Aaronic Priesthood: Bekiis e Mousbech er a Klisichel a Dios

Ng diak el meketeket e ak mla er a South Africa el loldingel er a blai el mla er ngii Thabiso, ngkel mle kot el assistant er a chelechad er a priest er a Kagiso Ward. Thabiso me a bisop, el ngii a omecheliu e olab a kiis er a tia el chelechad, a millemolem el meluuluch el mo er a rechedal tia el chelechad el dimlak el sal mesisiich, el osiik a uldasu el kirel a re bo loldingel er tir me a lechub e te olngeseu er tir. Te mlo melchesuar el mo oldingel er a blil a Tebello, e mle soitai er ngak el mo obengterir.

Se er a ki mengelakel er ngkal mengkar el bilis, e a ki miltik er kemam el nga era chelsel a delmerab el obengkel a Tebello, el chelelakel a rengul chad el mlo diak lomais el me er a ikelesia e leng mla er ngii a bebil er a elsengul sel Sandei. Ng mle ko er a merur ng di ng mle ungil a rengul el mengemedaol er kemam e dirrek el uleker er a telungalek er ngii el mo obengkel. A bisob a ulechotii a beltkil a rengul el mo er a rechad er a blil me sel rengul el soal lomak er ngii me a telungalek el mo cherechar er a templo. Tirka a kmal mlo ungil a rengrir, ng dirrek el sebeched el omelchesiu er a mesisiich el sioning er a Chedaol el Reng a bek el tekoi me a bek el omeruul.

Ng di ng tekingel a Thabiso a rirelii a klou er tia el odingel. Ng mla er ngii er a bedengek a kmo ngkal ngeasek a milngedecheduch a tekingir a re anghel—ungil tekoi el kid el rokui a sebeched el mtab e ng di ng kmal rirtechii a sechelil. “A kmal mle chellaod el mengedecheduch er a bek el taem er a ikelesia,” ng millekoi. “Kau a blechoel el melekoi a ungil tekoi el me er ngak. E kau kemedengei, a tim er kid er a soccer a mla mo diak er chelecha el diak ki mo bekau. Kau a kmal meduch er ngii.”

“Mousubes,” A Tebello ulenger. “Ak mo lemuut el mo obengkemiu e rebuik.”

“Ng kmal mo ungil,” ng millekoi a Thabiso. “E kau ke lotkid er se er a dongetmokel er kid el mesiou a leko kede misionari? Ng sebeched el lomuchel el lmuut el meruul er ngii?”

“Oi,” ng millekoi a Tebello. “Ng soak el lmuut el mei.”

E sel kot el klou el deuil a renguk a se er a ak counselor er a omerredel er a Young Men e kumes er a robang a Aaronic Priesthood el meliuekl er a beluulechad el ousbech er a klisichel a Aaronic Priesthood. E ng di bebil er a taem e ak mo sioning, el mekngit a renguk, le te betok el ngeasek el sechal a diak lodengelii sel klou el klisiich el obang el sebecherir el meruul a ungil.

A priesthood a klisiich me a ngerachel el mla er Ngii el Dios el meruul a omesiou el mo er a Rengelekel. E a, omko rokui el ngeasek el sechal, rokui lobang a Aaronic Priesthood, a mo sebecherir el mui el mtebngar el kmo a priesthood lobang a urekodel er a kiis er a odngelir a re anghel. Omko te mo mtebengii el kmo ngar ngii a chedaol ngerachel el obang el olngeseu er a resechelirir el metik er a rael el mo er a Osobel. Omko te medengei el kmo a Chedam er a Babeluades a mo mesterir a kliisich el loba el mesaod a klemerang el kirel a mla mo luut el evangkelio me a bleketakel e klemerang me a rebebil er a rechad a mo melechesuar a klamerang el kirel a tekingel a Kristo.

Kemiu el ngeasek el buik er a Ikelesia, me kuker er tial ker e ng di ng kiriu el nguu el loia er a rengmiu el mo er a ulebongel er a klengar kemiu. Ngera sel klou el klisiich el sebechem el nguu er tial beluulechad malechub e ng dereder er a Dios? Ngera el klisiich el omko ng sebechel ngarbab a berredel sebeched el loba el olngeseu er a Chedam er a Babeluades el lomult a klengar er a rechad, e omekrael tir el mo er a diak a ulebengelel deureng lokiu omengikiid er a rebet me a chelebirukel?

