O Le Faamanuiaga o le Tatalo

O’u tuafafine ma uso pele, o le Atua lo tatou Tama e le o se lagona po o se manatu po o se malosiaga. O Ia o se tamalii paia, e pei ona aoao mai tusitusiga paia, e i ai se foliga ma ni aao ma se tino toetu faamamaluina. E moni o Ia, Na te silafia i tatou uma taitoatasi, ma e alofa o Ia ia i tatou uma lava. E finagalo o Ia e faamanuia i tatou.

Na fetalai Iesu:

“O ai foi se tagata o outou pe a ole mai lona atalii i se areto, na te avane ea ia te ia se maa?

“A ole mai foi i se i’a, na te avane ea ia te ia se gata?

“O lenei, o outou e leaga, afai ua iloa e outou ona avatu o mea lelei ma a outou fanau, e le sili ea ona foaiina mai e lo outou Tama oi le lagi o mea lelei i e ole atu ai ia te ia?” (Mataio 7:9–11).

Atonu o le a fesoasoani se aafiaga patino e faamalamalama ai le mataupu faavae. A o avea au ma se fomai talavou sa faia ni aoaoga faamasani i le Falemai mo Tamaiti i Boston, sa ou faigaluega ai mo ni itula se tele ma sa tele lava ina ou malaga i le va o le falemai ma lo’u aiga i Watertown, Massachusetts, i se uila vilivae ona sa manaomia e lo’u toalua ma lo ma aiga laiti la matou taavale. I se tasi afiafi sa ou tietie atu ai i le fale ina ua maea se taimi umi i le falemai, ma sa ou lagonaina le lēlavā tele ma le fiaai ma sina lotovaivai teisi. Sa ou iloaina e le gata sa manaomia ona ou tuuina atu i lo’u toalua ma le ma fanau laiti e toafa lo’u taimi ma le malosi pe a ou taunuu atu i le fale, ae faapena foi ma se uiga auaumama o le loto fiafia. O le mea moni sa faigata ia te au le na o le viliina o le uila.

O lo’u auala o le a ou ui atu ai i se faleoloa e faatau ai moa falai, ma sa ou lagonaina o le a sili atu ona tuuitiitia lo’u fiaai ma lo’u lelavā pe afai ou te malolo e ’ai sa’u fasimoa a o ou agai atu i le fale. Sa ou iloaina sa fai se pa’ū o le tau o alagamoa po o vaemoa i le 29 sene i le fasimoa e tasi, ae ina ua ou siakia la’u atotupe, na pau la’u tupe sa i ai na o le limasene. A o vilivili atu la’u uila, sa ou ta’u atu i le Alii lo’u tulaga ma ole atu pe mafai, i Lona alofa tunoa, ona Ia faia ia ou maua se kuata [luasefululima sene] i le auala. Sa ou fai atu ia te Ia ou te le manaomia lenei mea ia avea ma se faailoga, ae o le a matuai ou faafetai lava pe afai e finagalo o Ia e tuuina mai ia te au lenei ituaiga faamanuiaga.

Sa amata ona ou vaavaai ma le totoa i le eleele ae sa leai se mea na ou vaaia. O le taumafai ai ia tumau pea se uiga e tumu i le faatuatua ae ia usiusitai a o ou tietie atu i la’u uila, sa ou latalata atui le faleoloa. Ma, na toeitiiti lava a feagai tonu ma le auala mai le nofoaga e faatau ai moa, sa ou vaaia ai se kuata i luga o le eleele. Faatasi ai ma le agaga faafetai ma le maua o le toomaga, sa ou pikiina ae ai, faatau mai le vaemoa, ma ‘ai ma le susua ia mea uma, ma sa ou vilivili atu loa ma le fiafia i le fale.

