Faatalitali i le Alii: Ia Faia Lou Finagalo

I lenei taeao o le Sapati, tatou te faafetai ai ma molimau atu i le mea moni o loo soifua lo tatou Faaola. Ua toefuatai mai Lana talalelei e ala i le Perofeta o Iosefa Samita. E moni le Tusi a Mamona. O loo taitaiina i tatou e se perofeta soifua i aso nei, o Peresitene Thomas S. Monson. Ae o le mea aupito taua, tatou te molimau atu ma le faamaoni a’ia’i i le Togiola a Iesu Keriso atoa ai ma faamanuiaga e faavavau ia e tafe mai ai.

I nai masina ua tuanai atu, sa ou maua ai le avanoa e suesue ma aoao ai e uiga i le taulaga togiola a le Faaola ma Lona saunia o Ia lava e faataunuu lena taulaga e faavavau mo i tatou taitoatasi.

O Ana tapenaga sa amataina i le muai olaga i le taimi, sa faatalitali ai o Ia i Lona Tama, ma fetalai atu, “Ia faia Lou finagalo, ma e a oe pea le mamalu e faavavau.”¹ Na amata mai i lena taimi ma faaauau ai lava e oo mai i le asō, na te faaaogaina ai Lona faitalia e talia ma faataunuu ai le fuafuaga a lo tatou Tama Faalelagi. O loo aoao mai tusitusiga paia e faapea, a o laitiiti o Ia, sa i ai o Ia “i le fale o [Lona] Tama”² ma “faatalitali ai i le Alii mo le oo mai o le taimi o lana galuega.”³ Ina ua 30 tausaga o lona soifuaga, sa puapuagatia o Ia i faaosoosoga faigata ae sa filifili lava e teena, ma fetalai atu, “Satani e, ina aluese ia oe i o’u tua.”⁴ I Ketesemane, sa Ia faatuatuaina ai Lona Tama, i le fetalai atu, “Aua le faia lo’u loto, a o lou finagalo,”⁵ ona ia faaaogaina ai lea o Lana faitalia e puapuagatia ai mo a tatou agasala. Na ala atu i le faalumaina i se faamasinoga faalauaitele ma le matuitui o le faasatauroga, sa Ia faatalitali ai i Lona Tama, ma ioe ai ina ia “manua ona o a tatou solitulafono … [ma] momomo o ia ona o a tatou amio leaga.”⁶ Peitai, a o alaga atu o ia, “Lo’u Atua e, lo’u Atua e, se a le mea ua e tuulafoai mai ai au?”⁷ Sa faatalitali o Ia i Lona Tama—i le faaaogaina o Lona faitalia e faamagalo ai Ona fili,⁸ vaaia Lona tina,⁹ ma tumau e oo i le iuga seia oo ina uma Lona soifua ma Lana misiona i le olaga nei.¹⁰

E masani ona ou mafaufau loloto, Aisea e oo ai tofotofoga ma faigata i le Alo o le Atua ma Ana perofeta paia ma le Au Paia faamaoni uma, e ui ina latou taumafai e fai le finagalo o le Tama Faalelagi? Aisea ua faigata tele ai, ae maise lava mo i latou?

Ou te mafaufau ia Iosefa Samita, o lē na tigaina i ma’i a o laitiiti ma sauaga i lona olaga. E pei foi o le Faaola, sa ia alaga atu, “Le Atua e, o fea o i ai oe?”¹¹ Ae e ui lava ina sa foliga mai sa tuua na o ia, sa ia faaaogaina lava lana faitalia e faatalitali ai i le Alii ma faataunuu le finagalo o lona Tama Faalelagi.

Ou te mafaufau i o tatou tuaa paionia, sa tuliesea faamalosi mai Navu ma sopoia ai laufanua valevalenoa—sa faaaoga a latou faitalia e mulimuli ai i se perofeta e ui lava ina sa latou tigaina i ma’i, mativa, ma o nisi na maliliu. Aisea na latou oo ai i na tofotofoga leaga? Mo le a le taunuuga? Mo le a le faamoemoega?

