2010–2019
O Le Mana o le Perisitua Arona
Oketopa 2011


O Le Mana o le Perisitua Arona

O outou faatasi ma le tofi o le Perisitua Arona ua outou umia e taua tele i le galuega a le Tama Faalelagi faapea ma Ana fanau ma le sauniuniga o lenei lalolagi mo le Afio Mai Faalua.

I se sauniga talu ai nei faaleaoaoga mo le Au Pulega Aoao, sa toe faamamafa mai ai e Peresitene Thomas S. Monson ia tiute ma avanoa mo e o tauaveina le Perisitua Arona.1 O le agaga o lena aoaoga o le a ou talanoa atu ai ia te outou.

O tiute e faataunuuina lelei, e iloa ai le taunuuga o nuu ma malo. E matua taua lava le mataupu faavae o le tiute ua apoapoaiina ai ē o tauaveina le perisitua. “O le mea lea, ia tuu atu nei i tagata taitoatasi e aoao lona tiute, ma galue i le tofi ua tofi i ai o ia, i le filiga atoa”2

Sa faamalamalama mai e Peresitene Monson, “E mafai ona oo mai ma le filemu le valaau a le tiute pe afai tatou te faia tiute ua tatou maua o le perisitua ua tatou umia.”3 Sa sii mai e Peresitene Monson le saunoaga a Siaosi Alapati Samita e faapea: “O lou tiute muamua lava o le iloa lea o mea e finagalo i ai le Alii ona e faalauteleina lea o lou valaauga i le mana ma le malosi o lou perisitua paia i luma o ou uso a tagata i se ala o le a fiafia ai tagata e mulimuli ia te oe.”4

A o fetalai ai i Lona tiute, sa faapea mai le Alii: “Ou te le usiusitai i lo’u lava loto, a o le finagalo o le Tama.”5 “Aua ou te lei alu ifo mai le lagi e fai lo’u lava loto, a o le finagalo o le ua auina mai a’u.”6 Ona sa faatinoina e Iesu Keriso Lona tiute, o lea ua “mafai ai ona faaolaina tagata uma, e ala i le usiusitai i tulafono ma sauniga o le Talalelei.”7 Uso e, o le tulaga faatonuina lenei e tatau ona tatou mulimuli ai.

I lo’u aafiaga ua ou matauina ai outou o loo auauna atu o ni tiakono, aoao, ma ositaulaga o loo outou naunau, faatuatuaina, ma agavaa i le faia o o outou tiute ua faamoemoeina mai ia te outou. Matou te faamemelo ia te outou. O lo outou mataalia ua matou mataalia ai foi, o o outou tomai ua ofoofogia, ua faamalosia i matou i a outou fegalegaleaiga. O outou faatasi ma le tofi o le Perisitua Arona ua outou umia e taua tele i le galuega a le Tama Faalelagi faapea ma Ana fanau ma le sauniuniga o lenei lalolagi mo le Afio Mai Faalua o Lona Alo paia. O la matou vaaiga mamao ia te outou e i talaatu o tausaga o lo outou matutua. Na saunoa Paulo e uiga ia te outou e faapea, “Aua ne’i inoino se tasi i lou taulealea; a ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia”8

I alii anamua sa oo mai i ai i se taimi

Le perisitua na faaigoaina ia Arona.

Na auala mai ia sa Levī, ositaulaga, ma perofeta foi,

Ua auauna atu e faamanuiaina fanau a le Atua.

Ona afio mai lea o le Faaola o le lalolagi

Ma sailia le tasi e igoa ia Ioane,

Ina ia papatisoina i lea lava mana e tasi

Ma amata ai le galuega o le faaolataga.

I aso e gata ai sa toefuataiina mai ai

I le lalolagi lenei lava mana e tasi,

Ina ia fanau mai i le agaga o se tasi

Upumoni uma o le talalelei.

O le Perisitua Arona, o se upumoni ofoofogia,

Ua aumaia e saunia ai—

Le faataunuuina o le togiola

E ala mai i le Alo Pele o le Atua!

Ma o le na te faaaogaina nei mana—

‘E le soona faaaogaina e se tamaitiiti.

O le i ai ia te ia o le mana o le perisitua

Tatou te fai atu ai, “Faauta i le tamatane!”9

“O le mana ma le pule o le perisitua maulalo, o le faaArona, o le taofia lea o ki o le auauna atu o agelu, ma le taitai i sauniga faaletino, o le tusi o le tala lelei, o le papatisoga o le salamo, mo le faamagaloina o agasala e tusa ma feagaiga ma poloaiga.”10 Na matauina e Peresitene Boyd K. Packer e faapea: “Ua tatou lelei tele i le faasafuaina atu o le pule o le perisitua. Ua toetoe soo le lalolagi o tatou faatulagaina ai le pule o le perisitua. … Ae ou te manatu, ua televave tele lo tatou tuuina atu o le pule o le perisitua nai lo le tuuina atu o le mana o le perisitua.”11 Mo le tulaga lelei tumau-faavavau o fanau a le Atua, e tatau ai ona faasa’o lenei mea.

