2010–2019
Waraka na Turaga: Me Yaco Ga Na Nomuni Lewa
Okotova 2011


Waraka na Turaga: Me Yaco Ga Na Nomuni Lewa

Sa inaki ni noda mai bula eke meda tubucake, vakatorocaketaki, ka vakaukauwataki mai na veika eda na sotava.

Ena mataka ni Sigatabu nikua, eda vakavinavinaka ka vakadinadinataka ni bula dina tiko na noda iVakabula. Sa vakalesui mai vua na parofita o Josefa Simici na Nona kosipeli. E dina na iVola i Momani. E liutaki keda tiko nikua na parofita bula o Peresitedi Thomas S. Monson. Tuvukana sara e cake eda na vakadinadinataka na Veisorovaki nei Jisu Karisito kei na veivakalougatataki tawamudu ka drodro mai kina.

Na vica na vula sa oti oqo, e solia vei au e dua na gauna meu dikeva ka vulica tale kina na solibula veisorovaki ni noda iVakabula, vakakina na Nona vakarautaki Koya me na laki cabori tawamudu me baleti keda kece yadua sara.

E a tekivu na Nona vakavakarau mai na bula taumada ena Nona a waraka na Tamada ka kaya, “Me yaco ga na lomamuni, ka me nomuni tikoga na vakarokoroko ka sega ni mudu.”1 Tekivu mai kea ka tomani tiko nikua, e vakayagataka tikoga o Koya na Nona galala ni digidigi me ciqoma ka vakayacora na ituvatuva nei Tamada Vakalomalagi. E vakavulica vei keda na ivolanikalou ni se gone, “ni sa kilikili kei [Koya] me tiko ena vale nei Tamana”2 ka “waraka na Turaga me na tekivu na nona veiqaravi.”3 Ni sa yabaki 30, e a sotava kina na veivakatovolei levu, e a vorata ka kaya, “Mo lako ki dakuqu Setani.”4 Mai Kecisemani, e a vakanuinui Vua na Tamana ka kaya, “Ia me kakua ni yaco na noqu lewa, me yaco ga na nomuni lewa,”5 sa qai mai vakayagataka na Nona galala ni digidigi me vakararawataki baleta na noda ivalavala ca. Ena veivakamadualaki ni veilewai e matanalevu kei na mosi ni vakoti e kauveilatai, e waraka toka ga o Koya na Tamana me “vakamavoataki ena vuku ni noda talaidredre … [ka] sa qaqi ena vuku ni noda caka cala.”6 Ena nona sa kaci ena domo levu, “Noqu Kalou, Noqu Kalou, ko ni sa biuti au ena vuku ni cava?”7 E waraka na Tamana—ni vakayagataka na Nona galala ni digidigi me vosoti ira na Nona meca,8 ka raica me wanonovi matua o Tinana,9 ka vosota ki na ivakataotioti me yacova ni sa laki cava na Nona bula kei na cakacaka vakalotu e vuravura.10

Au dau vakasamataka vakawasoma, se cava na vuna mera sotava kina na Luvena na Kalou kei ira na Nona parofita yalodina vakakina o ira na Yalododonu vakabauta na veivakatovolei kei na dredre, ena nodra sa cakava sara tikoga na Loma ni Tamada Vakalomalagi? Na cava me dredre kina, vakabibi vei ira?

Au nanumi Josefa Simici ena nona a tauvimate ni se gonetagane lailai kei na veibeitaki ena nona bula taucoko. E a osivaka mai me vaka na iVakabula, “Kemuni na Kalou, ko ni sa tiko evei.”11 Ia ena gauna e tiko duadua voli kina, e vakayagataka na nona galala ni digidigi me waraka na Turaga ka vakayacora na loma ni Tamada Vakalomalagi.

Au nanumi ira na ivuvu ena nodra takosova na vanua liwalala mai Nauvoo era vakayagataka na nodra galala ni digidigi ena nodra muria e dua na parofita mera sotava na tauvimate, dredre ni bula vakakina vei ira eso na mate. Na cava me yaco kina na dredre vakaoqori? Me na yaco ki vei? Na cava na kena inaki?

Ni da na vakataroga na taro oqo, eda na qai vakila ni sa inaki ni noda mai bula eke meda tubucake, vakatorocaketaki, ka vakaukauwataki mai na veika eda na sotava. Eda na cakava vakacava na ka oqo? E tukuna vei keda na ivolanikalou ena dua ga na itomovosa:” waraka na Turaga”12 Eda na sotava taucoko na dredre. Ena solia vei keda vakakina na Tamada Vakalomalagi na dredre oqo me laurai se na rawa ni da na vakayagataka na noda galala ni digidigi meda na muria na Luvena. O Koya e sa kila oti tu ka na soli vei keda na galala meda na vulica, ni kevaka me vakacava sara na dredre oqori, “ni ko na kalougata vakalevu ni ko sa vosota rawa na veika kece oqo.”13

