2010–2019
E Taua Oe ia te Ia
Oketopa 2011


E Taua Oe ia te Ia

E faaaoga e le Alii se fuafaatatau e matuai ese lava mai le fua a le lalolagi e fuatia ai le taua o se tagata.

O Mose, o se tasi o perofeta aupito maoae ua lauiloa i le lalolagi, na tausia e le afafine o Farao ma e 40 tausaga o lona soifua sa nofo ai i maota o le aigatupu o Aikupito. Sa masani lelei o ia i le mamalu ma le maoae o lena malo anamua.

I ni tausaga mulimuli ane, i luga o se mauga i se mea mamao, sa mamao ese mai le mamalu ma le matagofie o Aikupito malosi, sa tu ai Mose i luma o le Atua ma talanoa faafesagai e pei ona talanoa o se tagata ma sana uo.1 I le taimi o lena talanoaga sa faaali mai ai e le Atua ia Mose le taunuuga o galuega a Ona aao, ma faatepa o ia i Lana galuega ma [Lona] mamalu. Ina ua uma le faaaliga, sa pau Mose i le eleele mo ni itula se tele.Mulimuli ane ina ua toe maua lona malosi, sa ia iloaina ai se mea sa le’i tupu muamua ia te ia, i tausaga uma sa i ai o ia i le maota o Farao.

Fai mai a ia, “Ua ou iloa ai, o le tagata o se mea noa.”2

E Faatauvaa i Tatou Nai lo le Mea Tatou te Manatu Ai

O le tele lava o mea tatou te iloa e uiga i le atulaulau, o le tele foi lea o mea tatou te malamalama i ai—ua na o se vaega itiiti—o mea na iloa e Mose. E tele naua le atulaulau, e ese lava, ma mamalu lea e le malamalama i ai le mafaufau o le tagata. Na fetalai atu le Atua ia Mose, “E le mafaitaulia lalolagi ua Ou foafoaina.”O le ofoofogia o le lagi i le po, o se molimau matagofie lea o lena upumoni.3

E i ai ni nai mea ua faatumulia ai au i le maofa faapena, e pei o le lele i le pogisa o le po e sopoia ai vasa ma konetineta ma tilotilo atu i fafo mai le faamalama o le potu o avevaalele e agai atu i le mamalu e le mafaitaulia o le faitau miliona o fetu.

Sa taumafai le au vaai fetu e faitau le aofai o fetu i le atulaulau. Sa taumate e se tasi o vaega o saienisi e faapea o le numera o fetu e iloa atu e a tatou meavaai e faasefulu ona sili atu ai nai lo oneone uma o matafaga ma toafa o le lalolagi.4

O lenei faaiuga e i ai se mea mataina e tutusa ai ma le folafolaga a le perofeta anamua o Enoka: “Ana mafai e le tagata ona faitau fasimea o le lalolagi, ioe, le miliona o lalolagi e pei o lenei, e le mafai ona avea ma se amataga o le aofai o au foafoaga.”5

O le iloa ai o le le mafaitaulia o foafoaga a le Atua, e leitioa a fautuaina e le Tupu maoae o Peniamina lona nuu ia “manatua pea lava pea, le silisiliese o le Atua, ma lo outou lava noa.”6

E Sili Atu i Tatou Nai lo le Mea Tatou te Manatu Ai

Ae e ui lava o le tagata o le mea noa, ae e tumu au i le maofa ma le ofo pe a mafaufau atu “ua tele lava le taua o agaga i le silafaga a le Atua.”7

Ma a o tatou vaavaai atu i le telē naua o le atulaulau ma faapea, “O le a le tagata e faatusa atu i le mamalu o le foafoaga?” Na fetalai le Atua lava Ia, o i tatou o le pogai lea sa Ia foafoaina ai le lalolagi!O Lana galuega ma [Lona] mamalu—o le faamoemoega mo lenei lalolagi matagofie—ia laveai ma faaeaina le tagata.8 I nisi faaupuga, o le telē naua o le faavavau, o mamalu ma mealilo o le atulaulau ma le taimi e le muta, ua fausia uma mo le manuia o tagata soifua masani e pei o oe ma a’u. Sa foafoaina e lo tatou Tama Faalelagi le lalolagi ina ia mafai ona ausia ai o tatou tulaga gafatia i le avea ai o ni Ona atalii ma afafine.

