O Pese e Le Mafai Ona Latou Usuina

E toatele tagata o loo feagai ma faafitauli tuga po o ni faalavelave matuia i lenei olaga faaletino. I le lalolagi atoa ua tatou vaai ai i faataitaiga o tofotofoga ma faafitauli.¹ Ua tatou lagonaina le nutimomoia i o tatou agaga ona o ata o maliu i luga o televise, puapuaga matuia, ma le leai o se faamoemoe. Ua tatou vaaia tagata Iapani o loo tauivi ma le lotototoa ona o le faatafunaga mai se mafuie ma le galulolo. O vaaiga e le galo o le faatafunaga o fale tetele o le World Trade Center, ia na tatou maimoa talu ai nei sa toe faaolaola mai ma le tiga. E nutimomoia o tatou lagona pe a tatou iloaina ia ituaiga o faalavelave, aemaise lava pe a mafatia ai ē ta’umamāina.

O nisi taimi e patino i le tagata nei mala. E maliu se atalii po o se afafine a o talavou lava pe mafatia tele i se faamai faataumaoi. E maliu se matua agaalofa ona o se faatinoga e le’i mafaufauina po o se faalavelave. Pe o le a lava le faalavelave e tupu, tatou te faanoanoa ma tauivi e tauaveina avega a le tasi ma le isi.² Tatou te faanoanoa ona o mea o le a le faataunuuina ma pese o le a le usuina.

O nisi nei o fesili e tele na fesiligia soo ai taitai o le Ekalesia, Aisea e faatagaina ai e se Atua amiotonu mea leaga e tutupu, aemaise lava i tagata lelei? Aisea e le laveaiina ai i latou o e amiotonu ma o loo auauna i le Alii, mai ia faalavelave?

E ui tatou te le iloa ia tali uma, ae ua tatou iloa ni mataupu faavae taua e faatagaina ai i tatou e fetaiai ma faalavelave faatasi ma le faatuatua ma le mautinoa o loo i ai se lumanai sili atu ua fuafuaina mo i tatou taitoatasi.O nisi nei o ia mataupu faavae e sili ona taua:

Muamua, e i ai so tatou Tama i le Lagi, e silafia ma alofa patino ia i tatou ma e malamalama atoatoa i o tatou puapuaga.

Lua, o Lona Alo, o Iesu Keriso, o lo tatou Faaola ma le Togiola, lē ana le Togiola e le gata ina maua ai le faaolataga ma le faaeaga ae o le a totogi uma ai mea e le atoatoa o le olaga.

Tolu, o le fuafuaga o le fiafia a le Tama mo Ana fanau e le gata e aofia ai le muai olaga ma le olaga faitino ae faapena foi se olaga e faavavau, e aofia ai se toe faatasiga sili ma le mamalu faatasi ma i latou ua maliliu. O mea sese uma o le a faasa’oina, ma o le a tatou vaai i ai i se manino atoatoa ma se vaaiga lē ponā ma le malamalama.

Mai se vaaiga faatapulaa a i latou e leai so latou iloa, malamalama, po o se faatuatua i le fuafuaga a le Tama—o ē e na ona vaai lava i le lalolagi i tioata o le olaga faaletino i ana taua, misa, faamai, ma le leaga—e mafai ona foliga mai lenei lalolagi i le faanoanoa, le mautonu, le talafeagai, ma leai se uiga. Ua faatusatusa e taitai o le Ekalesia lenei vaaiga i se tagata e savali atu i le ogatotonu o se tala e tolu ona vaega.³ O i latou e aunoa ma se iloa o le fuafuaga a le Tama e le malamalama i le mea na tupu i le vaega muamua, po o le muai olaga, ma faamoemoega na faavaeina iina; e le malamalama foi i le faamaninoga ma folafolaga e oo mai i le vaega lona tolu, o le faataunuuga mamalu lea o le fuafuaga a le Tama.

E toatele e le malamalama e faapea i lalo o Lana fuafuaga alofa ma le atoatoa, o i latou e foliga mai e le atoatoa le malosi ona e le o so latou lava faaletonu, e le faasalaina i le iuga.⁴

I ni nai masina o lumanai o le a atoa i ai le 100 tausaga talu le tofatumoanaina o le vaa la’u pasese o le Titanic. O tulaga lamatia na siomia ai lenei mea matautia na tupu, o loo i ai pea se aafiaga malosi i tagata mo tausaga e selau talu ona tupu. O tagata na faalauiloaina le vaa la’u pasese maoae, lea e 11 fogafale le maualuga ma toetoe lava a 3 malae lakapi le umi,⁵ sa latou faia ni tautinoga sili ma le le faavaea e uiga i le saogalemu o le Titanic i sami malulu e tumu i poloka aisa tetele. Sa mafaufauina e le goto lenei vaa; ae ina ua goto ifo i le taele o le Vasa Atalana aisā, e silia ma le 1,500 agaga na maimau o latou ola faaletino.⁶