Ng di uaia bebil er a klisiich, a priesthood a kirel loureor alsekum e ng meruul a ngii dil ungil. A Rubak a mla kmu er kemiu el mekiis e mo okesiu (D&C 115:5) lak momart er a llomes er a ilkolek. Ng di tirke el diak le medakt a belsachel er a delongelir a remilngilt. Sel mousbech er a chedaol klisichel a priesthood, e a dechal a rengum me a kllou er reng er kau a meleketek. Ngeasek el sechal, ko medengei el kmo kemiu a ngar sel tkul rebab el sebechiu el ngara omesiou er a Dios. Ko medengei el kmo sel kot lungil a rengmiu e kemiu a semeriar el meruul er sel ungil uroer. Molisiich er a klisiichel a priesthood lokiu a klikiid me a llemalt.

Ak di mo lmuut el smisichii okedong el Elder Jeffrey R. Holland a dillii er a bekord el elolem el buil er a memong. “Ngak a osiik,” ng dilung, “er a rsechal el mekekerei me a remeklou el tir a omekerreu er tial mekemad er a delongelel a ungil me a mekngit el mei lluches a ngklir el dung a ngar er a uldesuir. Kid a ngar er a mekemad.” Ng millemolem “ak mengerechir a mesisiich e dirrek el mui er a klemerang el ngor, ng ngor el diak el di lomtok er a mekngit …  ng dirrek el ngor el mo er a ungil, ngor el mo er a ebangkelio, ngor el mo er a Dios” (“We Are All Enlisted,” Liahona and Ensign, Nov. 2011, 44, 47).

Oi, kemiu loba Aaronic Priesthood, kid a ngar er a mekemad. E a chelsel tial mekemad, e sel kot lungil teletael el doba el mesebechakl er kid er a mekngit a mouedikel el loldubech a llemalt. Ng diak el sebechem lorrenges a deleboes e moumechad er kau. Ng diak el sebechem el lomes, a mekngit el siasing, e moumuiko er kau. Ng diak el sebechem el merutech a diak el klikiid el tekoi e mdu el kmo ng diak le klou el tekoi. Ng diak el sebechem el di chelellakl e a Satan losiik el melemall a ikel lungil e bliochel el tekoi. Ng kirem, el mo dechor e merikl el mesebechakl a ikel modengei el kmo ng klemerang! Sel mrengesii me a lechub e ke mesang a ngidil tekoi el melemall a llechul a Rubak, molatk el kmo kau ke techang—ta er a soldau er Ngii el Dios, loba klisichel chedaol preisthood er Ngii. Ng diak a ngodech lungil koad lomtok er a cheraro, el ngkel demal a blulak, el uaia klemerang sel klemerang el tuobed er a ngerem sel mousbech er tial klisichel a priesthood. Oumesingd er a rbesechem a mo kullau er sel dechal me a lemetel a rengum. A rebebil a mo diak. E ng di ng diak a belkul. Omengull me a klaumerang er a Chedam er a Babeluades el kirem a ngosechekl le kau el ulusbech er a klisichel el kudmokl a Urungelel.

A kumekedong er a rokui el ngara chelechad er a omerreder er a Aaronic Priesthood el lmuut el lodersii a dai er a iilmokl e moked e momekrael er a rbataliong er kemiu. Mousbech er a klisichel a priesthood el mengemedaol er tirkel meliuekl er kau me le mei er a Kristo lokiu ouchel reng me a techolb. Ke mla nguu a kengei me a klisiich er a Chedam er a Babeluades el meruul er ngii.

Eru el rak er a memong, er a kuldingel er a Santiago, Chile, e ak kmal ulebal a renguk er a Daniel Olate, ngeasek el buik el blechoel lobengterir a remissionari. Ak kulker er ngii me loluches el me er ngak, e ngokiu a kengei er ngii e ak mo choiuii a tebedechel a e-mail er ngii: “Ak dirk mlo teruich me a elolem, e a Sandei e ak mlokedong el mo er a obis er a priest. Sel losisiu el sils e ak millecholb er a sechelik; a ngklel a Carolina. Ak ulsischeklii er a ebangkelio, e ngii a mle blechoel me er a Ikelesia e dirrek el ngiluu a Personal Progress award, e ng di a rechad er a blil a dimlak le kengei er ngii el mo metecholb el di merekmo bo lodengelekak e loumerang er ngak. Ng mle soal a bo kulecholb er ngii, me ng mle kiram el mengiil el ta el buil sel bol Sandei, el ngak a mo teruich me a elolem. Ng kmal dmeu a renguk el mlo sebechek el ngoseuir a ta er a ungil chad el me metecholb, e dirrek el melchesuar el kmo ngak ngikel millecholb er ngii.”

