2010–2019
O Le Faia i le Ala a le Alii
Oketopa 2011


O Le Faia i le Ala a le Alii

O mataupu faavae o le uelefea a le Ekalesia ua le na o ni manatu lelei; ae o ni upumoni ua faaalia mai le Atua—o Ona ala ia e fesoasoani ai i e le tagolima.

Ua onosefulu lima tausaga talu ai, faatoa maea lava le Taua Lona a le Lalolagi, sa ou iloa patino ai faamanuiaga o le polokalama o le uelefea a le Ekalesia. E ui lava sa ou tamaitiiti, ae ou te manatua pea le suamalie o le tofo o apa pea faatasi ma polesi ua faavelaina ma le manogi faapitoa o lavalava na foai atu e tagata agaalofa o le Ekalesia mai le Iunaite Setete i le Au Paia Siamani ina ua mae’a le taua. O le a le galo lava ia te au ma o le a ou faamemelo pea i nei faatinoga o le alofa ma le agalelei ia i matou o e sa le tagolima tele.

O lenei aafiaga patino ma le faamanatuga o le 75 tausaga o le fuafuaga musuia o le uelefea ua mafua ai ona ou toe mafaufau i mataupu faavae autu o le tausiaina o e matitiva ma e le tagolima, ina ia mafai ona ola faalagolago ia i latou lava, ma auauna atu ai i o tatou uso a tagata.

I Le Faapogai o lo Tatou Faatuatuaga

O nisi taimi tatou te vaai ai i le uelefea ua na o se isi foi autu o le talalelei—o se tasi o le tele o lala o le laau o le talalelei. Ae ou te talitonu i le fuafuaga a le Alii, o lo tatou tautino atu i mataupu faavae o le uelefea e tatau ona i ai i le faapogai tonu o lo tatou faatuatuaga ma le tuuto atu ia te Ia.

Talu mai le amataga o aso, sa fetalai ai lo tatou Tama Faalelagi ma le manino tele i lenei mataupu: e aofia ai se aioiga mālū, e pei o, “Afai e te alofa mai ia te au … ia e manatua e ua matitiva, ma ia faapaiaina mo lo latou tausiga ni mea mai au meatotino”;1 faapea foi ma ni poloaiga tuusao, “Ma ia manatua i mea uma e ua matitiva ma e ua le tagolima, e ua mama’i ma e ua puapuagatia, ona o ia o le na te le faia ia mea, o ia lava lea e le o so’u soo”;2 e faapena foi i le lapataiga malosi, “O lea, afai e ave e se tagata se mea mai le tele o mea uma ua Ou faia, ma lē tuu atu lana vaega, i e matitiva ma e ua le tagolima, e tusa ma le tulafono o la’u talalelei, o le a sii ae e ia ona mata faatasi ma e amioleaga i seoli, ua maua i le mafatia.”3

O Le Faaletino ma le Faaleagaga ua Fusia Faatasi

O poloaiga sili e lua—ia alofa atu i le Atua ma o tatou tuaoi—o se tuufaatasiga lea o le faaletino ma le faaleagaga. E taua le manatua o nei poloaiga e lua ua ta’ua [o poloaiga] “sili” ona e autu i ai isi poloaiga uma.4 I se isi faaupuga, o a tatou mea faamuamua a le tagata lava ia, faaleaiga, ma faale-Ekalesia e ao ona amata ii. O isi sini uma ma faatinoga e tatau ona puna mai i vaipuna o nei poloaiga sili e lua—mai lo tatou alolofa i le Atua ma o tatou tuaoi.

E pei o itu e lua o se tupe, o le faaletino ma le faaleagaga e le mafai ona tuueseeseina.

Na folafola mai e le Puna o le ola uma, “Ua faaleagaga mea uma lava ia te a’u, ma Ou te lei tuuina atu lava ia te outou i soo se taimi se tulafono sa faaletino.”5 O lona uiga ia te a’u “o le ola faaleagaga o le ola muamua lea o ola uma lava. E le na o se mea e tau ina iloa ma suesueina, ae ao ona ola ai.”6

Ae paga lea, e i ai tagata ua le manatu i le “faaletino” ona ua latou mafaufau e itiiti sona taua. Ua latou faapelepele i le faaleagaga ae faaitiiti i le faaletino. E ui e taua le taulai atu o o tatou manatu i le lagi, ae tatou te misia le uiga moni o la tatou tapuaiga pe afai e le taulai atu foi a tatou auaunaga i o tatou uso a tagata.