O se faamatalaga feteenai lenei a le tagata: a faatusa atu i le Atua, o le tagata o le mea noa; peitai o i tatou o mea uma ia i le Atua. Pe a faatusa atu i le vaaiga o foafoaga e le mafaitaulia, atonu tatou te foliga mai o se mea noa, o loo i ai sa tatou aloiafi o le afi faavavau o loo mu i totonu o o tatou fatafata. Ua tatou maua le folafolaga tatou te le malamalama i ai o le faaeaga—o lalolagi e leai se iuga—i o tatou lima. Ma o le faanaunauga sili lea o le Atua ia fesoasoani mai ina ia tatou ausiaina.

O Le Valea o le Faamaualuga

Ua iloa lelei e le taufaasese sili, o le tasi o ana auupega sili ona lelei i le taitai seseina o le fanau a le Atua, o le faatosina lea i le mea e gata ai i manatu feteenai o le tagata. I nisi, e faatosina o ia ia latou lilifa atu i le faamaualuga, faafeteteina i latou ma faamalosiauina ia talitonu i mafaufauga faivavale o lo latou lava taua ma le faigata ona faatoilaloina. Na te ta’u atu ia i latou ua sili atu i latou nai lo le tagata masani, ma ona o tomai, tofi, po o le tulaga faaagafesootai, ua tulaga ese ai i latou mai le vaaiga masani o tagata uma o loo siomia i latou. Na te taitaiina i latou ia faapea ai, ua le toe pule se tasi ia i latou, ma e le toe popole i faafitauli a soo se tagata lava.

Fai mai e ese le fiafia o Aperaamo Linikone i se solo e faitauina faapea:

Aisea ea e faamaualuga ai le tagata?

Pei o se alā e masau mai le vanimonimo, se ao lelea,

O se emo o le uila, se fati o le galu,

Le mou atu o le tagata ma lenei olaga e mapu i le tuugamau.9

Ua malamalama soo o Iesu Keriso e faatusatusa atu i le faavavau, o lo tatou i ai i lenei olaga faitino ua na o se “minute laitiiti” i le avanoa ma le taimi.10 Latou te iloa o le taua moni o se tagata e itiiti lava sona sao i mea e sili ona faatauaina e le lalolagi. Latou te iloa e mafai ona e faaputua tupe a le lalolagi atoa ae e le mafai ona faatauina mai ai se papa falaoa i le malo o le lagi.

O i latou o e o le a “mautofi i le malo o le Atua”11 o i latou ia o e avea “e pei o se tamaitiiti, e usiusitai, agamalu, lotmaualalo, onosai, ma tumu i le alofa.”12 “Aua o se faamaualuga ia te ia, e faamaulaloina lea; a o le faamaulalo ia te ia, e faamaualugaina lea.”13 E malamalama foi na soo “pe a outou auauna atu i o outou uso a tagata, ua na o lo outou auauna atu lava lea i lo outou Atua.”14

E Le o Faagaloina i Tatou

O le isi auala o loo taufaasese mai ai Satani e ala lea i le faalotovaivai. E taumafai o ia e taulai atu la tatou vaai i mea e faalētaua ia i tatou, seia oo ina amata ona tatou le talitonu e tele so tatou taua. E fai mai o ia ia i tatou, tatou te faatauvaa tele ma e leai se tasi e matauina i tatou, e faapea ua faagaloina i tatou—ae maise lava e le Atua.

Sei ou faasoa atu se aafiaga patino e ono avea ma se fesoasoani ia i latou o e lagona e faalētaua, faagaloina, pe tuua toatasi.

