Na Bibi ni Dua na Yaca

Elder Hales, ena vukui keimami kece sara, keimami vakaraitaka tiko na neimami loloma levu titobu ka vakavinavinakataka na nomuni mai tiko rawa eke ena mataka nikua.

Me tekivu mai na koniferedi raraba ni Epereli sa oti, sa dau tiko ga na noqu vakasama ena ulutaga ni kena bibi e dua na yaca. Ena loma ni vica na vula sa oti oqo, sa tadu mai ki na neitou matavuvale e vica na makubuqu vakarua. E dina ni vaka me totolo cake na nodra yaco mai, kau sega soti ni vakila sara vakavinaka, ia sa ka marautaki na nodra yaco mai na ikuri ni neitou matavuvale oqo. Era sa vakatokayacataki yadua ena dua na yaca mera na kilai tu kina ena nodra bula taucoko, ka vakaduiduitaki koya mai na tamata kecega. E dina oqo ena veimatavuvale kecega, ka dina talega ena veimatalotu kecega.

E kila na Turaga o Jisu Karisito na kena bibi me vakamatatataki na yaca ni Nona Lotu ena veigauna e muri oqo. Ena ika 115 ni iwase ni Vunau kei na Veiyalayalati, e vakayacana sara ga kina o Koya na Lotu: “Raica ena yaca ni Noqu lotu Na Lotu i Jisu Karisito ni Yalododonu Edaidai” (tikina e 4).

Ka a vakavulici ira na nona tamata na Tui o Penijamini ena gauna ni iVola i Momani:

“Ia mo dou taura matua ga na yaca i Karisito, koi kemudou kece sa veiyalayalati mo dou talairawarawa vua na Kalou me yacova na mate. …

“Mo dou kila sara ni oqo na yaca au a yalataka niu na solia vei kemudou ka na sega ni bokoci laivi, ia ena bokoci ga kevaka dou sa ivalavala ca; dou qarauni kemudou vinaka mo dou kakua ni ivalavala ca, de na bokoci laivi kina na yacana” (Mosaia 5:8, 11).

Eda taura vei keda na yaca i Karisito ena wai ni veipapitaisotaki. Eda dau vakavouya na mana ni papitaiso oqori ena veimacawa ena noda vakaivotavota ena sakaramede, ka da vakaraitaka kina na noda lomasoli me da taura na Yacana ka da yalataka tikoga me da dau nanumi Koya (raica na V&V 20:77, 79).

Eda kila beka na noda kalougata ena noda taura vei keda na yaca ni Luvena Daulomani e Duabau ga na Kalou? Eda kila beka na kena bibi oqori? Na yacana duadua ga na iVakabula na yaca e soli ena rukui lomalagi me rawa kina ni vakabulai na tamata (raica na 2 Nifai 31:21).

Me vaka o ni na nanuma, a vosa o Peresitedi Boyd K. Packer me baleta na bibi ni yaca ni Lotu ena koniferedi raraba ni Epereli sa oti. E vakamacalataka kina “ni da talairawarawa ki na ivakatakila, eda sa qai vakatokai keda Na Lotu i Jisu Karisito ni Yalododonu Edaidai ka sega ni Lotu Momani” (“Dusimaki ena Yalo Tabu,” Liaona, Me 2011, 30).

Me vaka ni sa rui bibi na yaca taucoko ni Lotu, au vakavoqataka kina na ivakatakila ni ivolanikalou, na nodratou veidusimaki na Mataveiliutaki Taumada ena ivola eso ni 1982 kei na 2001, kei na nodra vosa na iApositolo tale eso ka ra vakauqeti ira tiko na lewe ni Lotu me ra tutaka ka vakavulica ki vuravura ni vakatokai na Lotu ena yaca ni Turaga o Jisu Karisito. Oqo na yaca ena kacivi keda kina na Turaga ena veisiga mai muri. Sai koya na yaca ena kilai tani kina na Nona Lotu mai vei ira na kena vo.