I le tele o tulaga, o le goto o le Titanic o se faatusa lea mo le olaga ma le tele o mataupu faavae o le talalelei. O se faataitaiga atoa lea o le faigata o le tau na ona vaai i tioata o lenei olaga faaletino. O le maimau o le ola sa matautia tele i ona taunuuga ae o se faalavelave faalenatura. I le tele o tagata na maliliu i taua e lua o le lalolagi ma lea faatoa pasia foi le 10 tausaga o le faatafunaga o fale tetele o le World Trade Center, ua tatou vaaia ai i o tatou lava taimi se faamalama i le faate’ia, tigā, ma faafitauli o le ola mama o loo siomia ai mea o tutupu e mafua mai i faatinoga leaga o le filifiliga saoloto. O loo i ai taunuuga matautia i aiga, uo, ma malo ona o se taunuuga o nei faalavelave, e tusa lava po o le a le mafuaaga.

E tusa ai ma le Titanic, na aoaoina ai ni lesona e uiga i le matautia o le faamaualuga ma le malaga i vasa matautia ma “e le faailogaina tagata e le Atua.”⁷ O i latou na aafia e o mai i soo se atunuu. O nisi na mauoa ma lauiloa, e pei o John Jacob Astor; ae sa i ai foi ni tagata faigaluega leipa, tagata malaga, fafine, tamaiti, ma tagata o le auvaa.⁸

Sa i ai foi ni sootaga e le itiiti ifo ma le lua a le Au Paia o Aso e Gata Ai ma le Titanic.Ua faaalia uma i [sootaga] ia e lua o tatou luitau i le malamalama ai i tofotofoga, faafitauli, ma faalavelave ma maua ai ni malamalamaaga e uiga i le auala e mafai ai ona tatou taulimaina na mea. O le sootaga muamua o se faataitaiga o le talisapaiaina o faamanuiaga tatou te maua atoa ai ma luitau tatou te aloese mai ai. Na aafia ai Alma Sonne, o lē na mulimuli ane avea ma se Pulega Aoao.⁹ Ou te fanau mai i Logan, Iuta, o loo avea o ia ma o’u peresitene o le siteki. Sa faia le ma faatalanoaga o le misiona ma Elder Sonne. I aso na o faifeautalai uma e sauniuni, e faatalanoa e se Pulega Aoao. O ia o se uunaiga tele i lo’u olaga.

A o avea Alma o se alii talavou, sa i ai sana uo sa le toaga i le Lotu, e igoa ia Fred. Sa tele ni a la talanoaga e uiga i le ō e faamisiona, ma mulimuli ane na faatalitonuina e Alma Sonne ia Fred e sauni ma auauna atu. Na valaauina uma i la’ua i le Misiona a Peretania. Ina ua mae’a a la misiona, sa faia ai e Elder Sonne, o le failautusi a le misiona, ni fetuunaiga o faigamalaga mo lo latou toe foi atu i le Iunaite Setete. Sa ia faatauina ni pepa malaga e o ai i le Titanic mo ia, o Fred, ma isi faifeautalai e toafa ua faamaeaina foi a latou misiona.¹⁰

Ina ua oo mai le taimi e malaga ai, sa leiloa le mafuaaga na tuai mai ai Fred. Na faaleaogaina e Elder Sonne ia pepa malaga uma e ono e folau ai i le vaa la’u pasese fou ma le maoae i lana uluai malaga, ae faatau ia pepa malaga i se vaa e folau i le aso e sosoo ai.¹¹ Sa faailoa e faifeautalai e toafa ia na fiafia o le a malaga i le Titanic, lo latou lē fiafia. O le tali a Elder Sonne sa tali tutusa lava ma le tala a Iosefa ma ona uso i Aikupito o loo tusia i le Kenese: “E mafai faapefea ona tatou foi atu i o tatou aiga ae e le o i ai le tama ma i tatou?”¹² Sa ia faamalamalama atu i ana soa na latou o mai faatasi uma i Egelani ma e tatau ona latou toe foi faatasi uma atu i le fale. Mulimuli ane na iloa e Elder Sonne le goto o le Titanic ma faapea atu ma le agaga faafetai ia Fred, “Ua e laveaia lo’u ola.” Sa tali mai Fred, “Leai, e ala i lo’u sau i lenei misiona, ua e laveaiina ai lo’u ola.”¹³ Sa faafetai atu uma ia faifeautalai i le Alii mo le faasaoina o i latou.¹⁴