I le tele o tausaga ua mavae, sa ou auai ai i aoaoga faapailate i le Ea Fosi a le Iunaite Setete. Sa ou nofo mamao mai lo’u aiga, o se fitafita talavou mai Siamani i Sisifo, na fanau i Siekisolovakia, o lē sa ola ae i Siamani i Sasae; ma sa matuai faigata la’u tautala i le gagana Peretania. Ou te manatuaina lelei lava lo’u malaga atu i le nofoaga mo aoaoga faamasani i Texas. Sa ou i luga o se vaalele, sa ou saofai i autafa o se pasese e mamafa lona faaleoga pe a tautala, mai le itu i Saute. Sa tau le mafai ona ou malamalama i se upu sa ia tautala ai. O le mea moni sa ou mafaufau pe ua sese le gagana na aoaoina ai au. Sa ou fefe i le manatu e faapea, e tatau ona ou tauva mo tulaga maualuluga iloga i aoaoga faapailate faatasi ma tagata aooga o la latou gagana moni o le Igilisi.

Ina ua ou taunuu atu i le nofoaga autu o le ea fosi i le nuu itiiti o Big Spring, Texas, sa ou suea ma maua ai se paranesi toagaogao o le Au Paia o Aso e Gata Ai, lea sa i ai ni tagata lelei o le au paia, o e sa faatasitasi i ni potu mautotogi i le nofoaga o le ea fosi lava ia. Sa i ai le au paia i le faagasologa o le fausiaina o se falelotu laitiiti o le a avea ma se nofoaga tumau mo le Ekalesia. I aso na, o tagata o le au paia sa tele lava ina faia galuega o ni fale fou.

O lea aso ma lea aso, sa ou auai i a’u aoaoga faapailate ma suesue malosi i le mafai na ou mafaia ai, ona faaalu lea o le tele o ou taimi avanoa e galue ai i le falelotu fou. O iina na ou aoaoina ai o le lua-i le-fa, e le o se sitepu o se siva ae o se fasilaupapa. Sa ou aoaoina ai foi le tomai faapitoa e faasaoina ai, o le le lavea o lo’u limamatua pe a tutui se fao.

Sa ou faaaluina se taimi tele e galue ai i le falelotu, ma na oo ai ina faailoa mai le popole o le peresitene o le paranesi—o lē foi sa avea ma se tasi o o matou faiaoga avevaalele—atonu e tatau ona ou faaaluina se taimi tele i le faiga o a’u suesuega.

Sa auai foi au uo ma isi tagata aooga faapailate i ni gaoioiga i taimi avanoa, e ui ou te manatu, e saogalemu le faapea atu, o nisi o na gaoioiga ua le ogatasi ma le tamaitusi o loo i ai nei o le Mo Le Malosi o le AutalavouO a’u lava ia, sa ou fiafia i le avea ma se vaega malosi o lenei paranesi toalaiti i Texas sisifo, i le faataitaia o o’u tomai fou na maua o le faakamuta, ma le faaleleia atili o la’u Igilisi a o ou faataunuina ou valaauga e faiaoga i le korama a le au toeaina ma le Aoga Sa.

O le taimi lena, o Big Spring, e ui i lona igoa, sa o se nofoaga laitiiti, faalētaua, ma lē lauiloa. Ma sa masani foi ona ou manatu faapena ia te a’u lava ia—faalētaua, lē lauiloa, ma sina tuua toatasi foi. E ui i lea, sa le’i i ai se taimi na ou faapea ai ua faagaloina au e le Alii, ma pe mata o le a Ia mauaina au iina. Sa ou iloa e le’i afaina i le Tama Faalelagi po o fea sa ou i ai, po o le a lo’u tulaga ma isi i la’u vasega faapailate faataitai, po o le a foi lo’u valaauga sa i ai i le Ekalesia. O le mea sa taua ia te Ia, sa ou faia le mea sili sa ou mafaia, sa lilifa atu lo’u loto ia te Ia, ma sa ou naunau e fesoasoani atu ia i latou sa siomia a’u. Sa ou iloa, afai ou te faia le mea sili ou te mafaia, o le a lelei mea uma.

Ma sa lelei mea uma.15

O Le Mulimuli O Le A Avea ma Muamua

E le popole lava le Alii pe tatou te faaaluina o tatou aso e galulue ai i faletele maamora po o fale o manu.Na te silafia le mea o loo tatou i ai, e tusa lava pe o le a le faatauvaa o o tatou tulaga. O le a Ia faaaogaina—i Lana lava ala ma mo Ona faamoemoega paia—i latou o e lilifa atu o latou loto ia te Ia.

