Na Veivueti

LeGrand R. Curtis Jr.

Ena Vitusagavulu


Mai vei Karisito, na tamata sa rawa ni veisautaka na nodra bula me ra rawata kina na veivueti.

E vica na yaca e kilai kina na Turaga o Jisu Karisito. Na veiyaca oqo era vakaraitaka na veika duidui titobu me baleta na ilesilesi ni veisorovaki ni Turaga. Taura, me kena ivakaraitaki, na iulutaga “iVakabula.” E tu kece vei keda na vakasama ni ibalebale ni vakabulai baleta ni o ikeda vakayadua eda a vakabulai ena dua na gauna mai na so na ka. Ni keirau a se gone, o au vata kei ganequ keirau a qito tiko ena dua na waqa lailai ena dua na uciwai ena gauna keirau a biuta kina vakayalowai na vanua taqomaki ni qito ka keirau sa kuitaki sobu ena uciwai ka tawa kilai na kena rawa ni veivakaleqai. Ena kena saumi mai na neirau tagi, a cici mai o tamai keirau me veivueti, ka taqomaki keirau mai na rerevaki ni uciwai. Niu vakasamataka na vakabulai, au vakasamataka sara na ka au sotava o ya.

Na iulutaga “Dauveivueti” e vakaraitaka na vakasama vata. “Mo veivueti” sa ikoya mo volia se mo volia lesu mai. Me vaka na kena vakalawa, e sa vueti mai na iyauqaqa ena kena saumi taucoko tale na mokiti se so tale na dinau e oka kina. Ena gauna ni Veiyalayalati Makawa, na lawa i Mosese e vakarautaka na duidui ni sala e rawa me vagalalataki kina na dauveiqaravi kei na iyauqaqa, se me vueti, mai na saumi ni ilavo (raica na Na Vunau ni Soro 25:29–32, 48–55).

E dua na vosa bibi ena ivolanikalou e vakayagataki kina na veivueti me baleta na nodra vueti na luvei Isireli mai na nodra vesuki tu e Ijipita. Ni oti na veivueti o ya, a kaya vei ira o Mosese: “Sa ka ga ni sa lomani kemuni tiko o Jiova, … sa kauti kemuni tani kina o [Koya] ena liga kaukauwa, ka sa vakabulai kemuni mai na vale ni veivakabobulataki, mai na liga i Fero na tui Ijipita” (Nai Vakarua 7:8).

Na iulutaga ni nona vakabulai ira mai na tiko vakavesu na kai Isireli o Jiova e talevi lesu vakavuqa ena ivolanikalou.Vakawasoma na kena caka oqo me ra nanuma lesu kina na tamata na caka vinaka ni Turaga ena nona vueti ira na luvei Isireli mai vei ira na kai Ijipita. Ia sa vakayacori tale ga me vakavulici ira ni na dua tale, e bibi cake sara, ena nodra vakabulai na Isireli. A vakatavulica o Liai, “Ia ena yaco vakaidina na gauna ena lako mai kina na Mesaia me vakabulai ira na luve ni tamata mai na nodra lutu tani” (2 Nifai 2:26).

A vola na Daunisame: “Ia na Kalou ena vakabula na yaloqu mai na kaukauwa ni bulubulu” (Same 49:15).

Na Turaga a vakaraitaka vei Aisea, “Au sa vakaseavutaka na nomu talaidredre me vaka na o loaloa, kei na nomui valavala ca me vaka na o; mo lesu mai vei au, niu a voli iko” (Aisea 44:22).

Na vakabulai e tukuni tiko ena tolu na ivolanikalou oqo, e ka dina, ni o ya na Veisorovaki i Jisu Karisito. Sa ikoya oqo na “bula levu” a vakarautaka na noda Kalou lomani (Same 130:7). E sega ni vaka na veivueti ena ruku ni lawa nei Mosese se ena i vakarau vakalawa ena gauna oqo, na veivueti oqo e sega ni lako mai ena “veika e caca wale, ena siliva kei na koula” (1 Pita 1:18). “O koya [na Karisito] eda sa rawata kina na bula sa voli ena nona dra, io, na vakabokoci ni ivalavala ca, me vaka na nona loloma levu” (Efeso 1:7). A vakatavulica o Peresitedi John Taylor ni baleta na solibula ni Dauveivueti, “e a saumi na dinau, a yaco na veisereki, a vakataucokotaki na veiyalayalati, a vakayacori na lewa dodonu, a yaco na loma ni Kalou, ka soli ena gauna oqo na kaukauwa kece … ki na liga ni Luve ni Kalou” (Nodra iVakavuvuli na Peresitedi Ni Lotu: John Taylor [2001], 45).