Mo se faataitaiga, sa fausia e Enoka se nuu o Siona e ala i faagasologa faaleagaga o le fatuina o se nuu e tasi le loto ma tasi le manatu ma le galuega faaletino o le faamautinoaina e le o i ai se mativa ia i latou.7

E pei lava ona masani ai, e mafai ona tatou vaai atu i lo tatou faataitaiga atoatoa, o Iesu Keriso, mo se mamanu. E pei ona aoao mai ia Peresitene J. Reuben Clark, “Ina ua afio mai le Faaola i le lalolagi e lua ni ana misiona tetele; o le tasi o le faataunuuina o lana matafaioi o se Mesia, le togiola mo le pa’u, ma le faataunuuina o le tulafono; o le isi o le galuega lea na ia faia i ona uso ma tuafafine i la le tino i le faamaloloina o o latou puapuaga.”8

I se ala tali tutusa lava, o lo tatou alualu i luma faaleagaga ua fusia faatasi e le mavavaeeseina ma auaunaga faaletino tatou te faia i isi.

E faaatoaina e le tasi le isi. O le tasi e aunoa ma le isi o se mea taufaasese lea i le fuafuaga o le fiafia a le Atua.

O Le Ala a le Alii

E toatele tagata lelei ma faalapotopotoga i le lalolagi o loo taumafai e faafetaia’ia ia manaoga faavavave o e matitiva ma e le tagolima i soo se mea. Tatou te faafetai mo lea mea, ae o le ala a le Alii e tausia ai ē le tagolima e ese lava mai le ala a le lalolagi. Ua fetalai le Alii “E tatau ona faia i la’u lava ala.”9 E le gata ina gauai mai o Ia i o tatou manaoga vave; ae o loo Ia popole foi mo lo tatou alualu i luma e faavavau. Mo lenei mafuaaga, ua i ai pea i le ala a le Alii le ola faalagolago o le tagata ia te ia lava ma o le auauna atu i o tatou tuaoi o se faaopoopoga lea i le tausia o e matitiva.

I le 1941 na pa ai le Vaitafe o Gila ma sa lolovaia ai le Vanu o Duncan i Arizona. O se peresitene talavou o se siteki e igoa ia Spencer W. Kimball na fono ma ona fesoasoani, iloilo mea sa faaleagaina, ma auina atu se feau faauaealesi i le Aai o Sate Leki e talosagaina ai se tupe tele.

Nai lo le auina atu o le tupe, sa auina atu e Peresitene Heber J. Grant ni alii se toatolu: o Henry D. Moyle, Marion G. Romney, ma Harold B. Lee. Sa latou fono ma Peresitene Kimball ma aoao ia te ia se lesona taua lava: “E le o se polokalama lenei o le ‘aumai ia te a’u’” sa latou fai atu ai. “O le polokalama lenei o le ‘fesoasoani atu o le tagata lava ia.’”

I le tele o tausaga mulimuli ane, sa saunoa ai Peresitene Kimball: “Semanu o se mea faigofie lava, ou te manatu, mo le Usoga le aumai ia i matou [o le tupe] ma o le a le faigata lava le saofai i lo’u ofisa ma tufatufa atu; ae e maeu le tele o mea lelei na oo mai ia i matou a o i ai le faitau selau o i [matou lava ia] na o atu i Duncan ma fausia ni pa ma taai vaomago ma faagatasi le palapala ma faia mea uma sa manaomia ona fai. O le fesoasoani atu lena o le tagata lava ia.”10

E ala i le mulimuli i le ala a le Alii, e le gata ina faafetaiaia manaoga vave o tagata o le siteki a Peresitene Kimball, ae sa latou atiina ae se ola faalagolago o le tagata ia te ia lava, faamāmāina puapuaga, ma ola ae i le alofa ma le lotogatasi a o auauna atu le tasi i le isi.

