2010–2019
Matabete i Eroni: Tucake ka Vakayagataka na Kaukauwa ni Kalou
Epereli 2012


Matabete i Eroni: Tucake ka Vakayagataka na Kaukauwa ni Kalou

E gadrevi me vakayagataki na matabete me basika kina na vinaka. O ni sa kacivi mo ni “tucake ka rarama mai,” mo ni kakua ni vunitaka tiko na nomuni rarama ena butobuto.

Ena dua na gauna lekaleka sa oti au a tiko voli mai Sauca Aferika ka sikova e dua na vale vata kei Thabiso, na imatai ni ivukevuke ena kuoramu ni bete ena Tabanalevu na Kagiso. Erau a masulaki ira tiko na lewe ni kuoramu era luluqa tu o Thabiso kei na nona bisopi, o koya e vakatulewa ka tu vua na idola me baleta na kuoramu, ka rau vaqara na veivakauqeti me baleti koya me sikovi kei na sala me vukei kina. Erau vakauqeti me rau sikova na vale nei Tebello, ka rau sureti au meu lako vata kei rau.

Ni keirau lakosivita rawa ga na koli cudrucudru ivakatawa, keirau sa laki tu ena nodratou rumu ni gade vata kei Tebello, e dua na cauravou yalomalua sa sega tiko ni mai lotu baleta ni sa dau ogaoga vakalevu ena veika tale eso ena Sigatabu. E madua toka ia e marau ni ciqomi keitou ka sureti iratou na nona matavuvale me ratou mai tiko vata kei koya. E vakaraitaka na bisopi na nona loloma me baleta na matavuvale kei na nona gagadre me vukei iratou me ratou yaco me matavuvale tawamudu ena nodratou vauci ena valetabu. A yavalati sara na yalodratou ka keimami vakila na kaukauwa ni Yalo Tabu ka dusimaka na veivosa kei na veivakanananu.

Ia na veimalanivosa nei Thabiso e duatani kina na veisiko oya. E kena irairai vei au ni vosa tiko na bete gone oqo ena nodra vosa na agilosi—na veimalanivosa ni loloma keitou kila vinaka kece ka tarai ira vakalevu cake na nona itokani. “Au dau taleitaka vakalevu na veigauna kece au veitalanoa kina kei iko mai valenilotu,” e kaya yani o koya. “O dau tauca na vosa vinaka me baleti au. Kila nodatou timi ni soka sa sega sara ga ni basika cake tale ni o sa yali. O sa rui dau mataitaka o iko.”

“Vosoti au,” e sauma mai o Tebello. “Au na lesu tale yani vei kemudou.”

“Sa dua na ka marautaki oqori,” e kaya o Thabiso. “O se nanuma tiko na nodaru vakarautaki kedaru tiko me daru laki kaulotu? E rawa beka ni daru tekivu tale?”

“Io,” e tukuna tale mai o Tebello, “Au vinakata meu lesu tale yani.”

E rairai na marau levu duadua beka au sota kaya niu dua voli na daunivakasala ena mataveiliutaki raraba ni Cauravou na noqu raici ira na Matabete i Eroni e vuravura taucoko ena nodra vakayagataka na kaukauwa ni Matabete i Eroni. Ia ena so tale na gauna au dau vakadinadinataka, ena yalo rarawa, ni so na cauravou era sega tu ni kila na levu ni ka vinaka e rawa ni ra cakava ena kaukauwa e tu vei ira.

Na matabete na kaukauwa kei na dodonu mai vua na Kalou Vakataki Koya me da veiqaravi kina vei ira na Luvena. Isa, kevaka walega me rawa vei ira na cauravou yadua, na Matabete i Eroni yadua, me ra kila vakavinaka sara ni tu ena nodra matabete na idola ni nodra veiqaravi na agilosi. Kevaka walega me rawa ni ra kila ni nodra na itavi tabu me ra vukei ira na nodra itokani me ra kunea na sala ka na kauti ira yani vua na iVakabula. Kevaka walega me ra kila ni na solia vei ira na Tamada Vakalomalagi na kaukauwa me ra vakamacalataka vakamatata ena yalodina na dina ni kosipeli vakalesui mai me ra vakila kina na tani na dina sega ni cakitaki rawa ni vosa i Karisito.

Kemuni na cauravou lomani ena Lotu, meu taroga mada vei kemuni e dua na taro kau nuitaka ni o ni na tugana tu e yalomuni ena vo ni nomuni bula. Na kaukauwa cecere cava tale beka e rawa ni o rawata e vuravura mai na matabete ni Kalou? Na kaukauwa cava beka e rawa ni cecere cake mai na noda rawata me da vukea na Tamada Vakalomalagi ena kena veisautaki na nodra bula na kai noda, me vukei ira yani ena sala ni marau tawamudu ena nodra vakasavasavataki mai na ivalavala ca kei na caka cala?

