lava i se tagata o matagofie se faaviivii i sefaalapotopotoga e pei ona sa ia faia ai. Sa ia viia a latou auaunaga. Ona ia faapea mai lea ua ia iloaina sa mafai ona ia fesoasoani atu i tiakono fou pe a latou lagonaina le lofituina ona sa lofituina foi o ia ina ua ulu atu i le perisitua.

O ona lagona o le vaivai na oo ai ina ia onosai atili, agaalofa atili, ma o lea sa mafai lelei ai ona ia faamalosia ma auauna atu i isi. I na tausaga e lua i le Perisitua Arona, sa foliga mai ia te au, sa oo ai ina ia maua le poto masani ma le atamai. Sa ia iloaina sa fesoasoani ia te ia o se peresitene o le korama, e ala i se malamalama susulu ma le manino i ona lava manaoga a o sefululua ona tausaga. O ona luitau ma o tatou luitau i le lumanai o le a oo mai pe a mou atu na manatua ma mu itiiti i le gasologa o taimi ma o tatou manuia.

Atonu na vaaia e Paulo lena mea matautia ma fautuina ai lana soa talavou i le perisitua, o Timoteo. Sa ia faamalosiau atu ma faatonuina o ia i ana lava sauniuniga faaleperisitua atoa ai ma le fesoasoani atu i le Alii i le sauniaina o isi.

Faalogo i le mea na ta’u atu e Paulo ia Timoteo, lana soa talavou:

“Aua nei inoino se tasi i lou taulealea; a ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua ma le le gaoia.

“Ia e faasaga i le faitau, ma le apoapoai atu, ma le aoao atu, seia ou alu atu.

“Aua nei e faatalale i le meaalofa na tuuina atu ia te oe i le valoaga, ma le faaee atu o lima. …

“Ia oe lava ia te oe, atoa ma lau e aoao atu;¹ ia e tumau pea i ai: aua a e fai lena mea, e faaolaina ai oe e oe atoa ma e ua faalogologo ia te oe.”²

Na tuu mai e Paulo se fautuaga lelei mo i tatou uma. Aua le popole i sou le atamai o i ai ae mafaufau, faatasi ma le fesoasoani a le Alii, i le ituaiga o tagata o le a mafai ona avea ai oe.

O le aoaoga faavae o loo uunaia ai i tatou e Paulo e taumamafa ai i a tatou sauniuniga faaleperisitua, o afioga ia a Keriso ma ia agavaa mo le mauaina o le Agaga Paia. Ona mafai lea ona tatou iloaina mea ua finagalo le Alii tatou te faia i la tatou auaunaga ma maua ai le lototele e fai ai, pe o le a lava le tulaga e fetaiai ma i tatou i le lumanai.

Ua sauniaina i tatou mo auaunaga faaleperisitua o le a sili ona luitauina i taimi e oo mai ai. Mo se faataitaiga, e faasolo foi ina augatata o tatou musele ma tino a o tatou galulue. O lo tatou malosi e aoao ai ma manatuaina mea sa tatou aoaoina o le a faaitiitia. Ina ia tuuina ia auaunaga faaleperisitua ua faamoemoeina ai i tatou e le Alii o le a manaomia ai pea lava pea se loto pulea i aso uma o o tatou olaga. E mafai ona saunia i tatou mo lena tofotofoga e ala i le fausiaina o le faatuatua e ala i auaunaga i aso taitasi.

Ua tuuina mai e le Alii ia i tatou le avanoa e saunia ai i se mea ua Ia ta’ua “o le tautoga ma le feagaiga [o le] perisitua.”³

O se feagaiga tatou te osia ma le Atua e tausia Ana poloaiga uma ma tuu atu auaunaga semanu Na te tuuina atu pe ana faapea o i ai o Ia iinei. O le ola ai i lena tulaga faatonuina i le mea sili tatou te mafaia, e fausia ai le malosi faaleagaga o le a tatou manaomia e tumau ai e oo i le iuga.