Kena ibalebale li oqo ni da kila na ibalebale ni bolebole eda na sotava? Eda na sega beka ni taroga ena so na gauna, “Kemuni na Kalou ko ni sa tiko beka e vei?14 Io! Ni mate na nona itokani e dua, ena dau taroga o nona itokani. Ni sotava na leqa vakailavo e dua na matavuvale, ena dau taroga o tama. Ni dau mai lako sese e dua na gone, erau na dau taroga na nona itubutubu ena yalorarawa. Io, “sa ia na tagi e na bogi, ia, sa yaco ena mataka na marau.”15 Ni sa kida na rarama ena kena sa torocake na noda vakabauta kei na kila eda na tucake ka digitaka meda waraka na Turaga, ka kaya, “Me yaco ga na nomuni lewa.”16

Ia, na cava na ibalebale ni waraka na Turaga? Ena ivolanikalou, na vosa waraka e kena ibalebale, mo vakanuinui, mo nanamaki, vakakina mo vakararavi. Mo waraka ka vakararavi vua na Turaga ena gadrevi kina na vakabauta, vosota, yalomalua, yalomalumalumu, vosota vakadede, talairawarawa ki na ivunau, ka vosota ki na ivakataotioti.

Mo waraka na Turaga e kena ibalebale, mo tea na sore ni vakabauta ka bucina cake “ena yalodina, kei … na nomudou vosota.”17

E kena ibalebale na masumasu me vakataka na iVakabula—vua na Kalou, na Tamada Vakalomalagi—ka kaya: “Me yaco mai na nomuni matanitu. Me yaco na nomuni lewa.”18 Sai koya na masu eda cabora ena yaloda taucoko ena yaca ni noda iVakabula, o Jisu Karisito.

Kena ibalebale me vakasamataki ena vuni yaloda ka “[ciqoma] na Yalo Tabu” me na rawa kina ni da kila “na veika kece meda na cakava.”19

Ni da sa vakamuria na veivakauqeti ni Yalotabu, eda na raica ni “sa tubu na dauvosota mai na ka rarawa”20 ka meda vulica meda “vosota ka gumatua tikoga me yacova [ni da] sa vinaka sara”21

Na waraka na Turaga e kena ibalebale meda “tudei tikoga”22 ka “toso ki liu” ena vakabauta “kei na vakanuinui taucoko sara.”23

Kena ibalebale, na “vakararavi tabakidua ki na loloma i Karisito”24 kei na “[Nona] loloma ni vukei [keda ka kaya]: Me yaco ga na nomuni lewa, ia me kakua sara ni yaco na neimami lewa.”25

Ni da sa waraka tiko na Turaga, eda na “tudei ena vakamuria na ivunau,”26 ka “vakabauta ni da na kune vakacegu ena vuku ni veika rarawa oqori.”27

Meda “kakua ni biuta … [na noda] dinata”28 ni sa “ia na veika rarawa kece [eda] sa sota kaya [meda] na vinaka kina.”29

Ena duidui sara na veika dredre ena sotavi. Na veika e a sotava o Jope ena vakananumi keda ena veika meda na vosota. A vakayalia kece o Jope na nona iyau, wili kina na nona qele, nona vale, nona manumanu, lewe ni nona matavuvale, kena irogorogo, ituvaki vinaka ni nona bula, vakakina na ivakarau ni nona vakasama. Ia ena gauna sara ga ni nona sa lutu sobu, a waraka na Turaga ka kaya ena nona ivakadinadina: A kaya:

“Niu sa kila sa bula tiko na noqu iVakabula, ena tu talega e vuravura ena siga mai muri:

“Ia, ni sa rusa sara na kuliqu oqo, kau na kunea ga na Kalou ena yagoqu.”30

“Kevaka sa vakamatei au ko koya, kau na vakararavi ga vua.”31

Ena ivakaraitaki matata oqo nei Jope, ira na parofita, kei na iVakabula, eda na sotava tikoga na bolebole ni waraka tiko na Turaga, o ya kevaka meda sega tiko ni kila vakavinaka na Nona ituvatuva kei na inaki vei keda. Sa dau ciqomi vakalevu na kila vaka oya me “vosa ena vosa, [kei] na vunau ena vunau.”32

Ena noqu bula au sa vulica ni so na gauna au na sega ni ciqoma na isau ni noqu masu baleta ni kila tiko na Kalou niu se bera ni vakarau. Ia, ni sa sauma mai o Koya, ena “vakalailai eke ka vakalailai mai kea”33 baleta ni o ya sara ga na ka au rawa ni ciqoma se na ka au rawa ni cakava.

