E Tae Noa’tu i te Taime e Farerei Faahou ai Tatou

E au mau taea‘e e au mau tuahine, ua ite au e, ua tuati to tatou mana‘o e, ua riro teie amuiraa ei amuiraa nehenehe roa. Ua ite tatou i te niniiraa rahi o te Varua o te Fatu i roto i teie na mahana e piti, a putapû ai to tatou aau, e a haapuaihia ai to tatou iteraa papû no ni‘a i teie ohipa hanahana. Te faaite atu nei matou i te mauruuru i te mau taata atoa tei tauturu mai, tae noa’tu i te mau taea‘e tei horo‘a i te mau pure.

Tei ô nei tatou paatoa no te mea ua here tatou i te Fatu e ua hinaaro tatou e tavini Ia’na. Te faaite papû nei au ia outou e, ua ite to tatou Metua i te Ao ra ia tatou. Te ite nei au i To’na rima i roto i te mau mea atoa.

Te parau faahou nei au e, e mea nehenehe mau te mau himene, e te faaite nei au i to’u mauruuru rahi e i to te Ekalesia taatoa, ia ratou o tei farii ia faaite i to ratou mau tareni ia tatou.

Te faaite nei matou i to matou mauruuru rahi i teie mau taea‘e o tei haamauruuruhia i roto i teie amuiraa. Ua tavini haapa‘o ratou e te maitai e ua rave i te mau tautururaa faahiahia no te ohipa a te Fatu.

Te faatae nei au i te mauruuru rahi i to’u na tauturu haapa‘o e te itoito, e te haamauruuru nei au ia raua i mua i te taata no te paturu e no te tauturu ta raua i horo‘a mai ia’u. E na taata feruriraa paari mau teie, e te haro‘aro‘a, e aita e nehenehe e faaau i te faufaa o ta raua taviniraa.

Te haamauruuru nei au i to’u mau taea‘e no te Pŭpŭ no te Tino Ahuru Ma Piti Aposetolo no ta ratou taviniraa tuutuu ore i roto i te ohipa a te Fatu. Te faaite atoa nei au i to’u mauruuru i te mau melo no te Pŭpŭ Hitu Ahuru e i te Episekoporaa Faatere Rahi no ta ratou taviniraa otia ore e te maitai. Te faaite atoa nei au i to‘u mauruuru i te mau vahine e te mau tane e tavini nei ei mau ti‘a faatere no te mau pŭpŭ tauturu rahi.

E te mau taea‘e e te mau tuahine, te haapapû atu nei au ia outou e, ua ite to tatou Metua i te Ao ra i te mau titauraa ta tatou e farerei nei i roto i te ao i teie mahana. Ua here Oia ia tatou tata‘itahi, e e haamaitai Oia ia tatou mai te mea e, e rohi tatou no te haapa‘o i Ta’na mau faaueraa, e e imi ho‘i Ia’na na roto i te pure.

Ua haamaitaihia tatou na roto i te fariiraa i te evanelia a Iesu Mesia i faaho‘i-faahou-hia mai. Na te reira e horo‘a nei i te mau pahonoraa i te mau uiraa no ni‘a i te iteraa e, no hea mai tatou, eaha tatou i tae mai ai i ô nei, e e haere tatou i hea ia faaru‘e mai tatou i teie oraraa. Na te reira e horo‘a mai i te auraa e i te tumu e i te tia‘iraa i to tatou oraraa nei.

Te haamauruuru nei au ia outou no te taviniraa ta outou e horo‘a nei ma te aau tae i te tahi e te tahi. O tatou te rima o te Atua i ni‘a i teie fenua, ma te faaueraa mana ia here e ia tavini i Ta’na mau tamarii.

Te haamauruuru nei au ia outou no te mau mea atoa ta outou e rave nei i roto i ta outou mau paroita e ta outou mau amaa. Te faaite atu nei au i to’u mauruuru no to outou hinaaro ia tavini i roto i te mau ti‘araa i piihia’i outou, noa’tu te huru o te reira mau piiraa. E mea faufaa ratou tata‘itahi no te faahaereraa i te ohipa a te Fatu i mua.

Ua hope te amuiraa i teie nei. A ho‘i ai tatou i to tatou mau ti‘ahapa, a ho‘i ma te pe‘ape‘a ore. E ia maitai ho‘i te mau mea atoa i ô tatou, ia ho‘i atu tatou. E ia parahi tamau mai hoi i roto ia tatou, te Varua ta tatou i farii i ônei, a rave haere ai tatou i ta tatou mau ohipa i te mau mahana atoa. E mata na tatou i te faaite i te maitai rahi atu i te tahi e te tahi. E mata na tatou i te rave tamau noa i te ohipa a te Fatu.

Ia vai mai na te mau haamaitairaa o te ra‘i i ni‘a ia outou. Ia î na to outou mau nohoraa i te au maite e te here. E mata na outou i te faaamu tamau noa i to outou iteraa papû, ia riro ho‘i te reira ei paruru no outou i mua i te enemi.

Ei tavini haehaa no outou, te hinaaro nei au ma to’u aau atoa ia haapa‘o i te hinaaro o te Atua e ia tavini Ia’na e ia tavini ia outou.

Te here nei au ia outou ; te pure nei au no outou. Te ani faahou nei au ia haamana‘o outou ia’u e i te taatoaraa o te mau Hui Mana Faatere Rahi i roto i ta outou mau pure. Ua hoê matou e o outou i te tura‘iraa i mua i teie ohipa umerehia. Te faaite papû nei au ia outou e, ua hoê tatou paatoa i roto i teie ohipa, e e tuhaa ohipa ta te tane, te vahine e te tamarii tata‘itahi. Ia horo‘a mai te Atua ia tatou i te puai e i te aravihi e te hinaaro puai ia amo maitai i ta tatou tuhaa ohipa.

Te faaite nei au i to’u iteraa papû ia outou e, e parau mau teie ohipa, te ora nei to tatou Faaora, e te arata‘i nei e te faatere nei Oia i Ta’na Ekalesia i ni‘a i te fenua nei. Te vaiiho atu nei au ia outou na i to’u iteraa e to’u iteraa papû e, te ora nei te Atua to tatou Metua i te Ao ra, e ua here Oia ia tatou. Oia mau to tatou Metua, e e taata mau oOa. Ia ite e ia haroaroa hoi tatou e, te hinaaro nei Oia ia haafatata roa mai i piha‘iho ia tatou, ia here ia tatou, oia ïa, e hinaaro mau To’na ia na reira no tatou.

Ia haamaitai mai Oia ia outou. Ia tae mai hoi i ni‘a ia tatou To’na ra hau i fafauhia mai ra, i teie nei e i te mau taime atoa.

A faaitoito i to outou haereraa, e tae noa’tu i te taime e farerei faahou ai tatou i roto e ono ava‘e i muri nei, te na reira nei au i te i‘oa o Iesu Mesia, to tatou Faaora e te Taraehara, amene.