Ua ta’u mai e lo tatou perofeta ia i tatou le ala e faia ai lenei mea. I le sii maia o le saunoaga a George Q. Cannon, sa saunoa ai Peresitene Monson e faapea: “Ou te manao e vaaia lenei malosi ma le mana ua sosolo i le tino atoa o le Perisitua, mai lava i le taitai aupito maualuga e oo atu i le tiakono aupito faatauvaa ma sili ona lotomaualalo i le Ekalesia. E tatau i alii uma ona saili atu ma olioli i faaaliga a le Atua, o le malamalama o le lagi e susulu i lona agaga ma tuu atu ia te ia le malamalama e faatatau i ona tiute, e faatatau i vaega o le galuega ua i ai i ona tiute o lona Perisitua.”12

O a mea e mafai ona faia e se tiakono, se aoao, po o se ositaulaga e maua ai le agaga o faaaliga, ma faalautele ai lona valaauga? E mafai ona ia ola i se auala e olioli ai i le mana faamama, faapaia, ma faamalamalama a le Agaga Paia.

O le taua o lenei mea o loo maua i upu nei mai ia Alema: “Ma o lenei ou te fai atu ia te outou o le faatulagaga lenei ua valaauina i ai au, … e talai atu … i le tupulaga faia’e … ina [ia] latou salamo ma toe fanauina.13 Pe a toe fanauina se tasi, e suia lona loto. Ua le toe i ai sona manao mo mea leaga pe lē mama. Ua ia lagonaina se alofa loloto ma le usiusitai mo le Atua. Ua manao ina ia lelei, ia auauna atu i isi, ma tausi i poloaiga.14

Na faamatalaina e Peresitene Iosefa F.Samita lona aafiaga tele i lenei suiga: “O le lagona na oo mai i ou luga o le filemu a’ia’i, o le alofa ma le malamalama. Sa ou lagona i lo’u loto afai sa ou agasala … ua faamagaloina au; aua ua faamamaina moni lava au mai le agasala; na pa’i mai i lo’u loto, ma sa ou lagona lo’u le fia manao e faamanualia se iniseti sili ona itiiti i lalo o ou vae. Sa ou lagona e pei ua ou manao e fai le lelei i soo se mea, i tagata uma ma i mea uma. Sa ou lagona le ola faafouina, sa faafouina lo’u manao e fai le mea tonu. Sa leai lava se vaega e tasi o le naunautaiga mo le agasala o totoe i lo’u loto. E moni, ua na o au o se tama laitiiti, … ae o le uunaiga lenei na oo mai i o’u luga, ma ou te iloa e mai le Atua, ma sa avea ma o loo avea pea ma molimau ola ia te au i lo’u taliaina o le Alii.”15

O lea ua matou valaau atu ai ia te outou uso talavou maoae ina ia taumafai ma le filiga ia “toe fanauina.”16 Tatalo mo lenei suiga telei lou olaga. Suesue i tusitusiga paia. Ia sili atu le manao e iloa le Atua nai lo se isi lava mea ma ia avea e faapei o Lona Alo paia. Olioli i lou talavou ae ia “tiai [ese] mea a tamaiti.”:17

Ia taumamao mai talanoaga leaga ma le le aoga.

Sola ese mai mea leaga uma.

Aloese mai finauga.

Salamo pe a manaomia.18

O le a fesoasoani lenei mea ia te oe e te tula’i mai ai i lou tulaga malualii faatamatane. O uiga lelei o le lototele, faatuatuaina, lotomaualalo, faatuatua ma le lelei o le a fai mā oe. O le a faaaloalogia oe e au uo, o le a viia oe e ou matua, o le a faalagolago atu uso o le perisitua ia te oe, ma o le a faamemelo tamaitai talavou ma oo ina lelei atili i latou ona o oe. O le a faamamaluina oe e le Atua ma faamanuiaina au auaunaga faaleperisitua i le mana mai luga.

O isi o i matou uma o le a faia la matou pitolaau. O le avea ai o ni matua, ma matua matutua, o le a matou saunia outou mo isi auaunaga lotototoa i le malo o le Atua. O le avea ai ma ni o outou uso, o le a avea ai i matou ma faataitaiga mo outou e faata’ita’i i ai. O le a matou faateleina le malosi o a outou korama. O le a matou lagolago i a outou au peresitene o korama a o latou faaaogaina a latou ki e pulefaamalumalu ai. O le a matou tuuina atu ia te outou avanoa e faataunuu atoatoa ai tiute o le Perisitua Arona ma faalautele ai o outou valaauga o i ai.