A o tatou fesiligia nei fesili, tatou te iloa ai o le faamoemoega o lo tatou olaga i le lalolagi ia tatou ola, tuputupu ae, ma ia faamalolosia e ala i o tatou lava aafiaga. E faapefea ona tatou faia lenei mea? Ua tuuina mai e tusitusiga paia ia i tatou se tali i se fuaitau faigofie se tasi: tatou “faatalitali ia Ieova.”¹² E oo mai tofotofoga ma faaosoosoga ia i tatou uma lava. O nei luitau o le olaga nei e mafai ai e i tatou ma lo tatou Tama Faalelagi ona iloa pe tatou te faaaogaina a tatou faitalia e mulimuli ai i Lona Alo. Ua uma ona Ia silafia, ma ua tatou maua le avanoa e iloa ai, e tusa lava pe o le a le faigata o tulaga tatou te i ai, “o nei mea uma e [mo lo tatou] poto masani, ma lo … [tatou] lelei.”¹³

Pe o le uiga la o lenei mea o le a tatou malamalama i taimi uma i o tatou luitau? Pe o le a leai la se mafuaaga e fesili ai i tatou uma, i se taimi, “Le Atua e, o fea o i ai oe?”¹⁴ Ioe! A maliu se toalua, o le a tuufesili se soa. Pe a oo mai se faafitauli tautupe i se aiga, o le a fesili se tamā. Pe a se ese le fanau mai le ala, o le a fetagisi se tina ma se tama i le faanoanoa. Ioe, “e afe ane le tagi i le afiafi, a o le alaga fiafia i le taeao.”¹⁵ Ona, oo lea i le amataga o lo tatou faatuatua ma le malamalama faateleina, tatou te tutulai ma filifili e faatalitali i le Alii, ma faapea atu, “Ia faia lou finagalo.”¹⁶

O le a la, le uiga o le faatalitali i le Alii? I tusitusiga paia, o le upu faatalitali o lona uiga ia faamoemoe, ia tepa taulai, ma ia faalagolago. O le faamoemoe ma le faalagolago i le Alii e manaomia ai le faatuatua, onosai, lotomaualalo, agamalu, faapalepale, tausia o poloaiga, ma le tumau seia oo i le iuga.

O le faatalitali i le Alii, o lona uiga o le totoina o le fatu o le faatuatua ma tausia “ma le filiga tele, ma le … onosai.”¹⁷

O lona uiga o le tatalo e pei ona faia e le Faaola—i le Atua, lo tatou Tama Faalelagi—na faapea atu ai, “Ia oo mai Lou malo. Ia fai Lou finagalo.”¹⁸ O se tatalo tatou te tuuina atu ma o tatou agaga atoa, i le suafa o lo tatou Faaola, o Iesu Keriso.

O le faatalitali i le Alii o lona uiga o le mafaufau loloto i ai i o tatou loto ma “maua[ina] le Agaga Paia” ina ia mafai ona tatou iloa “mea uma e tatau ona [tatou] faia.”¹⁹

Pe a tatou mulimuli i uunaiga a le Agaga, tatou te iloa ai o “puapuaga e tupu ai le onosai”²⁰ ma tatou te aoao ai ia “faaauau pea i le onosai seia faaatoatoaina [tatou].”²¹

O le faatalitali i le Alii o lona uiga o le “tutumau mausali”²² ma “fetaomi atu i luma” i le faatuatua, “ma se susulu atoatoa o le faamoemoe.”²³

O lona uiga “ua na o galuega a Keriso … ua faalagolago i ai”²⁴ ma “faatasi ai ma le fesoasoani o [Lona] alofa tunoa ia te i [tatou, e fai atu ai]: Ia faia lou finagalo, le Alii e, ae le o matou loto.”²⁵