Au sa dau vakasamataka vakalevu na cava na vuna e vakatoka kina na Nona Lotu vakalesui mai na iVakabula ena yaca ka ciwa na kena vosa oqo. Sa na rui balavu beka, ia kevaka eda vakasamataka ena ivakamacala raraba ni veika e tutaka na Lotu, sa yaco kina me totoka ka lekaleka vinaka, matata, ka rawarawa. E rawa vakacava ni dua na ivakamacala me vakadodonu ka matata ka vakamacalataki ga ena vica na vosa?

Na veimalanivosa yadua e ivakamacala ka sega ni rawa ni vakuwai. Na vosa Na e vakaraitaka na itutu ni Lotu ena kedra maliwa na veimatalotu ni vuravura.

Na veimalanivosa Lotu i Jisu Karisito e vakadeitaka ni oqo na Nona Lotu. E vakavuvulitaka o Jisu ena iVola i Momani, “Ia kevaka sa sega ni vakatokai ena yacaqu, ena rawa vakaevei me noqu lotu? Ia kevaka sa vakatokai ena yaca i Mosese, sa lotu i Mosese; se kevaka sa vakatokai ena yaca ni dua na tamata, ia sa lotu ni tamata ko ya [me vaka na Momani] ia kevaka e vakatokai ena yacaqu ka tara cake ena noqu ivakavuvuli, sa qai noqu lotu” (3 Nifai 27:8).

Na Edaidai e vakamacalataka ni sai koya vata ga na Lotu a tauyavutaka o Jisu Karisito ena gauna ni nona veiqaravi vakalotu ena bula oqo ia sa vakalesui tale mai ena gauna oqo. Eda kila ni a dua na lutu tani, se vukitani, ka yaco kina na kena vakalesui tale mai na Nona Lotu dina ka taucoko ena noda gauna oqo.

Yalododonu e kena ibalebale o ira na lewena era muri Koya ka saga mera cakava na Nona lewa, maroroya na Nona vunau, ka vakarautaki ira mera laki bula vata tale kei Koya kei na Tamada Vakalomalagi ena veisiga ni mataka. Yalododonu e baleti ira era segata me ra vakasavasavataka na nodra bula ena nodra yalataka me ra muri Karisito.

Na yaca sa solia na iVakabula ki na Nona Lotu e tukuna sara ga vakadodonu vei keda o cei o keda kei na cava eda vakabauta. Eda vakabauta ni o Jisu Karisito na noda ivakabula kei na Dauveisereki ni kawatamata. Sa sorovaki ira kece era na veivutunitaka na nodra ivalavala ca, ka sa sereka na ivesu ka vakarautaka na tucake tale mai na mate. Eda muri Jisu Karisito. Ia me vaka a tukuna na Tui o Penijamini vei ira na nona tamata, au sa vakadeitaka tale vei keda kece nikua, “Mo dou nanuma dei tikoga na Yaca[na]” (Mosaia 5:12).

Eda sa kerei me da tu ka vakadinadinataki Koya “ena veigauna kecega, ena veika kecega kei na veivanua kecega” (Mosaia 18:9). E dua na kena ibalebale oqo ni sa dodonu me da tu vakarau me da vakaraitaka vei ira na kena vo o cei eda muria kei na Lotu nei cei eda lewena: na Lotu i Jisu Karisito. Eda vinakata me da vakayacora ena yalo ni loloma kei na ivakadinadina. Eda vinakata me da muria na iVakabula ena noda vakadeitaka vakarawarawa ka vakamatata, ia ena yalomalumalumu ni da lewena na Nona Lotu. Eda muri Koya ena noda yaco me tisaipeli Yalododonu Edaidai—ni gauna edaidai.

