Na Madigi ni Bula Taucoko

W. Christopher Waddell

Ena Vitusagavulu


Mai na nomu veiqaravi yalodina kei na solibula ena lomasoli, ena yaco na nomu kaulotu me vanua tabu vei iko.

E dua na gauna bibi ena nona bula e dua na daukaulotu sai koya na iotioti, se na veivakatarogi kei koya na nona peresitedi ni kaulotu me kena “ivakatale”. E uto ni veivakatarogi oqori na kena veitalanoataki na veika guiguilecavi dredre ena nona bula kei na veilesoni bibi sa rawati mai na loma ni 18 ki na 24 na vula.

E vuqa beka na veika e sotavi kei na lesoni e dau tautauvata ena veiqaravi vakadaukaulotu, na veikaulotu yadua e duidui, ena kena bolebole kei na madigi dau vakadreti keda ka vakatovolei keda me vaka na veika yadua eda gadreva kei na noda ivakarau ni bula.

Ni se bera ni keirau biuta tu na neirau vale vakavuravura me keirau laki qarava e dua na kaulotu tudei, keirau a laiva vei rau na neirau itubutubu vakalomalagi me rau vakataucokotaka na neirau itavi ena bula oqo. E dua tiko na Tamai keirau mai Lomalagi, o koya e kilai keirau—na neirau kaukauwa, kei na malumalumu, na veika keirau rawata kei na vanua keirau rawa ni yacova. E kila tu o Koya na peresitedi ni kaulotu kei na veitokani kei na lewenilotu kei koya e vakadikeva na Lotu keirau gadreva me rawa kina ni keirau vaka na daukaulotu, na tagane vakawati, kei na tama, kei na matabete e rawa me keirau vakakina.

Era dau lesi ira na daukaulotu o ira na parofita, daurairai ka dauvakatakila ena veidusimaki kei na veivakauqeti ni Yalo Tabu. Era dau dusimaka na peresitedi ni kaulotu vakauqeti na nodra veilesiyaki na daukaulotu ena veiyaono na macawa ka ra vulica vakatotolo kina ni kila vakavinaka sara na Turaga na vanua e vinakata me ra veiqaravi kina na daukaulotu yadua.

Ena vica na yabaki sa oti a veiqaravi voli kina vakadaukaulotu tudei e Arizona o Elder Javier Misiego, mai Madrid, Spain. Ena gauna oya e rairai matalia na nona kacivi me laki kaulotu ki Amerika, me vaka ni vuqa na cauravou mai Spain era kacivi me ra veiqaravi ga ena nodra vanua.

Ni cava na yasanibuka, erau a sureti kina kei na nona itokani me rau laki vakaitavi kina, a lako mai vei Elder Misiego e dua na lewenilotu luluqa ka kauti koya mai na nona itokani. Oqo na imatai ni gauna me qai curuma kina na tamata oqo ena vica vata a yabaki e dua na valenilotu. A tarogi vei Elder Misiego kevaka e bau kila e dua na Jose Misiego mai Madrid. Ni sauma o Elder Misiego ka kaya ni yacai tamana o Jose Misiego, a taroga na turaga oqo ena yalo nanamaki e vica tale na taro me vakadeitaka ni oqori ga na Jose Misiego. Ni sa vakadeitaka ni rau tukuna vata tiko e dua ga na tamata, sa tekivu me tuturu na wainimatana na turaga oqo. “Na tamamu duadua ga na tamata au papitaisotaka ena noqu gauna taucoko ni kaulotu,” E vakamacalataka na nona dau nanuma tu ga e na nona vakasama ni a druka ena nona itavi vakadaukaulotu. A vakavuna tu na nona luluqa vakalotu na nona dau vakila tu na takiveiyaga ni nona veiqaravi, yalolailai, ka vakabauta ni a druka vua na Turaga.

A qai vakamacalataka o Elder Misiego na veika a kauta mai ki na nona matavuvale na kaulotu ka “nanumi tiko ni a druka”. A tukuna vua ni a vakamau ena valetabu o tamana ka a papitaiso ni se cauravou, o Elder Misiego na ikava vei ira na ono na gone, o iratou na le tolu na tagane kei na dua na ganedratou era sa daukaulotu tudei kece, ka ra a bulabula kece ena Lotu, kei ira kece era sa vakawati era sa vauci ena valetabu.