Me vaka na veikaukauwa kecega, e gadrevi me vakayagataki na matebete me basika kina na vinaka. O ni sa kacivi mo ni “tucake ka rarama mai” (V&V 115:5), mo ni kakua ni vunitaka nomuni rarama ena butobuto. O ira ga era yaloqaqa era na wili vata kei ira era sa digitaki. Ni o vakayagataka na kaukauwa ni nomu matabete tabu, ena levu cake na nomu yaloqaqa kei na yalodei. Kemuni na cauravou, o kila ni dau gauna vinaka duadua vei iko na gauna o qarava tiko kina nona cakacaka na Kalou. O kila ni o dau mamarau vakalevu duadua ena gauna o vakaogai iko tiko kina ena cakacaka vinaka. Vakalevulevuya na kaukauwa ni nomu matabete ena nomu bula savasava ka bula kilikili.

Au vakuria na domoqu ena kaci a vakayacora o Elder Jeffery R. Holland ena ono na vula sa oti mai na itutu ni vunau oqo. “Au vaqara tiko,” e kaya o koya, “na tagane gone kei na qase ka ra kauwaitaka tiko na ivalu oqo ni vinaka kei na ca me ra curu mai ka vosa. Eda vala tiko.” E tomana, “… Au kerea e dua na domo kaukauwa cake ka yalodina cake, na domo me sega walega ni vorata na ca … , ia me domo ni vinaka, me domo ni kosipeli, me domo ni Kalou” (“We Are All Enlisted,” Liaona, Nove. 2011, 44, 47).

Io, kemuni na Matabete i Eroni, eda vala tiko oqo. Ia ena ivalu oqo, na sala vinaka duadua me da taqomaki keda kina mai na ca sai koya me da tutaka vakaukauwa sara na dodonu. E sega ni rawa ni o rogoca na vosa ca qai vaka mo sega ni rogoca. E sega ni rawa ni o sarava, duadua se kei ira tale eso, na iyaloyalo o kila ni vakasisila me qai vaka ni o sega ni raica. E sega ni rawa ni o tara e dua na ka dukadukali me qai vaka ni sega ni dua na ka. E sega ni rawa ni o wele voli ga ni segata o Setani me vakarusa na veika e taucoko ka savasava. Ia, mo tucake doudou ena vuku ni veika o kila ni dina! Ni o rogoca se raica e dua na ka e vakawaleni kina na ivakatagedegede ni Turaga, nanuma o cei o iko—e dua na sotia ni mataivalu ni Kalou Vakataki Koya, ka vakaiyaragi tu ena Nona matabete savasava. E sega tale ni dua na iyaragi vinaka cake me vorati kina na meca, na tama ni lasu, mai na dina ka na lutu mai gusumu ena nomu vakayagataka na kaukauwa ni matabete. E vuqa vei ira na nomu ilawalawa era na rokovi iko ena nomu yaloqaqa kei na nomu dina. Eso ena sega. Ia oqori e sega ni dua na ka. O na rawata na nona vakarokoroko kei na veivakabauti nei Tamada Vakalomalagi baleta ni o vakayagataka na Nona kaukauwa mo rawata kina na Nona inaki.

Au kacivi ira kina na mataveiliutaki kece sara ni veikuoramu ni Matabete i Eroni me ra vakarewataka tale na tawake ni bula galala ka cokonaka ka liutaka na nomu mataivalu. Vakayagataka na nomu kaukauwa ni matabete ena nomu sureti ira era tu wavoliti iko me ra lako mai vei Karisito ena veivutuni kei na papitaiso. E tu vei iko na nona veivakadonui kei na kaukauwa na Tamada Vakalomalagi mo cakava kina.

Ena rua na yabaki sa oti, niu veisiko voli mai Santiago e Chile, a vakauqeti au vakalevu o Daniel Olate, e dua na cauravou ka dau salavata vakalevu kei ira na daukaulotu. Au kerei koya me volavola mai vei au, ena nona veivakadonui au na wilika kina vei kemuni e dua na tiki ni nona ivola ena i- meli: “Au se qai yabaki 16 walega, kau sa tabaki ki na itutu vakabete ena Sigatabu. Ena siga vata oya au a papitaisotaka kina e dua na itokani; na yacana o Carolina. Au a vakavulica vua na kosipeli, ka dau lako mai lotu e veigauna ka ciqoma kina na nona icovi ni Torocake Yadudua, ia erau sega ni vakatara na nona itubutubu me papitaiso me yacova ni rau sa qai kilai au ka vakabauti au. E vinakata meu papitaisotaki koya, keirau sa mani wawa kina ena dua na vula me yacova mai na Sigatabu, niu sa qai yabaki 16. Au logavinaka niu vukea e dua na tamata vinaka vakai koya me papitaiso, kau marau niu papitaisotaki koya.”