Sa faaali mai e ni faiaoga maoae o le perisitua ia te au le auala e fausia ai lena malosi: o le fatuina lea o se mausa o le faatoilaloina o le vaivai ma le fefe lea atonu e te tau mafaufau ai o le a togi le solo. Sa faaali mai e faiaoga maoae a le Alii ia te au e faapea o le mana faaleagaga e tumau ai, e maua mai i le galue ia pasia le tulaga lea ua mananao isi e malolo ai.

Outou na taitai perisitua maoae o e na fausiaina lena malosi faaleagaga i lo outou talavou e i ai pea ia te outou pe a vaivai le malosi faaletino.

Sa i ai lo’u uso laitiiti i se tamai aai i Iuta mo pisinisi. Sa ia maua se telefoni i lona faletalimalo mai ia Peresitene Spencer W. Kimball. Sa leva le po ina ua mavae se aso faigata o galuega mo lo’u uso ma sa mautinoa foi e faapena mo Peresitene Spencer W. Kimball, o lē sa amataina le talanoaga i le telefoni faapenei. Sa ia faapea atu, “Sa ou faalogo o loo e i ai i le taulaga. Ou te iloa ua leva [le po] ma atonu ai ua e tofa, ae pe mafai ona e fesoasoani mai ia te au? Ou te manaomia oe e fai ma a’u soa a o ou alu atu i le aai e vaai i le tulaga o i ai o tatou falelotu uma.” Sa o lo’u uso ma ia i lena po, ma le leai o sona iloa e uiga i le tausiga o falelotu, e le iloa foi le mafuaaga ua manao ai Peresitene Kimball e fai sea mea faapea ina ua mae’a se aso umi, ma pe aisea foi na te manaomia ai se fesoasoani.

I ni tausaga mulimuli ane sa ou maua ai foi se valaau faapea i le po i se faletalimalo i Iapani. O le taimi lena sa avea ai a’u ma Komesina fou o Aoga a le Ekalesia. Sa ou iloa o loo nofo Peresitene Gordon B. Hnckley i se vaipanoa o lena faletalimalo mo sana tofiga i Iapani. Sa ou taliina le telefoni sa tatagi ina ua ou faatoa taoto lava i lalo e moe, ma le vaivai tele ina ua mae’a ona faia o mea uma sa ou manatu sa ou maua le malosi e faia ai.

Sa fesili mai Peresitene Hinckley i lona leo fiafia, “Aisea ua e moe ai ae o lea ou te i i o loo faitauina se tusi sa talosagaina i tatou e toe iloilo?” O lea sa ou nofo ai i luga ma galue loa e ui lava sa ou iloa e sili atu se iloiloga a Peresitene Hinckley o le tusi nai lo se mea e mafai ona ou faia. Ae i se ala sa ia faia ai na ou lagona ai sa ia manaomia la’u fesoasoani.

I faaiuga o fonotaga, toetoe lava o fonotaga uma, e fesili ai lava Peresitene Thomas S. Monson i le failautusi o le Au Peresitene Sili, “Pe ua faia uma a’u galuega?” Ma e ataata lava o ia pe a sau le tali: “Ioe, Peresitene.” O le ataata fiafia a Peresitene Monson e aumai ai se feau ia te au. E faatupu manatu ai ia te au, “Pe i ai ea se isi mea e mafai ona ou faia i o’u tofiga?” Ona ou toe foi atu lea i lo’u ofisa e galue.

Ua faaali mai e faiaoga maoae ia te au le auala e saunia ai e tausia le tautoga ma le feagaiga pe a faafaigataina e le taimi ma le matua. Ua latou faaali mai ma aoao a’u i le auala e pulea ai au lava ia e galue malosi atili atu nai lo le mea ou te mafaufau ou te mafaia semanu o o’u maua le malosi.

Ou te le mafai ona avea ma se auauna atoatoa i itula uma, ae e mafai ona ou tuuina atu ni taumafaiga sili atu nai lo le mea ou te mafaufau ou te mafaia. Faatasi ai ma lena mausa na muai fatuina, o le a ou saunia ai mo tofotofoga o mulimuli mai. E mafai ona saunia oe ma au i le malosi e tausia ai a ta tautoga ma feagaiga e ala i tofotofoga ia e mautinoa o le a oo mai pe a lata i le iuga o le olaga.

