2010–2019
Me Yacova ni Da Qai Sota Tale
Okotova 2011


Me Yacova ni Da Qai Sota Tale

Me tiko ga vata kei keda na yalotabu eda sa vakila eke ena noda laki qarava tale na veika eda dau vakaogai keda kina e veisiga.

Kemuni na wekaqu, au kila ni o ni na duavata kei au ni oqo e dua na koniferedi veivakauqeti vakalevu dina sara. Eda sa vakila vakayauyau na Yalo ni Turaga ena rua na siga sa sivi oqo ni sa tara na yaloda ka vaqaqacotaka na noda ivakadinadina ena cakacaka vakalou oqo. Eda vakaraitaka na noda vakavinavinaka vei ira yadua era sa vakaitavi, oka kina o ira na Turaga era cabo masu.

Eda tiko kece oqo baleta ni da lomana na Turaga ka vinakata me da qaravi Koya. Au vakadinadinataka vei kemuni ni nanumi keda tiko na Tamada Vakalomalagi. Au vakadinadinataka na Ligana ena veika kecega.

Vakadua tale, sa totoka dina na ivakatagi, kau vakaraitaka na noqu vakavinavinaka ka vakakina na vakavinavinaka ni Lotu raraba vei ira era lomasoli me ra wasea vei keda na nodra taledi.

Eda vakaraitaka na noda vakavinavinaka titobu vei ira na Turaga era sa mai vagalalataki ena koniferedi oqo. Era sa veiqaravi vakavinaka ena yalodina ka ra sa cau vakalevu sara ki na cakacaka ni Turaga.

Au vakaraitaka na noqu vakavinavinaka cecekia vei rau na noqu daunivakasala yalodina ka gugumatua ka vakavinavinakataki rau e matanavotu na nodrau veitokoni kei na veivuke erau vakayacora vei au. Erau sa turaga yalomatua dina ka kila ka, ka tawavakaiyalayala na nodrau veiqaravi.

Au vakavinavinakataki ira na taciqu ena Kuoramu ni iApositolo Le Tinikarua ena nodra guta tiko ga na veiqaravi ena cakacaka ni Turaga. Au vakaraitaka vakakina na noqu vakavinavinaka vei ira na lewe ni Kuoramu ni Vitusagavulu kei iratou na Matabisopi Vakatulewa ena nodra veiqaravi vuavuai vinaka ka sega ni ra nanumi ira ga. Au vakaraitaka vakakina na noqu vakavinavinaka vei ira na marama kei na turaga era veiqaravi ena vakaitutu raraba ni veimataisoqosoqo.

Kemuni na wekaqu, au vakadeitaka vei kemuni ni sa kila tiko na Tamada Vakalomalagi na veibolebole eda dui sotava tiko e vuravura ena gauna oqo. E lomani keda yadua ka na vakalougatataki keda ena noda segata me da muria na Nona ivakaro ka vakasaqarai Koya ena masu.

Eda sa vakalougatataki vakalevu dina sara ni sa tu vei keda na kosipeli vakalesui mai nei Jisu Karisito. E vakarautaka na isau ni taro me baleta na vanua eda lako mai kina, na cava eda mai cakava eke, kei na vanua eda na lako kina ni da sa toki yani mai na bula oqo. E vakaibalebale ka vakainaki ka solia na inuinui ki na noda bula.

Au vakavinavinaka vei kemuni ena nomuni dau veirairaitaka na nomuni veiqaravi. Eda matataka na Kalou ena vuravura oqo, ka noda ilesilesi me da lomana ka qaravi ira na Luvena.

Au vakavinavinakataka na veika kece o ni dau qarava ena nomuni veitabanalevu kei na tabana. Au vakaraitaka na noqu vakavinavinaka ena nomuni lomasoli mo ni veiqaravi ena veitutu o ni kacivi kina, se itutu cava ga. E bibi vakayadua ena kena tosoi na cakacaka ni Turaga.

Sa mai cava oqo na koniferedi. Me da na taqomaki, ena noda sa lesu yani ki na noda dui veivale. Me da raica ni sega sara ga ni dua na leqa ena noda a yali tu. Me tiko vata ga kei keda na yalotabu eda sa vakila eke ena noda laki qarava tale na veika eda dau vakaogai keda kina e veisiga. Me da vakaraitaka na noda veilomani sara vakalevu vakaikeda. Me dau kunei tikoga ni da cakava tiko na loma ni Turaga.

Me tiko kei kemuni na veivakalougatataki mai lomalagi. Me vakasinaiti na noda veivale ena duavata kei na veilomani. Mo ni dau susuga cake tikoga na nomuni ivakadinadina, me ra na nomuni itataqomaki mai vua na meca.

Me vaka niu nomuni italai yalomalumalumu, au gadreva mai vu ni yaloqu meu cakava na loma ni Kalou ka qaravi Koya ka qaravi kemuni.

Au lomani kemuni; au masulaki kemuni. Au na kerea tale yani mo ni dau nanumi au ka dau nanumi ira kece na Vakaitutu Raraba ena nomuni masumasu. Keimami duavata kei kemuni ena kena tosoi ki liu na cakacaka vakasakiti oqo. Au vakadinadinataka vei kemuni ni da duavata kece tiko ena ka oqo ka dui tu na itavi me da qarava na tagane, yalewa, kei na gone. Me solia vei keda na Kalou na igu kei na kaukauwa kei na yalo me da qarava vinaka kina na noda itavi.

Au wasea vei kemuni na noqu ivakadinadina ni dina na cakacaka oqo, ni bula tiko na noda iVakabula, ka ni o Koya e tubera ka dusimaka tiko na Nona Lotu ena vuravura oqo. Au laiva vei kemuni na noqu ivakadinadina kau vakadinadinataka ni bula tiko ka lomani keda na Kalou na Tamada Tawamudu. O Koya dina na Tamada, e tiko dina o Koya ka bula tiko. Me da raica ka kila na Nona gadreva tu me toro volekati keda mai, kei na levu ni ka sa tu vakarau me cakava o Koya me vukei keda kina, ena levu ni Nona lomani keda, kei na levu ni ka sa cakava kei na ka sa tu vakarau kina me cakava o Koya ena vukuda.

Me vakalougatataki kemuni o Koya. Me tiko vata kei kemuni na Nona vakacegu sa yalataki tu ena gauna oqo ka sega ni mudu.

Au vakamoce vei kemuni me yacova ni da qai sota tale ena loma ni ono na vula mai oqo, kau vakayacora vakakina ena yaca i Jisu Karisito, na noda iVakabula ka Dauveivueti, emeni.