I Lona alofa tunoa, na faafofogaina ai e le Atua o le lagi, Lē Foafoa ma le Pule o mea uma i soo se mea, se tatalo e uiga i se mea faatauvaa. Atonu e fesili se tasi pe aisea o le a faapopoleina ai o Ia lava i sea mea matuai laitiiti. Na taitaiina au e talitonu e alofa naua lo tatou Tama Faalelagi ia i tatou ma o lea, o mea e taua ia i tatou e avea ma mea e taua ia te Ia, ona o Lona alofa ia i tatou. O le a le tele atu o Lona finagalo e fesoasoani ia i tatou i mea tetele tatou te ole atu ai e sa’o (tagai i le 3 Nifae 18:20)?

Le fanau laiti, tupulaga talavou, faapea ma tagata matutua, faamolemole ia outou talitonu i le tele naua o le naunau o lou Tama Faalelagi e faamanuia oe.Ae ona o le a Ia le faalavelave i lo tatou faitalia, o lea e ao ai ona tatou ole atu mo Lana fesoasoani. O lenei mea e masani lava ona faia e ala i le tatalo. O le tatalo o se tasi lea o meaalofa aupito taua a le Atua i le tagata.

I se tasi mea na tupu, na fesili ai le au soo o Iesu, “Le Alii e, ia e aoao mai ia te i matou i tatalo” (Luka 11:1). O le tali, ua tuuina mai ai e Iesu ia i tatou se faataitaiga lea e mafai ona avea o se taiala i mataupu faavae autu o le tatalo (tagai i le Russell M. Nelson, “O Lesona mai le Tatalo a le Alii,” Liahona, Me 2009, 46–49; tagai foi i le Mataio 6:9–13; Luka 11:1–4). E tusa ai ma le faataitaiga a Iesu:

Tatou te amata i le talanoa atu i lo tatou Tama Faalelagi: “Lo matou Tama e o i le lagi” (Mataio 6:9; Luka 11:2). O lo tatou faamanuiaga le talanoa sa’o atu i lo tatou Tama. Tatou te le tatalo i se isi lava tagata. Manatua ua fautuaina i tatou e aloese mai le tautu i upu, e aofia ai le faaaoga soo o le suafa o le Tama pe a tatou tatalo.¹

“Ia paia lou suafa” (Mataio 6:9; Luka 11:2). Sa talanoa Iesu i Lona Tama ma se uiga auaumama o le tapuai, iloaina o Lona silisili ese ma tuuina atu ia te Ia le viiga ma le faafetai. E mautinoa lava o lenei tulaga o le faaaloalo i le Atua ma le tuuina atu o le faafetai i le loto faamaoni ma le patino o le tasi lea o mea autu i tatalo mataalia.

“Ia oo mai Lou malo. Ia faia Lou finagalo” (Mataio 6:10; Luka 11:2). Tatou te faailoa atu ma le saoloto lo tatou faalagolago i le Alii ma faaali atu lo tatou naunau e fai Lona finagalo, e tusa lava pe le tutusa ma o tatou loto. Ua faamalamalama mai e la tatou Lomifefiloi o le Tusi Paia: “O le tatalo o le faatinoga lea e faaogatusa ai le finagalo o le Tama ma le loto o le tamaitiiti. O le faamoemoega o le tatalo e le o le suia o le finagalo o le Atua, ae ia faamautuina mo i tatou lava ma mo isi ia faamanuiaga ua uma ona finagalo le Atua e foai mai, ae seiloga tatou te ole atu mo na faamanuiaga” (Bible Dictionary, “Prayer”).

“Ia e foai mai ia te i matou i le aso nei a matou mea e ai e tatau ma le aso” (Mataio 6:11; tagai foi i le Luka 11:3). Tatou te ole atu mo na mea tatou te manaomia mai le Alii. O le faamaoni e taua i le talosagaina o mea mai le Atua. Mo se faataitaiga, e le o se faamaoni atoatoa le ole atu i le Alii mo le fesoasoani i se suega i le aoga pe afai ou te le’i faalogo lelei i le vasega, fai meaaoga atofaina, pe suesue foi mo le suega. E masani lava a ou tatalo, e uunaia lemu lava au e le Agaga ia ou tautino e tele atu mea e tatau ona ou faia ia maua ai le fesoasoani o loo ou talosagaina mai le Alii. Ona tatau lea ona ou tuuto ma fai la’u vaega. E le tusa ai ma le fuafuaga a le lagi le faia e le Alii mo i tatou o mea e mafai ona tatou faia mo i tatou lava.

