Te mau haapiiraa a Iesu

Te faahiti nei te Bibilia i te haapiiraa a Iesu, « i haere mai nei au ia noaa to ratou ora, e ia rahi atu â te ora » (Ioane 10:10). I muri mai, i roto i te Ao Apî, ua parau Oia e, « o vau te maramarama e te ora o teie nei ao » (3 Nephi 11:11). Oia te Ora no teie nei Ao no te mea Na’na i hamani ia tatou, e no te mea, na roto i To’na Ti‘a-faahou-raa, ua papû maitai ia tatou paato‘a e, e ora faahou â tatou. E te ora Ta’na i horo‘a ia tatou e ere ïa i te ora tahuti noa. Ua haapii mai Oia e, « E horoa’tu â hoi au i te ora mure ore no ratou ; e ore roa ratou e pohe, e e ore roa hoi ratou i roto i tau rima nei e riro i te haru ia vetahi ê » (Ioane 10:28 ; a hi‘o ato‘a Ioane 17:2).

Ua haapii atoa mai Iesu e, « o vau te maramarama o teie nei ao, o te pee mai ia’u ra, e ore ïa e haere noa i te pouri ». (Ioane 8:12). Ua parau atoa oie e, « O vau te e‘a, e te parau mau, e te ora » (Ioane 14:6). O Oia te E‘a e o Oia te Maramarama no te mea na Ta’na mau haapiiraa e turama nei i to tatou haere‘a i roto i te oraraa tahuti nei, e e faaite ia tatou i te e‘a no te ho‘i i piha‘iho i te Metua ra.

Ua faatura tamau noa o Iesu i te Metua e ua pee Ia’na. Oia’toa i To’na apîraa ua parau Oia i To’na na metua i te tino nei e, « Aita orua i ite e, ia haapao vau i ta tau metua e tia‘i » (Luka 2:49). I muri iho, ua haapii Oia, « i pou mai nei hoi au mai te ra‘i mai e haapao i to tei tono mai ia’u nei hinaaro, eiaha to’u iho hinaaro » (Ioane 6:38 ; a hi‘o ato‘a Ioane 5:19). E ua haapii mai te Faaora e, « Aore roa e taata e tae i te Metua ra, maori râ ei ia’u » (Ioane 14:6 ; a hi‘o ato‘a Mataio 11:27).

E ho‘i tatou i te Metua ra na roto i te haapa‘oraa i To’na hinaaro. Ua haapii mai Iesu e, « E ore te feia e parau mai ia’u ra e, E te Fatu, e te Fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra » (Mataio 7:21). Ua faataa Oia :

« E rave rahi te parau mai ia‘u ia tae i taua mahana ra, E te Fatu, e te Fatu, e ere anei ua haapii matou ma to oe i‘oa, e ua tatai i te mau demoni i to oe i‘oa, e ua rave i te semeio e rave rahi i to oe i‘oa ?

« O ta’u ïa e parau atu, Aita roâ vau i ite ia outou. E haere ê atu outou, e te feia rave parau ino » (Mataio 7:22–23).

No reira o vai o te tomo i roto i te basileia o te ra‘i ra ? E ere ïa te mau taata tei rave noa i te mau ohipa nehenehe ma te faaohipa i te i‘oa o te Fatu, ta Iesu ïa i haapii mai, « o te taata râ i haapao i te hinaaro o tau Metua i te ao ra ».

Ua faaite mai Iesu ia tatou e nahea ia rave i te reira. Ua ani-manihini faahou mai â Oia ia tatou ia pee Ia’na : « E faaroo mai ta’u ra mamoe i to’u reo, ua ite au ia ratou, e e pee mai hoi ratou ia’u » (Ioane 10:27).

Ua horo‘a oia i te mana o te autahu‘araa i Ta’na mau Aposetolo (a hi‘o Mataio 10:1) e ia vetahi ê. Na ô atura Oia ia Petero te Aposetolo faatere, « E e horoa’tu hoi au i te mau taviri o te basileia o te ao ra ia oe e ta oe e haamau i raro nei, e haamau-atoa-hia ïa i te ao ; e ta oe e tuu i raro nei, e tuu-atoa-hia ïa i te ao » (Mataio 16:19 ; a hi‘o ato‘a Mataio 18:18).

Te papa‘i nei o Luka e, « ua haapao atura te Fatu i e hitu ahuru, e tatoopiti atura i te tonoraa ia ratou na mua ia’na, i te mau oire e te mau vahi atoa ta’na i opua ra e e haere atoa oia i reira » (Luka 10:1). I muri mai, ua parau atura teie mau Hitu Ahuru ia Iesu ma te oaoa, « Ua vi atoa te mau demoni ia matou i to i‘oa na » (Luka 10:17). Ua ite au i taua mana o te autahu‘araa ra.

I te pae hopea o ta’na tau misioni i te fenua nei, ua haapii atu Iesu i Ta’na mau Aposetolo, « Na te Faaa‘o na te Varua maitai ra, o ta te Metua e tono mai ma to’u nei i‘oa ra, na’na e haapii mai ia outou i te mau mea atoa ; e e faaite faahou mai hoi ia outou i te mau parau atoa ta’u i parau atu ia outou na » (Ioane 14:26), e « [na’na] e aratai ia outou i te mau parau mau atoa ra » (Ioane 16:13).

E arata‘i atoa Oia ia tatou na roto i Ta’na mau faaueraa. No reira, ua faaue atura oia i te Ati Nephi e, eiaha ratou e mârô faahou i ni‘a i te mau parau haapiiraa, no reira, na ô atu ra Oia :

« O tei roto ia’na te varua mârô ra, e ere oia i ta’u, no te diabolo râ, o te metua oia no te mârô, e ua faaitoito oia i te aau no te taata e mârô ai te tahi i te tahi ma te riri.