Ua Tauto Atu i Tatou Uma

O le taimi nei e toatele tagata o le Ekalesia o loo puapuagatia. O loo fiaaai, o loo faigata mea tau tupe, ma o loo tauivi i tulaga uma faaletino, faalelagona, ma popolega faaleagaga. Latou te tatalo ma le malosi atoa o o latou loto mo se fesoasoani, ma se toomaga.

Uso e, faamolemole aua ne’i outou manatu o se tiutetauave lenei a se isi tagata. O la’u lava lea, ma o lau foi lena. Ua tauto atu i tatou uma. “Tatou uma” o lona uiga o tatou uma—o e uma e umia le Perisitua Arona ma le Mekisateko, mauoa ma mativa, i malo uma. I le fuafuaga a le Alii, o loo i ai se mea e mafai ona saofaga i ai tagata uma.11

O le lesona ua tatou aoaoina mai lea tupulaga i lea tupulaga o loo i ai umae mauoa ma matitiva i lalo o lea lava matafaioi paia e tasi e fesoasoani atu i o tatou tuaoi. E manaomia uma i tatou e galulue faatasi ia faaaoga ma le manuia ia mataupu faavae o le uelefea ma le ola faalagolago o le tagata ia te ia lava.

Ua tele lava ina tatou matauina manaoga o siomia ai i tatou ma le faamoemoe o le a tu mai se tasi mai se mea mamao e faafetaia’ia na manaoga. Atonu tatou te faatalitali mo ni tagata tomai faapitoa e i ai se poto faapitoa e foiaina ni faafitauli maoti. A tatou faia lenei mea, ua tatou aveesea mai o tatou tuaoi le auaunaga sa tatau ona latou maua, ma ua tatou aveesea i tatou lava mai avanoa e auauna atu ai. E ui e leai se mea e leaga ai tagata tomai faapitoa, ae manatu i ai: o le a le mafai lava ona lava i latou e foiaina ia faafitauli uma. Ae, ua tuu e le Alii Lana perisitua ma ona faatulagaga i o tatou faitotoa i malo uma ua faatuina ai le Ekalesia. Ma, i ona autafa tonu, ua Ia tuu ai le Aualofa. E pei ona iloa e i tatou o e umia le perisitua, e leai ma se taumafaiga faaleuelefea e manuia pe a le faaaogaina ia meaalofa ma taleni maoae a o tatou tuafafine.

O le ala a le Alii e le o le saofai i autafa o le vaitafe ma faatalitali i le taimi e pe ai le vai ona tatou kolosi lea. Ae e ala i le o mai faatasi, afe i luga lima o o tatou ofu, ma o e galulue, ma fausia se alalaupapa po o se vaa e kolosi ai le vai o o tatou luitau. Outou alii o Siona, outou o umiaina le perisitua, o outou ia e mafai ona taitai ma aumaia le toomaga i le Au Paia e ala i le faaaogaina o mataupu faavae musuia o le polokalama o le uelefea! O la outou misiona o le pupula lea o o outou mata, faaaoga o outou perisitua, ma o e galulue i le ala a le Alii.

O Le Faalapotopotoga Silisili i le Lalolagi

I le taimi o le pa’ū tele o le tamaoaiga, sa faatonuina ai Harold B. Lee e le Usoga, a o avea o ia ma se peresitene o se siteki, e sue se tali i le ogaoga o le mativa, faanoanoa, ma le fiaaai lea sa salalau i le lalolagi atoa i lena taimi. Sa tauivi o ia e saili se tali ma sa ia avatu le mataupu i le Alii ma ole atu, “O le a se ituaiga o faalapotopotoga e ao ona matou maua … e faia ai lenei mea?”

Ma “sa pei na fetalai atu le Alii [ia te ia]: ‘Vaai, atalii. E te le manaomiaina se isi lava faalapotopotoga. Ua ou tuu atu ia te oe le faalapotopotoga silisili i luga o le fogaeleele. E leai se mea e sili atu nai lo le faalapotopotoga a le au perisitua. O mea uma e manaomia ona e faia i le lalolagi o le faagalulue lea o le au perisitua. Pau a lena.’”12

O le vaega amata foi lena i o tatou taimi. O lea ua tatou maua le faalapotopotoga a le Alii ua faatulagaina. O la tatou lu’i o le iloa lea pe faapefea ona faaaogaina.