A o tatou faatalitali i le Alii, ua tatou “le mafaagaeetia i le tausiga o poloaiga,”²⁶ ma le iloaina o le a tatou “mapu mai i o [tatou] puapuaga uma i se aso.”²⁷

Ma “aua le lafoai ai … lo [tatou] faamalosi”²⁸ ma o “mea uma sa [tatou] puapuagatia ai o le a galulue faatasi mo lo [tatou] lelei.”²⁹

O na puapuaga o le a oo mai i soo se ituaiga ma soo se malosi. O le aafiaga o Iopu e faamanatu mai ai ia i tatou mea e ono manaomia ona tatou onosaia. Sa aveesea mea uma a Iopu, e aofia ai lona fanua, fale, ma manu vaefa; tagata o lona aiga; lona igoa tauleleia; lona malosi faaletino; faapea foi ma lona manuia faalemafaufau. Peitai, sa faatalitali lava o ia i le Alii ma sa tuuina atu se molimau patino mamana: Fai mai a ia:

“Aua ua ou iloa, o loo soifua le na te togiolaina au, o aso amuli foi e tulai mai ai o ia i luga o le eleele:

“E ui lava foi ina … faaumatia lenei tino, ae ou te iloa atu le Atua i lo’u tino.”³⁰

“E ui lava ina fasioti o ia ia te a’u, ou te faamoemoe pea ia te ia.”³¹

E ui lava i faataitaiga matagofie a Iopu, o perofeta, ma le Faaola, o le a tatou iloa lava e faigata le faatalitali i le Alii, aemaise lava pe a tatou le malamalama atoatoa i Lana fuafuaga ma faamoemoega mo i tatou. O lena malamalama e masani lava ona tuu mai soo i “lea fuaitau i luga o lea fuaitau, ma lea mataupu i luga o lea mataupu.”³²

I lo’u olaga ua ou aoao ai o nisi taimi ou te le maua ai se tali i se tatalo ona ua silafia e le Alii ou te le o sauni. Ae a tali mai o Ia, e masani lava “o si mea itiiti i i ma sina mea itiiti i o”³³ aua na pau na o mea e mafai ona ou tauaveina po o mea ua ou naunau e fai.

E masani ona tatou tatalo ia maua le onosai, ae tatou te mananao i ai i le taimi nei lava! A o talavou, sa tatalo ai Peresitene Tavita O. MaKei mo se molimau i le moni o le talalelei. O ni tausaga se tele mulimuli ane, a o faamisiona o ia i Sikotilani, na faatoa oo mai ai lena molimau. Sa ia tusia mulimuli ane, “Sa o se faamautinoaga ia te au e faapea, o tatalo faamaoni e taliina mai ‘i se taimi, i soo se mea.’”³⁴

Atonu tatou te le iloa po o afea pe faapefea foi ona tuuina mai tali a le Alii, ae i Lana lava taimi ma Lana lava ala, o le a oo mai ai tali. Mo nisi o tali atonu tatou te faatalitali ai seia oo i le olaga a sau. Atonu e moni lenei mea i nisi o folafolaga i o tatou faamanuiaga faapeteriaka ma mo nisi o faamanuiaga mo tagata o aiga. Ia aua nei o tatou fiu i le Alii. O Ana faamanuiaga e faavavau, ae le mo na o sina taimi.

O le faatalitali i le Alii tatou te maua ai se avanoa le au maua e iloa ai e toatele o loo faatalitali mai ia i tatou. E faatalitali mai a tatou fanau ia i tatou e faaali atu le onosai, alofa ma le loto malamalama ia i latou. E faatalitali mai o tatou matua ia i tatou e faaali atu le agaga faafetai ma le agaalofa. E faatalitali mai o tatou uso ma tuafafine ia i tatou ia tatou loto malamalama, lotoalofa, ma loto faamagalo. E faatalitali o tatou taitoalua ia i tatou ia alolofa atu ia i latou e pei ona alofaina i tatou taitoatasi e le Faaola.