Sa tekivu me mamakeukeu na turaga lesu mai na kaulotu luluqa oqo. Mai na nona cakacaka, sa qai kila ena gauna oqo sa vakalougatataki kina e vica vata na bula, ka tala mai na Turaga e dua na daukaulotu mai Madrid e Spain, ki na dua na yasanibuka mai Arizona me laki tukuna vua ni a sega ni druka. E kila tu na Turaga na vanua e vinakata me ra laki kaulotu kina na daukaulotu yadua.

Se na ivalavala cava ga e vinakata na Turaga me vakalougatataki keda kina ena noda gauna ni kaulotu, e sega ni kena inaki me cava ga ena gauna eda sa mai vagalalataki kina mai vua na noda peresitedi ni iteki. Na nomuni kaulotu sa buturara ni veituberi ki na nomuni gauna ni bula. Na veika eda sotava, na lesoni kei na ivakadinadina e rawa mai na noda gauna ni veiqaravi ena yalodina e kedra inaki me vakarautaki kina e dua na yavu vakosipeli ka na tudei tu ena bula oqo ka yacova yani na veigauna tawamudu. Ia me tomani tikoga na veivakalougatataki ni oti na kaulotu, sa tu eso na ivakarau e dodonu me na sotavi. Ena Vunau kei na Veiyalayalati eda wilika kina, “Ia ko ira kecega sa gadreva meu vakalougatataki ira, sa kilikili me ra muria na kena ivakaro” (V&V 132:5). E vakavulici na ivakavuvuli oqo ena italanoa ni Lako Yani.

Ni sa ciqoma oti mai vua na Turaga na nona ilesilesi, a lesu tale ko Mosese ki Ijipita me laki kauti ira tani na luvei Isireli mai na veivakabobulataki. Era sega ni vagalalataki ni oti e vica na mate veitauvi veitaravi, ni bera na ika 10 ni mate veitauvi: “Niu na lako voli ena vanua ko Ijipita ena bogi koya, ka yavita na ulumatua kecega ena vanua ko Ijipita” (Na Lako Yani 12:12).

Me ra taqomaki mai vua na “dauveivakarusai” (tikina 23), a vakaroti ira na nona tamata na Turaga me ra cabora e dua na isoro, e dua na lami “e sega na kena ca” ( tikina e 5), ka me kumuni vata na dra mai na isoro. Oti me ra qai “taura e dua na kena dra” ka boroya kina na duru ruarua ni sogo, kei na ulu ni katuba” (tikina e 7)—kei na yalayala oqo: “Ia niu sa raica na dra au na qai lako siviti kemudou, ena sega ni yacovi kemudou e dua na ka mo dou rusa kina” (tikina e 13).

“A ra sa lako yani na Isireli ka kitaka, ia me vaka ka vakarota ko Jiova” (tikina 28). Era vakacabora na isoro, kumuna na kena dra, ka boroya kina na nodra veivale. “Sa qai yaco ena lomaloma ni bogi, sa qai yaviti ira kecega na ulumatua ena vanua ko Ijipita ko Jiova” (tikina 29). Era sa mani taqomaki kina ko Mosese kei ira na nona tamata, me vaka na yalayala ni Turaga.

Na dra era a vakayagataka na Isireli, na ivakatakarakara ni nona Veisorovaki ena gauna mai muri na iVakabula, sa vua ni isoro era a vakacabora. Ia, na isoro walega kei na dra e sega ni rauta me rawati kina na veivakalougatataki sa yalataki tu. Kevaka a sega ni boro na duru ni katuba ena dra, ena sega ni yaga na isoro.

E vakavuvulitaka o Peresitedi Thomas S. Monson: “E dredre na cakacaka ni kaulotu. E gadreva na nona igu e dua, ka vakaotia na nona kaukauwa, ka gadreva na nona vinaka taucoko. … E sega tale ni dua na cakacaka e gadrevi kina na veiauwa babalavu kei na yalodina cecere kei na mataqali solibula vakaoqori kei na masu vagumatua” (“That All May Hear,” Ensign, Me 1995, 49).