O le mea e amata ai o le faamasani lea o i tatou lava ia i mea ua uma ona faaalia mai e le Alii. E le tatau ona tatou manatu ua tatou iloaina. E tatau ona tatou taulimaina lenei mataupu i se lotomaualalo faatamaitiiti. E ao i tupulaga uma ona aoaoina ni aoaoga faavae fou ia e faavae ai le ala a le Alii i le tausiaina o ē le tagolima. E pei ona faatonuina ai i tatou e le tele o perofeta i le tele o tausaga, o mataupu faavae o le uelefea a le Ekalesia ua le na o ni manatu lelei; ae o ni upumoni ua faaalia mai le Atua—o Ona ala ia e fesoasoani ai i ē le tagolima.

Uso e, ia suesue muamua mataupu faavae ma aoaoga faavae faaalia. Faitau ia tusitaulima e faatatau i le uelefea a le Ekalesia;13 faaaoga le uepisaite o le Initoneti providentliving.org; toe faitau le tusiga o le Liahona o Iuni 2011 e uiga i le fuafuaga o le uelefea a le Ekalesia. Saili i le ala a le Alii e tausia ai Lana Au Paia. Aoao i mataupu faavae o le tausia o ē le tagolima, auauna atu i tuaoi, ma ola faalagolago le tagata ia te ia lava lea e faaatoatoa ai e le tasi le isi. O le ala a le Alii e ola faalagolago ai le tagata ia te ia lava e aofia ai se ala paleni o le tele o elemene o le olaga, e aofia ai aoaoga, soifua maloloina, galuega, mea tau tupe a le aiga, ma le malosi faaleagaga. Faamasani oe lava ia i le polokalama faaonapo nei a le uelefea a le Ekalesia.14

O le taimi lava e te suesueina ai aoaoga faavae ma mataupu faavae o le uelefea a le Ekalesia aoao,ia saili atu e faaaoga mea ua e aoaoina i manaoga o i latou ua i ai i lau tausiga. O le uiga o lenei mea e faapea, i se fuataga tele, o le a e fuafuaina lava e oe. E eseese uma aiga, faapotopotoga, ma nofoaga uma o le lalolagi. E le o i ai se tali aoao se tasi e talafeagai mo tagata uma i le uelefea a le Ekalesia. O se polokalama o le fesoasoani atu o le tagata lava ia lea e nafa ai tagata taitoatasi ma le ola patino faagalogalo o le tagata ia te ia lava. O a tatou punaoa e aofia ai tatalo patino, o a tatou lava taleni ma tomai na tuuina mai e le Atua, o aseta ua tatou maua e ala mai i o tatou lava aiga ma tagata o o tatou aiga lautele, o punaoa eseese mai le nuu, atoa ai ma le lagolago agaalofa a korama o le perisitua ma le Aualofa. O le a taitai atu i tatou e lenei mea i le mamanu musuia o le ola faalagoalgo o le tagata ia te ia lava.

O le a tatau ona faataatia sau fuafuaga e ogatusa ma aoaoga faavae a le Alii ma ia tutusa ma tulaga i le faataatiaga faafaafanua. Ina ia faatinoina ia mataupu faavae paia faaleuelefea, e le manaomia ona e vaai pea i le Aai o Sate Leki. Ae e manaomia ona e vaai i totonu o tusitaulima, i totonu o lou loto, ma i le lagi. Faalagolago i musumusuga a le Alii ma mulimuli i Lana ala.

I le faaiuga, e ao ina e faia i lau eria mea na faia e soo o Keriso i tisipenisione uma: fefautuaai faatasi, faaaoga uma punaoa o loo maua, saili atu i le musumusuga a le Agaga Paia, ole atu i le Alii mo Lana faamautinoaga, ona afe lea i luga o lima o lou ofu, ma alu e galue.