Na veika e tara na veivueti oqo e oka kina na kena vorati na mate vakayago me baleti ira kece na luve ni Kalou. Sa ikoya o ya, na mate vakayago e sa vorati ka da na tucake kece tale mai na mate. E dua tale na irairai ni veivueti oqo mai vei Karisito sa ikoya na qaqa ena mate vakayalo. Mai na Nona vakararawataki ka mate, a sauma o Karisito na ivalavala ca ni tamata kece ga ka na vakatau mai na veivutuni ni tamata yadua.

O koya gona, kevaka eda veivutuni, e rawa me vosoti na noda ivalavala ca, na kena isau sa sauma oti na noda Dauveivueti. Oqo e dua na itukutuku vinaka kivei keda kece sara, “ni sa ivalavala ca ko ira kece ga na tamata, ka ra sega ni yacova na ka e vakarokorokotaki kina na Kalou” (Roma 3:23). O ira era sa lako sese vakavuqa mai na gaunisala ni bula savasava era gadreva vakalevu sara na veivakabulai oqo, ia kevaka e sa taucoko nodra veivutuni, sa dodonu mera qāqā. Ia o ira era sa cakacaka vakaukauwa me ra bulataka na bula vinaka era gadreva vakabibi talega na veivakabulai oqo, baleta ni sa sega ni rawa vua e dua me tu ena iserau nei Tamada ni sega na veivuke nei Karisito. O koya gona, na loloma ni veivakabulai oqo e vakatara na lawa ni dodonu kei na loloma veivueti me vakadonui ena nodra bula kece sara o ira era sa veivutuni ka muri Karisito.

Dokai, ka rogo, ka tudei,
Tuvatuva talei,
Lewa, dodonu, loloma
Na bula vakalou!
(“Dokai na Vuku kei na Loloma,” Serenilotu, naba 101)

A vakatavulica o Peresitedi Boyd K. Packer: “E dua tiko na Dauveivueti, na Dauveisorovaki, ka tuvakarau ni sa rawa vua me vakameautaka na qāqā ni lewadodonu ka solia na loloma veivueti kivei ira era sa vakararawataki” (“The Mediator,” Ensign, May 1977, 56).

Na ivolanikalou, ivola volai, kei na veika e sotavi ena bula era vakasinaiti ena italanoa ni veivueti. Mai vei Karisito, na tamata sa rawa ni veisautaka na nodra bula me ra rawata kina na veivueti. Au taleitaki ira na italanoa ni veivueti oqo.

E dua tiko na noqu itokani ka a sega tu ni muria na ivakavuvuli ni Lotu ni se cauravou lailai. Ena nona sa isausau vou mai kina, sa qai kidava na ka e yali vua baleta nona sa sega ni bulataka na kosipeli. A veivutuni, veisautaka na nona bula, ka yalodina ena nona bulataka na bula dodonu. Ena dua na siga, ni oti e vica na yabaki neirau veikilai vakaitabagone, au sotavi koya ena valetabu. A cila mai matana na rarama ni kosipeli, kau vakila ni sa dua na lewe ni Lotu yalodina ka tovolea tiko me taucoko nona bulataka na kosipeli. Sa italanoa ni veivueti na kena italanoa.

Ena dua na gauna au a vakataroga e dua na marama ka cala ena dua na ivalavala ca rarawataki vakalevu me baleta na papitaiso. Ena gauna ni veivakatarogi au taroga kevaka e kila ni sa na sega ni dodonu me vakaruataka tale na ivalavala ca o ya. Ena luvuci titobu ni lomana ka laurai e matana kei na nona ivosavosa, a kaya, “Io peresitedi, au na sega vakadua tale ni cakava na ivalavala ca o ya. Sa ikoya oqori na vuna au via papitaiso kina—me vakasavasavataki au mai na ka e kauta mai na ivalavala ca vakasisila o ya.” Sa italanoa ni veivueti na kena italanoa.