“Ia e faamagalo ia te i matou i a matou agasala” (Mataio 6:12) po o le, i se isi faaupuga, “Faamagalo ia te i matou i a matou agasala” (Luka 11:4). O se vaega taua o tatalo faaletagata lava ia, ae o nisi taimi e galo ai, o le salamo. Ina ia aoga le salamo, e tatau lava ona fitoitonu, faamaoni, ma tumau.

“E pei o i matou foi ona matou faamagaloina atu i e ua agaleaga mai ia te i matou” (Mataio 6:12; tagai foi i le Luka 11:4). Sa faia e le Faaola se sootaga manino i le va o le faamagaloina o a tatou agasala ma le faamagalo atu i isi o e na faia ni mea sese ia i tatou. O nisi taimi o mea sese na faia e isi ia i tatou, e matuai tiga ma faigata tele ona faamagalo pe faagalo. Ou te faafetai mo le faamafanafanaga ma le faamalologa ua ou maua i le valaaulia a le Alii e lafoai o tatou tiga ma lafo atu ia te Ia. I le Mataupu Faavae ma Feagaiga vaega e 64, Ua Ia fetalai ai:

“O Au, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.

“Ma e tatau ona outou fai ifo i o outou loto—ia tuu i le Atua e faamasino i le va o a’u ma oe, ma taui ia te oe e tusa ma au galuega” (fuaiupu 10–11).

Ona tatau loa lea ona tatou faataatiaese atoa le mataupu, ae tuu atu loa i le Alii, pe afai tatou te mananao e faamaloloina [i tatou].

“Aua ne’i taitaiina i matou i le tofotofoga, a ia e laveai ia i matou ai le leaga” (Mataio 6:13, vaefaamatalaga a; mai le Faaliliuga a Iosefa Samita, Mataio 6:14; tagai foi i le Luka 11:4, vaefaamatalaga c; mai le Faaliliuga a Iosefa Samita). O lea la, i a tatou tatalo e mafai ona tatou amataina le faagasologa o le puipuiga i le faamauluina o le ofutau atoatoa o le Atua (tagai i le Efeso 6:11; MF&F 27:15) e ala i le tulimatai atu i le aso o i luma atu ma ole atu mo se fesoasoani i mea ia o nisi taimi e taufaamatau mai tatou te ono fetaiai. Faamolemole, au uo e, aua nei galo ona ole atu i le Alii e puipui ma faatasi ma outou.

“Aua e ou le malo, ma le mana, atoa ma le viiga, e faavavau lava” (Mataio 6:13). E ese le aoga o le faaiuina e Iesu o lenei tatalo i le toe viiaina o le Atua ma faaali atu Lona faaaloalo ma le usitai i le Tama. A tatou talitonu moni e pulea e le Atua ia Lona malo ma e ia te Ia le mana ma le viiga uma, ua tatou faailoa atu o Ia moni lava e pule, e alofa o Ia ia i tatou i se alofa e atoatoa, ma e finagalo o Ia ina ia tatou fiafia. Ua ou iloa o se tasi o mealilo o se olaga fiafia o le iloa lea o le faia o mea i le ala a le Alii o le a atili ai lo’u fiafia nai lo le faia o mea i la’u lava ala.

E i ai se tulaga lamatia o le ono lagona e se tagata e le agavaa o ia e tatalo. O lenei manatu e sau mai lena agaga leaga, o ia lea e aoao mai i tatou e aua le tatalo (tagai i le 2 Nifae 32:8). E tutusa lava le leaga o le mafaufau ua tatou agasala tele ma ua le tatau ai ona tatalo, ma se tagata ma’i tigaina e talitonu ua ma’i tigaina tele o ia e le mafai ai ona alu i le fomai!