E vakavuqa ni ra dau solia eso na yacabuli me baleta eso na tamata kei na isoqosoqo eso tale na tamata. Na yacabuli e rawa ni ivakalekaleka ni dua na yaca, se e rawa ni kau, mai na dua na ka a yaco se so na ituvaki vakayago se so tale na ka. E dina ni so na yacabuli e sega ni tautauvata na kena ibalebale se na kena bibi kei na yaca dina, e rawa ni ra vakayagataki vakavinaka.

Na Nona Lotu na Turaga ena gauna makawa kei na gauna oqo sa dau vakayacabuli tu. O ira na Yalododonu ena veigauna ni Veiyalayalati Vou era vakatokai me ra Lotu Vakarisito baleta ni ra tukuna ni ra vakabauti Jisu Karisito. Na yaca oqori, ka dau vakayagataki taumada vakasausa mai vei ira na nodra dauveivakasewasewani, sa yaco ena gauna oqo me yaca dokai; ka sa ka dokai vei keda ni da vakatokai me da lotu Vakarisito.

Era dau vakatokai na noda lewenilotu me ra Momani baleta ni da vakabauta na iVola i Momani: E Dua Tale na iVakadinadina kei Jisu Karisito. Eso beka era na tovolea me ra vakayagataka vakararaba na vosa Momani me ra okati kina se baleti ira era sa biuta na Lotu ka tauyavutaka na veilawalawa tawase tani eso. Na kena ivakavakayagataki oqori ena vakatubura na veilecayaki. Eda vakavinavinakataka na nodra sasaga na tabana ni itukutuku ena nodra tovolea me ra kakua ni vakayagataka na Momani ena kena ivakarau e rawa ni ra veilecayaki kina na tamata ka wilika vata na Lotu kei ira na ilawalawa dau vakamau vakalevu se so tale na ilawalawa. Meu tukuna sara mada vakamatata eke ni sega ni dua na ilawalawa dau vakamau vakalevu oka kina o ira era vakatokai ira tiko me Fundamentalist Mormons se so tale na isoqosoqo eda yaca vata, e tiko e dua na kedra isema ki na Lotu i Jisu Karisito ni Yalododonu Edaidai.

E sega ni yaca taucoko se yaca dodonu ni Lotu na Momani ka dina ga ni ra a vakatoka taumada o ira na noda dauveivakasewasewani ena veigauna taumada ni noda vakacacani, sa yaco me ciqomi ni ra tukuni tiko na lewenilotu ka sega ni isoqosoqo lotu. E sega ni gadrevi me da muduka na kena dau vakayagataki na yaca Momani ena gauna dodonu, ia sa dodonu me da vakabibitaka tikoga na yaca dodonu ni Lotu. Ena dua tale na kena vosa, sa dodonu me da levea ka kua ni vakauqeta na vosa “Lotu Momani.”

Ena veiyabaki niu dau laki vakatawa eso na ilesilesi vakalotu ena veiyasai vuravura, au dau tarogi vakawasoma kevaka au lewena na Lotu Momani. Na kena isau au dau cavuta “Au lewe ni Lotu i Jisu Karisito. Me vaka ni da vakabauta na iVola i Momani, ka vakatokayacataki vua e dua na parofita ka iliuliu makawa ena vanua o Amerika ka dua tale na ivakadinadina kei Jisu Karisito, eda sa dau vakatokai kina ena so na gauna me da Momani.” Ena veigauna kece sara sa dau ciqomi vakavinaka na isau ni taro oqori ka sa dau dolavi kina eso na madigi vinaka meu vakamacalataka kina na Vakalesuimai ni taucoko ni kosipeli ena gauna oqo.

Kemuni na taciqu kei na ganequ, vakasamataka mada na revurevu ni noda sauma na veitaro oqori ena noda vakayagataka ga na yaca taucoko ni Lotu me vaka sa vakadeitaka na Turaga me da vakayacora. Ia kevaka o sega ni rawa ni vakayagataka taucoko sara na yacana, kaya mada ga, “Au lewe ni Lotu i Jisu Karisito” qai vakamacalataka e muri “ni Yalododonu Edaidai.”