Ena noqu veisiko ena vica na yabaki oqo ena veikoniferedi kei na veisoqoni tale eso ni iteki, au nanuma na bolebole nei Peresitedi Thomas S. Monson ena nodra vueti o ira na lewe ni Lotu era sa luluqa tu. Ena dua na koniferedi ni iteki au a talanoataka kina e dua na italanoa me baleta e dua na lewenilotu ka sa luluqa tu ka sa qai lesu tale mai ena taucoko ni nona itaviqaravi ni oti na nona a laki sikovi koya ena nona vale na nona bisopi kei ira tale eso na iliuliu, tukuni vua ni sa gadrevi o koya, ka kacivi koya me veiqaravi ena tabanalevu. Na turaga e talanoataki tiko oqo e sega wale ga ni ciqoma na veikacivi ia a veisautaka na nona bula kei na nona ivakarau ka yaco me taucoko sara nona lesu mai ki na Lotu. A sega walega ni ciqoma na tagane ena italanoa oqo na kaci ia a veisautaka talega na nona bula kei na nona itovo ka yaco me gugumatua sara ena Lotu.

E dua na noqu itokani a tiko ena ivavakoso au a talanoataka tiko o ya. E laurai ni veisau na kena irairai ena kena talanoataki tiko na italanoa. Ena siga ka tarava a vakauta mai vei au e dua na imeli ka tukuna tiko mai kina na yavala ni lomana me baleta na italanoa kei tamai watina ena nona a lesu tale ki Lotu ka ni tautauvata sara ga kei na kena au a talanoataka tiko. A tukuna vei au ni kena yaco na veisiko vata ga mai vua e dua na bisopi kei na veisureti me veiqaravi ena Lotu, a dikeva tale kina o tamai watina na nona bula kei na nona ivakadinadina, yaco na veisau levu ena nona bula, ka ciqoma na veikacivi. Na tamata ka vakaqaqacotaki tale mai o ya e sa 88 na nona kawa tamata era sa lewe ni Lotu bulabula sara.

Ena dua na soqoni ni oti e vica na siga e muri, au a talanoataka kina na italanoa ruarua oqori. Ena siga ka tarava au ciqoma tale kina e dua na imeli ka tekivu toka vakaoqo, “Oqori tale ga na italanoa nei tamaqu.” Na imeli oqori, mai vua e dua na peresitedi ni iteki, ka tukuna kina na sureti nei tamana me veiqaravi ena Lotu, e dina ga ni sa luluqa tu ena so na ivakarau ka gadrevi me veisautaki. A ciqoma na veisureti, kei na kena icakacaka, veivutuni, a qai yaco me veiqaravi me dua na peresitedi ni iteki ka qai peresitedi ni tabana ni kaulotu, ka tuva na yavudei me baleta na nona kawa era muri mai me ra lewe ni Lotu yalodina.

Ni oti e vica na macawa au talanoataka kece na tolu na italanoa ena dua tale na koniferedi ni iteki. Ni oti na soqoni, a lako mai vei au e dua ka tukuna vei au ni o ya e sega ni italanoa kei tamana. O ya na kena italanoa. A tukuna vei au na veika a yaco ka vakavuna na nona veivutuni ka lesu tale mai me vakataucokotaka na nona vakaitavi ena Lotu. Sa toso sara. Niu sa mai colata na veikacivi ni nodra laki vueti mai na luluqa vakalotu, au raica ka rogoca na kedra italanoa vakavuqa eso era sa ciqoma na veisureti mera lesu mai ka veisautaka na nodra bula. Au a rogoca na veimataqali italanoa ni veivueti.

E dina ga ni sega ni rawa me da sauma lesu na Dauveivueti ena veika a sotava me baleti keda, na ituvatuva ni veivueti e gadreva na uasivi ni noda sasaga me taucoko na noda veivutuni ka vakayacora na lewa ni Kalou. A vola na i Apositolo o Orson F. Whitney:

iVakabula, Dauveivueti ni yaloqu,
Na ligana cecere sa vakataucokotaki au,
Na nona kaukauwa lagilagi sa tuberi au cake
Sa kamica kina na mequ bilo ni rarawa!
Na vosa vinaka cava meu na cavuta,
Oi kemuni na Kalou ni Isireli dauloloma.
Sa sega ni rawa meu sauma lesu yani, Turaga,
Ia sa rawa meu lomani kemuni. Nomuni vosa savasava,
Sa noqu marau dina sara oqo,
E noqu reki ena siga, ka noqu tadra ena bogi?
Sa yavala na tebenigusuqu me kaburaka yani,
Mana na nomuni lewa ki na noqu bula taucoko.
(“Savior, Redeemer of My Soul,” Hymns, no. 112)

Au vakadinadinataka na kaukauwa ni Veisorovaki nei Karisito. E rawa me da ciqoma na veivakalougatataki kece ni bula tawamudu, ena noda veivutuni ka lesu mai Vua. Meda vakayacora vakakina, ka ciqoma na noda italanoa ni veivueti vakai keda, sa noqu masu ena yaca i Jisu Karisito, emeni.