Ou te tuu atu ia te outou se folafolaga, afai tou te mulimuli i lenei mamanu, o le a outou mauaina taitaiga patino e faatatau i le o ai, o le a, o afea, ma pe o gafea o le faia i le ala a le Alii.

O Faamanuiaga o le Faia i le Ala a le Alii

O folafolaga faaperofeta ma faamanuiaga o le uelefea a le Ekalesia, o le faia i le ala a le Alii, o nisi ia o mea e sili ona ofoofogia ma matagofie ua tuuina mai e le Alii i Lana fanau. Na Ia fetalai, “Afai foi e te alofa atu i le ua fiaai, ma e fafaga ia maonao le ua tiga; ona alu ae lea o lou malamalama i le pouliuli, ma lou pogisa e pei o le aoauli ia: e taitaiina foi oe e le aunoa e Ieova.”15

Pe tatou te mauoa pe matitiva, e tusa lava pe o fea tatou te nonofo ai, tatou te manaomia uma le tasi ma le isi, aua o loo i ai i le ositaulagaina o o tatou taimi, taleni, ma punaoa le faaagavaaina o o tatou agaga ma oo ai ina faamamaina.

O lenei galuega o le faia i le ala a le Alii ua le na o se isi mea i le lisi o polokalama a le Ekalesia. E le mafai ona lafoaiina pe tuu ese. E totonugalemu i a tatou aoaoga faavae; o le uiga moni lea o la tatou tapuaiga. Uso e, o lo tatou avanoa sili lea ma le faapitoa o ni e umiaina le perisitua e galueaiina ai le perisitua. E le tatau ona tatou faasaga ese o tatou loto ma o tatou ulu mai le avea ai ma e sili atu ona ola faalagolago ia i tatou lava, tausiaina sili o e le tagolima, ma le tuuina atu o auaunaga agaalofa.

E femiloai faatasi le faaletino ma le faaleagaga. Ua tuuina mai e le Atua ia i tatou lenei aafiaga faale-olaga nei ma luitau faaletino e o mai faatasi e avea ma potu suesue e mafai ai ona tatou tuputupu ae i tagata e finagalo le Tama Faalelagi e avea ai i tatou. Tau ina ia tatou malamalama i le tiute sili ma faamanuiaga e oo mai i le mulimuli ai ma faia i le ala a le Alii o la’u tatalo lea i le suafa o Iesu Keriso, amene.

  1. Mataupu Faavae ma Feagaiga 42:29, 30.

  2. Mataupu Faavae ma Feagaiga 52:40.

  3. Mataupu Faavae ma Feagaiga 104:18.

  4. Tagai i le Mataio 22:36–40.

  5. Mataupu Faavae ma Feagaiga 29:34.

  6. Thomas Merton, Thoughts in Solitude (1956), 46.

  7. Mose 7:18.

  8. J. Reuben Clark Jr., i le Conference Report, Apr. 1937, 22.

  9. Mataupu Faavae ma Feagaiga 104:16; tagai foi i le fuaiupu e 15.

  10. Spencer W. Kimball, i le Conference Report, Apr. 1974, 183, 184.

  11. Tagai i le Mosaea 4:26; 18:27.

  12. Harold B. Lee, transcript of welfare agricultural meeting, Oct. 3, 1970, 20.

  13. Tagai i le Tusitaulima 1: Peresitene o Siteki ma Epikopo (2010), mataupu 5, “Taitaiina o le Uelefea a le Ekalesia”; Tusitaulima 2: Taitaiina o le Ekalesia (2010), mataupu 6, “Mataupu Faavae o le Uelefea ma le Taitaiga”; O Le Faia i le Ala a le Alii: O Se Taiala a le Taitai i le Uelefea (tamaitusi, 2009).

  14. Tusi a Elder Glen L. Rudd o le Pure Religion: The Story of Church Welfare since 1930 (1995), o loo maua mai le Faletusi o le Ekalesia, o se tusi matagofie e suesue ai i aoaoga faavae ma le talafaasolopito o le polokalama o le uelefea a le Alii.

  15. Isaia 58:10–11; tagai foi i fuaiupu e 7–9.