Na iVola i Momani—a iVola Mai Vua na Kalou

Tad R. Callister

Ena Mataveiliutaki ni Vitusagavulu


Ni duavata kei na iVola Tabu, sa yaco na iVola i Momani me dua na ivakadinadina bibi ni vunau i Karisito kei na Nona Vakalou.

Ena vuqa na yabaki sa oti a taura kina ena imatai ni gauna e dua na iVola i Momani o tukaqu vakatolu. A cega sara e loma ka wilika e vica na drauna. A qai kaya kina, “Na ivola o ya ke sega ni vola na Kalou e vola na tevoro, au na vakadikeva mada o cei e vola dina.” A wilika tasevu vakarua ena tini na siga a qai kaya vakaoqo, “E sega ni vola rawa na tevoro na ivola oqo—sa mai vua na Kalou.”1

Oqori na ka taleitaki cecere ni iVola i Momani—e sega tale na kena veiba. Ke sega ga ni vosa ni Kalou me vaka sa vakadinadinataki, sa ivola lasu dina. Na ivola oqo e sega walega ni vakadinadinataka tiko ni ivakavuvuli ni bula savasava se vosa ni veika vakalotu se isokomuni ni vosa e veivakararamataki. E tukuna tiko ni vosa ni Kalou—na iyatuvosa yadua, na veitikina yadua, na draunipepa yadua. A tukuna o Josefa Simici ni a dusimaki koya e dua na agilosi ni Turaga ki na peleti koula, ka umani tu kina na nodra itukutuku na parofita ena gauna makawa mai Amerika, ka a vakadewataka na peleti oqori ena kaukauwa vakalou. Kevaka e dina na italanoa o ya, sa ivolanikalou savasava dina na iVola i Momani, me vaka ga ni sa tukuna tiko; ke sega, sa qai dua ga na lasu butobuto ka vereverea sara.

E tukuna kina o C. S. Lewis na digidigi vakaoqo me baleta e dua, ka dodonu vua me ciqoma se cakitaka ni sa vakalou dina na iVakabula—ena gauna ka sa sega talega ni rawa me veibataki kina: “Au saga tiko oqo meu tarova e dua mai na nona cavuta na veika lialia era dau kaya na tamata me baleti Koya: ‘Au sa tu vakarau meu ciqomi Jisu me noqu qasenivuli cecere savasava, ia au sega ni ciqomi Koya me Kalou. ‘Oqori e dua na ka meda kakua sara ni cavuta. Vua e dua na tamata, dina ga sa kaya na veika sa dau cavuta o Jisu, ena sega sara ni rawa me na dua na qasenivuli cecere savasava. … Mo na digidigi ga eke. Ke sega ga ni a, se sa, Luve ni Kalou na tamata oqo: e sa dua na tamata lialia se ka vakatani sara. … Ia meda kakua ga ni veivakalomavinakataki tiko vakaca, me o Koya e dua tu ga na qasenivuli cecere vakatamata. E se bera ni dolava vei keda o Koya na ka o ya. E sega ni Nona inaki talega.”2

Sa vakakina, meda sa digidigi ga baleta na iVola i Momani: ke sega ga ni mai vua na Kalou sa mai vua na tevoro. Sai koya sara ga o ya. Au sureti kemuni ena gauna oqo mo ni taura mada e dua na veitarogi ka na vukei kemuni mo ni raica na ituvaki dina ni ivola oqo. Tarogi kemuni mada, na ivolanikalou oqo mai na iVola i Momani e kauti kemuni vakavoleka vua na Kalou se vua na tevoro:

“Mo dou tugana ki lomamudou na vosa i Karisito; raica na vosa i Karisito sa tukuna vei kemudou na veika kece mo dou kitaka” (2 Nifai 32:3).

Se na nona veimalanivosa oqo e dua na tama dau loloma vua na luvena tagane: “Ia oi kemudrau na luvequ, mo drau nanuma mo drau tara na nomudrau yavu ena uluvatu ni noda iVakabula, sai Koya na Karisito na Luve ni Kalou” (Ilamani 5:12).

Se na nona veimalanivosa oqo e dua na parofita: “Io dou lako vei Karisito, ka biuta tani na ivalavala sa sega ni vakalotu, mo dou vinaka kina” (Moronai 10:32).

Ena rawa beka me a vola na itukutuku oqo mai na iVola i Momani o koya na tevoro? Ni sa oti na nona cemuri ira laivi na tevoro na iVakabula, era a kaya na Farisi ni a vakayacora “ena kaukauwa ga i Pielisepupi na nodra turaga na tevoro.” A qai kaya kina na iVakabula ni sa ka lialia sara na vakasama o ya ni: “Matanitu yadua,” a kaya o Koya, “sa veisei vakai koya, ena vakarusai; kei na … vale sa veisei vakai koya ena sega ni tudei.” A qai tinia ena kena usutu: “Ia kevaka sa vakasevi Setani ko Setani, sa qai veisei vakai koya; ena qai tudei vakaevei na nona matanitu?” (Maciu 12:24–26; vakamatatataki).