Me vua ni solibula oqori, eda lesu vata kaya na noda isolisoli mai na kaulotu: Na isolisoli ni vakabauta. Na isolisoli ni ivakadinadina. Na isolisoli ni kila na itavi ni Yalotabu. Na isolisoli ni vulici ni kosipeli ena veisiga. Na isolisoli ni noda sa qarava na noda iVakabula. Na isolisoli ka tawani tu vakamatau ena veiivolanikalou makawa, na ilavelave sasanukinuki ni Vunautaka Noqu Kosipeli, ivolaniveisiga ni daukaulotu, kei na yalo vakavinavinaka. Ia, me vakataki ira na luvei Isireli, na veivakalougatataki tomani tikoga ka sala vata kei na veiqaravi vakadaukaulotu e gadrevi me cakacakataki ni oti na kena vakacabori.

Ena vica na yabaki sa oti, ni keirau vakatulewa tiko kei Sisita Waddell ena Tabana ni Kaulotu mai Spain Barcelona, au dau solia e dua na iotioti ni ilesilesi vei ira yadua na daukaulotu ena iotioti ni nodra veivakatarogi. Ni ra sa lesu ki vale era dau kerei, ena gauna vata ga me ra taura na gauna me ra vakasamataka kina na lesoni kei na isolisoli sa vakarautaka tu vei ira e dua na Tamada Vakalomalagi lomasoli. Era kerei me ra tuvalaka ena masumasu ka vakasamataka na sala vinaka duadua me ra vakayagataka kina na veilesoni oqori ena nodra bula ni sa oti mai na kaulotu—na lesoni ena vakaimawe ena veiyasa kece sara ni nodra bula: na vuli kei na digidigi ni cakacaka, na veiqaravi ena Lotu ena veigauna ni mataka, ka bibi duadua, o cei era na yaco tikoga me vaka kei na nodra vakatoroicaketaki tiko ni ra tisaipeli i Jisu Karisito.

E sega ni dua sa lesu mai na kaulotu me sa bera na nona vakasamataka na veilesoni e rawata mai na nona veiqaravi yalodina ka me ra vakayagataka ena gugumatua. Ni da vakayacora vakakina eda na vakila na veivakauqeti ni Yalotabu ki na noda bula, noda matavuvale, ena vaqaqacotaki na noda matavuvale, ka da na voleka cake yani kina vua na noda iVakabula kei na Tamada mai Lomalagi. Ena dua na koniferedi raraba sa oti, a veisureti kina vaqo o Elder L. Tom Perry: “Au kerei kemuni na lesu mai na kaulotu mo ni soli kemuni tale mada, mo ni vakasinaiti tale ena gagadre kei na yalo ni veiqaravi ena kaulotu. Au kerei kemuni mo ni vaka na irairai ni daukaulotu, mo ni daukaulotu, ka vakaitovotaki kemuni me vaka na nona daukaulotu na Tamada mai Lomalagi. Au gadreva meu yalataka vei kemuni ni sa tu na veivakalougatataki lelevu me baleti kemuni o ni na cuqena tikoga na gugumatua ka dau tu vei kemuni ena nomuni se daukaulotu voli” (“Na Daukaulotu se Qai Lesu Mai,” Liaona, Janu 2002, 88, 89; Ensign, Nove 2001, 77).

Vei kemuni na cauravou o ni se vakarau tiko mo ni laki veiqaravi vakadaukaulotu tudei, au wasea na nona ivakasala o Peresitedi Monson mai na Okotova sa oti: “Au na tokaruataka na veika era sa vakavuvulitaka tiko mai vakabalavu na parofita eso—o ira na cauravou bula kilikili yadua, ituvaki vinaka e dodonu me ra laki kaulotu. Na veiqaravi vakadaukaulotu e itavi ni matabete—e dua na itavi e namaki vei keda, oi keda ka sa solia vakalevu sara vei keda na Turaga” (“Ena Noda Mai Sota vata Tale,” Liaona, Nove 2010, 5–6).

Me vakataki ira ga na daukaulotu era sa lesu mai kei ira era veiqaravi tiko oqo, e kilai iko na Turaga ka sa vakarautaka tiko e dua na gauna mo laki kaulotu kina. E kila o koya na nomu peresitedi ni kaulotu kei na watina vakasakiti, erau na lomani iko me vaka ga ni o luvedrau ka rau na vakasaqara na veivakauqeti kei na veidusimaki ena vukumu. E kilai ira yadua na nomu itokani o Koya kei na veika o na vulica mai vei ira. E kila o koya na veivanua yadua o na laki veiqaravi kina, na lewenilotu o na laki sotava, kei na bula o na tara me baleta na veigauna tawamudu.