Sa ou vaaia se faamaoniga o lena mea i se fonotaga a le Fono a le Au Faatonu o Aoaoga a le Ekalesia. E oo ifo i le taimi lena ua autausaga o auauna atu Peresitene Spencer W. Kimball a o onosaia ai le tele o faigata o le soifua maloloina lea e na o Iopu e malamalama i ai. Sa ia taitaia le fonotaga i lena taeao.

Sa faafuasei ona le gagana o ia. Sa faapa’ū ifo i lona nofoa. Sa moeiini. Sa lafo ifo lona ao i lona fatafata. Sa ou nofo latalata ia te ia. Sa sosoo mai ai ma Elder Holland. Sa ma tutu i luga e fesoasoani ia te ia. O le leai o so ma’ua poto masani, sa ma manatu ai e sii o ia i lona ofisa o lata ane, a o nofo pea i lona nofoa.

Sa avea o ia ma o ma faiaoga i lena taimi sa matua mafatia ai. A o tofu i ma’ua ma le pito o lona nofoa o loo si’i, sa matou tuua le potu fono ma agai atu i le ala savali. Sa tau pulapula mai o ia, ma sa iloagofie lava lona meia, ma fai mai, “Oi, faamolemole ia faaeteete. Vaai i tiga o oulua tua.” A o matou latalata atu i le faitotoa o lona ofisa, sa ia fai mai, “Ua ou le fiafia lava ua ou faalavelave i le fonotaga .” I nai minute talu ona matou i ai i lona ofisa, sa ia tepa mai ia i ma’ua ma fai mai, “Pe ua le tatau ea ona oulua toe foi atu i le fonotaga.”

Sa ma tuua loa ma faanatinati atu, ma le iloaina o lo ma i ai iina atonu e taua i le Alii. E mai lava i le tamaitiiti o Peresitene Kimball e na te tuleia lava ia i tala atu o tapulaa o lona onosai e auauna ai ma alofa i le Alii. O se mausa sa matuai mautu lea sa i ai i taimi sa ia manaomia ai. Sa saunia o ia. Ma o lea sa ia mafai ai ona aoao mai ma faaali mai ia i tatou le auala e saunia ai e tausia le tautoga ma le feagaiga, e ala i sauniuniga tumau i le aluga o tausaga lea e faaaoga ai lo tatou malosi uma i mea e ono tulai mai o ni galuega iti e i ai ni taunuuga faatauvaa.

O la’u tatalo ia tau ina tatou tausia a tatou feagaiga o le perisitua e agavaa ai i tatou lava mo le ola e faavavau faapea ai ma i latou uma ua valaauina ai i tatou e aoao. Ou te folafola atu ia te outou afai tou te faia uma mea tou te mafaia, o le a faateleina e le Atua lou malosi ma lou atamai. O le a Ia saunia oe.

Ou te molimau atu o loo soifua le Atua le Tama ma e alofa ia te outou. Sa faaali atu o Ia ma Lona Alo toetu ma le mamalu, o Iesu Keriso, i se taulealea e le’i i ai se poto masani, o Iosefa Samita. Sa La faatuatuaina o ia i le Toefuataiga mai o le atoaga o le talalelei ma le ekalesia moni. Sa La faamalosiauina o ia pe a ia manaomia. Sa La tuuina atu ia ona lagonaina le aoaiga alofa pe a faamaualaloina ai o ia ina ia mafai ona siitia ai o ia i luga. Sa La sauniaina o ia, ma o loo La sauniaina i tatou, mo le malosi e galulue ai pea e agai atu i le mamalu selesitila, o le faamoemoe lena ma le mafuaaga o a tatou auaunaga uma faaleperisitua.

Ou te tuu atu a’u faamanuiaga ina ia mafai ai ona outou iloaina ia avanoa mamalu ua tuuina mai e le Atua ia te outou i valaauga, ma saunia ai outou mo Lana galuega ma le auaunaga i isi. I le suafa o lo tatou taitai alofa ma le faiaoga, o Iesu Keriso, amene.