Eso beka era na taroga, vakacava na mata eso ni Initaneti me vaka na Mormon.org ka vakakina eso na tabana vakaitukutuku e tauyavutaka na Lotu. Me vaka au sa tukuna, ni cavuti tiko vakararaba na lewenilotu, eso na gauna e dau ganita ga na Momani Na ka dina dau yaco, ni ra dau vakaraici keda mai eso ena taudaku ni noda vakabauta ena nodra vakasaqara na vosa oya. Ia ni o laki cega ga na Mormon.org, sa vakamacalataki sara tu ga ena imatai ni tabana na yaca ni Lotu, ka dau laurai ena veitabana kecega ena mata oqori. E sega ni matau me da namaka me ra taipataka taucoko na yaca ni Lotu na tamata ena nodra segata me ra raici keda se ni ra curuma na noda mataveilawa.

Ni rawa ni tomani tikoga oqo, me kakua kina ni ra sega ni vakayagataka na lewe ni Lotu na yaca taucoko ni Lotu ena veigauna kece e rawa kina. Me da tara cake na ivalavala oqo ena noda veimatavuvale kei na itaviqaravi vaka-Lotu kei na noda veitaratara e veisiga me da vakamatatataka tiko kina ni Na Lotu i Jisu Karisito ni Yalododonu Edaidai sai koya na yaca sa vakarota na Turaga sara ga Vakai Koya me da kilai kina.

Ena dua na vakadidike se qai yaco wale toka ga e kunei kina ni sa rui levu na tamata era se bera tiko ga ni kila ni Momani e baleti ira na lewe ni noda Lotu. Ka dua na iwase levu ni tamata era se bera tiko ga ni vakadeitaka rawa ni o ira na Momani era Lotu Vakarisito. Ena nodra wilika sara mada ga na noda cakacaka ni Liga ni Veivukei e vuravura raraba ni oti na vakacaca ni cagilaba, uneune, ualuvu, kei na lauqa, era sega tiko ga ni semata rawa na noda sasaga ni veivukei raraba kei keda ni da isoqosoqo lotu Vakarisito. Ena rawarawa cake vei ira kevaka eda tukuni keda ni da Lotu i Jisu Karisito ni Yalododonu Edaidai. Ena sala oqo o ira era rogoca na yaca Momani era na semata vata na vosa oqori kei na yacada vakatakilai mai kei ira era dau muri Jisu Karisito. Ena sala oqo o ira era rogoca na yaca Momani era na semata vata na yaca oqori kei na yacada vakatakilai mai kei ira era dau muri Jisu Karisito.

Me vaka eratou kerea na Mataveiliutaki Taumada ena nodratou ivola ena ika 23 ni Feperueri, 2001: “Na vakayagataki ni yaca vakatakilai mai, Na Lotu i Jisu Karisito ni Yalododonu Edaidai…, sa bibi sara ena noda itavi ni kena kacivaki na yaca ni iVakabula ki vuravura raraba. O koya sa kerei kina ni gauna eda tukuna kina na Lotu meda na vakayagataka na yacana taucoko ena veivanua kecega e rawa kina.”

Ena koniferedi raraba ni Okotova 1948, a kaya kina o Peresitedi George Albert Smith, “Kemuni na taciqu kei na ganequ o ni lako yani mai ke, o ni na veimaliwai beka kei na vuqa na veimatalotu e vuravura, ia ni nanuma tiko ni dua ga na Lotu e vuravura taucoko e vakayacani vei Jisu Karisito na noda Turaga me vaka na ivakaro vakalou” (ena Conference Report, Okot 1948 167).

Kemuni na taciqu kei na ganequ, me da nanuma talega oqo ena noda biuta na koniferedi ena mataka nikua. Me sa qai vakarogoi yani na noda ivakadinadina baleti Koya ka me sa tu ga e lomada na noda lomani Koya, sa noqu masu malumalumu oqo ena Yaca, ni Turaga o Jisu Karisito, emeni.