O nisi taimi, e pei o le tulaga na oo i ai Elder Sonne ma ana uo faifeautalai, e oo mai ia faamanuiaga tetele ia i latou o ē faatuatua. E tatau ona tatou faafetai mo le alofa mutimutivale agamalu e oo mai i o tatou olaga.¹⁵ Tatou te le o nofouta lava i le tele o faamanuiaga o loo tatou mauaina mai lea aso i lea aso. E matuai taua lava lo tatou mauaina o se agaga o le faafetai i o tatou loto.¹⁶

O loo manino lava tusitusiga paia: o i latou e amiotonu, mulimuli i le Faaola, ma tausia Ana poloaiga o le a manuia i le nuu.¹⁷ O se elemene taua o le faamanuiaina o le mauaina lea o le Agaga i o tatou olaga.

Peitai, o le amiotonu, tatalo, ma le faamaoni o le a le taunuu pea i ni taunuuga fiafia i la le tino. E toatele o le a oo i tofotofoga matuia. A tupu lenei mea, o le mauaina tonu o le faatuatua ma le saili atu i faamanuiaga faaleperisitua ua faamaoniaina e le Atua. Na tautino mai le Alii, “Ia valaauina ni toeaina … e tatalo mo i latou ma faaee o latou lima i luga o i latou i lo’u igoa; ma afai e oti i latou e oti i latou ia te a’u, ma afai e ola i latou e ola i latou ia te a’u.”¹⁸

Sa faailoa mai o le sootaga lona lua a le Au Paia o Aso e Gata Ai ma le Titanic e le’i i ai se taunuuga fiafia i la le tino. O Irene Corbett sa 30 tausaga le matua. O ia o se avā ma se tina talavou mai Provo, Iuta. Sa i ai ni ana taleni maoae o se tusiata ma se tagata musika; sa avea foi o ia ma se faiaoga ma se tausima’i. I se uunaiga o se matata faafomai i Provo, sa ia auai atu ai i se kosi suesue o tomai faatosaga mo le ono masina i Lonetona. O lona manao tele sa i ai ina ia faia se suiga i le lalolagi. Sa ia faaeteete, mafaufau lelei, loto tatalo, ma lototoa. O se tasi o mafuaaga na ia filifili ai le Titanic e toe foi atu ai i le I.S. ona sa ia manatu o le a latou malaga faatasi ma faifeautalai ma o le a maua ai sona saogalemu faaopoopo. O Irene o se tasi o nai tamaitai e le’i faasaoina mai lenei faalavelave matautia. O le tele o tamaitai ma tamaiti na tuu i vaafaaola ma laveaiina mulimuli ai. E le’i lava ni vaafaaola mo tagata uma. Ae ua talitonuina e le’i i ai o ia i totonu o se vaafaaola ona, faatasi ai ma ona tomai faapitoa, sa faatasi atu o ia i manaoga o le toatele o le pasese na manunua ina ua feto’ai le vaa ma le aisa tele.¹⁹

E tele ia ituaiga o luitau o i ai. O nisi tatou te maua ai ni aafiaga taua. O ni taunuuga tigā i lenei olaga faaletino e le o ni faamaoniga o le leai o se faatuatua po o se lē atoatoa i le fuafuaga aoao a lo tatou Tama i le Lagi. E moni lava le afi a le tunu auro, ma le tulaga lelei o uiga faaalia ma le amiotonu ia e tutupu mai e ala i mafatiaga e faaatoatoa ai ma faamamāina ai i tatou ma saunia ai i tatou e feiloai ma le Atua.

A o avea le Perofeta o Iosefa Samita ma se pagota i le Falepuipui i Liperate, na tautino atu le Alii ia te ia e tele faalavelave e mafai ona tutupu i tagata. Sa ta’ua e le Faaola i vaega, “Afai e lafo oe i le loloto; afai e taupulepule galulolo o le sami e faasaga mai ia te oe; afai e avea matagi malolosi ma ou fili … ma aufaatasi elemene uma e pupuni le ala; … o nei mea uma e te maua ai le poto masani, ma o le a avea ma ou lelei.”²⁰ Sa faaiuina e le Faaola Ana faatonuga: “Ua iloa ou aso, ma o ou tausaga o le a le faitauina itiiti mai; o lea, aua le mata’u …, aua o le a faatasi le Atua ma oe e faavavau ma faavavau lava.”²¹