O loo silafia e le Atua o nisi o tagata sili ona maoae o e sa soifua, o i latou ia o le a le faaalia lava i nofoaiga o talafaasolopito. O i latou ia o tagata faamanuiaina, lotomaulalo o e faataitai i faataitaiga a le Faaola ma faaalu aso o o latou olaga i le faia o mea lelei.16

O se tasi o na ulugalii, o ni matua o sa’u uo, na faaali maia lenei mataupu faavae mo a’u. Sa faigaluega le tane i se fale vili uamea i Iuta. A oo i le malologa, na te aumai i fafo ana tusitusiga paia po o se mekasini a le Ekalesia e faitau. Ina ua vaai i ai isi tagata o le aufaigaluega i lenei mea, sa latou taufaifai ia te ia ma luitauina ona talitonuga. Soo se taimi lava latou te faia ai lena mea, e tautala atu ai o ia ia i latou ma le agalelei ma le mautinoa. Na te lei faatagaina lo latou le faaaloalo e faaoso ai sona ita pe le fiafia ai foi.

O ni tausaga mulimuli ane, sa ma’i tigaina ai se tasi o na tagata sa sili ona taufaifai atu. A o lei maliu o ia, sa ia talosagaina ina ia faia se tautalaga a lenei tamalii lotomaulalo i lona falelauasiga—lea sa ia faia lava.

O lenei tagata faamaoni o le Ekalesia, sa le tele ni mea sa ia maua i tulaga o le lauiloa po o le tamaoaiga, ae o lana uunaiga sa loloto lona oo atu ia i latou uma sa silafia o ia. Sa maliu o ia i se faalavelave i le galuega, a o tu atu e fesoasoani i se isi tagata faigaluega o le sa pa’ulia i le kiona.

E tasi le tausaga ae faia loa se taotoga o le faiai o lona faletua, lea na iu ai ina le mafai ona savali o ia. Ae sa fiafia tagata e o mai e faaalu o latou taimi ma ia aua e faalogo o ia. Na te manatua. E alofa o ia. O le le mafai ona ia tusitusi, na te taulotoina ai numera telefoni a lana fanau ma a latou fanau. Na te manatuaina ma le alofa ia aso fanau ma aso faamanatu o faaipoipoga.

O i latou e asia o ia e o ese mai ua maua lagona lelei e uiga i le olaga ma e uiga ia i latou lava. Latou te lagonaina lona alofa.Latou te iloa e popole alofa o ia. E le taitai lava faaseā o ia ae faaalu ona aso i le faamanuiaina o olaga o isi. Fai mai se tasi o ana uo, o lenei tamaitai o se tasi lea o nai tagata toalaiti na ia iloaina, o le na faaalia moni le alofa ma le soifuaga o Iesu Keriso.

O lenei ulugalii atonu o tagata muamua ia e faapea mai, sa faalētaua tele i laua i lenei lalolagi. Ae e faaaoga e le Alii se fuafaatatau e matuai ese lava mai le fua a le lalolagi e fuatia ai le taua o se tagata. Na te silafia lenei ulugalii faamaoni; e alofa o Ia ia i laua. O a laua faatinoga o se molimau ola lea o lo laua faatuatua malosi ia te Ia.

E Taua Oe ia te Ia

Uso e ma tuafafine, atonu e sa’o o le tagata o le mea noa lea pe a faatusatusa atu i le telē o le lalolagi. E i ai taimi tatou te lagona ai foi le faalētaua, le iloa, tuua toatasi, po o le faagaloina. Ae, ia e manatua i taimi uma, e taua oe ia te Ia! Afai e te masalosalo i lena mea, ia manatua ia mataupu faavae faalelagi nei e fa:

Muamua, e alofa le Atua i e lotomaulalo ma agamalu, aua “e sili lea i le malo o le lagi.”17