E le tatau ona tatou faapea, o soo se ituaiga o tatalo, e le afaina pe faape’ī lona faamaoni, o le a mataalia pe afai na pau lava le mea tatou te faia o le tatalo. E le gata i le tatau ona fai o a tatou tatalo, ae e tatau foi ona tatou ola ai. E sili atu le fiafia o le Alii i le tagata e tatalo ona galue loa lea nai lo le tagata e na ona tatalo lava. E pei lava o vai mai le fomai, e pau lava le auala e aoga ai le tatalo o le fai lea e pei ona faatonuina mai.

Pe a ou fai atu o le tatalo o se faamanuiaga matagofie, e le ona e faapea ua ou faafetai i le mafai ona ou talanoa i le Tama Faalelagi ma lagona Lona Agaga pe a ou tatalo. Ae ona e tali moni mai o Ia ma talanoa mai ia i tatou. Ioe, o le ala e talanoa mai ai o Ia ia i tatou e masani lava e le o se leo tatou te faalogoina. Na faamalamalama mai e Peresitene Boyd K. Packer: “E oo mai lena leo matagofie, mālū o musumusuga e pei o se lagona nai lo o se leo. E mafai ona faaleo atu le atamai mamā a’ia’i i le mafaufau. … O lea taiala e oo mai o ni mafaufauga, o ni lagona, e ala mai i musumusuga ma uunaiga” (“Tatalo ma Uunaiga,” Liahona, Nov. 2009, 44).

O nisi taimi e foliga mai tatou te le maua ni tali ia tatou tatalo faamaoni ma faatauanau. E manaomia le faatuatua e manatua ai e tali mai le Alii i Lana lava taimi ma i Lana lava ala, ia sili ona faamanuiaina ai i tatou. Po o le, pe a manatunatu atili i ai, o le a tele ina tatou iloa ua uma lava ona tatou iloa lelei le mea e tatau ona tatou faia.

Faamolemole ia aua nei lotovaivai pe a le vave ona tupu lenei mea mo oe. E pei foi o le aoaoina o se gagana ese, e manaomia ai le fai soo ma taumafaiga. Ae, ia silafia, e mafai ona e aoaoina le gagana a le Agaga, ma a e mafaia loa, o le a tuuina atu ia te oe le faatuatua tele ma le mana i le amiotonu.

Ou te faatauaina le fautuaga a lo tatou perofeta pele, o Peresitene Thomas S. Monson, o lē na saunoa mai: “Ia i latou o loo faafofoga mai i lo’u leo, o e o tauivi ma luitau ma faigata, pe tetele pe laiti, o le tatalo e maua ai le malosi faaleagaga; o le tusifolau lea i le filemu. O le tatalo o le auala lea tatou te faalatalata atu ai i le Tama i le Lagi, o lē e alofa ia te i tatou. Talanoa atu ia te Ia i le tatalo ona e faalogo lea mo le tali. E mamanu mai vavega i le tatalo” (“Ia Avea ma Tagata Sili e Mafai ona Avea ai Oe,” Liahona, Me 2009, 68).

Ou te faafetai lava mo le faamanuiaga o le alu atu i lo’u Tama Faalelagi paia i le tatalo. Ou te faafetai mo le anoanoai o taimi ua Ia faafofogaina ma tali mai ai ia te au. Ona e tali mai o Ia ia te au, e aofia ai i nisi taimi i auala e muai faaali mai ma faavavega, ua ou iloa ai o loo soifua o Ia. Ou te molimau atu foi ma le lotomaualalo o Iesu, o Lona Alo paia, o lo tatou Faaola soifua. O Lana Ekalesia ma [Lona] malo lenei i luga o le fogaeleele; e moni lenei galuega. O Thomas S. Monson, o lē tatou te tatalo faatauanau mo ia, o Lana perofeta; ou te molimau atu ai i ia mea ma le mautinoa atoa i le suafa o Iesu Keriso, amene.