Kevaka era vakavulica vei keda na ivolanikalou oqori mai na iVola i Momani meda sokalou ka lomana ka qarava na iVakabula (ni ra sa tukuna dina), era sa qai vu vakacava mai vua na tevoro? Ke sa vakakina, ena tawasei koya vakai koya ka vakarusa ga na nona matanitu, na ituvaki oqo e kaya na iVakabula ni sega ni yaco rawa. Na nona wilika e dua na tamata ena dina, sega ni vakalewa na iVola i Momani ena kauti koya me vakadeitaka kina vakataki tukaqu vakatolu o ya: “A sega ni vola rawa na tevoro na ivola oqo—sa mai vua na Kalou.”

Ia na cava e rui bibi kina na iVola i Momani ni sa tu rawa vei keda oqo na iVola Tabu me vakavulica vei keda na veika baleti Jisu Karisito? Ko sa bau vakasamataka mada na vuna sa rui levu tu kina na lotu Vakarisito e vuravura nikua, ka ra kauta mai na nodra vunau ena iVola Tabu vata ga? Sa baleta ga ni duidui na nodra vakadewataka na iVola Tabu. Kevaka e tautauvata na nodra vakavakadewa, era na yaco me dua ga na lotu. Oqo e sega ni ituvaki e gadreva na Turaga, ni sa vakaraitaka kina o Paula na Apositolo ni sa “duabau ga na Turaga, sa duabau ga na vakabauta, sa duabau ga na veipapitaisotaki” (Efeso 4:5). Me na vakayacori na veivakaduavatataki oqo, sa tauyavutaka kina na Turaga e dua na lawa vakalou ni ivakadinadina. A vakavulica kina o Paula, “Ena vakadinadinataki na vosa kecega e na gusu ni vakadinadina e lewe rua, se lewe tolu” (2 Korinica 13:1).

Na iVola Tabu sa dua na ivakadinadina i Jisu Karisito; sa dua tale na iVola i Momani. Na cava sa rui bibi kina na ikarua ni ivakadinadina oqo? E na veivuke kina na vakasama oqo: Ena vica na laini dodonu ko na rawa ni vola mai na dua ga na itoqa? Na kena isau e vakaitamera. Meda raica mada vakalekaleka, ni itoqa o ya e matataka tiko na iVolatabu ka drau sara na laini dodonu era volai mai na itoqa o ya e matataka na veimataqali vakavakadewa ni iVola Tabu ka sai ira oqori na veimataqali duidui lotu yadua.

Na cava ena yaco, o ya, kevaka e tiko ena draunipepa o ya e dua tale na itoqa e matataka tiko na iVola i Momani? Ena vica beka na laini dodonu o na vola rawa ena kedrau maliwa na itoqa vakayavu oqo: na iVola Tabu kei na iVola i Momani? E dua walega. E dua ga na ivakadewa ni vunau i Karisito ena bula tiko ena ivakadinadina ni rua na ivakadinadina bula oqo.

Sa na yaco ka yaco tikoga na iVola i Momani me ivakadinadina veivakadeitaki, veivakamatatataki, ka veivakaduavatataki ni vunau e vakavulici tiko ena iVola Tabu ni sa “duabau ga na Turaga, sa duabau ga na vakabauta, sa duabau ga na veipapitaisotaki.” Me vakataka, ni so era veilecayaki tiko me baleta na bibi ni papitaiso ki na veivakabulai ka dina ga ni a kaya na iVakabula vei Nikotimo, “Kevaka sa sega ni sucu e dua e na wai kei na Yalo Tabu, ena sega ni curu rawa ki na matanitu ni Kalou” (Joni 3:5.) Ia, na iVola i Momani, e tagutuva taucoko na lomatarotaro ena vuku ni ulutaga o ya: “A sa vakaroti ira na tamata kecega me ra veivutuni ka papitaiso e na yacana, … kevaka e sega era na sega ni rawata na matanitu ni Kalou” (2 Nifai 9:23).

Ena vuravura nikua sa bini tu na veimataqali iwalewale ni veipapitaisotaki ka dina ga ni sa tukuna vei keda na iVola Tabu na kena ivakarau dina a papaitaisotaki kina na iVakabula, na noda Daunivakaraitaki cecere: “Sa cabe sara mai na wai [o Koya]” (Maciu 3:16). A rawa beka vua me cabe mai na wai kevaka a sega lako sobu taumada kina? E dua beka na duidui e tiko baleta na ulutaga oqo, ena bokoca laivi na ka oqo na iVola i Momani ena itukutuku dodonu ni vunau baleta na ivakarau dodonu ni papitaiso: “Ia ni sa oti oqo mo qai tabadromuci koya e na wai” (3 Nifai 11:26).