E ala mai i la outou auaunaga, o le a oo mai ai faamanuiaga maoae i le Ekalesia. “E tautatala agelu i le mana o le Agaga Paia.”19 E mafai foi ona outou faia lena mea. A o outou tautatala atu i le mana o le Agaga Paia, ma faatautaia faatusa paia o le faamanatuga, o le a taumafai alii ma tamaitai, tama ma teine e salamo, ia faateleina lo latou faatuatua ia Keriso, ma ia mafuta ai pea le Agaga Paia ma i latou.

A o outou anapopogi ma aoina le taulaga anapogi, o le a uunaia tagata e mamanu a latou galuega e faataitai i le Faaola. Na tausia lelei e le Alii e matitiva, ma e na tuulafoaiina, ma sa Ia fetalai atu: “Mulimuli mai ia te au.”20 O la outou auaunaga i le tausia o ē le o faamanuiaina tele tatou te punouai ai i Lana galuega paia, ma fesoasoani ai foi ia tatou faatumauina le faamagaloga mo a tatou lava agasala ua te’a.21

A o outou “asiasi atu i fale o tagata taitoatasi,”22 aua le fefefe pe matamumuli. O le a tuu atu e le Agaga Paia ia te outou i le taimi tonu lava mea tou te tautatala atu ai, le molimau e ta’u atu, le auaunaga e tuu atu.

O a outou taumafaiga maelega e “leoleo … i … le ekalesia e le aunoa”23 o le a faamanuiaina. O o outou uiga lotomaualalo ma le faamaoni o le a faamalūlūina ai loto e oo lava i ē le talitonu ma aveesea ai le pule a le fili. O a outou valaaulia mo isi e o mai tou te o faatasi i le lotu, tou te aai faatasi ma feinu i le faamanatuga, ma outou auauna atu faatasi o le a avea ma se faamanuiaga talileleia mo i latou ua leiloloa i mea pogisa o loo muitiiti ai le malamalama o le talalelei pe ua le mumu ai foi.

E, o’u uso e talavou pele, “aua ne’i e faatalalē i le mea alofa na tuuina atu ia te oe,”24 lea na e mauaina ina ua faaee atu ma faauuina oe i le Perisitua Arona.

“Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.

“O lenei aua e te mā i le molimau i lo tatou Alii … A ia tiga faatasi i … le talalelei e tusa ma le mana o le Atua;

“O lē na … valaau mai [i tatou] i le valaau paia, … na foaiina mai ia i tatou ia Keriso Iesu talu mai le vavau.”25

O lo tatou perofeta pele ua “valaauina outou i le tagavai [o le perisitua]”26 Matou te faamamaluina outou, tatalo mo outou, olioli i le auauna faatasi ai ma outou, ma faafetai atu i le Atua mo le mana o la outou auaunaga faaola.

Ou te molimau atu, o le Atua lo tatou Tama e Faavavau o loo afio i le lagi i luga. O Iesu Keriso o le Alo paia o le Atua, o le Togiola o le lalolagi, ma o outou na o le au Perisitua Arona o Ana avefeau ia i le fogaeleele, i le suafa o Iesu Keriso, amene.

  1. Thomas S. Monson, General Authority training meeting, Apr. 2010.

  2. Mataupu Faavae ma Feagaiga 107:99.

  3. Thomas S. Monson, “O Le Valaauga Paia o le Auauna Atu,” Liahona, Me 2005, 54.

  4. George Albert Smith, i le Conference Report, Apr. 1942, 14; tagai foi i le Thomas S. Monson, Liahona, Me 2005, 54.

  5. Ioane 5:30.

  6. Ioane 6:38.

  7. Mataupu Faavae o le Faatuatua 1:3.

  8. 1 Timoteo 4:12.

  9. Solo saunia e Keith B. McMullin; tagai i le Keith B. McMullin, “Faauta i le Tagata,” Liahona, Ian. 1998, 46.

  10. Mataupu Faavae ma Feagaiga 107:20.

  11. Boyd K. Packer, “O Le Mana o le Perisitua,” Liahona, Me 2010, 7.

  12. George Q. Cannon, Deseret Weekly, Nov. 2, 1889, 593; quoted by Thomas S. Monson in a General Authority training meeting, Apr. 2010.

  13. Alema 5:49; faaopoopo le faamamafa.

  14. Tagai i le Marion G. Romney, “According to the Covenants,” Ensign, Nov. 1975, 71–73.

  15. Joseph F. Smith, i le Conference Report, Oct. 1902, 3.

  16. Tagai i le Ioane 3:3–7; Alema 5:14–21, 49.

  17. 1 Korinito 13:11.

  18. Tagai i le 2 Timoteo 2:16, 22–26.

  19. 2 Nifae 32:3.

  20. Luka 18:22; tagai foi i le Ioane 14:12–14.

  21. Tagai i le Mosaea 4:26.

  22. Mataupu Faavae ma Feagaiga 20:47.

  23. Mataupu Faavae ma Feagaiga 20:53.

  24. 1 Timoteo 4:14.

  25. 2 Timoteo 1:7–9.

  26. Thomas S. Monson, General Authority training meeting, Apr. 2010.