Eda dau masuta wasoma na vosota, ia eda vinakata sara ga ena gauna o ya! E a dau masulaka o Peresitedi David O. McKay ni se gone me dua na nona ivakadinadina ni dina na kosipeli. Ena vica vata na yabaki e muri ni sa laki kaulotu voli mai Sikoteladi, sa qai yaco mai vua na ivakadinadina o ya. E a qai vola vakaoqo o koya, “sa vakadeitaka vei au ni masu ena yalodina ena dausaumi vakaidina ena so na ‘gauna ena so na vanua.’”34

Eda na sega beka ni kila se na sauma mai vakacava na Turaga na noda masu, ena Nona gauna kei na Nona ituvatuva, ena yaco mai na kena isau. E so na kena isau ena qai yaco ena bula ka tarava. Oqo ena dina ena so na yalayala ena noda veivakalougatataki ni peteriaki kei na so na kalougata ni so na lewe ni matavuvale. Meda kakua ni soro ena waraka na Turaga. E ka tawamudu na Nona veivakalougatataki, ka sega ni vagauna.

Na waraka na Turaga ena solia vei keda e dua na madigi levu ni noda kila ni levu sara era tu ka waraki keda. Era waraki keda na luveda meda vakaraitaka na vosota, na loloma, kei na noda na kilai ira vakavinaka cake. Era a waraki keda na noda itubutubu meda vakaraitaka vei ira na vakavinavinaka kei na yalololoma. O ira na tuakada kei na tacida era a waraki keda meda veivosoti, yalololoma ka dauveivosoti. Era dau waraki keda na watida meda lomani ira me vaka e lomani keda kece na iVakabula.

Ni da sa vosota rawa na mosi vakayago, eda sa na rawa ni kila se vica era sa tu ka waraki keda. Vei ira kece na Meri kei na Marica, vei ira kece na kai Samaria dauloloma ka dau vukei ira na tauvimate, vukei ira na malumalumu, ka qaravi ira na vakaleqai nodra vakasama kei na ituvaki ni yagodra au vakila me baleti kemuni na nodrau loloma na Tamada Vakalomalagi kei na Luvena Daulomani. Ena nomuni dau veiqaravi Va-Karisito ena veisiga, ko ni sa waraka tiko na Turaga ka vakayacora tiko na loma ni Tamada Vakalomalagi. Sa na matata tu na Nona veivakadeitaki ni kaya: “Ni kemuni a cakava vua e dua sa lailai vei ira na wekaqu oqo, ni a cakava vei au.”35 E kila o Koya na nomuni vakacacabo kei na nomuni rarawa. Ena dau rogoca na nomuni masu. Ena dau tiko kei kemuni na Nona vakacegu ni ko ni sa waraki Koya ena vakabauta.

Oi keda vakayadua eda na sega ni rawa ni kila se vakasamataka rawa na nona dau lomani keda kece na Turaga. Me da sa dau veilomani vakalevu cake kina vakakina na noda lomani keda vakaikeda. Me da dau nanuma ni sa yaco “[me da] tamata yalosavasava ena vuku ni [Nona] veisorovaki, meda talairawarawa, yalomalua, yalomalumalumu, dauvosota, dauloloma, ka talairawarawa ki na veika kece sa lewa [vei keda] na Turaga me vaka na gone sa talairawarawa vua na tamana.”36

Sa vaka o ya na vakacacabo ni noda iVakabula vua na Tamana ena Were o Kecisemani. Kaya o Koya vei ira na Nona tisaipeli, “Me datou vakatawa,” e vakatolu na Nona lesu mai ka raici iratou ni ratou moce ga.37 Ni sa mai sega na veitokani kei iratou na tisaipeli sa vakakina ni sa mai yali na vakilai ni Tamana, sa digitaka ga na iVakabula me “vosota na veika rarawa kei na veivakatovolei kecega.”38 Ni sa talai mai e dua na agilosi me vakaukauwataki Koya,39 A sega ni laiva “me biu tu mai na bilo qo.”40 E a waraka na Tamana ka kaya, “Me yaco ga na nomuni lewa,”41 ka sa sikaraka duadua ga ko Koya na ikeli ni waini.42 Ia me vaka niu dua na Nona iApositolo Le Tinikarua ena gauna edaidai, au sa masulaka ni da na vakaukauwataki, meda na vakatawa vata kei Koya ena veisiga kece ni noda bula.

Ena mataka ni Sigatabu nikua, au vakavinavinaka ki na “noqu Kecisemani”43 kei na nomuni, ni da sega ni tu taudua. O Koya e vakatawai keda tiko “e sega ni sosovu ka sega ni moce.”44 Na Nona agilosi eke vakakina mai na yasa ni ilati era sa “vakavolivoliti [keda], mera laveti [keda] cake.”45 Au vakadinadinataka ni sa dina na yalayala ni noda iVakabula, ni a kaya o Koya: “Ia ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici ka sega ni oca; era na lako tu ka sega ni malumalumu.”46 Meda sa waraki Koya ena noda toso ki liu ena vakabauta, me rawa ni da na cavuta ena noda qaqa ni masu, “Me yaco ga na nomuni lewa,”47 ka lesu vei Koya ena lagilagi. Ena yaca ni noda iVakabula ka Dauveivueti, o Jisu Karisito, emeni.