« Inaha, e ere teie i te ture na’u, ia faaitoito i te aau o te taata i te riri te tahi i te tahi ; teie râ ta’u ture, ia faaruehia te reira » (3 Nephi 11:29–30).

Ua titau atoa mai Oia ia tatou ia faatumu i ni‘a Ia’na, eiaha i ni‘a i te mau mea o te ao nei. I roto i Ta’na a‘oraa no ni‘a i te pane ora, ua faataa mai Iesu i te taa-ê-raa i rotopu i te maa tahuti e te maa mure ore. Na ô maira Oia e, « Eiaha e ohipa i te maa tahuti noa, i te maa râ e tia i te vairaa e tae noa’tu i te ora mure ore ra, o ta te Tamaiti a te taata e horoa mai na outou na » (Ioane 6:27). Ua haapii mai te Faaora e, o Oia te Pane Ora, te tumu o te maa mure ore. No ni‘a i te maa tahuti ta te ao e horo‘a nei, e tae noa’tu i te manna ta Iehova i tuu mai no te faaamu i te mau tamarii Iseraela i roto i te medebara, ua haapii mai Iesu e, te feia o tei ti‘aturi i taua pane ra ua pohe ïa ratou i teie nei (a hi‘o Ioane 6:49). Area te maa Ta’na i horo‘a ra, o te « pane ora ïa tei pou mai mai te ra‘i », e ua haapii mai Iesu e, « o te amu i teie nei pane, e ti‘a ïa i te oraraa » (Ioane 6:51).

Ua parau te tahi pae o Ta’na mau pĭpĭ e, « e parau riaria » teie, e mai taua taime ra, e rave rahi o tei pee Ia’na ra, « ua faarue maira e aita i pee faahou ia’na » (Ioane 6:60, 66). Mai te mea ra e, aita ratou i farii i Ta’na haapiiraa na mua’tu, oia hoi, e ti‘a ia ratou ia « imi i te basileia o te Atua na mua roa » (Mataio 6:33). Tae roa mai i teie mahana, te tahi mau taata o te parau nei e, e Keretetiano ratou, ua hau a‘e ïa ratou i roto i te mau mea o te ao nei—te mau mea e paturu nei i te ora i te fenua nei, aore râ e horo‘a nei i te maa e tae atu ai i te ora mure ore ra. No te tahi pae, teie « mau parau riaria » Ta’na, te riro noa nei â ïa ei tumu no te oreraa e pee i te Mesia.

Te taime teitei roa a‘e o te tau ohiparaa a te Faaora i te tahuti nei, o To’na ïa Tia-faahou-raa e To’na Taraehara no te hara a to te ao nei. Ua tohu o Ioane Bapetizo i te reira i te na-ô-raa e, « a hi‘o na i te Arenio a te Atua, o tei hopoi ê atu i te hara o te ao nei » (Ioane 1:29). I muri mai, ua haapii mai Iesu e, « te Tamaiti a te taata i haere mai … e tavini râ, e ia horoa i to’na ora ei hoo no te taata e rave rahi » (Mataio 20:28). I te Tamaaraa Hopea, ia au i te papa‘iraa a Mataio, ua haamaramarama mai Iesu e, te uaina Ta’na i haamaitai o To’na ïa toto « no te faufaa apî, i haamaniihia no te taata e rave rahi ia matara te hara » (Mataio 26:28).

I to’na fâraa mai i to te Ati Nephi, ua ani manihini oia ia ratou ia haere mai e ia hi‘o i te puta i roto i to’na aoao e te puta o te naero i roto i To’na na rima e To’na na avae. Ua faataa mai Oia e, ua rave Oia i te reira « ia ite outou e, o vau te Atua no Iseraela, e te Atua no to te ao atoa nei, e tei pohe no te mau hara a to te ao nei » (3 Nephi 11:14). E te faaite faahou ra te aamu e, ua ma‘iri ihora te nahoa taata « i te pae avae no Iesu, haamori atu ai ia’na (irava 17). No te reira to te ao atoa nei e haamori ai Ia’na i te hopea ra.

Ua haapii faahou Iesu i te tahi atu â mau parau mau faufaa rahi no ni‘a i To’na Taraehara. Te haapapû maitai mai nei te Buka a Moromona i te mau haapiiraa a te Faaora e ua horo‘a mai i te haamaramaramaraa maitai a‘e no ni‘a i Ta’na misioni, mau parau no teie haapiiraa :

« I tono mai tau Metua ia’u ia faateiteihia vau i nia i te satauro …, ua ume mai au i te mau taata atoa ra ia ‘u …

« … ia haavahia i ta ratou mau ohipa.

« E … o te tatarahapa e te bapetizohia i to’u ra i‘oa, e faaîhia ïa ratou ; e ia tamau â e tae noa’tu i te hopea, ihaha, o te ore ïa ratou e faahapahia e au i mua i te Metua ia tae i te mahana e tia‘i au e haava i to teie nei ai …

« E ore e ô te mea viivii i roto i to’na basileia ; no reira e ore te taata e tomo i roto i to’na faaearaa, maori râ o tei mâ to ratou ahu i to’u ra toto, no to ratou faaroo, e te tatarahapa i ta ratou mau hara, e ta ratou tamau-maite-raa e tae noa’tu i te hopea » (3 Nephi 27:14–16, 19).

E no reira te taa ra ia tatou e, ua horo‘a mai te Taraehara a Iesu Mesia i te rave‘a ia upooti‘a tatou i ni‘a i te pohe varua tei tae mai na roto i te hara, e ia farii i te mau haamaitairaa o te ora mure ore na roto i te raveraa e te haapa‘oraa i te mau fafauraa mo‘a.