Pe a tatou onosaia puapuaga faaletino, e faateleina lo tatou nofouta i le toatele o loo faatalitali mai ia i tatou taitoatasi. Mo Maria ma Mareta uma, mo Samaria agalelei uma o e auauna atu i e mama’i, fesoasoani i e vaivai, ma tausia e e gasegase faalemafaufau ma faaletino, ou te faailoa atu le agaga faafetai o se Tama Faalelagi alofa ma Lona Alo Pele. I au galuega faa-Keriso i aso uma, o loo e faatalitali ai i le Alii ma faia le finagalo o lou Tama Faalelagi. Ua manino lava Lana fetalaiga ia te oe: “Aua na faia e outou i le tasi o e aupito itiiti o o’u uso nei, o a’u lea na outou faia i ai.”³⁵ O loo Ia silafia au osigataulaga ma ou faanoanoaga. E faafofoga mai o Ia i au tatalo. O Lona filemu ma [Lona] malologa o le a fai mo oe pe a tumau pea ona e faatalitali mo Ia i le faatuatua.

O i tatou uma taitoatasi ua sili atu ona alofagia e le Alii nai lo le mea e mafai ona tatou malamalama pe manatu i ai. O lea ia tatou agalelei atili ai o le tasi i le isi ma agalelei atili ia i tatou lava. Ia tatou manatua a o tatou faatalitali i le Alii, ua avea i tatou “ma tagata paia e ala i [Lana] togiola, … e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i [o tatou] luga, e pei ona usitai atu se tamaitiiti i lona tama.”³⁶

Na faapena le usiusitai o lo tatou Faaola i Lona Tama i le Faatoaga o Ketesemane. Sa Ia augani atu i Ona soo, “Tatou mataala faatasi ma au,” ae e faatolu ona foi mai o Ia ia i latou ae tau mai ua gase la latou moe.³⁷ O le leai o se mafutaga a nei soo ma le le i ai o Lona Tama, sa filifili ai le Faaola e mafatia i “tiga ma puapuaga ma faaosoosoga o ituaiga eseese.”³⁸ Faatasi ai ma se agelu na auina mai e faamalosi ia te Ia,³⁹ E “le’i faafiti o Ia e inu le ipu oona.”⁴⁰ Sa faatalitali o Ia i Lona Tama i le fetalai atu, “Ia faia lou finagalo,”⁴¹ ma sa Ia solia toatasi ma le lotomaualalo le soligavine.⁴² O lea, i le avea ai ma se tasi o Ana Aposetolo e Toasefululua i nei aso e gata ai, ou te tatalo ina ia faamalolosia i tatou e mataala faatasi ma Ia ma faatalitali ia te Ia i o tatou aso uma.

I lenei taeao o le Sapati, e faailoa atu lo’u agaga faafetai auā “i lo’u Ketesemane”⁴³ ma a outou Ketesemane, e le o tuua ai na o i tatou. O Ia o lē e leoleo mai ia i tatou “e le tulemoe ia, e le moe lava.”⁴⁴ O Ana agelu iinei ma tua atu o le veli o loo “si’o faataamilo [tatou], e sapasapai [tatou] i luga.”⁴⁵ E tuuina atu la’u molimau faapitoa e moni Lana folafolaga aua na Ia fetalai, “A o e faatalitali ia Ieova e toe faafouina lo latou malosi; latou te sii ae apaau e pei o aeto; latou te femoeai, a e le vaivai; latou te savavali, a e le tigaina.”⁴⁶ Talosia ia tatou faatalitali ia te Ia e ala i le fetaomi atu i luma ma le faatuatua, ina ia mafai ona tatou faapea atu i a tatou tatalo, “Ia faia lou finagalo,”⁴⁷ ma toe foi atu ia te Ia ma le mamalu. I le suafa paia o lo tatou Faaola ma le Togiola, o Iesu Keriso, amene.