Mai na nomu veiqaravi yalodina kei na solibula ena lomasoli, ena yaco na nomu kaulotu me vanua tabu vei iko. O na vakila na mana ni saumaki mai ena cakacaka ni Yalotabu ena nomu bula ka tara na yalodra o ira o vakavulici ira.

Ni o vakarau mo veiqaravi, e levu tu na ka me caka. Mo yaco mo nona italai mana na Turaga ena gadrevi kina e levu cake na ka mai na noda vakatikori ga, tokara e dua na itokaniyaca, se curuma yani e dua na koronivuli ni veivakarautaki ki na kaulotu. Oqori e dua na ituvatuva ka a se tekivu ni a se vo tu e dua na gauna balavu mai na nomu qai vakatokai mo “Elder.”

Tadu yani ki na nomu kaulotu kei na nomu ivakadinadina vakataki iko ni iVola i Momani, ka rawa mai na vuli kei na masu. Na iVola i Momani sa ivakadinadina qaqa sara ni nona vakalou na Karisito. Sa ivakadinadina talega ni Veivakalesui mai vua na Parofita o Josefa Simici. Ni o daukaulotu, sa dodonu me dua taumada na nomu ivakadinadina ni dina na iVola i Momani. … Na ivakadinadina bula oqo ni Yalo Tabu [ena yaco] me itakele ni nomu veivakavulici” (Vunautaka na Noqu Kosipeli: iDusidusi ki na Veiqaravi ni Daukaulotu [2004], 115).

Tadu yani ki na nomu kaulotu ni kilikili tu kei iko na veitokani ni Yalo Tabu. Ena malanivosa nei Peresitedi Ezra Taft Benson: “Na Yalotabu sai koya na tiki bibi duadua ni cakacaka oqo. Ni vakalevulevuya tiko na nomu ilesilesi na Yalotabu, e rawa ni o cakamana vua na Turaga ena buturara ni kaulotu. Ni sega na Yalotabu, o na sega sara ni qaqa rawa, se vakacava tu na levu ni nomu taledi kei na rawa ka.” (ena Vunautaka na Noqu Kosipeli, 198).

Tadu yani ki na nomu kaulotu ni ko sa vakarau tu mo cakacaka. “Na nomu qaqa vakadaukaulotu [ena] vakarautaki vakatabakidua mai na nomu yalodina ena vaqaqara, veivakavulici, veipapitaisotaki, kei na veivakadeitaki.” Ena namaki me “mana na nomu cakacaka ena veisiga yadua, ka [solia] na nomu … vinaka duadua mo kauta mai na yalo vei Karisito” (Vunautaka na Noqu Kosipeli, 11, 12).

Au tokaruataka na nona veisureti o Elder M. Russell Ballard, ka a tukuni vei ira e dua na ilawalawa cauravou era a vakarautaki ena dua na gauna yani e liu me ra veiqaravi: “Keimami rai vei kemuni, na taci keimami gone ena Matabete i Eroni. Keimami gadrevi kemuni. Me vakataki ira na le 2,000 na cauravou yaloqaqa nei Ilamani, o ni luvena vakayalo talega na Kalou, ka rawa talega ni o ni vakalougatataki ena kaukauwa mo ni tara cake ka taqomaka na Nona matanitu. Keimami gadrevi kemuni mo ni cakava na veiyalayalati tabu, me vaka era a cakava. Keimami gadrevi kemuni mo ni vakarorogo sara ka talairawarawa ka yalodina, me vakataki ira” (“Na iTaba Daukaulotu Qaqa Duadua,” Liaona, Nove. 2002, 47).

Ni o ni ciqoma na veisureti oqori, o ni na vulica na lesoni cecere, me vakataki Elder Misiego kei ira kece era sa veiqaravi ena yalodina, lesu mai ka bulataka. O ni na vulica ni dina na nona vosa na noda parofita, o Peresitedi Thomas S. Monson: “Na madigi ni bula taucoko ni daukaulotu e nomuni. Sa waraki kemuni tu na veivakalougatataki ni gauna tawamudu. Sa nomuni na madigi moni, kua ni dua na dausarasara, ia mo ni vakaitavi saraga ena buturara ni veiqaravi vakamatabete” (Ensign, Me 1995, 49). Au vakadinadinataka ni dina na veika oqo ena yaca i Jisu Karisito, emeni.