A Daniel a kuk di ta er a ngeasek el buik el meliuekl er a beluulechad el oltirakl er a klisichel a Dois el blal nguu el mesterir. Chimong a Luis Fernando, er a Honduras, el mlo metik el kmo sechelil a merael er a kengaol el rael me ng mlo ochotii a klaumerang er ngii lobengkel, luchul e ng ngulsebelii a klengar er a sechelil (mesa “A Change of Heart,” lds.org/youth/video). A Olavo, er a Brazil, a ta er a okesiu. Ng melemalt el chad er a blil (mesa D&C 84:111), Olavo a milngususeu er a delal me luut el blechoel mo er a Ikelesia (mesa “Reunited by Faith,” lds.org/youth/video). Ng sebechem el metik a bebil er a ika el cheldecheduch me a bebil di uai ngii er a website er a rengeasek er a Ikelesiayouth.lds.org. Me a le uaisei, a Internet, social media, me a bebil er a beches el tekoi a dongu el Rubak a mla locha er a chimad el lolengeseu er kid el lousbech a ngercheled er a priesthood e dirrek lomerk a klemerang me a kldung.

Kemiu el ngeasek el buik, sel okesiu er a Aaronic Priesthood el ngara ungil lomerelel el blak sodii, e kemiu a mengetmokel er kemiu el kirel a ngerachel el ngara medemiu el taem. E ng di kau a lemuut el meruul a kmall betok er a illechang. Ng diua Johanes el Techoleb, ngii a okesiul a Aaronic Priesthood lobang, kau a dirrek el mengetmokel e meruul er a Rolel meng mo melemalet. Sel mouchais er a evangelio er a ouchel er a kengtid me a techolebechelid, el uaia Johanes, e kau a mengetmokel er a rechad el kirel ongeru el mei a Rubak (mesa Mateus 3:3; D&C 65:1–3; 84:26–28 ). Kau a blechoel melekoi el kirel klou el moktek er kau. Ng uaisei, e elecha el taem e ke mla loiang a teletael el mo oureor, me sel mousbech er a decham e a Dios a meskau me koba el lomekngeltengat ra rebebil ra rechad, moltobed er tir ra delngerenger e mo soiseb er a llomes, e mengedmokl er a rolel a Rubak.

A Ikelesia a mla meskemiu a babier er a Ngerachel el mo er a Dios el mousebech er ngii el longeseu er kau el mesuub a rokui el ngerchelem. Bo blechoel mesuub er ngii. Bo moutubareuach, el cheroid er a technology, e molengit a ngeseu er a Rubak. E bekiis e mousbech er a klisichel a Rubak. Ak yaksok er kau me ke monguu a nger ra Chedam er a Babeluades el kmo ng mekera mo mecheliu ra klengar er kau e dirrek el ngosuterir a rebebil.

A kmu tekingel a President Thomas S. Monson: “Lak el metetoech osengem er a meklou a ututelel el teletael el kirel a klaumerang er kau… . Kau a klou a omesang er a ikel diak el meues. Sel omesang er a medam, dingam el rongesii, me a rengum el melchesuar, e ng sebechem el olngeseu e dirrek el ngosuterir a rebebil” (“Be Thou an Example,” Liahona me a Ensign, May 2005, 115).

Ak kuuchais er kemiu el kmo a klisichel a Priesthood a klemerang. Ak mla ng mai a klaumerang er ngak meng kirel oureor er ngak. Ak mla mes a betok el ongasireng el bek longasireng a mokdubech er tirke loba klisiisch er a Prieshood. Ak mla mes a sioning er a klisichel a osisechakel er a reanghel e dirreke el klou a klaumerang er tir e orreked e mengedecheduch e a Chedaol Reng a mekeek a tekoi el loureng, e mekengii a rengul a ta er a rechad el ousbech er a llomes me a beltik el reng. El loba ngklel a Jesus Kristo, el Rubak er kid, e mengetekled, e Osobeled, amen.