Lona lua, ua tuuina mai e le Alii “[ina] ia folafola atu le atoatoaga o [Lana] talalelei e e vaivai ma e faatauvaa i tuluiga o le lalolagi.”18Ua Ia filifilia “[ia] oo mai mea vaivai o le lalolagi ma gaui i lalo mea tautaua ma le malolosi”19 ma ia faamāina “ai mea malolosi.”20

Lona tolu, e le afaina po o fea e te nofo ai, e le afaina po o le a le le taualoa o lou tulaga, po o le a le faatauvaa o lau galuega, po o le a le utiuti o ou tomai, po o le a le tulaga masani o ou foliga vaaia, po o le a foi le foliga laitiiti o lou valaauga i le Ekalesia, e le faapea e le o silafia oe e lou Tama Faalelagi. E alofa o Ia ia te oe. Na te silafia lou loto maulalo ma au faatinoga o le alofa ma le agalelei. O na mea uma, latou te fatuina ai se molimau tumau o lou faamaoni ma lou faatuatua.

Lona fa ma le mea mulimuli, faamolemole ia malamalama o le mea o loo e vaaia ma oo i ai i le taimi nei, e le o le mea lena o le a i ai le faavavau. O le a e le lagonaina le tuua toatasi, faanoanoa, tiga, po o le lotovaivai i le faavavau. Ua ia i tatou le folafolaga faamaoni a le Atua, o le a Ia le faagaloina pe tuulafoai i latou o e lilifa atu o latou loto ia te Ia.21 Ia faamoemoe ma faatuatua i lena folafolaga. Aoao e alofa i lou Tama Faalelagi ma avea ma Ona soo i le upu ma le amio.

Ia mautinoa afai e te pipii mau, talitonu ia te Ia, ma tumau faamaoni i le tausiga o poloaiga, e i ai se aso o le a tou iloa ai mo outou lava ia folafolaga na faaalia mai i le Aposetolo o Paulo: “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.”22

Uso e ma tuafafine, o le Tagata e sili ona malosi i le atulaulau o le Tama lea o lou agaga. Na te silafia oe. E alofa o Ia ia te oe i se alofa atoatoa.

E silasila mai le Atua ia te oe e le gata o se tagata soifua i luga o se paneta itiiti, ma o le e ola mo se taimi itiiti—E silasila mai o Ia ia te oe o Lona atalii/afafine. E silasila mai o Ia ia te oe o le tagata e gafatia ma faamoemoeina e avea ai oe. E finagalo o Ia ia e iloa e taua oe ia te Ia.

Talosia ia tatou talitonu, faatuatua, ma faatulaga o tatou olaga ina ia tatou malamalama i lo tatou taua ma gafatia moni e faavavau. Talosia ia tatou agavaa mo faamanuiaga taua o loo teuina e lo tatou Tama Faalelagi mo i tatou, o la’u tatalo lea i le suafa o Lona Alo, o Iesu Keriso, amene.

  1. Tagai Mose 1:2.

  2. Mose 1:10.

  3. Mose 1:33.

  4. Tagai Andrew Craig, “Astronomers Count the Stars,” BBC News, July 22, 2003, http://news.bbc.co.uk/2/hi/science/nature/3085885.stm.

  5. Mose 7:30.

  6. Mosaea 4:11.

  7. Mataupu Faavae ma Feagaiga 18:10.

  8. Tagai Mose 1:38–39.

  9. William Knox, “Mortality,” i le James Dalton Morrison, ed., Masterpieces of Religious Verse (1948), 397.

  10. Mataupu Faavae ma Feagaiga 121:7.

  11. 3 Nifae 11:38.

  12. Mosaea 3:19.

  13. Luka 18:14; tagai foi i fuaiupu e 9–13.

  14. Mosaea 2:17.

  15. Dieter F. Uchtdorf na muamua faauu i lana vasega.

  16. Tagai i le Galuega 10:38.

  17. Mataio 18:4; tagai foi i fuaiupu 1–3.

  18. Mataupu Faavae ma Feagaiga 1:23.

  19. Mataupu Faavae ma Feagaiga 1:19.

  20. 1 Korinito 1:27.

  21. Tagai Eperu 13:5.

  22. 1 Korinito 2:9.