E vuqa era vakabauta ni sa mai oti na ivakatakila ena iVola Tabu ka dina ga ni iVola Tabu vakataki koya sa ivakadinadina ni ivakarau ni vakatakila ni Kalou ena 4,000 na yabaki ni bula ni tamata. Ia mai na dua na vunau cala vakaoqo sa vaka e dua na buloko ni domino lalai ka vakavuna na nodra veilutulutuki yani na kena vo se na kedra veilutulutuki yani na vunau dodonu. Na vakabauta ni kena sa mai oti na ivakatakila e vakavuna me lutu na vunau ni sa “ikoyakoya tikoga na Kalou ena siga sa oti, e na siga edaidai, ka tawamudu” (Mormon 9:9); e vakavuna me lutu na vunau a vakavulica o Emosi ni na “sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita” (Emosi 3:7) ka sa vakavuna me lutu na vunau ni “Sa sega ni digitaki ira vakailoa na tamata na Kalou” (Cakacaka 10:34) ka lutu vakakina na nona vosa vei ira na tamata ni veigauna kecega. Ia e ka ni marau ni sa mai vakadinadinataka na iVola i Momani na dina Vakaivolatabu ni sa tomani tikoga na ivakatakila:

“Au na vosa talega vei kemudou sa cakitaka na ka sa vakatakila na Kalou, ka kaya ni sa oti ka sa sega na ivakatakilakila se parofisai. …

“Eda sa sega li ni wilika ni sai koyakoya tikoga na Kalou ena siga sa oti, ena siga edaidai, kei na veisiga e muri … ?” (Momani 9:7, 9).

Ena dua tale beka na kena itukutukuni, kevaka a vosa na Kalou, o Koya sa sega ni dauveivukiyaki, ena veigauna makawa, ena vosa vakakina ko Koya ena gauna oqo.

Na lisi ni veivakadeitaki vakaivunau kei na veivakamatatataki ena toso tikoga ka toso tikoga ia e sega ni dua e kaukauwa se veirawai vakalevu cake me vakataka na ivakavuvuli ena iVola i Momani me baleta na Veisorovaki i Jisu Karisito. O na vinakata beka me vakadeitaki e yalomu e dua na ivakadinadina sega ni vakabekataki ni iVakabula sa lako sobu mai ki na nomu ivalavala ca ka sa sega na ivalavala ca, se ituvaki ca ni tamata e sega ni kovuti ena liga loloma vakalou ni Nona Veisorovaki—ni sa tiko na Nona iwali veivakabulai cecere kaukauwa ki na nomuni veika dredre yadudua? Mo wilika sara na iVola i Momani. Ena vakavulica vei iko ka vakadinadinataka ni Veisorovaki i Karisito sa vakaitamera baleta ni kovuta ka umana ka cecere duadua mai na veimalumalumu kecega ni tamata se bau kilai. Oqo na vuna a vakaraitaka kina o parofita Momani, “Raica sa nomudou inuinui na isoro i Karisito” (Moronai 7:41).

E sega ni da kurabui ni tukuna kina vakadoudou na iVola i Momani, “Ia kevaka dou sa vakabauta na Karisito, dou na vakabauta na vosa oqo, ni sa ikoya oqo na vosa i Karisito” (2 Nifai 33:10). Ni duavata kei na iVola Tabu, sa yaco na iVola i Momani me dua na ivakadinadina bibi ni vunau i Karisito kei na Nona Vakalou. Ni duavata kei na iVola Tabu, sa “vakavulici ira na tamata kecega me ra kitaka na ka vinaka” (2 Nifai 33:10). Sa duavata kina kei na iVola Tabu, me kauti keda ki na “duabau ga na Turaga, sa duabau ga na vakabauta, sa duabau ga na veipapitaisotaki.” Oqori na vuna sa rui ka bibi kina ena noda bula na iVola i Momani.

Ena vica na yabaki sa oti au a tiko ena dua na veituberi vakavuli mai Toronto, e Kenada. A vosa kina e dua na goneyalewa yabaki 14. A kaya ni a veiwasei tiko vakalotu kei na dua na itokani e koronivuli. A kaya vua na itokani oqo, “O lotu cava?”

A sauma, “Na Lotu i Jisu Karisito ni Yalododonu Edaidai, se Momani.”

A sauma o nona itokani, “Au kila na Lotu oqori, kau kila ni sega ni dina.”

“O kila vakacava?” a saumi mai.

“Baleta,” a kaya o nona itokani, “Niu sa vakadikeva oti.”

“O sa wilika beka na iVola i Momani?”

“Sega,” a saumi mai.“Se bera.”

A qai sauma na goneyalewa vinaka oqo, “Ia o se bera dina ni vakadikeva na noqu lotu baleta au sa wilika na draunipepa yadua ni iVola i Momani kau kila ni dina.”

Au sa wilika talega na draunipepa yadua ni iVola i Momani, ka wilika, ka se baci wilika tale, ka sa noqu ivakadinadina malumalumu oqo, me vakataki tukaqu vakatolu, ni sa mai vua na Kalou. Ena yaca i Jisu Karisito, emeni.

Show References

  1.  

    1. Willard Richards, ena LeGrand Richards, A Marvelous Work and a Wonder, railesuvi, vakadodonutaki (1972), 81, 82.

  2.  

    2. C. S. Lewis, Mere Christianity (1952), 40–41.