O Daniel e dua ga vei ira na vuqa na cauravou e vuravura raraba era bulataka tiko na kaukauwa sa nuitaki ira kina na Kalou. E dua tale o Luis Fernando, mai Honduras, a raica ni sa lakova tiko na nona itokani e dua na sala rerevaki ka wasea vua na nona ivakadinadina, a mani vakabula (raica na “E Dua na Veisau ni Yalo,” lds.org/youth/video). Olavo, mai Brazil, ka dua tale na ivakaraitaki. E dua na italatala dina ena nona vuvale (raica na V&V 84:111), a vakauqeti tinana o Olavo me lesu tale ki Lotu (raica na “Reunited by Faith,” lds.org/youth/video). E rawa ni o kunea eso na italanoa oqo kei na vuqa tale e tautauvata kaya ena mataveilawa ni itabagone ena Lotu, youth.lds.org. Wawa mada, na initaneti, na ivakarau ni veimaliwai, kei na tekinoloji tale eso era iyaya sa solia ki ligamuni na Turaga me vukei kemuni ena nomuni cakacakataka na nomuni itavi ni matabete ka vakatetea na revurevu ni dina kei na ivalavala savasava.

Kemuni na cauravou lomani, ni o ni vakayagataka na Matabete i Eroni ena ivakarau au sa vakamacalataka, o ni sa vakarautaki kemuni tiko ki na itavi ena veisiga ni mataka. Ia e levu cake tale na ka o ni sa cakava tiko. Me vakataki Joni na Dauveipapitaisotaki, na Matabete i Eroni ivakaraitaki vinaka oya, o sa vakarautaka tale tikoga na nona sala na Turaga ka vakadodonutaka tiko na Nona salatu. Ni o kacivaka ena yalodoudou na kosipeli ni veivutuni kei na papitaiso, me vakataki Joni, o sa vakarautaki ira tiko na tamata ki na nona lako mai na Turaga (raica na Maciu 3:3; V&V 65:1–3; 84:26–28). Sa dau tukuni wasoma vei kemuni na vanua cecere o ni rawa ni yacova. Oqo na gauna me da cakacakataka kina na veika e tu vei keda oqori, me vakayagataki na kaukauwa sa solia vei iko na Kalou mo vakalougatataki ira kina na tani, kauti ira tani mai na butobuto ki na rarama, ka vakarautaka na sala ni Turaga.

Sa solia vei iko na Lotu na ivolalailai ni iTavi Vua na Kalou e dua na ivurevure me vukei iko mo vulica ka qarava na nomu itavi. Dau vulica wasoma. Tekiduru, vakayawa mai na veika vakatekinoloji, ka vakasaqara na veituberi ni Turaga. Oti qai tucake ka vakayagataka na kaukauwa ni Kalou. Au yalataka ni o na rawata na kena isau mai vei Tamada Vakalomalagi ena ivakarau mo bula kina kei na ivakarau mo vukei ira kina na tani.

Au cavuta na vosa nei Peresitedi Thomas S. Monson: “Kakua ni beca na veivakauqeti kaukauwa ni nomuni ivakadinadina. … Sa tiko vei kemuni na rai mo ni kilai ira rawa kina o ira era tu vakaloloma. Ni sa tiko na matamuni mo ni rai kina, na daliga mo ni vakarorogo kina, kei na yalo mo ni vakila kina, sa qai rawa mo ni dodoliga yani ka vueti ira era itaba vata kei kemuni” (“Mo iVakaraitaki,” Liaona, Me 2005, 115).

Au vakadinadinataka vei kemuni ni ka dina na kaukauwa ni matabete. Au a rawata na noqu ivakadinadina ena noqu vakayagataka na matabete. Au sa raica oti na veitaravi ni cakamana mai vei ira e tu vei ira na kaukauwa ni Matabete i Eroni. Au sa vakadinadinataka na kaukauwa ni cakacaka ni agilosi ni ra vosataka na Matabete i Eroni yalodina na vosa ni vakanuinui e vakasinaiti ena Yalotabu, ka dolava na yalona e dua e gadreva tu na rarama kei na loloma. Ena yaca i Jisu Karisito, na noda Turaga, noda iliuliu, ka noda iVakabula, emeni.