O nisi luitau e mafua mai i filifiliga saoloto a isi. E taua le filifiliga saoloto mo le tuputupu a’e faaleagaga ma le atinaega o tagata taitoatasi. O le amio leaga o se elemene o le filifiliga saoloto. Na faamalamalama mai e Kapeteni Moronae lenei aoaoga faavae taua tele: “E tuu e le Alii ē amiotonu ia fasiotia, ina ia mafai ona oo mai o lona faamasinotonu ma lana faamasinoga i luga o ē amioleaga.” Na ia faamanino mai e le o malaia ē amiotonu, ae “latou te ulu atu i le malologa o le Alii lo latou Atua.”²² O le a faamasinoina ē amioleaga mo mea leaga latou te faia.²³

O nisi luitau e oo mai i le lē usiusitai i tulafono a le Atua. O faafitauli tau le soifua maloloina e mafua mai i le ulaula tapaa, ava malosi, ma le faatautala o fualaau, ua lofituina. O le faapagotaina i falepuipui ona o se taunuuga o solitulafono e fesootai ma le ava malosi ma fualaau faasaina ua maualuga tele foi.²⁴

O le saosaoa o le tatalaga o faaipoipoga ona o le mulilua ua maoae foi. E mafai ona aloese mai le tele o nei tofotofoga ma faafitauli e ala i le usitaia o tulafono a le Atua.²⁵

O la’u peresitene pele o le misiona, o Elder Marion D. Hanks (o lē na maliu ia Aokuso), na faatonuina i matou o ni faifeautalai ia taulotoina se faamatalaga ina ia tetee atu ai i luitau faaletino: “E leai se avanoa, leai se taunuuga, leai se lumanai e mafai ona faalavelaveina pe taofia pe puleaina le mausali o le tuuto atu o se tagata naunau.”²⁶

Na ia faailoa mai e le faatatau lenei mea i luitau uma tatou te fetaiai ae e moni i mataupu faaleagaga. Ou te talisapaia lana fautuaga i lo’u olaga.

O se tasi o mafuaaga mo le malaia matautia o ola i le Titanic o le le lava lea o vaafaaola. E tusa lava pe o a luitau tatou te fetaiai i lenei olaga, e maua lava i le Togiola a le Faaola ia vaafaaola mo tagata uma. Mo i latou e manatu o luitau o latou fetaiai e le talafeagai, ua totogiina e le Togiola ia mea uma e le talafeagai o le olaga.²⁷

O se luitau tulagaese mo i latou ua maliliu ē pele ia i latou o le aloese lea mai le mafaufau pea i avanoa ua maimau i lenei olaga. E masani lava o i latou e maliliu a o talavou ua faaalia ni tomai taua, mea e fiafia ai, ma taleni. Faatasi ai ma lo tatou malamalama faatapulaaina, tatou te faanoanoa ona o mea o le a le faataunuuina atoa ma pese o le a le usuina. Ua faamatalaina lenei mea o le oti atu faatasi ma lau musika o loo i totonu pea o oe. O le musika i lenei tulaga o se faatusa mo soo se ituaiga o gafatia e le i faataunuuina. O nisi taimi e faia ai e tagata ni sauniuniga taua ae e leai se avanoa e faatino ai i le olaga nei.²⁸ O se tasi o solo lauiloa e ta’ua soo, “Tusiaina ma le Faanoanoa i se Lotoa o le Ekalesia i se Nuu Maotua,” tusia e Thomas Gray, e manatunatu ai i ia avanoa ua misia:

O le avanoa ua maumau e ono fesootai i le aiga, galuega, taleni, aafiaga, po o isi. O mea uma nei na lē taulau i le tulaga o Sister Corbett. Sa i ai pese na te le’i usuina ma gafatia na te le’i faataunuuina i lenei olaga faaletino. Ae pe a tatou vaai i tioata lautetele ma le manino o le talalelei, nai lo tioata faatapulaa o le na ona i ai i le olaga faaletino, tatou te iloa ai le taui tele e faavavau na folafolaina e se Tama agaalofa i Lana fuafuaga. E pei ona aoao mai le Aposetolo o Paulo, “O mea e lei vaaia e mata, e lei lagona foi e taliga, o mea ia ua saunia e le Atua mo i latou o e alofa ia te ia.”³⁰ Ua maua mai i se laina o se viiga pele le mafanafana, toomaga, ma tioata manino: “Ua faafofoga mai Iesu, i a’u pese fai lemu.”³¹

Na fetalai mai le Faaola: “O lea, ia faamafanafanaina o outou loto. … Ia filemu ma iloa o A’u o le Atua.”³² Ua tatou maua Lana folafolaga o le a tatou usuina faatasi ma a tatou fanau ia “pese o le olioli tumau-faavavau.”³³ I le suafa o Iesu Keriso, lo tatou Faaola, amene.